أخبرني الحقيقة (باللهجة الجزائرية)

24

تفاعل وفوت + بارطاج بلييييز 🥰

الحلقة 24 ::

بعد يومين ..
نفس الروتين على الابطال ..
كنزة كامل النهار فالدار مع الشغل ، وتقربت بزاف من سوسن وصارو يحكيو بزاف ، مكاش جديد يعني ..
ادهم كامل النهار حاير ويخمم على كنزة ، خايف عليها وهاد الشي لي زاد كرهو في روحو ، باسك مشاعرو ليها ما تبدلتش مالغري الصفعة لي خذاها من عندها !!

#فالقصر ..
كانت تقريبا مع 11 تاع الصباح .. سعاد ماراحتش تخدم باسك كانت عيانة .. من نهار راحت كنزة وهي صحتها تتدهور ومش مليحة ، تدوخ وماتاكلش مليح .. يعني نفسيتها اثرت على صحتها الجسدية .. المهم قلنا كانت فبيتها ، حست بلي رح تتقيا (حشاكم) ، ناضت تجري للدوش وقعدت ترجّع (حشاكم) وغير جات رح ترجع طاحت طوول فالارض وما حست لوالو ..
فريدة كانت فالكوزينة وبيسك فريدة بيتها فالطابق الاول سمعت الطيحة .. معرفتش وش لي صرا ، عمبالها كشما طاح ولا .. طلعت تجري تشوف وش كاين ، فتحت الباب تاع بيت سعاد وتشوفها طايحة قدام سريرها .. عيطت عيطة دزاير كامل سمعتها ، جاو الخدامات لخرين يجريو .. تخلعو كي شافو سعاد هكاك .. وحبطو ميس واسماء تان ..
راحو كامل لعندها ، رشو عليها الما ، هزوها ، والو محبتش تفطن ..

ميس(تعيط) : وحدة فيكم تعيط لماهر ازربووو

اسماء (تضرب فيها) : يما سعااااد ، يماااا سعاااد ، افتحي عينيك تعيشيييي ..

راحت فرح عيطت لماهر وقاتلو ، جا طيارة للقصر ، وغير سمعو لخرين جاو كاملين ..
طلع ماهر يجري لبيت يماه ، غير شافها هكاك قلبو طاح ، راح يجري لعندها ، عاونوه الخدامات باش يهزها وحطها فالطونوبيل ، وطار بيها للسبيطار ..
خاوتو فاتح وكريم هزو نساهم وولادهم وتبعوهم للسبيطار ..
دخل ماهر يجري بسعاد ويعيط ..

ماهر : تعيشوووو عاونوووني

جاو الطبة يجريو ، حطوها فسرير وبداو يفحصو فيها ويقيسولها الضغط والسكر .. ويحاولو يفطونها .. وزادو وصلو العايلة كاملييين وقعدو يخزرو فيها من بعيد ، غير ماهر لي كان واقف قدامها .. كان خايف عليها ، خايف يخسرها كيما خسر باباه ، مام سي كان صغير بصح يشفالو شوية ..
حتى شافو الالة تاع القلب تحبس .. ناضو الطبة يعيطيو ويجريو ، جا واحد بدا يدير الماساج كاغدياك والتنفس الاصطناعي .. كامل تخلعو كي شافوها هكاك والبنات بداو يبكيو .. كانت فعالم وحدوخر ، تطلع وتحبط مع اليدين تاع الطبيب ، غير كمل الثلاثين ضربة على القفص الصدري تاعها جا طبيب وحدوخر يدير في بلاصتو ..
حتى عاود رجع قلبها يخبط .. كانو كامل على اعصابهم ، غير شافو ضربات القلب فالالة رجعت تندو وتكالماو شوية ..

كمل الطبيب الفحوصات وقال للفرمليات باش يدوها لغرفة خاصة ..

ماهر : وش بيها دكتور ؟

طبيب: عندها السكر طايح ولاطونسيون طالعة ، راها تاعبة نفسيا وجسديا ، نظن جازت على ضغط كبير .. والسكتة القلبية لي صرات محتمل تعاود تصرالها ، على هذا لازم تبقا لهنا تحت المراقبة ..