أخبرني الحقيقة (باللهجة الجزائرية)

35

هااااااي 💖 سمحولي اذا البارت قصير ، باسك راهم عندي الافكار مي مانيش عارفة نرتبهم مليح ، مالا راني نكتب بالعقل باش ندير حاجة مليحة وما نبداش نخلط 😁

الحلقة 35 :::

شرقت الشمس .. وكنزة ما رقدتش كامل كانت غير تخزر لادهم لي كان مزالو طايح ، وهي غير تبكي ، عينيها تنفخو وحماارو .. كان معاهم غير هذاك الراجل ..

كنزة : مممممم مممممم اااممممممم

خزر فيها الراجل وقلب عينيه ..

كنزة : امممممم.. همممممممم هههممممممم

الراجل : يااا ربي وش بلاني بيها !!

ناض فتحلها فمها ..

كنزة (تبكي) : تعيش خويا تعييش ، ارفدو من الارض وحطو فكاش بلاصة ، نزف بزااف دم ، تعيش تعيش .. على الاقل نوضو ولا هزو ، تعيش تعيش ، شوف كيفاش راهو ..

خزر فيها الراجل مستغرب ، عمبالو رح تعيط وتقولو اطلقني ولا عاونني ، مي هي كانت خايفة على ادهم كثر .. رجعلها الراجل القماشة وراح قعد كيما كان .. كنزة قريب هبلت ، ما لقات ما دير ، حاسة روحها عاجزة وهي هكاك تخزر فيه مرمي قدامها .. ندمت على كل نهار قالتلو كلمة قاستو ولا جرحاتو ، تفكرت كامل لحظاتهم مع بعضهم ، حست روحها مخنوقة وحابة تروح لعندو وتعنقو وتقولو سمحلي ..
دخل عندهم وحيد يمشي بانتصار زعما ..

وحيد : اااو الشابة مارقدتيش ؟؟

ما خزرتلوش كنزة قاع ..

وحيد : ااه زعما طيحي خشينة .. اوك

دور راسو وخزر للراجل ودارلو براسو باش ينوض ادهم .. راح الراجل صب فوقو بيدون ماء بااارد وضربو بزوج كفوف .. كنزة غلقت عينيها ما قدرتش تخزر فيه ..
فطن ادهم ، وبدا يفتح عينيه ، جسمو كامل يسطر ، وراسو رح يطرطق .. خزر فالراجل و ف وحيد ، تفكر وش راهو يدير لهنا .. دار ديراكت يحوس على كنزة ، شافها هاكاك عينيها رح يطرطقو بالبكا ..

ادهم (يهدر بصعوبة) : كن..كنزة ، راكي مليحة ؟؟ قو..قوليلي ؟؟

كنزة كانت خايفة ومرعوبة مي فنفس الوقت كي سمعت صوتو رتاحت شوية .. هزتلو راسها بمعنى ايه ..
ادهم تبسم كي شاف بلي مزالها مليحة ..

وحيد : مزال ما يخلاص الفيلم تاعكم ؟

خزرلو ادهم خزرة تقتل ، لوكان جات الخزرة تحرق لوكان راهو تحرق كامل ..

وحيد : واش سي الشباب ، رح تهدر ولا راح نباتو لهنا ؟؟

ما جاوبوش ادهم ..

وحيد : يا ربي رح ينشفلي ريقي ..

صونا تيليفون تاعو .. كان هذاك الراجل لي كان معاه فالبيرو ذاك النهار ..

وحيد : الو .. وي .. ايه ارواح .. راك تعرف وين .. ايه .. اه لحقت .. ايه .. اوك

كوبا عليه وخزرلهم يتبسم ..