أخبرني الحقيقة (باللهجة الجزائرية)

20

اتفاعلو ودعموني ❤❤

الحلقة 20 :::

#فالقصر ..
وصلت الطونوبيل لي كانت فيها ريناد .. حبطت تجري للصالون ، كانت سعاد وميس وفدوى لتم قاعدين ..

فدوى : هاذي نتي !!

ريناد : جدة لازم نقولك حاجة

سعاد : وشنو ؟

ريناد : شفت كنزة دوك قاعدة مع طفل فالجنينة وقالها بلي يحبها ..

لتم كانت ليليا حابطة من بيتها باش تقعد معاهم ، غير سمعتها الدم حبسلها فجسمها ، غلقت عينيها ، خلاص ريناد طرطقت بومبة !!
ناضت سعاد من بلاصتها وقعدت تخزر فريناد ، ولخرين دارو يدهم على فمهم ..

سعاد : راكي عارفة وش راكي تقولي ؟

ريناد : سقسي الشوفور يقلك جدة .. ما عنديش علاش نكذب كذبة هكدا ..

سعاد طاحت على الكانابي وقعدت تلهث .. راحو يجريو عندها

ميس : يمااا سعااااد

فدوى : جدة جدة جدة !!

لتم دخلت كنزة تجري ، غير وصلت للصالون خزرت فيهم ودارو كامل يشوفو فيها ، خزرت فريناد لي كانت تتبسم بانتصار ، عرفت بلي الخبر وصل لسعاد ، قعدت واقفة بلا ما تتحرك ووجهها صفر ، غير شافتها سعاد بدات تعيط ..

سعاد : روحييييي من وجهيييي ، روحي عليااااا ، ما نحبش نشوفك

راحت ليليا تجري جبدتها من يدها وطلعتها لبيتها ، وغلقت الباب .. كنزة طرطقت بالبكا ..

كنزة : وش رح ندير دوك يا ربي !!

ليليا : يا كنزة من ذاك العام وانا نقولك اخطيك، بعدي عليه، الشي لي راكي ديري فيه غالط، ماسمعتيليش ماسمعتيليييش !!

كنزة : ليليا !! وش رح ديرلي ؟؟ وش رح ندير ؟؟

ليليا : معلاباليش !!

ليليا دموعها حبطو ، خافت بزاف عليها ، معرفتش وش ممكن دير ..
التحت ، الرجال حبطو كامل من بيوتهم كي سمعو العياط

فاتح : وش كاين يما ؟؟

ماهر : وش بيك يما ؟ وش لي صرا ؟؟

سعاد : ربيتها وكبرتها ، ما خليتها تعوز ولا حاجة ، درت فيها كونفيونص ، غدرتني ، وطيحت بنيفي فالارض ، ووسخت سمعة عايلة #####

قعدو يخزرو فيها مخلوعين ، ما فهمو والو

كريم : شكون هاذي يما ؟؟

ريناد : كنزة

تخلعو كامل ، ماكانوش يستناوها منها

ماهر : صح يما ؟؟

ما ردتش عليه سعاد ..

ريناد : ايه شفتها بعيني

سمير : شكون ياكد بلي صح ؟