أخبرني الحقيقة (باللهجة الجزائرية)

43

هااااي البنات 💕 البارت هذا هو ما قبل الاخير ان شاء الله يعجبكم 💕

الحلقة 43 :::

غدوة من ذاك ..
لحق يوم العرس واخيييرااا ..
ناضت كنزة على السبعة من كثرة الستراس لي كان حاكمها .. دورت وجهها لقات سوسن مزال راقدة .. ناضت من بلاصتها ، دوشت ولبست بيجاما دافية وخرجت من البيت ، لقاتهم كامل راقدين والقصر يصفر .. حتى سعاد لي موالفة من الفجر وهي نايضة اليوم كانت راقدة من كثرية التعب لي تعبوه السمانتين اللخرين ..
حبطت كنزة للكوزينة ، لقات الخدامات يوجدو الفطور ..

كنزة : صباااح الخير عليكم

كامل : صباح النور ..

كنزة : رح نتوحشكم بزااف

فرح : مام حنا حنونتي

سيرين : ديجا كي رحتي المرة لي جازت خليتي فراغ كبير

فريدة : والله غير صح يا بنتي ، رح تخلي بلاصتك وواحد ما يرومبلاصيها

كنزة : اااه خلاص دوك رك تبكيوني ، دموعي راهم واجدين باش يطيحو على اقل كلمة

سيرين (عنقتها) : ياا عمري ما تبكيش كنزة ، اليوم يومك ، لازم تكوني فرحانة

كنزة : ايه بصح رح نتوحشكم

فرح : ايي خلاص دوكا والله نبكي انا تان
ضحكو عليها كامل ..

فريدة : هايا ازربي روحي كنزة ، رح تفطن لالة سعاد تلقاك لهنا

كنزة : ايه صح

خرجت كنزة تجري من الكوزينة ورجعت لبيتها .. قعدت على السرير وحكمت تيليفونها ، عيات ترسل ليميساج لادهم مي والو ، هو كان في سبات .. وماحبتش تعيطلو كانت عارفة بلي معاه الناس .. نسفت بالقاوي ورمات التيليفون على السرير وناضت لسوسن تفيقها ..

سوسن (غالقة عينيها) : خلينيي كنزة ..

كنزة : نووووضي سوسن ، تعيشي كرهت وحدي ، نووضي ياخي اليوم عرسي لازم توقفي معايا

سوسن : خليني نرقد كنزززة

كنزة : لالا نوضيي دوووك

ناضت سوسن تقعدت وخزرت فيها بعين مغلوقة وعين مفتوحة وشعرها طالع فالسما ..

سوسن (عيطت) : وشنووو وش تسحقي ؟

كنزة (تبسيمة تاع براءة) : كرهت من القعاد وحدي

سوسن : روحي لعند ليليا ولا فدوى ولا زينة ، خليني نرقد تعيشي

وعاودت رجعت رقدت وغطات وجهها بالكوات .. ناضت كنزة جبدت الكوات عليها ، وسوسن عاودت تقعدت وهي تخزر فكنزة قريب تخنقها

سوسن : ما تخلينيش نرقد ؟

كنزة : لالا ، هايا نوضي

سوسن : نكرهك علابالك