كرونيك:صائدة الرجال

16

 16:

تماديت في الكلام....اللي عندي الكل بش نقولو....يلزمني نبرا من داي....نفرغ همي اللي عشتو سنين عمري....نخليهولو و نروح....كالافعى كتنزع جلدها و تخرج... _نعلبو الابات اللي كيفك....عايش حياتك بالطول والعرض وما تعرفش علي. ..حتى حية ولا ميتة....تي انت ما تعرفش وجهي....ما نعنيلك شي انا....و انا زادة ما تهمنيش....ما عنديش حتى ذرة احساس ليك....طز فيك يا دولة....طز في ابوتك و في دنيتك و في فلوسك....زاد احمار....و تغصور و بدا يجبد في النفس بالسيف....ومنها طاح ضربة وحدة....فشلت مرة وحدة....انا اللي كنت قوية و نسب فيه توة دخلت بعضي....انا اللي كنت نقلو ما عندي حتى احساس ناحيتك...فمة حاجة رفت في قلبي كيف ريتو هكاك....مشيت نحرك فيه و نكلم فيه:_سي كاظم....سي كاظم....ما نجمتش نعيطلو بابا....اما والله حسيت بالخوف عليه...قلبي بالدقداقة....نكلم فيه و ما يجاوبش ....دخلت بعضي علخر...رجعلي شاهد العقل و طلبت الاسعاف ....جاو هزوه....وطلبت من تليفونو نوامر اولادو... بش يلحقوه للكلينيك....دخلوه فيسع....و انا نجري وراه....ما ترددتش المرة هذي في اني نسعفو...ما خممتش في الفلوس...هاو طلع عندي قلب...و نحس....مالفحص لول طلع عامل جلطة...طلعلو الدم...اما اسعفوه فيسع....خاطر ما بطاش في الخلوط...خرجت للكلوار....نغزر لزوز اولاد جايين يفركسوا عليه و يسالوا على اسمو....هزيت روحي و روحت....ما نحب نرى حد ولا نكلم حد....روحت بحمل اجبال على اكتافي....مهدودة و تاعبة الى ابعد الحدود....و الدمع اللي شديتو تسيب....دموع سنين و سنين.....بكيت بكيت حتى عييت و رقدت...

قمت مرهوجة الصباح....دوشت و لبست وخرجت...مسطرة في مخي اش بش نعمل....صرفت شيكاتي....و الكارت فيزا متاعو عندي بكودها....جبدت جبدت مالكونت متاعو حتى قلت يزي...وما نبرد الا ما نفرغو...كلمت الكلينيك سالت عليه...قالولي روحوا بيه لباس...تجاوز الازمة....قلت خلي يرتاح الساعة و نمشيلو نفضحو قدام اولادو....ناخذ بايي في فلوسو وورثتي و هو حي قبل ما تاكلها الصحاح...و نرفع قضية نسب...موش بش نبدا نتيتم و نتبكى و نستنى الحب و الحنان ....كلو كعك ما يطير جوع....ناخو متاعي....و نهز راسي...ونقلب منظري ما عادش يراني....