الحلقة 4 ::
فالليل تلمو كامل على الطابلة للعشا ما عدا ريناد
سعاد : وينها ريناد ؟
فريدة : لالة سعاد ، قاتلي بلي ما تقدرش تحبط راها مريضة شويا
سعاد : وش بيها ؟
فريدة : ما علاباليش لالة سعاد
سعاد : معليش خليها
ناض ياسر من بلاصتو ووقف ، كامل دارو يخزرو فيه
ياسر : جدة ، من بعد اذنك حبيت نقول حاجة
سعاد : وش كاين يا وليدي ؟
كريم : اهدر وليدي وش كاين ؟
ياسر : احم احم ، جدة ، عمي فاتح ، راني حاب من عندكم يد ليليا على سنة الله ورسولو .. ليا
لي كانو فالطابلة كامل شهقو من الخلعة ، لي كانو عارفين هوما ميس يمات ليليا ووافقت، واسماء يمات ياسر، وكنزة باسك ليليا تحكيلها كلش، وعلابالها بلي هوما يحبو بعضاهم من لي كانو صغار، وشنو اسماء طلبت من ياسر يصبر حتى تكمل ليليا قرايتها وتخدم ف الشركة تاعهم من بعد يخطبها من مانها .. هوما كانو يحبو بعضاهم وشنو ما كان بيناتهم والو، من البعيد برك ، حب عفيف كيما نقولو ..
كريم : هذا خبر يفرح ، خويا فاتح وش رايك ؟
فاتح : ياسر وليدي انا نتشرف بهاد الشي ، مكاش احسن من انو نعطي بنتي مومو عيني ليك نتا ، ياخي تربيت قدامي ونعرفك
ياسر : الشرف ليا عمي .. جدة وش قلتي ؟
سعاد : ليليا بنتي ، راكي موافقة ؟
تبسمت ليليا حشمانة وحبطت راسها وهدرت غير بالعقل ..
ليليا : مدام بابا قابل واذا زدتي قبلتي نتي جدة انا ما عندي حتى مشكل
سعاد : ميس بنتي وش تقولي ؟
ميس : يما سعاد ، انا اهم حاجة عندي هي سعادة ولادي ، ومدام ليليا موافقة على هاد الشي وشافت بلي ياسر يناسبها مدابينا ، وياسر راهو كي وليدي نعطيلو ليليا وعينيا مغمضين
ياسر : ربي يحفظك طاطا
كريم : انا تان موافق ، اسماء ونتي ؟
اسماء : لي تشوفوه هذاك هو ووليدي يعرف صلاحو
سعاد : انا من جهتي مكاش حاجة كيما اني نطمن على زواج احفادي ، نقولو مبروك
بداو البنات يولولو وياسر ناض سلم على يد وراس سعاد وليليا تان دارت كيفو ، وقعدو كامل يتبسمو وفرحانين وبداو يتعشاو ..
سعاد : وش رايكم نديرو العرس مع عرس فدوى ؟
(فدوى مخطوبة وليد عم باباها كريم)
ياسر : ايه علاش لالا
ماهر : لالا يما ، كل واحد وعرسو خليهم يتفششو ، العرس مرة وحدة برك
كنزة : ايه صح جدة ، هكدا يكثرو العراس وحنا نجوزو وقت هايل
أنت تقرأ
أخبرني الحقيقة (باللهجة الجزائرية)
Romanceفتاة من اغنى العايلات ، يتيمة الوالدين ، عاشت تحت سلطة وسيطرة جدتها ، تتعرف على شاب فقير وترجع تحبو .. وش راح يصرا وهل رح يقدرو يبنيو قصة حبهم ولا القدر يوقف فطريقهم ؟💥💥 اول كرونيك ننشرها ، باللهجة الجزائرية، من قلمي 💗💗 نتمنا تقراوها وتعطوني راي...
