كرونيك:صائدة الرجال

08

 8:

مرة من مرات....راجل باهي شيوبة مذخم....اما موفي في بدنو....مالك سيري وتلة....ما يجيش ديما....يتفقد و برا... عندو ولد لاهي بامورو هنا ....ولاخر هامل في الخارج...تقولوا منين ليك هالمعلومات نقلكم من تبتبيتي على ضحيتي....تقولو درت بالولد خير مالشايب...نقلكم الشايب احن....و محروم يا ضناي....مرتو متوفية...و ولدو صعيب مسكر مربط....يعرف خدمة اكهو....و عندو كره اعمى للنسا....ما نعرفش علاش....و ما يهمنيش نعرف....خاطر ما عندي ما نعمل بيه....الشيوبة سي محمد عندو نهيرين يدور فيهم على وتلتو في وقت معين....ريقلت جوي و قعدت بحذا لوتيل نستنى....مع جيان كرهبتو....رميت روحي قدام الكرهبة....خباثة خاطر الكرهبة نقصت في السرعة بش تراكي قدام لوتيل وانا قصيت من قدامها....و اووووووب نجي طايحة ما في عيني بلة.....هبط الشوفور و الشايب...._يا رسول الله ....تي ماو حل عما عينيك....ما تراش المرا اكاكا....والشوفور يتغصور_والله هي ترمات قدام الكرهبة....بالك تحب تموت...._اسكت اسكت خلينا نشوفوها...._مدموازال....بربي فيق و يضرب في خدودي....عملت روحي نئن...و جليت عيني بالشوية....غزرلي باهت_اللهم صل عالنبي....لباس بنتي لباس...._علاه ما خليتونيش نموت....علاه....و نصيح....وهو يهدي في...:استهدى بالله بنتي....علاه الزين هذا الكل يمشي خسارة...._شكون حاس بيه هالزين؟...مرت بابا اللي تقتل في عرق بعرق؟ولا بابا اللي ملوح في السبيطار ...._وووه حممتلي قلبي....ارتاح الساعة ....هيا نهزك للكلينيك...استلبست و قتلو:_لا يعيشك....لباس....خليني نمشي....وقمت ننفض في حوايجي....قعد شادني من يدي و يثبت في خيالي....وصدري....و ساقي العريانة...._وين تمشي....وانا ما زلت نسيبك...تلفت بعث الشوفور....وقلي اطلع.....طلعت معاه....وعمتلو طرح يتم ما نحكيلكمش....دموعي سبالة....وانا نشكي بهمي من مرت بابا ....الطرايح اللي عطاتهملي....شري و عراي....بابا المريض وما عندو والي....حتى رصاتلي هملت في الشوارع و مع اللي يسوى وما يسواش....عينيه لمعت كي سمع بعد ماسخفتو حتى دموعو عدها هبطت.....يصبر في و قلي:_ كل شي اليوم نعوضهولك....و كان تقعد مريقلة معاي ما ترى مني كان اللي يفرحك قتلو بتبسيمة عسل:_معاك حبيبي....المفيد ندلل....باسلي يدي كينو يوعد في وعد قاطع....مدلي لفة فلوس حطهالي في حجري و قلي:_ ،شد هذوم على الحساب....و هزني لواحد مالوتلة خاطيه موش تابعو يتلف في الجرة .....فطرني....وهزني عملت شوبينغ قال شنوة قال يفرهد في....وعطاني شاك ابيض قلي خوذ اللي تحب....ما خليت ما خذيت....شماتة فيه....كبيتلو وعدو....ملاين زرقا صرفتها في الماركات الكل ....لبسة....برفانات....مكياج....صبابط....سيكان....بالبونتو نشري على بعضو....ملابس داخلية....ما خليتش .....ما خرجت الا ما سخفت عليه و قلت يزيه.....هههههه....تعشينا....و شدينا الثنية لدار...يملكها على البحر...