أخبرني الحقيقة (باللهجة الجزائرية)

26

فوت وبارطاجيو بليييز 😍

الحلقة 26 ::

بعد ساعة ..
خرج ادهم من البيت ووراه كنزة كارهة الرحمة تاعها ، شافوهم العايلة ، جاو عندهم ..

صفية : رح تروحو خلاص ؟

ادهم (ببرود) : ايه ..

سهام : ارواحو عندنا من بعد ..

ادهم : ان شاء الله ..

خرج ادهم ولحقاتو كنزة .. ولخرين قعدو مخلوعين فيهم ، ما فهمو والو !!

راح ادهم وكنزة للدار بالطونوبيل تاع صاحبو ..
دخلو وقعدو يكتاشفو الدار لقاوها مديكوريا وكلش فيها مليح ، ابارتومون فيها زوج بيوت وصالون وكوزينة ودوش .. ادهم راح للكوزينة يشوف وكنزة راحت لواحد من البيوت وتكسلت على السرير ، تخمم فالجحيم لي رح تعيش فيه ..
ادهم كمل من الكوزينة وراح يشوف البيوت ، ماكاش علابالو بلي راها فهذاك البيت ، دخل غير شافتو ناضت تجري رفدت المخدة زعما باش تضربو بيها لوكان يدنا ليها ..

كنزة : اسمع .. تمسني ما تلوم غير روحك .. انا منحبكش والزواج هذا ما عندك وين توصل بيه ، اقعد بعيد عليا ..

ادهم تبسم بحرقة كبيرة وبسخرية فنفس الوقت ..

ادهم : حقا انا ماعنديش مستوى كيما تاعك ، بصح عندي نيف والحمد لله كابر راجل ، هكدا؟ .. مانيش رخيص باش نمس مرا بلا ارادتها وسورتو ما تحبنيش ..

كنزة : راني حذرتك ، اقعد بعيد عليا خيرلك

ادهم : كنزة، انا ونتي خلاص... مزال ماتفهميها هادي؟ كلش خلاص وما كاين حتى حاجة تربطنا

وخرج وخلاها مصدومة ، الهدرة تاعو قطعتلها قلبها، مي مزالها خايفة منو اذا يمسها ..
خرج ادهم من الدار وعاود تفكر كيفاش جمال وصاه مايخرجش من الدار بزاف ، عاود رجع وراح للشمبرة الزاوجة وغلق الباب وتكسل على السرير وقعد هكاك يخزر فالبلافون يخمم فالحالة لي راهو فيها ..

العشية .. خرجت كنزة من البيت ميتة بالجوع ، شافت البيت مغلوق قالت باينة يكون خرج .. راحت للكوزينة كانت فارغة تصفر .. ماحبتش تعيطلو ، مالا راحت لبست قشها وجات خارجة ..
لحقت للباب فتحاتو حتى حكمها من يدها .. تخلعت ، دارت خزرت فيه ، هو دخلها وغلق الباب ..

كنزة : وش بيك ؟؟

ادهم (ببرود) : وين رايحة ؟

كنزة : نجيب الماكلة

ادهم : رح نقولها مرة وحدة وما نعاودش ، رجلك ما تنحطش خارج الدار ..

كنزة : وش حب يقول ؟

ادهم : حب يقول ما تخرجيش من الدار ، يا معايا يا مكاش ..

كنزة (تبسمت بسخرية) : والله ؟؟!! وش بيك ، والله غير سيريو وش بيك ؟ جبتني لهنا باش نرجع بوبية عندك ، باش ديكوري بيا الدار وتدي وش حبيت مني ، قول ؟؟ انطق ؟ وش راك حاب من عندي ، وش درتلك باش تعذبني هكدا ؟