أخبرني الحقيقة (باللهجة الجزائرية)

16

ماتناسوش تتفاعلو وتدعموني 😘

الحلقة 16 ::

خرجو الجيران على صوت العياط ومعاهم فريد ، غير شافو ادهم مرمي فالارض وقدامو دمو يشرشر هكاك بداو يعيطو ، فريد شافو قريب نشل ، راح يجري ليه وهو يبكي ، رفدو وقعد يضرب فيه ..

فريد : ادهم وليدي، تعيش افتح عينيك ، تعيش ماتروحش وتخليني ، ادهم ، ادهم ، وليدي

فتح ادهم عينيه بالعقل ، غير شاف باباه تبسم تبسيمة ماتبانش كامل ..

ادهم : با..با .. اسمح..لي ..

وعاود رجع غلق عينيه ، فريد بدا يضربو ويعيط وواحد من الجيران لي عندو طونوبيل رفد ادهم ودارو الداخل وفريد عيط لسهام تروح معاه وصفية تقعد مع مرام ، غير شافوه هكاك بالدم ديالو بداو يعيطو ويضربو في رواحهم ..

صفية : وليدي ، يااااا يمااااا على وليدي توخذ في صغرو ياااااا يمااااا

جاو الناس ودخلوها لدارها وقعدو يسكتو فيها ، ولخرين راحو للسبيطار ، وسهام قاعدة من اللور وحاطة راس ادهم على حجرها وتبكي وتدعي ربي يسلك ..

لحقو للسبيطار ، جاو الفراملة يجرو ، داروه فالحمالة (منعرفش وش يقولولها 😅) وبداو يجرو بيه وسهام وفريد يجرو معاهم .. جا عندهم الطبيب وقالولو وش كاين ووش صرالو

طبيب : وجدو غرفة العمليات ممكن تكون كاينة اصابة فالطحال ودخلو المريض .. ازربو هاياااا

دخلو ادهم لغرفة العمليات ، شوية وجا الطبيب الجراح ومعاه المساعدين وبداو التشخيص ديالهم باش يعرفو اذا ينحولو الطحال ولا لالا
كانت سهام مع فريد برا تبكي الدم على ادهم ، قلبها يتقطع عليه ، حتى سمعت ميساج فالتيليفون ديالو ، فتحاتو كانت كنزة ..

كنزة : ادهم احكي معايا ، ماجانيش الرقاد

ماعرفتش سهام كيفاش حتى عيطت لكنزة ، كانت محتاجة واحد يهدر معاها باسك كانت في حالة ..

سهام : الو

كنزة تخلعت كي جاها صوت مرا ، مافهمتش روحها علاش تقلقت وحبت تخرج من التيليفون باش تخنقها ..

كنزة : شكون ؟

سهام (تبكي) : كنزة .. انا سهام .. ادهم .. ادهم ...

وطرطقت بالبكا ، كنزة مافهمتش كامل وش كاين ..

كنزة : وش بيه ادهم ؟ كاش ما صرالو ؟

سهام (تبكي وتشهق) : رح يموت ، خويااا رح يموت ، طعنوه بالموس لكرشو وفقد بزاااف الدم .. كنزة قوليلي مارحش يروح علينا

وعاودت طرطقت بالبكا ، كنزة حست بماء بارد نزل فوقها وهي تسمع فيها ، طاحو دموعها بلاما تحس ، قعدت هكاك جامدة ما تتحركش ، وبدا قلبها يخبط وجسمها كامل يرجف وحدو ..