بنيات الفريق

part23

#بنيات_الفريق23

مجدي : الو ناردين وين انتي لهسي يا بتي ؟  انا مستنيك لي ساعه في المطعم ..!!

منار : انا منار يا عمو مجدي  ..

مجدي : منورة ازيك .. اديني ناردين لو سمحتي ..

منار عاينت لجيلا الكانت ماسكه راسها الملفوف بشاش من الألم .. جيلا هزت ليها راسها : لازم يعرفوا

منار بتوتر : عمو مجدي ناردين بعيده مني اسي شويه و بتجي ..

مجدي : انتوا لسه في الجامعه ؟ ...  الو .. الو .. يا منار

جيلا خطفت منها التلفون : اي معاك الشبكه ما مساعداني ، ناردين تعبت شويه جبنها المستشفى

مجدي بخوف : مسستشفى ؟ مستشفى شنو ؟ و كيفها اسي ؟؟

جيلا : اهدا و اطمن هي بخير ، نحنا في مستشفى "..." لو بتقدر تعال لينا .

مجدي : طيب طيب انا جاي حالآ ، خلوكم معاها لغايه اجي ما تخلوها براها .

جيلا : حاضر يا عمو  نحنا كلنا معاها انت اطمن هي كويسه .

جيلا فصلت التلفون و رجعت مسكت راسها ، منار أنت بألم نزلت نظره على يدها المكسوره تتحس فيها كان في شويه خدوش في وشها ..

جيلا ادتا التلفون : دا ابوها متخيله لمن ترجع ليهو البيت بهيئته دي حا يحصل ليهو شنو دا لو صحت اساسا؟

منار : براي ما توتره ما ناقاصاك

شهلا كانت مصابه بكدمات خفيفه و رابطين ليها شاش حاولين معصم يدها الايسر و في بطن ذات اليد ..

شهلا : عبير وين ؟

جيلا بزهج : ساقتا الممرضه تخيط ليها جرح راسها

شهلا : كلو بسببها شوفي اتأذينا من ورا راسها و هي ما جاتها غير ضربه صغيره في راسه ..!

منار : دا ما وقتو ،  حا نقول شنو لابو ناردين بعد يجي ؟ و حا نقول شنو لاهلنا ؟

جيلا : حا نقول ليهم الحقيقه حا نقول شنو غير كدا ..؟

منار : اذا زول عرف الحقيقه حا تحصل مشكله  ! .. انا خايفه .. الشرطه بتحقق في الموضوع حا نقول شنو ؟

جيلا بنفرزه : اوووف منك يا منار خلاص اسكتي ، دا ما وقتو الفينا مكفينا خلي ناردين تصحى اول شيء بعداك نتفاهم ..

منار  : انا خايفه عليها ، خايفه يحصل ليها شيء ..

شهلا مشت على منار : البت كويسه و حا تقوم بالسلامه ما تفاولي عليها ..

منار ببكاء : انا بجد خايفه

شهلا و جيلا عاينوا لبعض بضيق واي واحده وجهه نظره لجهه مختلفه .. شويه جا اتصال في تلفون ناردين من مجدي : اي منار انتوا وين انا ما شايفكم ؟