بنيات الفريق

part16

#بنيات_الفريق16
  
= تقصد شنو بكلامك دا ؟

ختى يدينو في جيبو و مشى قعد في الكرسي و خلف رجلو : تحبي العرس يكون  في ياتو صاله ؟

قولت ليهو بكل برود : بتعرف حاوية النفايات ؟  طلعت منو و جسمي بنتضف غضب طول الطريق منار بتسألني من الحصل جوة و انا ما شغاله بيها ، ملامحي خلتها تسكت نزلت مني في بيتهم ،، الغضب كان عاميني و ماشايفه قدامي  مشيت مكتب مجدي .. انا كل ما اطلع ليهو بعذر يحببني فيهو يظهر لي بدلو الف سبب يكرهني فيهو اكتر ..!! 
 
دخلتا جوة متجاوزه السكرتيره البتنده علي قفلت الباب في وشها من جوه ،، مجدي رفع راسو مع قفلت الباب
مجدي جاء علي بحيرة : ناردين ..! خير يا بتي فيكي شيء ؟ تعبتي تاني نمشي الدكتور ؟

بعصبيه : توديني بقروشك الحرام مش ؟ بقروشك الجايبه من السرقه و الصفقات المشبهوه و حق الناس الماكلو  صاح ؟

مجدي بخلعه: دا شنو الكلام البتقولو في دا ؟؟

= يعني الكلام القالو فهد عنك غلط ؟ و انك متورط معاهو في كل القرف البعملو ؟ سكت ما رد لي ، رفعتا صوتي : ساكت ليه ما دافع عن نفسك قول لي الكلام دا غلط ، قول انو بكذب علي  ..

مجدي : ناردين بتي اهدي ، انتي عيانه . قرب مني زحيت يدو بقوة : انت مرضي يا مجدي انت دا ، ياخي انا بفتش ليك في اعذار تبرر ضربك و قسوتك و عمايلك فيني .. كل ما القي ليك عذر بلقى اضعافو يكرهني فيك .. كل ما اقرب منك بتبعدني بتصرفاتك كل ما اقول دا ابوي اكره انك ابوي زياده ..

مجدي بتوتر : خلينا نقعد شويه و نتكلم .
 
= ما عايزه معاك كلام ..  قول انك ما مأكلني و مشربني و ملبسني من حرام يا مجدي ! قول انو بكذب وبفتن بينا زي نجوان ، قول انك ما قاعد تسرق زيهم ، قول لي ابوكي ما حرامي ..

مجدي بعصبيه :  انا ما حرامي ولا ما كل حق حرام

= يعني فهد بكذب علي  ؟ سكت و ما رد لي ..
=  كيف ما حرامي وانت ما بتنفي البقولو ؟ انت بتسكت ليه ، انت عايزني اكرهك يعني ؟

طلع النظاره و ضغط على مدمع عيونو ، قعد في الكرسي  ساكت ، جن جنوني بسكوتو قولت ليهو بعصبيه : انا متمنيه لو كنت ما تخلقتا اساسآ و يريتني ميته ياريتني موته من زمان و ارتحتا .. يارب اموت وارتاح منك  .. مجدي مسكني من يدي بقوة وقفل لي خشمي وهو برجف من فوق لتحت .. عيونو اتملت دموع ما فتح خشمو بكلمه جسمو تلج و وقع في الارض ، ضربتو في خدودو عشان يصحى ،، رشيتو بمويه و جريت فتحت الباب كوركتا للموظفين البرا جات السكرتيره و معاها كذا واحد شالو معاي ما قدرتا اسوق ساق واحد من الموظفين  وصلناهو المستشفى الطوارىء على طول .. جسمي متلج و برجف من فوق لتحت ونفسي ضاق وشي احمر  اتحسسسته رقبي و يدي بترجف واحده من الممرضات لاحظت لي
الممرضه : يا اخت انتي كويسه ؟
هزيت ليها راسي " كويسه " .. مسكتا في الحيطه عشان ما اقع ولسه ماسكه حلقه و بحاول اتنفس .. الممرضه جرت جابت لي اوكسجين ركبتو لي .