أخبرني الحقيقة (باللهجة الجزائرية)

22

يا البنات ، راني نكتب ونعيا بزاف مي ماكاين حتى تفاعل ، حتى المشاهدات راها تنقص بزاااف.. والله نحس بالاحباط وراها تروحلي الرغبة فالكتابة ، تعيشو عاونوني شوية وبارطاجيوها باش الناس يقراوها 💔 والله غير تغيضني ..

الحلقة 22 :::

(تسريع الاحداث)
جاز شهر كاامل .. الروتين نفسو ..
كنزة تنوض تخمل وتستقهوا مع سمية وسوسن ، ويطيبو الغذا وياكلو وتقعد هي وسوسن يقصرو ومن بعد يطيبو العشا ويرقدو ، وكنزة كل يوم تزيد تتعلم شغل الدار والطياب ، مكاش جديد .. وكل يوم فالليل تبات تبكي على ادهم ، بالرغم لي غاضها كي كذب عليها مي توحشاتو وتوحشت تشوفو ، حبت يا لوكان تسمع صوتو برك ، توحشت ليليا والفاميلية وبيتها وحياتها !!
ادهم يجوز نص النهار اللول مع جماعة وحيد بلا فايدة ، غير يدور معاهم باش يتقرب منهم .. والنص الزاوج يا مع وسيم يا فالدار قاعد وحدو يعيط لكنزة يخمم فيها وكيفاش غبرت ، هو تان توحشها وما عندوش مامبا تصويرة ليها، ويتمنى لوكان ماسمحش لروحو يتقرب منها !!

ناضت كنزة هذاك النهار بكري .. ستقهواو وخملو الدار وسيقو ..

سمية : البنات ، اليوم رح نروحو عند فتيحة

سوسن : ااه صح عندنا شحال ما رحناش

كنزة : شكون فتيحة ؟

سوسن : هاذي مرا مسكينة عايشة وحدها معندهاش ولاد ، نروحو نطلو عليها مسكينة ونسيقولها شوية ونعاونوها .. عندنا بزاف ما رحناش باسك كنا لاتيين بيك ، مي دوك رح تجي معانا ، وش رايك ؟

كنزة : ايه بيان سور ..

طلعو بين زوج بدلو حوايجهم ، وسمية طيبت شوية مسمن وبغرير باش تديه معاها ..
خرجو وراحو بطاكسي لعندها .. فتحتلهم الباب وفرحت كي شافتهم وسلمت عليهم ، كانت مرا فالستينات هكا

فتيحة : والله ما حق عليكم ، غبتو عليا !!

سمية : سمحيلنا يا ختي والله كانت عندنا ضيفة

فتيحة : اه هاذيا ؟

سمية : ايه .. كنزة

قربت كنزة سلمت عليها وهي تتبسم

فتيحة : مرحبا بيك عندي ..

كنزة : يسلمك

فتيحة : شكونها ؟؟

سمية : ياخي تعرفي سعاد هي بنت خالي

فتيحة (حبطت راسها ووجها تبدل) : ايه

سمية : مالا هاذيا حفيدتها .. مسكينة يتيمة الوالدين وسعاد رباتها

طلعت فتيحة راسها مشوكية ، قعدت تخزر فيها ووجها صفر ..

سوسن : وشبيك خالتي ؟

فتيحة (تتلعثم) : ااه.. لالا .. وا..والو

كامل ستغربو منها ، وسورتو كنزة ، ما فهمتش وش بيها !!