أخبرني الحقيقة (باللهجة الجزائرية)

8 (التعريف بالبطل)

الحلقة 8 ::

فاصل .. ادهم 24 سنة .. طويل ، البشرة حنطية ، عينيه نوازات ، شعرو حكل وعندو اللحية خفيفة، كور وديكور 😍😂 ، من صغرو يحب السبور ومطراسي الكور ديالو .. عندو ختو وحدة لي هي سهام 30 سنة لي طلقت من ثلث سنين وعطاوها حق الحضانة ومنعو راجلها يشوف بنتو باسك يشرب ومايصلحش ، وكلما يجي يحاول يشوف مرام تمنعو ويخرجلو ادهم يشبعو مخبط.. باباه حياتو كامل خدام عند سي وحيد اكبر رجال الاعمال ، مي الناس كامل تعرف لي هو يخدم الزطلة ، وفريد خديمو لي كامل حياتو يذل في روحو على جال لقمة العيش لولادو .. حياتهم كامل قيس قيس ، وادهم عانا فحياتو ونحقر ونذل بزاف من عند الناس ، مي قرا وكمل على جال سهام ، لي كانت ديما وراه بعد ما حبست هي قرايتها فالبيام باش تخدم وتعاون باباها نضرت بزاااف ، وقعدت ورا ادهم حتى كمل قرايتو .. وغير جوز لارمي، الناس لتم (منعرفش وش يسموهم 😂) عجبهم شحال انسان مليح ويخدم من قلبو ، مع شوية معرفة من عند صاحبو وسيم لي تلاقاه في لارمي ورجعو حباب ، قدر ادهم يرجع عميل سري مع سلك الشرطة (ماتسقوش كيفاش ولا تقولو مكاش منها ، خلو لواحد يخرط في راحتو 😂😂 معليش حاولو تامنو وخلاص 😂😂) ، بعد ما عرفو بلي عندو علاقة مع سي وحيد ، قررو انو رح يخدم عندو كوم كوا خديم كيما باباه مي هو يجمع منو المعلومات حتى يطيحو ويقدرو لابوليس يعتاقلوه ، باسك هو مايخدمش بيديه ودايمن يسلك من تهم التهريب.. على هذا ادهم يكره وحيد ويخدم معاه من فوق القلب ولوكان يقدر يقتلو ، وسورتو كي يشوف باباه لي يعتابرو القدوة ، يذل روحو قدامو هكاك