أخبرني الحقيقة (باللهجة الجزائرية)

21

سمحولي اليوم بارت صغير ، راني نعيا وانا نكتب .. اتفاعلو ودعموني 😘

الحلقة 21 :::

غدوة الصباح .. ناض ادهم متحمس ، واخيرا رح يتهنا من وحيد والخماج تاعو .. لبس سروال كحل وتيشرت كحل وباسكات كحلة وخرج .. عيط لوسيم وجمال باش يتاكد بلي كلش واجد .. دا الموطو وراح للشركة تاع وحيد .. لقاهم ديجا يتسناو.. طلع فنفس الطونوبيل مع وحيد .. قعدو فالطريق قريب زوج سوايع ..
غير وصلو حبطو وبداو الرجال يروحو عند البابور لي كان فيه المواد .. ووحيد قعد فالطونوبيل ..

ادهم : سي وحيد متحبطش ؟

وحيد : ايه راني جاي ..

غير جا وحيد يحبط ، حتى شاف لابوليس بداو يجيو من جهة البابور .. وبداو يحكمو الناس ..
وحيد غير شافهم تخلع وقعد يعيط..

وحيد : ديماااااااري ... يااا الكلب ديمااااااري

ديمارا الشوفور بفيتاس عالية ، ادهم كان واقف لتم قدام الطونوبيل ، غير شاف وش صرا تخلع ووجهو صفار ، عيط لجمال ..

ادهم : وش صراااااا ؟؟؟ حضرات وش هاااااااد التمسخيييييير ؟؟؟ كيفاش يخرجو من بلايصهم قبل ما نعطي الاشارة ؟؟

جمال : وش كااااين ؟؟ وش صرا ؟؟

ادهم : جماعتك خرجو من بلايصهم بلا اذن!!

جمال : انا قلتلهم غير يشوفو جماعة وحيد قربت من البابور يحكموهم ويفتشو السلعة! وعلاش راك تعيط وش صرااا ؟؟

ادهم مسح على وجهه ، رح يطرطق من التقلاق ، اخر فرصة كانت بين يديه ضاعت ، ووحيد هرب من يدو ، وماكاين حتى دليل يقول بلي السلعة لي دخلت تاعو ولا يقدر يتهمو ، حتى واذا حكموه رح يخرج من التهمة الموجهة ليه بحكم المكانة تاعو والمحاميين الكبار لي يعتمد عليهم !!

ادهم : حضرات ، حنا رانا حايبين حكمو وحيد ولا الجماعة تاعو ؟؟

جمال : هرب وحيد ؟

ادهم (يعيط) : اييييييه !!

جمال (يعيط) : ادهم !! اعرف قدرك وما تعيطش على القائد تاعك !!

ادهم : سمحلي حضرات ..

رما التيليفون تكسر على مية مورصو وبدا يعيط وحدو كي المهبول وراح يجري مش عارف لوين اصلا !!

#عند كنزة ..
ناضت الصباح ، لقات سوسن ديجا ناضت ورفدت الفراش .. رفدت فراشها وحبطت للكوزينة ، لقاتهم يغسلو المواعن تاع الفطور ..

سمية : اه كنزة صباح الخير

كنزة : صباح الخير .. نعاونكم ؟

سمية : لالا روحي للبيت وفطري ..

كنزة : ايه

راحت كنزة للبيت لقات القهوة والخبز والمعجون والبغرير .. كلات ورفدت الصوالح وغسلتهم.. وراها بداو يسيقو الدار ، كنزة معرفتش كيفاش دير 😂