كرونيك:صائدة الرجال

11

 11:

في العاصمة دولاب كبير....دنيا بلاعة تهزك لسابع سما و تحطك للقاع...دنيا تبهر ....تجلب ....تغرق....تفرفط .....و ما تنجمش تخرج....زدت غرقت في مشواري ....وزدت عبيت بالفلوس اما ما عييتش و ما شبعتش....نحب الحاجة لاي حد نفقدها....نحب ما نتلزش و ما نمدش يدي....ونحب نفش غلي في كل راجل تطيحو الصدفة في ثنيتي....اشكال جديدة و انواع جديدة هوني....اما الرابط واحد....قدام غريزتو حتى راجل ما ينجم يقول لا....وقدام حلاوتي و قوتي حد ما ينجم يثبت في بلاصتو....مهما تكون مكانتو فريستي يطلع ولا يهبط نجيبو نجيبو....الحاصل رجعت لدوماني بقوة كبيرة....مشيت مع برشا رجال...فتقت مواهبي ....شطيح...اغراء....فلووووس....دلال....المفيد ديما نخلص....ما فماش حكاية مهمة غيرتلي حياتي....الكلهم كيف كيف...وانا مواصلة نتفنن و عاملة بعمايلي....في المقابل رصيدي البنكي كبر...وهو يكبر وانا نكبر معاه .....و زيد نلوج على صيد اكبر على قد الطمع واللهفة اللي هازيني...لا شفقة ولا رحمة بحتى حد....حتى جات حكاية قلبت الموازين الكل.... فمة شخصية كبيرة معروفةفي البلاد...اكبر مصدر ومورد....رجل اعمال من النوع الثقيل...باسمو و سمعتو ....بشركاتو و افارياتو....راجل في الخمسينات....سي كاظم بن حسين....راجل تعرفو الدنيا الكل....تلفزة ولا راديو ديما يحكيو عليه....وبخلاف قيمتو في البلاد و قيمة افارياتو في اقتصاد البلاد....معروف انو قمار كبير ....و نسواني الى ابعد الحدود....برغم اللي عندو عايلة....اما كل واحد عايش حياتو...تقول لعنة و طايحة فيهم...اولادو فساد...بنت وحدة عندو معرسلها بيعة و شرية و تعاني.....مرتو من سفر لسفر....وهو يغرم في زمانو....كيف العادة درستو مليح مليح....اوقاتو....جياتو لشركاتو...سهرياتو....هو صيد رزين....وانا يلزمني نخدم برزانة....حوتة كبيرة و يلزمها شبكة كبيرة بش تتخبط تتخبط و ما تطلعش.... وكاي شخصية كبيرة...يلزم يبين اللي هو انساني....يتبرع لدور ايتام...و يزورهم ديما ...و يهزالتبرعات لاك الوليدات...هذي نقطة عرفتها عليه من البحث اللي عملتو عليه...لقيتها نقطة هامة بش نتلاقاو صدفة.....

يا سيدي....حصرت روحي على قاعدة...لبست فاست و جيب قصير في النوار...سورية بيضا بالريبان مالكول...طالون نوار....لميت شعري لفوق....عينين زرق بحر...اي لاينر...رموش طويلة مركبة...روج غامق...صاكي في جنبي فيه ماتريالي...وانطلقت....لدار الايتام....وصلت قبلو بشوية بش نكمل مهمتي و نقابلو في الخروج كيني صدفة...دخلت للمديرة....فرحت بي....و قلتلها نحبو نعملو حفلة في الدار و عايداتها الكل ترجع للايتام و في نفس الوقت يتفرهدوا ...رحبت بالاقتراح متاعي...و اتفقنا نتصل بيها كيف نريقل الامور الكل.... هزتني تدور بي في الدار ....عرضوني الصغيرات انواع واشكال....ماللي في اللفة حتى للمراهقة...يسخفوا....انا اللي قلبي حجر و غاضوني...منسيين....ما يجيهم كان اللي يحب يبيض صورتو ولا يغسل اموالو...وجعوني...وليت نفركس كيفاش نخرج فيسع....ما نحبش لا نسخف و لانضعف....انا ما عنديش قلب يحس كيف الناس....ما نتوجعش اما نوجع...هذاكا كيفاش نحب نكون...توصل في المديرة و ضحيتي جاي بكرهبتو و كورتاج و هيلمان..تبسمت بخباثة....نسيت اللي وراي و نخمم في اللي جاي قدامي...رخيت في مشيتي مع المديرة...و طالوني عدو نقب القاعة بحس خطواتو الراكزة...