بنيات الفريق

part11

#بنيات_الفريق11

  سبأ : ابراهيم خلينا نتفاهم ...

ابراهيم : ما داير معاك اي تفااااهم و الدبله تصلني و لا اقول ليك خليها معاك ما دايره اشبعي بيها ...

سبأ بقت تبكي بهستريا جرينا عليها كلنا و الحيرة ماليه وجوهنا

ابتهال : في شنو يا سبأ مالك بتبكي ؟ .. سبأ كملت بكاء من غير ما ترد ليها ..

= سبأ في زول مات ؟  مالك بتبكي ؟؟

جيلا : هي كانت بتتكلم بالتلفون الا لو في زول مات حبوبتك ماتت يا سبأ ؟؟

ياسر : خلوها تبكي ما تتكلمو معاها او تضغطوا عليها ح اجيب مويه و اجي ما بتأخر .

تاليا : ياسر ..

ياسر وهو مستعجل : بعدين ، بعدين يا تاليا ...

ياسر مشى جاب مويه و جا و سبأ لسه مستمره في البكى و ما نطقت بحرف .. مرت حكايه عشرة دقايق سبأ بتبكي باستمرار من غير ما تسكت او تتكلم ، فينا البكت معاها من غير ما تفهم الحاصل و فينا الفضلت مقوياها وبتحاول تحنسه وتهديها .. هدت شويه و قالت لينا : مافي شي يا جماعه امشوا ..

= كيف يعني مافي حاجه بتبكي ساااي ؟؟

سبأ : اي ببكي سااي

جيلا بعصبيه : زحو لي منها بت الكب دي ، بتبكي ساي دي تقوليها لناس ببتكم وخطيبك ما لينا نحنا وهسا ومن غير كلام كتير تقولي لينا في شنو ؟

ياسر : جيلا براحه عليها ما كدا ..!

جيلا : معليش يا ياسر بس البت دي ليها اسبوعين بتكرفس في وشها وتصرصر في و كل ما اساله تقول مافي شي و  ما في حاجه ..!! قولت ما اضغط عليها و اخليها براحتها بس الظاهر الا اجيب راسها غصب

نزلتا براسي وقعدتا تحت رجليها : سبأ حبيبتي في شنو ؟ احكي لينا مالك نحنا اخواتك !

منار : يا سبأ تطمينا عليك ، الله يخليك ما ممكن تخُضينا عليك كدا وتجي تقولي مافي شي !!

ابتهال : في شنو يا سبأ ح تخبي علي انا ؟؟

سبأ بعبره مخنوقه : سابني يا ابتهال سابني يا جماعه وفسخ الخطوبه .. ورجعت تبكي تاني  .. بقينا نعاين لبعض مصدومين في البنسمعوا ..! ابراهيم ساب سبا بعد الحب دا  كلو ؟

ياسر رجع بخطواتو للخلف  : طيب استأذن انا يا جماعه . ياسر مشى و تاليا لحقتو ، نحنا فضلنا مع سبأ بنحاول نفهم منها الحاصل !

جيلا : سبأ كيف يعني سابك ؟؟

سبأ : يعني سابني يعني خلاص انتهينا

= سابك ليه حصل شنو ؟ كدي احكي خلينا نفهم ..

سبأ بصوت مبحوح : ليهو كذا يوم مراقبني بمشي وبجي من وين ، فجأه قال لي ما تمشي مع صحباتك وما عايز اشوفكك معاهم تاني سالتو ليه ؟ قال لي هو كدا بس .. يوم لمة الجبنه في بيت منار حاولتا احنسو قدرتي بس رفض ، مشيت من غير ما اكلمو ووصيت ناس بيتنا ما يجيبوا ليهو سيرة فجأه اتصل لي وشاكلني عرف من وين ؟؟ انا ما عارفه وسالته امي حلفت قالت ما كلمتو ..! اول امس خالتي عندهم خطوبه اتصلت ليهو استاذن منو رفض قال لي ما تمشي وعندهم اولاد وشنو شنو قولت ليهو ديل اولاد خالتي وتعاملي معاهم في حدود بس قال لي لا ما تمشي ما مشيت و سمعتا الكلام قعدتا تخيلي اتصل لي قال لي تطلعي اشوفك بعيني انك قاعده انا جنب البيت ..! " بكت " امي زعلت مني وخالتي زعلت وبتها زعلت وقاطعوني تمام حتى ما قدرتا ابرر ليهم موقفي  ؟! و عشان ارضي لامي وخالتي  مشيت زورتهم وباركته ليها في البيت و اعتذرتا منهم ، وانا في البيت اتصل لي وقومها فيني قيامه كييييف تمشي انا مش قولت ليك ما تمشي ؟؟ قولت ليهو غلطانه اعفي لي بس دي خالتي ! ما اتفهم كورك وجاااط وقوم الدنيا وما قعدها .. وبين كل فتره والتانيه مره يرجع طبيعي مره جنو يقوم عليهو يجووط فيني عشان حاجات تافهه .. اليله قال لي انا شايفك قاعده مع اولاد وانتي وانتي وانتي .. وفصلها مني قال لي الدبله زاتها خليها عندك .. عليك الله يا جماعه انا حصل قعدتا مع اولاد ؟؟ انا بتاعت اولاد ؟؟ ... كملت بكى بحرقه 💔💔