اليتيم والحسناء

البارت 28

وفاء الكلاب وغدر البشر عناوين  تعلو الصحف. والتقليعة الجديدة في اخر موضات الغدر والخداع هو ان لا يغدر بك الغريب لكن يفعلها من كان مكانه قرب حبل الوريد. ؟؟!! غدر وطعنات قريبة فتكون دائما صائبة لا تخطأ الهدف  وتأتيك بغتة وانت في كامل راحتك واسترخائك.
لانك من المفترض مع أحبتك ومن تأمن  شرهم وسرهم  وانت في قمة اطمئنانك تأتيك الطعنة.

هدى: كملت كليه وتعيينت بمدرسه مال بنات وكاعده فد يوم واجتني مريم

مريم: هدى ليش مانروح نسال بملجى الايتام بلكت نلكاهم

هدى: مريم بله اني اذا اتسودن حقي اطفالي راحوا مني انتي شبيج شجاج كل عقلج ناديه تعوفهم ماتعرفين ناديه شنو لعد

مريم: شخسرانين احنه نروح ونشوف

هدى: مريم وحتى لو لكيناهم شنعرف منهم واني حتى صوره لهم ماعندي الطفله عمرها سنتين والولد عمره سته اشهر شلون اعرفهم

مريم: لعد شلون تبقين هيج مدمره حياتج

هدى: حياتي ادمرت من باعني ابوج حجي زامل للخضير واشترى ابنه عادل

مريم: بس هدى الناس جاي تجيج خوش قسمه تزوجي بلقليل تنسين اطفالج وتجيبين غيرهم

هدى: ولج مريم الاخر يوم بحياتي ماانساهم نور ومحمد ولج عطرهم بخشمي لهسه ولج ذوله قطعه من روحي والله يعلم شصاير بيهم هسه

مريم: سمعنا مرت خالوا طالب تعيط يبؤؤي يبؤؤؤي
ركضنه عليها وكانت الصدمه 😥
خالوا طالب نقتل كاتلينه بليرموك بلاربع شوارع بسبب الطائفيه المقيته حيلي راحه مااكدر حتى اعيط بقيت جامده
هو يتشغل بتكسي وماخذ اجره للمنصور كان موكفينه جماعه وماخذينه للاربع شوارع وقاتلينه اوووف منظر مايروح من عيني وهو مزرف بشياش وراسه مذبوح الله ينتقم من لي خلق هل الفتنه الله ينتقم من امريكا من كان يعرف هذا شيعي لو سني

هدى: من كالوا خالج مات حسيت امي ماتت ثاني مره لان خالوا طالب كان الاب والام وخال
اخذوا جنازته بدون راس لان كانوا يذبحون الشخص ويشمرونه بدون راس بس جسد معقوله احنه بشر شنو هاي الوحشيه
الشيعي مايدخل منطقه سنيه لان ينقتل وسني مايدخل لمنطقه الشيعه تحس روحك بغابه وضعيف يروح بيها

مريم: خلصت الفاتحه وخالوا احمد قرر اني وحسين نروح نسكن يم بيت جدوه لان بيبي وهدى وزوجه خالوا طالب واطفاله بقوا وحدهم وكال حسين انت ابو البيت بعد وحسين سوده عليه اكثر شخص متاثر على عمه لان هو كان مربي من هو زغير اخخخ خالوا الله يرحمك حتى بموتك ما ارتاحيت

ناديه: رجع محمد من منى وفرش فراشه ونام حتى ماباوع عليه واني عاذرته ونور نامت من وقت احس هدى ليوم راحت نفس اليوم تكرر عليه من راحت امهم وهمه يبجون

محمد: كعدت الصبح لكيت الملابس كلعاده مال شغل يم راسي محضرتهن ماما ناديه ونور نايمه قريبه عليه صفت اكول رب العالمين صح اخذ امي منه  بس عوضنه باام لي هيه ماما ناديه ماتتعوض بكل كنوز الكون
بدلت وكملت ودخلت على ماما لغرفه بستها براسها وردت اطلع وصاحت عليه

ناديه: تعال ماما مانايمه اني تعال يروح امك

محمد: كعدت يمها وبس ايدها وكتلها ليش تبجين ماما

ناديه: ماما والله مجبوره ضميت عليكم ردت احميكم

محمد: ومنو كلج اني ضايج اكو واحد يضوج من مدرعه(لان هيه دبيه اسميها مدرعه)

ناديه: ضحكت صح كلماته بسيطه بس زاحت جبل من صدري

محمد: ماما احنه وعينه لدنيا انتي امنه وانتي لي تعبتي وانتي لي ربيتي وامي الله يرحمها لو كانت موجوده ماكانت اهتمت بينه بكدج ديله كومي لا حسبالج تسويلج فام وتغلسين على ريوك يله لمطبخ

نور: هله هله شتخططون من ورايه عيني خيانه صارت طائفيه يبؤؤؤي والله جوعانه

محمد: استلمي ماما كانت عايزه وكعدت لخبله بربج هاي شكول وحده مطلكه كل همها بطنها

نور: لعد شسوي اموت من الجوع يمه كلشي ولا كروشي

ناديه: صار يروح امكم هسه دقائق ويكمل

محمد: ماما اريد دوك ( عجين ينخبز بلدهن ويتخله عليه شكر لي عاش بزمن الحصار يعرف هاي اكله شكد طيبه) صار اهواي ما ماكل منه

نور: اي ماما كثري مال ٥ نفرات

ناديه: اسم الله وينهم 5 نفرات هو بس انتي واخوج واني

نور: ماما تعرفين بنتج نايمه بدون عشه لبارحه

ناديه: اي سوده عليه وقوطيه مال دبس منو ماكلها ابويه

نور: لا ماما كنت مقهوره وذبيت حرقتي بلاكل بس تدري واحد اذا ضايج مايحس بلاكل مابي طعم

ناديه: اسكتي لا اشعل ابوج ماكله قوطيه دبس وتصيح مقهوره

محمد: ماما هاي له يوم تكرطنه واحنه نايمين

نور: هو شماكله وحاطين عينكم عليه هيه قوطيه دبس و٣ كرص خبز حتى كانت نفسي مسدوده

ناديه: كملت الريوك ومحمد راح لشغل واني ونور كعدنا ننظف لبيت لان ست احلام نشتغل جواها خدام واني مااخليها تشتغل لان وصخه ومحد ياكل من اكلها وفرحت نور بسرعه تجاوزت الموضوع طلاكها بس اعرف تكتم بروحها مثل امها هدى 

محمد: رحت لمحل مثل كل يوم صح تاخرت تقريبا 40 دقيقه بس عمو ابو سلام مايحاجيني ويعتبرني مثل ابنه

وصلت لمحل وكانت صدمه لكيت ناس ملتمه على محل ودم تارس المحل باوعت لكيت عمو ابو سلام مقتول هو وعامل رعد
هذا من اصعب ايام حياتي لي ماتروح من عيني خصوصا عمو ابو سلام كان لي ابو
واني لو مامتاخر هاي 40 دقيقه كان نقتل وياهم لان امريكان ضاربينهم طلاقات  كانوا جيش المهدي يزرعون عبوات على الشارع ومن تجي الهمرات الامريكيه يفجرونها والامريكان يبقون يضربون على الناس الابرياء والالاف الابرياء نقتلوا بسبب هذا شي
اجتي الشرطه اخذت عمو ابو سلام و رعد وقفلوا المحل واني بقيت باب المحل كاعد مااعرف شسوي من الصدمة وين اروح وملابسي كلها دم لان كعدت على الارض وهيه كلها دم وبقيت ابجي بدون شعور لان الشعور في تلك لحظه ماينوصف تشوف انسان لي صاحب فضل عليك مقتول كدامك  ....

يتبع