اليتيم والحسناء

البارت 2

بلايه واهس
سافرت بيه السنين
وماخذت من عدها كلشي
لا خليل ابموتي يحضر
لاخليل يشيل نعشي
باقي محتار بزماني
واحسب الموتي ثواني
الوگت عكس
الاريده وبالعكس وياي يمشي
ناگع براسي الوقار
وكلشي شيب والبياض اشتاح رمشي
قايمه براسي القيامه ،،!
والسنين الطارت بكشت حمامه
وتالي لاخل
الحويته ولاعشت يوم بسلامة

خلصت الفاتحه وقرروا عشيرة اهل محسن ان يقتلون شكو واحد من اقارب عادل وكالوا جميع واحد له صله بعادل مهدور دمه

اهل عادل شردوا من البيت يم عمامهم بلكوت

عمام محسن دكوا بيت اهل عادل وبيوت عمامه بلمنطقه وصار كلمن يحمل لقب العزواي مهدور دمه يعني صارت معركه قبائل

ادخلت العشائر الباقية والوجهاء ببغداد
شي اكيد الناس طالعه من حرب ومفجوعه ماكو عائله ماعدها شهيد لو ابوهم لو اخوهم لو ابنهم لو عمهم
شي اكيد حرب 8 سنوات ماخلت شي بلعراق والناس مابيهم حيل صراع ونزاع عشائري

وبعد ٣ اشهر وبشهر الواحد بداية سنة ١٩٨٩ أدخلت الناس الخيره والشيوخ من مختلف القبائل وقنعوا شيخ عشيره اهل محسن باان يعطي عطوه او مهله لمده ٣٠يوم اي شهر بين ماتهدء الاوضاع

وطبعا عادل بسجن وشي اكيد السجن ارحم مايطلع
بره لان دمه مهدور

الشيخ ابو صاحب شيخ اهل محسن جمع العشيره وكال

الشيخ: بويه احنه أنطينه عطوه لناس وكلكم تسمعون الكلام مااريد تصرفون من دون شوري ورايه
اي تصرف غلط منكم هاي العشائر كلها تحقنا واحنه اهل الحق يصير علينه وانت ابو خضير تلزم اولادك
واني وعدتكم وشاربي مو عليه ومااكعد ديوان بعد
اذا مارجعت حقكم ودم اخوكم

عيسى: محفوظ حقنا مايرجع له بدم واحنه مو نسوان همه زلم واحنه زلم وعادل مايشم الهوه واني عايش

حميد ابن خضير: اني ويه عمي عيسى
منصور ابن حسن: شتكول علينا العرب غمان ماياخذون دم عمهم شيخ احنه مانسكت

خضير: احنه غير الثار ماعدنا غير دم عويدل النذل واهله ماكو

حسن اخو محسن زغير : شيخ احنه ماقللين شر واحنه راحلنه زلمه يسوله مية زلمه

عبد العزيز : لو اعرف اروح اعدام دم عمي مايروح واني ابن فطيم
و عبد العزيز ابن خضير الجبير وامه اسمها فاطمه

الشيخ: والله خوش المزعطه كامت تتحكم بينه ولكم بعد مانكدر نسوي شي انطينه كلمه لشيوخ وهاي الناس كلها تحقنا اذا تصرفنا غلط
وشتريد تكول علينه العرب ماعدهم رداد مو زلم مايوفون بكلمتهم
ابو خضير ماتحجي شني

طبعا ابو خضير مكسور على ابنه لي كان منتظره يتسرح من الجيش ويزوجه

سلطان: عيسى ولك لاتكمز انت و خضير اسمعوا كلام الشيخ
مابيه حيل اخسر بعد واحد ولكم محسن هد حيلي

خضير : بويه ليش نسكت هاي تفك لمن ضامينهن وذني العكل لمن نلبسهن نلبس اثياب نسوان ونكعد بلبيت اذا مابينه خير ناخذ ثار اخونه ماننحسب زلم

عيسى: ولك خووويه محسن الحيد دمك يروح وعويدل يتمشى كدامي

الشيخ : خلص ننتظر شهر تخلص العطوه وتكعد الزلم ونشوف وعويدل مايشرد بمعلته له يوم
ابو خضير اريد امشي واريد جواب منك مثل ما الشيوخ اخذوا مني كلمه وعهد اريد منك كلمه وعهد قبل لا امشي

سلطان: محفوظ الله وياك كلمه زلم ولي يطلع منهم اني كتاله (اني اقتل )

مشت الايام والشهر بدء يخلص واهل عادل بعدهم بلكوت همه وعمامه

زامل ابو عادل مزوج اثنين
زوجته الاول متوفيه عدها بنات اثنين ( هدى و مريم)
وزوجته ثانيه اسمها كلثوم لي هيه ام عادل
عدها ( عادل و صلاح و كفاءه )

زامل : صخمت وجهنا ياعادل هجمت بيوتنه
كلثوم : ولك يمه عادل وين انت هسه

هدى : كاعده وبقلبي اكول تستاهلين ياكثلوم على الضيم لي شوفتينه اياه اني ومريم
هذا كله منج ربج مايظلم باوعت على مريم ترجف
كتلها شوفي الحيه شلون مقهوره هذا تالي ظلمها

مريم :اوووف منج هدى وقتج هسه شوفي مصيبه على راسنا الله يعلم شوكت يقتلونه

هدى : احنه شكو بابا بس زلم مطلوبين نسوان ماشموله ههه خل تاكلها كلثوم خل تضوك المر لي شفناه اني وياج عشنه حياتنه ايتام وضيم وظلم من قساوتها

حجي زامل : الشيخ كالي بعد شهر الكعده ماخذين عطوه شهر

كلثوم : شراح تسوي ابو عادل وعادل يبقى بسجن يمه ابني اصخام بوجهي

زامل : خلي بلسجن ارحم من مايطلع وينقتل واني عندي عرف ب الامن وصيتهم عليه هسه هو بعده مامصعدينه القاضي انطيت فلوس الضابط وكتله اجلها لدعوه بلكت تنحل سالفه ويتنازلون

كلثوم: من كل عقلك حجي ذوله يتنازلون ذوله اذا مايقتلونه واحد واحد ما يشفه دمهم

هدى : يستاهل ابنج اكو واحد يقتل صديقه ومنو محسن مامصدكه

كلثوم: صمي حلكج بنت جميله لا اجي افركه فرك فرحانه بنت جميله

مريم: لا تجيبين اسم امي على لسانج امي اشرف منج ياساقطه

وعلكت بين كلثوم ومريم وهدى وعاط بيهن حجي زامل اسكتن لا اكسر روسجن احنه وين انتن وين

خلص الشهر وباجر الكعده

اجتي الشيوخ العشائر لي اتعهدوا وشيوخ العزاوي اهل عادل وجايبين وياهم شيوخ من مختلف العشائر منهم شيخ شمر و ابو عامر وسواعد
وجعب لان بلانساب قبيل كعب هم عمام قبيله بني عقيل

صارت الكعده والصياح وهذا يحجي كلمه وثاني يعيط طبعا ابو صاحب شيخ اهل محسن وصه ربعه محد يحجي بس هو و شيخ كاظم

اتفقت الشيوخ فصل ١٠ مليون قبل ١٠ مليون تعادل مليارات هسه لان العمله صعبه وتختلف والعراق طلع من حرب يعني كلشي ب بلد دمار
اتفقوا ١٠ مليون و وحده من خوات عادل تروح فصليه

وهنا تبدء القصه لازم وحده من خوات عادل
وعادل عنده من خواته هدى ١٧ سنه ومريم ١٥ ذني
من غير ام لي امهن متوفيه
وكفاءه ١٦ لي هيه اخت عادل من امه وابوه
خلصت الكعده
وحجي زامل قرر ينطي بنت هدى فصليه لان هيه الجبيره

يتبع.....