أخبرني الحقيقة (باللهجة الجزائرية)

3

الحلقة 3 ::

كانت كنزة تخبط على المخدة باش تعدلها حطت فوقها الدبدوب ديالها لي قاتلها جداتها بلي خلاتهولك يماك وهي تحبو بزاف وتحس فيه ريحة يماها لي عمرها ما عرفتها .. سمعت الدقديق وراحت فتحت الباب ، لقاتها اسماء زوجة كريم

اسماء : كنزة حبيتك فموضوع

كنزة : وي طاطا اسماء ادخلي

دخلت اسماء وقفلت الباب وقعدو على البونك ، قعدت كنزة تخزر فيها تستنا فيها تهدر ، واسماء قعدت تخزر فالارض وتخلط فصباعتيها تحاول تهدر ، اسماء هاديا انسانة مليحة وطيبة جات من عائلة متوسطة ، سعاد ما تحبهاش بزاف ..

اسماء : كنزة حبيبتي تعرفيني نعزك بزاف وكنت معاك ملي زدتي ويماك نحبها بزااف ربي يرحمها

كنزة : اكيد طاطا مام انا نحبك بزااف والله غير نتي عزيزة عليا وراكي تعرفي هاد الشي

اسماء : بيان سور عزيزتي ، حبيتك فموضوع ، ريناد بنتي راني خايفة عليها ، راني نلاحظ عليها بلي راها تخالط بزاف ناس مشي ملاح ، ولوكان تخرج على الطريق يما سعاد تقتلها

كنزة تخلعت من الهدرة تاع اسماء ، صح كامل يعرفو بلي ريناد سامطة وتهدر فالوجه وماتحبش عايلتها ومتحملة المعيشة معاهم غير على خاطر الدراهم ، باسك هي تحب حياة الخلاط وهاداك الشي ، وعايلة سعاد عندهم التقاليد محافظين عليهم ..
كنزة ما عرفتش وش لازم تقول ولا دير ، حارت ..

كنزة : طاطا والله غير حيرتيني ، وش لازم ندير يعني ؟

اسماء : حبيتك تهدري معاها ، انا حاولت بزااف وفدوى اختها تان حللتها باش تهدر معاها مي والو تعرفيهم كي القط والفار ، غير نتي لي نقدر نتكل عليك

كنزة : بصح طاطا انا وريناد ما نهدروش كامل وما نعرف عليها والو و...

اسماء : علابالي ، مي تعيشي يا بنتي ..

وطرطقت اسماء بالبكا وغطات وجهها بيديها وقعدت تبكي هكاك ، كنزة رتابكت وماعرفتش وش لازم دير غير انها تمسح على ظهر اسماء ، غاضتها ، بناتها خارجين فيها وتخاف من سعاد بزاف بعد ما تحملت بزاف ذل من عندها ، وكريم مشي حنين فيها بزاف ، باسك يحب يمشي كلمة يماه

كنزة : خلاص طاطا تعيشي ما تبكيش ، نهدر معاها ما تقلقيش روحك

عنقتها اسماء وكنزة متبسمة تبسيمة صفرة ، ماشي عارفة وش لازم دير .. خرجت اسماء من بيت كنزة وخلاتها حايرة ، ناضت وقعدت دور فالبيت وتخمم وش لازم تقول لريناد ، عارفة الطبع ديالها كيفاش و بلي وجهها مطلس ، الله يجيب الخير

خرجت كنزة من البيت حتى شافت سعاد داخلة للقصر ، راحت تجري ليها سلمت على يدها
كنزة : جدة توحشتك

سعاد : بووه بعدا

كنزة : والله ، وين كنتي ؟

سعاد : رحت للشركة عند خالك فاتح