بنيات الفريق

part13

#بنيات_الفريق13

  
جيلا : اهدي نحنا لسه ما متأكدين ، انا ماشه لسبأ اطمن عليها جايين معاي ؟

منار : طبعآ جايين معاك يلا نمشي . طلعنا و طول الطريق الافكار تلعب بي..جيلا ربتت على كتفي : نود ، حتى لو اتأكدنا كلو بتعالج

شلتا شنطتي : بس هو ليهو 10 سنين يعني مستفحل في جسدو

جيلا : كان ليهو الف سنه بتعالج ، هو صاح القديم بياخد وقت بس في النهايه بتعالج .

منار : لكن السحر ببطل بعد 40 يوم ما بدوم اكتر من كدا الا اذا اتجدد ، كان مرة سمعتا حبوبه بتتكلم عنو و قالت اي عمل بدوم 40 يوم بس معناها نجوان قاعد تجددو ليهو .

جيلا : جدي بفهم في الحاجات دي تعالي لينا في البيت .

= خلاص بغشى معاك بيتكم .

مشينا لسبأ حالتها كانت ما بتسر بال هادئه وما بتتكلم معانا كتير ، حاولنا نجذب انتباها بالمواضيع بس ما نفع ، استأذنا طلعنا من بيتهم بعد حسينا مافي تجاوب منها . مشينا منها و قلوبنا معاها اول مرة اشوف سبأ مكسوره كدا من عرفتها 💔

منار : رايكم شنو نسوقها بكره نطلع بيها يمكن تفك شويه ..!

جيلا : اي نغير ليها جو كتمت البيت بتزيدها زياده

  = نمشي البحر الجو حلو شديد الايام دي ؟

جيلا : فكرة زابطه وانا ح ابزل جهدي اني اطلعه برا البيت

منار : اوكي اتفقنا نكلم عبير عشان بتزعل لو عرفت اننا عملنا شي من وراها .

= ومن متين عبير مهتمه بامور الشله ؟

جيلا : و الله بتزعل متذكرين لمن مشينا البحر المرة الفاتت و ما كلمنها ؟ زعلت شديد كانت متحسسه

منار : مرة قالت لي انا بحس انكم ما بتحبوني و اني ما منكم

حسيت بالسوء لمن سمعتا كلام البنات عن عبير

= هي ما بتكون معانا و 24 ساعه حايمه بتقعد مع فرده اكتر مما بتقعد معانا ما ذنبنا انها ما بتشاركنا اهتمامتنا !

جيلا : اتفضلوا خشو ، فتحت الباب ودخلنا ..

قعدنا مع اهله شويه ،، جيلا اشرت لينا بيدها مشيينا معاها .. جدها كان  قاعد في السرير بسبح .

جيلا بصوت عالي :  ابوي صالح ، صحباتي ديل بسلمو عليك.. جدها صلح قعدتو ورفع راسو علينا ابتسم لينا ورحب بينا بطريقه حنينه شديد حتى سلامو كان بنفس الحنان كانو بناتو .. طلب مننا نقعد في السرير القدامو اصر ان مرتو  تجيب لينا مويه الا جيلا قالت ليها شربو في بيتنا .. قعدنا واي واحده بتاعين للتانيه . جيلا شرحت ليهو بصوت عالي ..

صالح : لكن يا بناتي انتن متأكدات من البتقولن فيهو دا ؟ ، عشان الكلام دا خطير وبدخلكم في معصيه لو غلط !