أخبرني الحقيقة (باللهجة الجزائرية)

25

تلبية لطلب احدى المتابعات ، رح نزيد بارت اليوم مي قصير ، سييت نكملو بكري مي كنت مشغولة ، هذا وين كملتو .. ما تنساوش الدعم والباطاج بليييز 😘

الحلقة 25 ::

#عند ادهم ..
كان قاعد عند شط البحر ، كي العادة ، والف من صغرو يجي لهنا ويتأمل فالموجات حتى يروحلو الزعاف ..
بقا يخمم ف حياتو لي عبارة عن فوضى مخلطة من كل جهة، وزادت كملت عليها كنزة وحكاية الزواج هاديا.. تمنى لوكان يروح يجري ويرمي روحو ف البحر هذاك ويختفي كليا من الحياة هادي..

#في القصر ..
وصلت سوسن مع كنزة وسمية للقصر ، بعد ما وصلهم وليد عمها .. حبطو ..
جا سليم يجري لعند كنزة .. غير شافتو تبسمت ، شحال توحشاتو ، وتوحشت حياتها الروتينية لي كانت عايشتها قبل ما تتعرف على ادهم .. راحتلها الضحكة تاع زمان ، الهبال ، الزهو ، الفرحة ، كلش راح وتبخر وتحس في روحها غير مهمومة ..

سليم : كنزة ، وش راكي بنتي ؟

كنزة (عينيها تعمرو بالدموع) : لاباس عمي سليم ، توحشتك بزااف

سليم : انا تان يا بنتي .. هايا ادخلو..

دخلو وقعدو واقفين عند الباب .. حبطو عندهم العايلة ، ليليا راحت تجري عند كنزة عنقتها ، حتى طرطقو بالبكا بين زوج ..

ليليا : توحشتك يا عمريي

كنزة : انااا تااان ..

بعدت عليها وحكمت يدها ، طلعت كنزة راسها خزرت فالباقين قلبها تقطع كيفاش كانو يخزرولها ، قربت فدوى سلمت عليها واسماء تان ، لخرين والو مكاش لي قرب ليها ..

ميس : خالتي شكون نتي ؟

سمية : انا بنت خال سعاد .. وهاذي بنتي سوسن

ميس : ايه الله يبارك .. اتفضلو للصالون .. (خزرت فكنزة وعيطت) لبيتك نتي ..

كنزة تالمون لي كانت مقنوطة وحاسة بالذل ما قدرتش تريبوندي عليها ، مالغري كانت دايمن ترجعلها الصرف كي ما تعرفش تهدر معاها ، مي دوك عارفة لوكان تهدر رح يبهدلوها ، ما خصهاش تطياح القدر ..

طلعت كنزة لبيتها مع سوسن وليليا .. دخلو وقعدو على السرير بين ثلاثة، كنزة ف الوسط وهوما وحدة من ووحدة من ..

ليليا : سوسن تقدري تحبطي مع ماماك

سوسن : لالا معليش ، نقعد مع كنزة ..

بقاو ساكتين شوية حتى طرطقت كنزة بالبكا ، عنقتها ليليا، وسوسن حكمتلها يدها...

ليليا : وش بيك كنزة ؟؟

كنزة (تبكي) : شفتي كيفاش يخزرولي ليليا ؟؟

ليليا : ما ديريش عليهم ، راهم زعفانين برك، اعطيهم شوية وقت برك ..

كنزة : كرهت .. رح نقتل روحي خير

ليليا: ما تقوليش هكدا !!

كنزة : نقوول .. جدة تحب تزوجني بادهم