أخبرني الحقيقة (باللهجة الجزائرية)

5

الحلقة 5 ::

الصباح .. ناض ياسر يجري من بلاصتو قبل ما ينوضو لخرين ، علابالو بلي جداتو ناضت باسك دايمن تنوض هي الاولى وزيد بكري ، حبط لبيتها (كل عائلة عندها ايتاج تاع شمبرات) .. دقدق وسمعها قاتلو ادخل الوغ دخل وقعد يمشي بالعقل ويخزر فالارض وحشمان ..

ياسر : صباح الخير جدة

سعاد : صباح النور وليدي ، وش تسحق ؟

ياسر قرب من جداتو وسلم على يدها وخزر فيها متبسم ..

ياسر : جدة حبيت نطلب منك حاجة مي ما تزعفيش

سعاد : احكي نشوفو

ياسر : احم ، حبيت .. يعني .. لوكان .. ولا خلاص

سعاد : بووه ياسر وش بيك ، احكي

ياسر : حبيت نسكنو انا وليليا بعد الزواج فدار وحدنا .. يعني جدة ما تفهمينيش غالط ، برك باش نحسو روحنا شوية آلاز وزيد رح نحوس دار غير لهنا ، هكدا نكونو قراب ليكم ونجو كل يوم عندكم ، مي اذا ما حبيتيش ماشي مشكل كامل والله

سعاد : نتا حبيت ولا ليليا ؟

ياسر : امم ، يعني قرار مشترك

سعاد : خلاص مالا كيما تحبو ، لي يريحكم

ياسر : صح جدة ؟؟

سعاد : ايه ، انا كان مذابيا تقعدو معانا مي بيسك رح تكونو عرسان جداد من حقكم تلقاو راحتكم ، مي عندي شرط

ياسر : نتي تأمري جدة

سعاد : غير تولد ليليا ترجعو عندنا ، نحب نشوف ولادكم قدام عيني وزيد القصر راهو كبير يسعنا كامل

ياسر : خلاص مالا جدة كيما تحبي ، ربي يخليك ليا ويطول في عمرك يا رب

سلم ياسر على راس جداتو فرحان ، صح ماقدرش يدي كامل وش حب ويكمل حياتو برات القصر مي معليش على الاقل عام ولا عامين رح يجوزهم مع ليليا وحدهم ..

سعاد : هايا مالا روح بدل قشك ، رح ينوضو لخرين باش نفطرو كيف كيف

ياسر : اوكي جدة

وخرج ياسر من عندها ..

.......

من جهة وحدخرا ، في قاراج قديم ومهجور ، قعد ادهم قدام باباه فريد وخبط راسو زوج خبطات ..

فريد : اتهدن وليدي تعيش ، رح يجي سي وحيد ونفهمو كلش

ادهم : رح نقتلو هذايا ، عمبالو رانا نتمهبلو معاه ، انا نسحق دراهمي دوكا

لتم دخل عليهم وحيد يمشي ويتبسم وحدو ، وقف عندهم وهوما وقفو ..

وحيد : حاب تقتلني .. ادهم ؟

فريد : لالا حاشا سي وحيد ، وليدي حب يقول رح يقتل اي واحد يجي فطريقك

وحيد : ايه .. دراهمك مكاش دوكا

ادهم (تقلق) : ياخي قتلك نسحق دراهمي ، تفاهمت معاك من الاول باش تخلصني فالوقت ماش نقعد نستنا فيك

وحيد : اوووف وش بيك ، ياخي قتلك سمانة زوج رح نخلصك ، وزيد حتى نتا ما خدمتش خدمتك كيما طلبت انا

ادهم : انا ؟

فريد خاف من ادهم يزيد يتقلق وكشما يدير ..

فريد : خلاص ادهم .. سي وحيد خلاص والله سماح ، غير توجد الدراهم راح نرجعو .. ربي يخليك

قعد فريد يجبد ادهم من ذراعو ..

فريد : هايا وليدي هايا نروحو

خرجو بين زوج من القاراج وراحو للدار وادهم الدخان خارجلو من نيفو من التقلاق ..

دخل للدار لقا يماه وختو يفطرو .. خزر فيهم وطلع لبيتو ديراكت ودخل ياخذ دوش

........