بنيات الفريق

part14

#بنيات_الفريق14

  = ابوي عارف ؟؟

غادة : ايوة ، نحنا اكتشفنا الحكايه لمن تغريد كانت متابعه مع الشيخ و قال ليها ان في سحر معمول و بعد حكت ليهو قصتها مع مجدي الشيخ اتأكد و قال ليها عاملين ليك سحر تفرقه ، نحنا كلمنا سكينه عمتك و هي المفروض تكون كلمة مجدي في الايام الفاتت دي بس المشكله ان نجوان كاتباهو و عاملاهو خاتم في اصبعه عشان كدا نحنا عايزنك تجيبي العمل الكاتباهو بيهو .

استغربتا في كلامها و قولت ليها : اجيبوا كيف يعني ؟

غادة عاينت لتغريد قبل تقول : شوفي يا ناردين انا بعرف واحده بتشوف و قالت ان  العمل مختوت في السرير حق ابوك فتشي فرشو بتلقيهو بعد تلقيهو جيبي عشان نديهو للشيخ يتخلص منو بمعرفتو .

= و البضمن شنو ان المرة دي كلامها صاح ؟

غادة : بعرفها من زمان لا اليلة لا امس و البتقولو كلو صاح ما تشككي فيها و اسمعي البقول ليك عليهو و امشي فتشي .

= طيب ح احاول القاهو

غادة : لا ما تحاولي ضروري تلقيهو ، و قومي امشي بيتكم و ابدي المهمه و اتاكدي ان نجوان مافي عشان ما تكشفك

= اول ما امشي البيت ح ابدا تفتيش

غادة : لا قومي امشي هسي

= غاااادة ...!!!

مسكتني من يدي :  قومي امشي بسرعه بلا غادة معاك .. ودعته امي من بعيد و غادة جراني من يدي و بتكورك فيها .. رجعتا البيت لقيت نجوان في وشي عاينتا ليها بطرف عيني ودخلتا ، طول ما انا قاعده كنت بفكر اخش غرفتها كيف ؟ دي بتقفله قبل تمشي الحربايه دي .. ! الافكار توديني و تجيبيني ما نومتا للصباح من كتر التفكير .. نزلتا اشم لي شويه هوا ما كان عندي دوام بدري ..  لمحته يزن كان بحاول ينزل من الكرسي و قرب يقع ما اشتغلتا بيهو و مشيت على الباب ، سمعتا وقع كبايه اتلفتا لقيتو حشر نفسو بين الكرسي و التربيزه ما قدر يطلع نفسو جيت اطلعو سبقني عليهو مجدي رفعوا و قال لي : دا مهما كان طفل مالك ما شايفاهو ؟

اتحركتا :  افتكر دي مسؤوليه امو ما مسؤوليتي

مجدي : دا اخوك يا ناردين !

= ويا ترى انتوا معتبرني اختو ؟ عشان بتذكر اخر مرة قربتا فيها من الولد دا شاكلتوني و اتهمتوني اني عايزه ليهو الاذيه ! فتحتا الباب و طلعتا قعدتا في الحديقه الخلفيه ، كان في صوت وسوسه عاينتا اتجاه الصوت لقيت جمانه " بت نجوان " بتتكلم بالتلفون ..

جمانه : انا عايزاها بأي تمن .. اي اي ، خلاص فهمتا اوووف . فصلت الخط بزهج ، ارتبكت لمن شافتني ما فتحتا خشمي معاها حولتا عيوني منها و كملتا باقي حوامتي .. كرفست لي وشها قبل تعاين لي بتكبر ، جمانه اصغر مني بسنه بت نجوان من راجله الاول ، يزن بس هو اللي من مجدي .. جاها اتصال تاني مشت مني بعيد ...
_____________________