بنيات الفريق

part37

#بنيات_الفريق37

عاينتا ليهو بدهشه و حيرة !

كمل بنبره هادئه و حزينه : بحبك من لمن كنتي بتحبي و تشابي ، من لما كنتي بتقومي و بتقعي و ما قادره تشيلي كرعينك حتى ! بضحكك لضحكك بزعل لزعلك اي شي فيني مقرون بيك .. سعادتي ، و حزني ، و حياتي ، و مرضي و عافيتي حتى شمسي ما بتطلع اذا ما شوفتك يا ناردين ! كتمته كتير لكن ما قادر اكتم ، ما قادر اخبي .. روحي بتطلع بتطلع انا خلاص اقسم بالله اكتفيت .. محملاني لقب انا ما قادر عليهو انا ما ابوك ، مشاعري اتجاهك ما ابوه لكن بقيت ليك اب غصب عشان بتقوليها و انتي مبسوطه عشان انا عايزك تضحكي باي طريقه حتى لو على حساب مشاعري ! كلمة  "بابا " دي بتضبحني ، بتسحب روحي سحب  انا ما ابوك ناردين ما ابوك ..!! بس انتي بت قلبي الماشوفته غيره و لا حبيت غيره و لا حسيت بغيره انا بحبك ، مغروم  ، عشقان ، هيمان  فيك انا ..! حاولي افهميني ، استوعبيني انا حيلي كلو اتهد من الورا الحب دا ، ما عندي طاقه اتحمل بيها وجود واحد جنبك بموووت فهمتي بموت ، بتخنق .. بكره اي واحد انتي بتقربي منو اي واحد انتي بتبسمي لي .. ودا ما بيدي بركبني عفريت ، جن بنطط في وشي ما بشوف قدامي تاني .. ما تطلعي حناني اكتر مما هو طالع ما تقربي من واحد قدامي عشان ما اجن اكتر مما انا جاني .. كدا فهمتي ؟ فهمتي مش .. !؟ فك يدي و بزهج ساق العربيه حتى ما نطق بحرف زياده لغايه وصلنا .. اتلخبطته كلي ما قدرته حتى ارفع لساني و انزلو مكانو ؟ جدع لي مفتاح العربيه و مشى برجلينوا .. عاينتا لي يدي كانت محمره دقيت باب بيتنا جات امي فتحت لي خشيت من سكات جدعته المفتاح في التربيزه

امي : بسسم الله  مالك يا بت ؟

= تعبانه شويه عايزه انوم .

امي : جعانه اخت ليك اكل ؟

= لا ، عايزه انوم بس بعد اصحى باكل

امي : طيب ..

خشيت الغرفه جدعته حاجاتي و اتبطحته على بطني في السرير ، هو قال لي كدا فعلا و لا دا خيال مني عشان بحلم بيهو كتير ! اكيد بتخيل لي  انوم و اصحى يمكن اتحسن و افهم شيء .. دخلته راسي في المخده و غمضته عيوني عقلي يودي و يجيب ساعه عشان نومته و نومته غصب .. فتحته عيوني مسكته التلفون لقيت روحي نمته ربع ساعه بس !! جدعتو و سرحته بعيد لفتره ما قصيره .. حسيت روحي فقدته الذاكره هو انا مالي مش المفروض اتحسن ! سمعته صوت الاذان بإذن دا مغرب و لا عشا ؟ عاينته للساعه لقيته 7 لا دا مغرب كدي اصلي يمكن الله يهديني هو انا مالي هسا ؟! صليت و اطبحته قبلي في المصلايه جات امي خاشه لقتني بنفس الوضعيه

امي : بعد صحيتي قومي اكلي ليك شي ، فنيلة يزن البنيه وين ؟ دايره اغسله

= ما عارفاها شوفي الشماعه

مشت علي الشماعه : ما لقيته

= خلاص ما عارفها

امي : سمح راقده كدا مالك ما تقومي ؟