♤حنين♤

♤حنين♤ (2)

رواية .. ♤ حنين ♤

بقلم .. كيمو 🍟

♤2♤

🖊في الحلقة الفاتت عرفنا حنين و هي بطلة روايتنا طبعا ..و عرفنا احمد جيرانهم طوالي ..طبعا كمان عرفنا انه احمد عنده مشاعر ناحية حنين و كان قريب منها دايما و بحب يشوفها فرحانه و بجيب ليها اي شي بتحبو زي الشوكلاتة يعني ..و كمان اخر حاجه عرفنا انه ابو احمد جاهو شغل برة السودان و ح يسافرو معاهو ..المهم اخر شي حنين دخلت غرفتها عشان تنوم و احمد كان عايز يقول ليها كلام بس م عارف كيف و م بقدر طبعا يدخل ليها في غرفتها .. احمد فجاءة اتزكر انه عنده كتاب حق حنين معاهو ..قام رجع البيت سريع و طلع ليهو ورقه و كتب فيها كلام و دخلها في نص الكتاب ..و رجع سريع و قال لي جمال ..

احمد { الكتاب دا حق حنين كان معاي ..

جمال { اهااا طيب ي احمد ح اديهو ليها ..

احمد { طيب ي عمو

*🖊المهم بعد العشاء و الونسة و كدة عائلة حنين ودعو عائلة احمد و قالو ليهم تصلو بالسلامة ..و جمال شال الكتاب و دخل الغرفة على حنين لقاها نايمة المهم ختا الكتاب مع كتب حنين و طلع ..*🖊

🖊حنين صحت الصباح من النوم و جهزت للمدرسه و هي طالعه للترحيل ابوها قال ليها في كتاب حقك كان عند احمد جبتو ليك لقيتي ..؟🖊

حنين { م لاحظتا ليهو ..دا كتاب القصص؟

جمال {اي المهم ختيتو ليك مع الكتب

حنين { اها طيب ...

🖊حنين طبعا كانت زعلانه عشان احمد سافر و م ودعتو حلو و كان نفسها تقول ليهو كلام بس م قدرت .. و الورقه الكتبها احمد و الفي نص الكتاب لحدي اسي م شافتها لانها م شافت الكتاب اصلا ..ولانه جمال قال ليها جبتا ليك الكتاب و م قال ليها احمد هو الجاب الكتاب ..كانت امكن تنتبه و تفتح الكتاب🖊

*🖊قصتنا ح تتقدم 4 سنه لقدام و ح نوصل للوقت الحالي ..(حنين امتحنت سنه تالته و كانت ممتحنه علمي احياء و اشتغلت كويس شديد في الامتحانات و كانت واثقه انها ح تجيب درجه حلوة شديد ..)*

*🖊لازم افهمكم شوية حاجات قبل م نخش في القصة ..على فكرة لحدي اسي دي كلها بداية و مقدمة ..المهم حنين في الثانوي قرت في مدرسة خاصه و اتعرفت على بنات كتير و كتير من البنات كانو صحباتها ..بس في اتنين كانو صحباتها شديد ..الاولى اسمها (ريان) بت ظريفه و كيوت و صحتها سمحه و بتحب حنين شديد و من اول البنات العرفتهم حنين ..و حنين بتعتبرها اختها و اكتر من اخت ..صحبتها الثانيه اسمها ( كوثر) بس بنادوها بي كوكي .. و هي البت العاقله فيهم يعني دايما بتنصحهم و بتقول ليهم كلام يوعيهم لما يغلطو و حنين دايما بتثق فيها و بتجي تحكي ليها مشاكلها و تحلها ليها ..يلا كوثر محترمه شديد م زي حنين و ريان صايعين و جنهم مشاغلات اولاد و عوارة و هظار في اي شي دايما ..حنين و ريان و كوكي امتحنو علمي احياء مع بعض ..🖊*

*صحي زي م انتو عارفين حنين حلوة شديد و هي احلى من ريان و كوكي ..و بعديها ريان احلى من كوكي و كوكي م شينه طبعا بالعكس حلوة كمان لكن بس حنين و ريان احلى منها ..حنين حلوة شديد بس لبسها محترم و عادي يعني نص نص م بتلبس ضيق و م بتلبس واسع اما ريان الضيق البلجد جد ..بتلبس ضيق و شعرها دايما بتحب تخليهو فاكي و صورها في الانستا م كعبه لكن بتخلي اي ولد يدخل ليها و يشاغلوها و كدة ..اما كوكي طبعا غير العبايات م بتحب تلبس و شعرها دا ولا سبيبه م بتكون ظاهرة ..ريان عايشه بس مع امها ..ابوها متوفي.. و م عندها اخوان ..كوكي عايشه مع امها و ابوها و عندها اختها اصغر منها بي 4 سنه اسمها (ملاذ) و هم جلابة يعني لانه امها دكتورة و ابوها رجل اعمال كبير و مشهور .. ..ريان و حنين و كوكي ساكنين قريب من بعض شديد يعني مسافه قصيرة بين اي بيت وحدة فيهم*

🖊نرجع لي حنين ..بس ح نتكلم عن امها و ابوها ..اول شي نتكلم عن ابوها جمال ..نزل المعاش من الشغل و عمره كبر شويه و بقى قاعد في البيت .. سماح ام حنين شغاله استاذة في مدرسه خاصه و هي البتصرف على البيت من م جمال نزل المعاش ..باختصار كدة عائلة حنين عائلة متوسطة و محدودة الدخل و عايشين و مبسوطين ..اما محمد اخو حنين في اخر سنة في الجامعة و مركز على قرايتو و زهجان من السودان عايز يتخارج يشتغل برة بس اول م ينتهى من الجامعه 🖊

🖊بكرة يوم النتائج بتاعت الشهادة .. و حنين و ريان و كوكي اتفقو الليله يتلاقو في بيت حنين و يتونسو و يرفعو معنويات بعض..فعلا زي الساعه 12 ظهر ريان و كوكي كانو مع حنين ..على فكرة هم م ساكنين بعيد من بعض ..المهم قعدو مع بعض في غرفة حنين و بدو يتونسو ..🖊

ريان { طبعااا عندي ليكمممم خببببر حلوووووووو

حنين { اهاا قولييي فرحينا

كوكي{ اها ان شا الله خبر نافع

ريان { ههههه غايتو انتي ح تشاكليني ي كوكي ..

حنين { اها اها قولي خليك من كوكي

ريان { اتعرفتا على ولد من الامارات احم احم

كوكي { غاييتتوو استغفرالله بس

ريان { هههههه م قلتا ليك

حنين { انتي ي ريان هبله ..يعني شنو اها وين الخبر الحلو

ريان { اي عايزة اوريكم ..المهم الولد شاف صوري في الانستقرام و قال لي عجبتيني و انا جاي السودان قريب و عايز اخطبك و كلام زي دا

كوكي{ وانتي طبعا م صدقتي

ريان { لا ..صدقت والله

حنين { و لي صدقتي يعني امكن كذاب

ريان { لا م كذاب والله واضح جادي ..

حنين { كدي ورينا صورو ..

ريان { طيب ثواني افتح الانستا

♡♡