بنيات الفريق

part9

#بنيات_الفريق9

سبأ بصوت باكي : اتخيلي يا ابتهال وصلت بيهو يمعني من صحباتي ! اسي انا اقول ليهم شنو يا ابتهال اقول ليهم شنو ..؟ خطيبي قال لي  اقطع علاقتي بيكم و ما اشوفكم تاني ؟ و كان قطعتاها امشي و اجي مع منو تاني ؟ البونسني و بِفَرق لي منو تاني ؟ ..  فوق ما انهم مصبرني على الجامعه و مستحملني في الشينه قبل السمحه اقطع علاقتي معاهم بمبرر سخيف زي دا ؟؟ 
اتنهدت : انا ما عارفه شنو الغيرو و منو البجيب ليهو الاخبار دي كلها عني و عايز يفتن بيناتنا لكن ما عافيه ليهو و حسبي الله ونعم الوكيل فيهو .. و اتفقعت بالبكاء ..

ابتهال : ما من حقو ابدآ يمنعك من صحباتك في النهايه انتي ما عامله شي غلط عشان يعصر عليك كدا ...!!

سبأ : اعمل شنو انا و اتصرف كيف يا ابتهال قولي لي ؟ كان قبيل شوفتا منهم شينه الموضوع ببقى لي ساهل لكن حتى جيلا العرفتها من جيت الحي دا قال لي اقطعي معاها ! انا محتاره محتاره و ما عارفه اعمل شنو ..!!

ابتهال : انا شايفه انك تتطنشي كلامو و تضربي براسو الحيط لو سمعتي منو ح يتمادى .. لازم يعرف حجمو اذا من هسا بضغط عليك كدا اها بعد العرس ح يعمل فيكي شنو ؟ انتي زاتك غلطانه فضلتي تسمعي في كلامو و تمشيهو

سبأ بيأس و خيبه : ح يسيبني و يبعد عني هو قالها لي بلسانو 💔

ابتهال : اليبعد كان بعد حواء والده الا هو ؟؟ ما تتساهلي معاهو يا سبأ اخير ليك ..

سبأ : اي الا هو يا ابتهال الا هو ، انا بحبو من صغيره و انتي عارفه غلاتو عندي قدر شنو .. ؟! ما بقدر اتخيل يوم بلاهو خلي يبعد عني عمر ! ما بقدر اخسروا قلبي ما بتطاوعني و لا فيني حيل للحاجه دي  💔

ابتهال : انا زاتي ما بعرف بتحبي فيهو شنو  ابراهيم دا..!! واحد عرباوي متخلف  و جاهل و مخو قديم  غير قروشو ما شايفه فيهو شي يتحب انتي بس عويره زيادة عن اللزم ومدياهو اكبر من حجمو .

سبأ : ابتهال من فضلك ما تقولي عنو كدا انا ما برضى ..

ابتهال : اوووف بطريقتك بس واحده قاريه جامعه و مستواها الفكري عالي و كتار جارين وراك  عايزه بواحد زيو شنو ؟

سبأ : عشان بحبو يا ابتهال بحبو ..و انتي بتقولي كدا عشان ما بتعرفي زيي و على فكرة هو قاري جامعه بس الظروف ما ساعدتو و خلاها عشان يساعد ابوهو و انا هو متفاهمين دا غير انو حنون وطيب و قلبو كبير .

ابتهال بغيظ : امممم لا واضح التفاهم دا ..

سبأ عاينت لابتهال بزعل : ابتهال ..!!

ابتهال مسكت تلفونها : خلاص سكتنا ..

________________

  جيت البيت لقيت سحر و اخوها قاعدين مع مجدي و نجوان في الهول خاتين عصاير و حلويات و التربيزه القدامهم فطست من كم الحاجات المختوتا فيها .. عاينت ليهم بطرف عيني واتخطيتهم ..