البارت الواحد والعشرون
نور شافت هاي الامرأة كاعده من دخلو للمقام بس محد من اهلها انتبه عليها او اهتم الها دخلنه عادي كملنه مراسيم الزياره وكعدنه ..
الباب مفتوحه وهاي المريه صارت مقابيلنه الامرأة احسها تباوع علينه تنتظرنه حته نروح يمها !! من شكلها كولش ارتاحت نور حسيتها تختلف عن البقيه الراحت عليهم حست بيها شي غريب يجذبها حته تروح وتكشف يمها ..!!
سرى ..ماما شوفي هاي المره شدسوي ؟؟ وليش النسوان يمها يسألنها وتجاوب ..؟؟
ماله نور .. يمكن تاخذ خيره او تكشف بالقران ..
سرى .. خلي اروح يمها وتاخذلي عندي فضول اعرف ..
نروح بس احنه البنات اني وساره وبنات خالتي وامي وخالتي يبقن كاعدات بداخل المقام
نروح عليها ونطلب منها تكشفلنه ..
اول شي بنات خاله..
الامرأة تاخذ القرآن وتفتحه من بعد ..مااخذت..اسمائهم واسم الام .. تحجي عن حياتهم بشكل عام اشياء طبيعيه عن الدراسه وعن الزواج مثل سوالف البنات يعني ماكو شي ..مهم ..
يوصل السره النور ..
تلتفت عليها المره .. انتي انطيني اسمج واسم امج ..
نور .. لا اني مااريد مجرد حبيت اسمع وياكم لا اكثر..
الامرأة .. (تضحك) .. حقج بعد الشفتي صعبه عليج تسمعين او تصدكين باحد بس مع هذا اكولج انتي قويه .. كدرتي تتخطين بس بعد وراج خطوات اكثر واتعب بهوايه اذا صبرج قوي راح تقاومين واذا استسلمتي الها راح اتبعج طول حياتج ؟؟!!! .
نور ( استغرب من كلامها حيل وشلون عرفت ع شغلتي )
.. شنو قصدج وضحيلي بعد ''
الامرأة .. قصدي تعرفي كولش زين .. ماكو داعي احجي بعد اكثر .. بس احب اكولج الشخص البالج بعده ينتظرج ونهايتج ويا راح تكون حلوه بس يرادلها صبر ..
طبعا هنا ساره وبنات خالتي منصدمين من الديسمعو وحده صافنه بوجه الخ ..😨😨
نروح نرجع يم خالتي وامي .. كل وحده من البنات تحجي شنو كالتلها المره بالتفصيل واني افكر بيني وبين نفسي شديصير بيه؟؟
اقرر ارجع ع الامراة الشفتها اسألها بعد اكثر التفت اروح الكيها ماكو ادور عليها ماموجوده اختفت فجأة انمحت ومالها اثر ..
نرجع للبيت ..👇👇
تقريبا دنيا مغرب .. قبل مندخل للبيت نسمع صوت كولش حلو وخاشع صوت تجويد قرآن ..
اول وحده تدخل نور تلكي ابوها يقره قرآن بأعلى صوته .. صوت حنين ودافي من تسمعه تخشع ويرف كلبك بسهوله .. الله يحفظك بابا حبيبي ..
سرى .. الله عمو شنو هالصوت الحلو الله يزيدك ايمان اكثر بعد ..
خاله نور .. ابو نور عاشت ايدج تدري اول ما سمعت الصوت عبالي بالتلفزيون ما صدكت انت دتقره اله ام نور كالت ..
ابو نور .. هههه الله يسلمكم عيني .. كل فتره نحتاج نرقي البيت بأيات القران وهسه جبت مي وقريت عليه وكلت ارش البيت كوله بي الاركان والحياطين ..
ابو نوو ياخذ مي بسراحيه ( اناء )ويقره عليها سوره الفاتحه وسوره الاخلاص وسوه البقره جزء منها وسوره الكافرون والفلق .. ويرشها باركان البيت اهم شي تكون بعيده ع دوس الارجل .. ويخلي بطشت وكولنه نسبح منه او حته نشرب ممكن ..
نور .. بابا تدري انت من رشيت البيت ورقيته حسيت البيت كولش نظيف بي ريحه طيبه زاكيه اول مره اشمها ..
مها .. اي والله عمو صحيح كلام نور .. واني قررت بس اروح البيتنه اسوي نفس الرقيه وارش بالبيت كوله..
.. 👇👇
تمشي الايام ويخلص الاسبوع وثاني يوم لازم بيت خالتي يرجعون المنطقتهم ..
قبل بيوم العصر نور جانت نايمه وفجأة تصحى ع وصوت كرار .. يبجي ..
نور .. ماما ماما وينج كرار ديبجي (( محد يجاوب ))
تروح نور حته تشوف اخوها تلكي واكف بره بالحديقه ويأشر كدامه ..
نور .. ها حبيبي شبيك شنو وكعت ( تتفحص كرار مابي اي شي ) .. تحاول تخلي يسكت.. بس بعده يبجي ويأشر بايده .. تباوع نور ع المكان اليكولها عليه كرار متلكي شي تاخذ وتروح ع امها تلكيها هي وخالتها بالمطبخ ..
نور .. ماما مو شكد صحت عليج كرار لكيته يبجي بره وحده ..
خاله نور.. شوكت صحتي اني هنا يم امج كولشي ما سمعت ..
ام نور .. ليش شبي اخوج هسه جان يمي يلعب اخاف شاف بزونه لو شي حشره وخاف ( تاخذ كرار وتروح تغسله .. ترجع تحاجيني ).. وابد ما سمعت صوتج صحتي وتدرين المطبخ قريب ع الحديقه لو صايحه عليه جان سمعت ..
نور .. ترتبك وتغير الموضوع اي يحوز اني اتوهمت..
تدخل نور الغرفتها تظل تفكر .. تصيح ع امها ..
نور .. ماما تعالي شويه اريدج
ام نور تجي عليها للغرفه تروح نور تسد باب الغرفه حته محد ينتبه ..
نور .. ماما اني متاكده كرار شاف شي وكام يبجي.
ام نور .. اي مو كتلج يجوز بزونه فاتت من يمه وجفل
نور .. ماما حبيبتي ركزي ويايه كرار مرعوب وكولش خايف ويأشرلي ع شي ومن اباوع اني مااشوفه.. كرار شاف شي بره .. واحتمال بابا من قره الرقيه بالبيت ورشه هذا الشي بقه بره ومادخل ماما ازيدج علم تره الاطفال يشوفون هالاشياء ؟؟ عرفتي شدقصد ....
ام نور .. اسكتي ماما لتحجين بهيج سوالف اعوذ بالله من الشيطان الرجيم .. ماكو شي وكولشي ماشاف ان شاءالله وديريالج تبينين شي كدام خالتج تعرفيها تخاف خلي تروح باجر بالسلامه وعود نحجي الابوج ..
نور تبقه شويه بغرفتها تعرف بان الامرأة التتبعها بعدها موجوده وهذا تنبيه الها عن طريق كرار واختارته بالذات لان تدري بنور شكد تحبه وتخاف عليه ..
بعدين تطلع ع البنات تلكيهن كاعدات ع التلفزيون تكعد يمهم عادي ومتبين شي ...
هنا وبكل الاحداث التصير نور قويه وتقريبا كل اليسمع المرت بي يحسدها ع قوتها ..
يصير اليوم اليغادرون بي بيت خاله نور .. الكل حزين .. نور تودعهم بزعل وساره بعصبيه وهي اصلا زعلانه من قبل يوم من سمعت راح يرجعون ..
ساره .. اويلي منج يا خاله مو كتلج ابقي بس هاليوم شعندج قابل تاركه جهال وراج مو زلم عندج 😭😭
خاله نور .. هههههه سرو حبيبي هو شنو فرقه هاليوم حاله حال البقيه واول وتالي نرجع .. تبوس ساره وتودعها .. ويرحون ..
ثاني يوم .. نور تروح للمدرسه تطلع تراجع دروسها هي وسميه بالفرصه .. تشوف لمه مال بنات ..
نور .. هاي شكو ع شنو ملتمين
سميه .. ماادري تعالي نشوف ..
تروح نور هي وسميه تلكي حوراء بالنص تبجي والبنات ملتمات عليها ..
#سوسه_الربيعي
