البارت الثالث والعشرون .
اهل عمار يوصلون الأربيل .. يأجرون فندق يرتاحون بي كم ساعه من بعد ما حجزو يم الدكتور وعرفو مكانه ويجي وقت الحجز يرحون .. لدكتور .. بالعياده كاعدين ينتظرون السره .. هنا عمار اخو كايده ويستند عليه حته يكدر يمشي .. ومينطق ولا حرف.. اكو شخص من المرضى كاعد بالعياده ( شكله عربي مو كردي ) نظراته كولها ع عمار ويراقبه شلون يتألم .. يسأل ابو عمار ..
الشخص .. حجي شبي الولد يأشر ع عمار ..
ابو عمار .. وليدي مريض صارله فتره ومنعرف سالفته شنو .. احنه من بغداد وماخلينه دكتور الا وعرضنه عمار عليه وماكو فايده اخر شي .جينه لهنا الاربيل لان وصفولنه هذا الدكتور بلكت الله ويكتبله شي زين ويطيب ع ايده .. انت من وين شكلك وكلامك عربي لهجتك تكول انت من اهل الجنوب ..
الشخص .. هههه اي صحيح اني اصلي من البصره بس اشتغل هنا باربيل واني بحدمتكم اذا محتاجين اي مساعده ..
اخو عمار .. تسلم اخويه بارك الله بيك متقصر ..
يوصل السره ويصيحون اسم عمار ياخذه اخو وابو ويدخلون ع الدكتور .. الدكتور يكتبله ع عده فحوصات وتحاليل خارج العياده .. يكملون كل هالاجراءات تقريبا عده ساعات مشت .. الشخص الجان كاعد بالعياده يدخل لدكتور ويكمل فحص وياخذ العلاج من الصيدليه بس كل هذا وهو يبقه ينتظره العمار ميقبل يرجع للبيت .. هو متقصد يبقه ينتظر لان عنده غايه تجاه عمار ..
اخو عمار ياخذ اوراق التحاليل والسونار والاشعه وكل الفحوصات ويدخل لطبيب ..👇👇
الطبيب .. ( الطبيب يتكلم اللغه الكدريه بس طبعا من كثره زياره المراجعين العرب الة اتعلم اللغه العربيه بطلاقه ..) الطبيب يتفحص باوراق التحاليل والفحوصات .. الدشوفه اني هسه جميع هاي الفحوصات نظيفه تبين اخوك ما مصاب بشي .. الدم نظيف والمعده نظيفه الكليات تعمل بشكل جيد .. مختصر اخوك بصحه جيده وماكو شي يدعو للقلق ..الافضل اله تاخذه للبيت حته يرتاح او تعرضه ع طبيب نفسي .. وكول هاي الادويه والعلاجات الماخذها قبل مسويه اضطرابات بالمعده .. حاليا اني مااكتبله شي لان من الاساس ميحتاج ..
اخو العمار ...
يتعجب من كلام الدكتور .. ياخذ الاوراق ويطلع .. يلكي ابو عمار كدامه يروح يحجيله عن الطبيب شيكول .. وبشنو نصحه .. ابو عمار يتفاجئ من السمعه ويكعد حاير بنص العياده ميعرف شيسوي بعد كل هالتعب والانتظار وتالي ميحصلون اي نتيجه ..
الشخص البقه ينتظره العمار سمع كل حديثهم متقصد هو يسمعه لان اكو فدشي اباله .. يروح ع ابو عمار ويكوله 👇👇👇
حجي ممكن احجي وياك بموضوع ..
ابو عمار .. اي اتفضل احجي .
الشخص .. حجي تره ابنك مو مال طبيب شغلته تختلف ومعروفه..
ابو عمار .. شنو قصدك مو مال طبيب تعرف شي انت ؟؟
الشخص .. حجي شوف بطنه شلون منفوخه وشوف ملامح وجهه ركز بيها اكيد مو نفس ملامحه قبل ..
شوف حجي عندي الانسان اليكدر يساعدكم بهيج امور .. انسان متدين ويخاف رب العالمين وكل الشغلات اليسويهن بالقرآن ..
