بنيات الفريق

part3

#بنيات_الفريق3

  عبير نزلت من العربيه و قفلت الباب بقوة ، ادت طارق عين حمرا قبل تعدل ملابسه وتعدل وقفته وتمشي ... يدوب دخلت البوابه لاقاها اسمراني ، ممتلىء الجسد ، حالق شعرو نيمار ،، بنطلون اسود فميلا زرقاء ، شنطه ضهر سودا  .. بحركه سريعه وقف قدامها و بظرافه
احمد :  دا منو الكنتي راكبه معاهو دا ؟!

عبير بنهره هزت احمد : وانت مال اهلك   ؟!

احمد بتمتمه : ااا ااسف اذا ضايقكك سؤالي..  سألته بحكم الصداقه البينا ما اكتر ما اتوقعته سؤالي يزعجك  💔

عبير بعصبيه وهي رافعه اصبعه : اياك تتجاوز حدودك معاي و ما تسأل في اللي ما يخصك ..

احمد بتوتر  : تمام تمام ..اهدي ..انا اسف زلة لسان سامحيني .. كنت جايب ليك مخلصات بالpoints المهمه للأمتحان الجاي ... فتح شنطتو طلع منها دفتر مرتب بطريقة حريصه شديد و مد ليها : ح تلاقي هنا اختصار لكل المقرر  ،، اتفضلي .

عاينت للدفتر ورجعت نظره لاحمد ، صلحت وقفته ونزلت اصبعه شالت نفس عميق وطلعتو

بمسكنه : اوووف اليوم دا كان صعب علي شديد ، ما تأخذني يا حمو ♡

احمد بإبتسامه محت توترو : لا عادي ولا يهمك اصلآ امتحان اليله دا براهو بقلب كيانك ..ربنا يعينك ♡

عبير بدلع و هي بتمسك الدفتر : ميرسي ..ميرسي جدآ يا احمد ما عارفه اشكرك كيف بجد !!

احمد : لا ابدآ ما بينا شكر ، كفايه علي انك تقضي يوم سعيد من غير ما يزعجك شيء ♡

عبير و هي بتعاين في عيون احمد : شكلو باقي اليوم ح يكون حلو شديد ♡
احمد ابتسم ابتسامه عريضه ونزل راسو قبل يستأذن و يمشي منها ..  بعد مشى عبير عاينت ليهو بسخريه وهو بتخبط في مشيتو .. اتلفت اتجاها رفعت ليهو يدها بإبتسامة مصطنعه لوحت بيدها .. طلعت انفاسه قبل تلمح الشله و هي جايه اتجاها ...

احمد :  سنيرنا و ُبرُّف دفعتو و من اول يوم شاف فيهو عبير اعجب بيها شديد و بقى في كل لاب ما حضرتو عبير او ليكشر او زي ما شايفين امتحان بلم ليها الملخصات البسهر عليهم  و يتعب و يخصم من زمنو عشان هي تنجح  .. عبير ما مهتمه بدراستها خالص  وكانت بتشيل ملاحق  بس من لما صاحبت احمد بقت بتنجح وبتمر سمستر ورا سمستر وكل الفضل في نجاحه دا يرجع لأحمد .. اللي مهتم بأدق تفاصيله وعلى طول في حالة سؤال عنها بحبها حب عذري شديد ... هي عارفه مشاعر احمد اتجاه بس ما بتديهو فرصه يعبر عنها عشان ما تخسرو او تخش معاهو في علاقه  هي عارفه ما بتدوم فيها ..  و عشان تضمن انو حبو دا يستمر   كل فتره و التانيه بتديهو جرعه عشم لو كانت كلمه او تصرف او تلميح... مستغلاهو ابشع استغلال وهو المسكين ما عارف عبير دي شنو رغم انو كذا مرة اصاحبو حذرو منها وفهموا بس مع الأسف البحب اعمى 💔