أخبرني الحقيقة (باللهجة الجزائرية)

36

حبيبااااتي وش رااكم ؟؟
ان شاء الله يعجبكم البارت ..

الحلقة 36 :::

خارج الشمبرة تاع كنزة ..
فالشمبرة لي مقابلتها ، لحقو صفية وفريد وسهام يجرو ودموعهم على خدهم .. دقدق فريد .. خرجتلو الفرملية ..

فرملية : وي الحاج ؟

فريد : وليدي ادهم راهو لهنا ؟

فرملية : ايه ..

فريد : راهو مليح ؟

فرملية : لاباس عليه الحاج ما تقلقش روحك .. رح يجي عندكم الطبيب ، استناو لهنا

دخلت الفرملية وخرج عندهم الطبيب ..

طبيب : السلام عليكم

هوما : وعليكم السلام

طبيب : ما تقلقوش رواحكم ، ادهم بسلامتو قوي وقاوم ، صح تعرض لضرب عنيف بصح الحمد لله حنا وتخلعنا كيفاش ما تكسرش ، نزف بزاف مي لقينا متبرع .. وعندو مشكل شوية فالكبدة باسك انضرت من الضرب يعني مرحش ترجع سليمة 100% مي مع الوقت و الدواء يتحسن ويرجع كلش بخير ان شاء الله ..

سهام (تنهدت) : ااااخ يا ربي الحمد لله .. ربي يخليك دكتور

طبيب : هذا الواجب تاعنا ..

صفية : تعيش يا وليدي ، ربي يخليلك وليداتك ، خليني ندخل نشوفو ، كبدتي تكوات عليه يا وليدي الطبيب

طبيب : ايه ادخلو عندو ، راهو تحت المخدر دوك مي شوية ويفطن .. لازم ما تضغطوش عليه ، باسك راهو تاعب ومحتاج الراحة

صفية : ايه كونك هاني ، نشوفوه برك

دخلو والفرملية خرجت .. قربو منو كامل ، كان وجهو مجروح ومنفخ بالضرب .. حطت صفية يدها على خدو وبقات تبكي ..

صفية : يااا كبدتي ، يا وليدي ، يا مومو عينيا ، وعلاش هكدا تحرقلي قلبي عليك ، علاش ترمي روحك للهلاك ، علاااش يا وليدي

عنقتها سهام وهي تبكي وحاكمة يد ادهم ..

سهام : يما خلاص تعيشي ، سمعتي الطبيب قالك راهو لاباس عليه

صفية : ما قدرتش على الخلايع والله ما قدرت ، نظل ندعي ربي ما يديهش عليا ويخليني مكوية عليه ، يااا ربيي احفظو يا ربي

شوية هكدا رجع الطبيب ..

طبيب : اسمحولي مي متقدروش تقعدو بزاف معاه ولا على الاقل يقعد واحد برك تعيشو

سهام خزرت فيماها وباباها ..

سهام : انا نقعد ونتوما ارجعو للدار ، مرام خليناها عند الجارة وحدها ، تعيشو .. راني انا معاه ، وغير يفطن راني نجوزهولكم

حطت صفية راسها على صدرو وبكات حتى شبعت وناضت هي وفريد ورجعو للدار ، وقعدت غير سهام معاه ..