اليتيم والحسناء

البارت 33

خلك حيد وگتك
وزرع الطيب
على أبواب
السجن لتصير حارس...
خلك طير
حر وطير  ليفوگ
تصيرلهم
شذر فوگ المحابس...

محمد: سنه ٢٠١٠ ودعت فاطمه الحياه والله يغفر ذنبها ولو لي شفته اني واختي ماشافه بشر بسببها بس مايجوز على الميت بس رحمه

ناديه: اول مره ادخل للبيت وفاطمه ماكو ومتاكده مراح ترجع كل هذا ظلمها ولسانها ب ٣ ايام فاتحه والناس نستها بس شي اكيد الناس اذتهم ما مراح ينسون ظلمها

نور: رحت ويه ماما ناديه وبنات فاطمه يردن ياكلنه اني وماما ناديه خلصت الفاتحه ورحت لبيت عيالي

هدى: مره خالوا طالب تريد حصتها من للبيت تريد تروح يم اهلها هيه واطفالها تسوالنه بيها لان مانريد البيت ينباع بس ماكو فائده قافله

مريم: والله ماتحمل هذا البيت لي عشنه بي طفولتنه ينباع

هدى: شسوي اول وتالي ينباع ونباع البيت و وزعوا الحصص وخالوا احمد قرر يشتريلنه يمهم بمنطقه الامين بلرصافه يعني راح نتحول من الكرخ للرصافه واني شلون اعووف منطقتي الاسكان لي خلصت بيها ٣٩ سنه وكل ذكرياتي هنا

مريم: اتحولنا منطقه الامين الثانيه اشترينه بيت على كد فلوسنه

هدى: كملت اجرائات نقل المدرسه وحياته هنا اصعب يعني هنا مجتمع عشائري اكثر

محمد: طلعتلي كليه علوم رياضيات جامعه الموصل بس عبدالعزيز وماما ناديه وماقبلوا اروح لان يخافون بسبب الطائفيه والاوضاع تعبانه
قرر اسوي اعاده ترشيح من اعلى الى الادنى وتمنيت يطلعلي معهد طبي بس اقل واحد نقبل بمعهد طبي معدله ٨٠  طلعلي معهد اداره الرصافه باب المعظم
كانت صدمه كنت متوقع بلقليل كليه تقنيه بس شسوي هو حظي شوكت كعد حتى يكعد ويه القبول
قدمت بلمعهد وطلعلي قسم احصاء والمعلوماتيه

ناديه: نور صارت حامل بس رجلها عصبي ويضربها على كلشي بس هيه تكول لاتدخلون ويوم كاعدين ودخل علينه عمي خضير

خضير: شلونج بويه ام حيدر

ناديه: هله عمي تفضل تفضل

خضير: رجلج مانزل من الدوام شني

ناديه: لا والله خالوا

خضير: ومحمد وين

ناديه: والله بمحل مال حلاقه يشتغل

خضير: بويه اجيتج بشغله وماكو غيرج يكدر عليها

ناديه: انت تامر عمي

خضير: عمي اريدكم ترجعون للبيت لان هاي مره حميد مالها شغل بلبيت ولبيت صاير خايس وتعرفين احنه علينه رجل وانتي الفاهمه والجبيره وتعرفين شلون تستقبلين الناس

ناديه: عمي خضير هو شيخ اخوته وصدك ناس تجيهم اهواي بس انصدمت وصراحه لازم اشوف محمد يله لان شافه بهذاك للبيت مو سهل