اليتيم والحسناء

البارت 29

نور تكَول لعلي ...

شمالك ماتحن مو جاينة العيد

يالبادي بزعل انه بصلح بادي

تعال الخاطر الله لا تظل زعلان

عيد الله  ولك مو عيد ميلادي

محمد: وصلت لمحل وكانت صدمه لكيت ناس ملتمه على محل ودم تارس المحل باوعت لكيت عمو ابو سلام مقتول هو وعامل رعد
هذا من اصعب ايام حياتي لي ماتروح من عيني خصوصا عمو ابو سلام كان لي ابو
واني لو مامتاخر هاي 40 دقيقه كان نقتل وياهم لان امريكان ضاربينهم طلاقات  كانوا جيش المهدي يزرعون عبوات على الشارع ومن تجي الهمرات الامريكيه يفجرونها والامريكان يبقون يضربون على الناس الابرياء والالاف الابرياء نقتلوا بسبب هذا شي
اجتي الشرطه اخذت عمو ابو سلام و رعد وقفلوا المحل واني بقيت باب المحل كاعد مااعرف شسوي من الصدمة وين اروح وملابسي كلها دم لان كعدت على الارض وهيه كلها دم وبقيت ابجي بدون شعور لان الشعور في تلك لحظه ماينوصف تشوف انسان لي صاحب فضل عليك مقتول كدامك 

ناديه: الباب نفتحت ومحمد ملابسه كلها دم واني انظف بلحوش وكمت اعيط وهو بس يبجي ولك يمه شبيك وشنو هذا دم

محمد: ماما الامريكان قتلوا عمو ابو سلام

ناديه: الا اله الا الله

محمد: ماما سدوا المحل ودم بقى بلكَاع

ناديه: يمه شهيد هذا الف رحمه على روحه والله يلعنهم ليهود لقتله شيريدون منه مو كافي دمروا هذا البلد

نور : شفت محمد يبجي وعرفت عمو ابو سلام استشهد وادري محمد شكد متعلق بيه ونسيت كل جروحي لان شافه محمد اصعب مني موضوع امي وموضوع ابو سلام وشلون اذا عرف امي عايشه ربي خلصنا من فاطمه يارب

ناديه: دخل بلكوه بدل ملابسه ونام وبقى على هاي حاله ب اسبوع مصدوم وبعدين طلع يدور شغل

محمد: بديت ادور شغل لان وراي مدرسه وفلوسي كلها مجمعها يم عمو ابو سلام وحسيت روحي يتيم بهذا اليوم لان ابو سلام كان معوضني عن الكل عن ابوي خضير لي مجرد اسم على ورق

ناديه: مرت ايام ومحمد ماحصل شغل وفاطمه فوك راسه تفتر ليش ماتشتغل شعندك كاعد

محمد: يوم 29/7/2007  نهائي كاس اسيا رحت لبيت منى شفت المباراه ويه خالد والعراق فاز على سعوديه وناس طلعت بشوارع سنه وشيعه وسني حاضن شيعي وشيعي يركص ويه سني نست الناس طائفيه
وحمد الله ربك جعلها سبب يوحد الشعب بدت الطائفيه تلفظ انفاسها الاخيره والناس أفتهمت مكر الاحتلال

فاطمه: محمد لازم يشتغل ويه حميد

ناديه: بس محمد مابي حيل عماله وشغل حميد خطر سكلات

فاطمه: باجر يطلع ويه حميد

ناديه: حميد يشتغل عماله ويه خلفات وشغلهم كل بنايات واني خايفه على محمد لان اعرف حميد حقيره ويكره

محمد: طلعت ويه حميد عماله اول يم تذكرت عمو ابو سلام شلون كان مدللني واشتغل ودموعي تنزل وحميد يصيح عليه وكلساع ضاربني

ناديه: خلص اول يوم وخلص ثاني يوم بس خايفه وقلبي مامرتاح واليوم ثالث نفس كل يوم كعدت محمد ساعه ب 5 وطلع لشغل وياهم بس خايفه خصوصا لبارحه حميد بشغل ضارب محمد ومغطط راسه برميل المي وهذا طفل يدفع ضريبة زواج امه من خضير بحيث ماكفاهم لي سوه بهدى رجعوا على اطفالها

حميد: محمد ليوم تصعد ويانه على سكله

ابو كرار الخلفه: حميد وين يصعد هو طفل يدوخ ويوكع

حميد: يتعلم ابو كرار

ابو كرار: بمسؤوليتك حميد اذا صار شي وهاي عمال شهود

محمد: صعدوني على سكله واحس روحي مصعدين لذبح اخاف من أماكن مرتفعه واني بعدني ١٦ سنه بديت اشتغل وكلساعه حميد يضربني وغالط عليه واني ارجف من الخوف اخاف اوكع

حميد: تعال جيبلي طاسه محمد

محمد: حميد والله اخاف امشي على سكله وطاسه ثقيله

حميد: كتلك تعال لا اجي اشمرك

محمد: اخذت طاسه وبلكوه شايلها لان طاسه مال لبخ كبيره كلش وصلت يم حميد كان يضربني راشدي وهذا اخر شي اتذكره هيه ضربه هيه وكعه من طابق ثاني الطابق الارضي

ابو كرار: ولك مات الولد حميد اني مامسؤول

حميد: يطبه مرض لاتخاف روحه روح الجلب 

ابو كرار: ولك رائد (عامل) شوف الولد مات

رائد: ابو كرار مابي نفس

ابو كرار: نزلت اركض لان هاي مسؤوليه توكع براسي

رائد: اخذت محمد جو ماطور وجبت ترمز بي مي بارد درته فوك راسه رجع النفس له والدم يصب من راسه
واباوع حميد ولا كنما اخوه

ابو كرار: خل ناخذ لمستشفى راح يموت

حميد: عوفه ابو كرار اني مسؤول منه خلي نايم واذا مات نكول وكع وبعدين هناك شرطه ومركز يسجنونه

رائد: اخذته وخليته بمكان في (ظل)ماتوصله شمس وشديت الجرح لي براسه وهو فاقد

محمد: كعدت احس وجع بجسمي براسي شبه مشلول ومااشوف شي اريد اصيح مااكدر

ناديه: العصر جابوا محمد راسه ملفوف وشايلينه واني وكعت وكمت اصيح ولك حميد كتلته الله يلعنك

نور: شكد كنت اكره حميد بس من شفته شمر محمد بلكراج ودخل لغرفته وبقت بس ماما ناديه تعيط يمه
تقربت عليه ابوس بيده حمودي رد على اختك مو كتلي قبل يومين مااعوفج تريد تعوفني ليش منو لي

يتبع.......