أخبرني الحقيقة (باللهجة الجزائرية)

6

الحلقة 6 ::

#القصر ::
جازت سمانة والنسا كل يوم يخرجو يوجدو جهاز ليليا وفدوى وياسر شرا دار قريبة لقصر جداتو وجاب خدامات يسيقوها وخدامين يخدموها على حساب الذوق تاع ليليا ..

وحد النهار ، الصباح مع الحداش ، كانو كامل فالشركة .. وحتى سعاد راحت هذاك النهار باش تراقب الحسابات والخدمة كيفاش ماشية باسك فالفترة اللخرة رجعت تشك شوية فالخدامين .. المهم ، فالدار كانو كاين كنزة مع ميس برك ، اسماء راحت تشري حوايج لروحها ولفدوى .. كانت كنزة فالجادران قاعدة مع سليم ، هكدا كل مرة سعاد تخرج هي تروح تقعد معاه ، تحب تحكي معاه بزاف وكل مرة تروح لدارو عند مرتو وبناتو لي رجعو صحاباتها ، مي لوكان تسمع بيها سعاد تمنع عليها الخرجة باسك هوما صح صح زواولة وفقارا وسعاد قاع الطيبة لي فيها مي تحقر بالعين وما تحبش تخالط الزواولة عكس كنزة اكيد ..
كانت كنزة تقصر مع سليم ..

كنزة : عمي قولي وعلاش راك تخدم لهنا عندنا ؟

سليم : حابة تحاوزيني

كنزة : يخاااه عمي حاشا وش بيك ، راك كيف بابا ونديرك فوق راسي ومكاش لي يدنا ليك وش بيك

سليم : نقصر برك بنتي هههه ، انا جدك ربي يرحمو جابني لهنا راني نخدم لهنا فايت ثلاثين سنة

كنزة : احكيلي شوية على جدي

سليم : وش نحكي وش نخلي كان انسان هايل ، الناس الكل تحبو وتشكرو ، كان كريم وكان ما يبخل بوالو على حتى واحد ، مي هو كان دايمن كيما جداتك صح يدير الخير مي ما يحبش يخالط الزواولة على هاذيك لي يماك....

خزر فيها وبلع فمو بيدو وخزر فكنزة لي ما فهمتش وش يقصد ، وعاود دار يكمل خدمتو ..

كنزة : وش بيها ماما ؟ كمل عمي علاش سكتت ؟

سليم : اه كنزة بنتي تعيشي لازم نكمل دوك ترجع لالة سعاد تلقاني مزال ما كملتش

كنزة : مي عمي ...

لتم سمعو عياط وبكا تاع طفلة صغيرة ، خزر سليم فكنزة مستغربين ..

كنزة : عمي سمعت كيما سمعت ؟

سليم : والله غير سمعت ، وش كاين ؟

راحت كنزة تجري لباب تاع السور تاع القصر لقات الحراس واقفين والباب مغلوقة ويخزرو برا ..

كنزة : وش كاين ؟

حارس : مادموزال كنزة ، ماعلاباليش هذا وين شفت هاذيك الطفلة واقفة وتبكي وحدها

كنزة خزرت فيها كانت طفلة تاع خمس سنين ، بزاف شابة وكيوت ..

كنزة : افتح الباب تعيش نشوف وش بيها

الحارس فتح الباب وكنزة راحت تجري عند الطفلة ، قعدت على ركبتها وعنقت الطفلة وحاولت تسكتها ، مسحتلها على شعرها حتى سكتت .. تبسمت معاها