بنيات الفريق

part 8

#بنيات_الفريق8

》》》    في بيت فيصل سفيان 《《《

  ليلى جابت شاي الصباح لفيصل في الغرفه ، كان قاعد في الكرسي و سرحان بعيد ..  كبت الشاي وطلعت من غير ما تنتبه لشرود فيصل .. مشت و جات لقت الشاي  في محلو .. دخلت طرف اصبعه في الكبايه تتحسس درجه حرارة الشاي  .. اتلفتت لفيصل و قالت ليهو : مالك يا راجل ما شربتا الشاي بعد برد ؟ مسيخ ولا شايو كتير ؟؟

فيصل بثقل مط رجلو لقدام و عاين ليها  : الشاي ما فيهو شي .. ليلى جات قعدت جنبو و قالت ليهو
= مالك يا راجل متّمحن كدا من صباح الرحمن خير ان شاءالله في شنو  ؟

سكت مساافه و عاين ليها : سلوى اختي امس فاتحتني في موضوع منار تاني ، قالت دايراها لولده هيثم .

ليلى : و انت قولت ليها شنو ؟

فيصل : قولت ليها هي بتقرا لسه بعد تكمل قرايتا ..

ليلى : زي القولت ليها انك موافق يا فيصل كنت ترفض بالباب بدل كل ما تفتح معاك الموضوع دا تقفلو بالقرايه ،، منار ما فضل ليها كتير في الجامعه  حجة القرايه دي تاني ما بتنفع !

فيصل : ليلى .. انا عارف البتفكري فيهو بس اشوف راي البت يمكن تكون موافقه ..!

ليلى  : انا بتي ما بديها لولد زي هيثم حتى لو كانت موافقه .

فيصل : بس دا ود اختي يا  ليلى ...

ليلى وقفت على حيلة و قالت ليهو بنبرة جادة : و انا العندي قولتو م ح اسمح بتي يحصل فيها الحصل لاختك  "مريم " و تروح ضحيه رضى اخوان ، و الكلام دا انا قولتو ليك من عرستا لانفال .. قول لاختك ما عندنا بنات للعرس يا توريها انت يا اوريها انا بنفسي .

فيصل : مافي داعي للعصبيه دي كلها و اهدي .

ليلى وهي متجه للباب : انا قولتا العندي يا فيصل ومهما حصل ما اسمح انو واحده من بناتي تعيش قصة " مريم " من تاني ...
____________________

لقيت مكالمه فايته من رقم خالتي غادة الامس سيفتو و ضغطتا اتصال .. ردت لي شافعه : ماما طلعت مع خالو التاج المستشفى .. قبل الطفله تكمل كلامه  سمعتا صوت زول قلع منها التلفون و شاكلا قال ليها " امشي خلصي واجباتك وتاني ما القاكي حايمه في البيت " .. ختت السماعه في اذنه و قالت لي : الو . منو معاي ؟

= انا ناردين بت اخت ..

قالت لي بنبره حاده : بت تغريد الراميه لينا امك انتي و ابوك .. ابوكي عرفناهو عرس غيره انتي لقيتي ام غيره ولا مرتو بقت ليك ام ؟؟ ..  في زمتك دي جادعه امك السنين دي كلها  راقده عيانه ما كلفتي نفسك ترفعي سماعه التلفون و تشوفي امك دا عايشه ؟ ميته ؟ ولا مجدوعه في ياتو بلد زاتو ..! عليك الله انتي هسي بت انتي ؟؟ كان البنات زيك ان شاءالله النسوان يعقرن و ولادة البنات تنعدم يا ولادة السجم و الندم ما بتخافي من الله ؟  بكره الله بسألك من امك  ... ولا ما بتعرفي الله ؟ خسارة الدايه و تعب السمايه منحشره في قصرك و قافلاهو عليكي  شكلها القروش ما خلتك محتاجه لام ولا يحزنون .. الله ياخدك يا ملعونه توف عليكي و على اشكالك ...تيت تيت فصلت الخط . كلامها وقع على قلبي زي موية النار دموعي جات جاريه و بقيت ببكي بتنهد .. ما كفايه انها سايباني السنين دي كلها وفي الاخر انا الاتلام واطلع الكعبه ؟؟ كلهم مستنين فيني فرصه ويدويني كلام حار يسم البدن ..
الاقيها من مرت ابوي ولا من ابوي زاتو ولا من الدنيا ولا منو ؟؟ .. و امي عيانه ؟؟  دا فيلم جديد اكيد تمثيليه عشان اغفر ليها غيابه . و الا كييف يعني عيانه بالسنين  مرض شنو دا البدوم بالسنين ؟   ضغتا على راسي بقوة من الصداع  فتحتا الدرج طلعتا مسكن بلعتو .. بعد تلاته ساعات غادة رجعت لي