كرونيك:صائدة الرجال

21

 21:

نرجعولها...تتململ...تئن ....كرايمها مكسرة...حاسة روحها مدقدقة...تحل في عينيها بالسيف...تحاول تستوعب اش جرى...عملت فلاش باك...بوها...الرزق...خوها...الباب تخلع...بركون وقهوة مرة...رجال..شمت حاجة...هنا تنطرت وحلت عينيها...ما نجمتش تتحرك...حاجة رابطتها...حبت تتكلم...ما نجمتش...فمها مكمم...دورت عينيها في البلاصة اللي هي فيها...حاطينها على كرسي...رابطينها....من ايديها و ساقيها...حاطين على فمها كمامة...جابوها كيما هي من دارها....عريانة....روبة قصيرة بروتال صفرا فيها تويتي....شلاكة تويتي....خاطر هي مغرومة بيه....ديما يتحيل و يهرب و يطير....شعرها مسيب طويل ....لا لنتي و لا شي مستعار....هي كيما هي على حقيقتها....تلكمتت على روحها....و حست بالخوف...موش مستانسة تخاف....اما مستانسة تخرج بشخصية الصيادة....ما استانستش تخرج كيما هي في الدنيا....تلفتت تثبت في المحيط اللي هي فيه....هي في دبو ولا شنوة....كراذن مكدسة....حس احصنة و حيونات بحذاها....ساعة ساعة يطل عليها فار....تزيد تقحرلو....ومخها يهز و يجيب....شكون اللي جابها؟....و علاه؟....و هي وين توة؟....زعمة خوها اش يحب منها؟...بش يقتلها على خاطر الورث....لا لا صعيب....اش جيبها لهنا و اش بش يخرجها؟....في مخها ما يعمل هالعملة كان خوها....مغلغل عليها و على الرزق....اللي تفك وعين تضحك و عين تبكي....كي تفكرت كبست روحها....ما عندها علاش ولا مناش تخاف ...ما تعودتش تكون خوافة...اتكات على الكرسي ....و تستنى شكون بش يهل عليها....و تسمع في حس كرهبة شدت فران قوي....قلبها تقبض....تسمع في حس ساقين تجري....كلام مش واضح...عملت روحها غمضت عينيها كينها ما زالت دايخة...حتى تتاكد من شكون جايبها لهنا....مدت وذنيها تتصنت تسمعش صوت تعرفو....شي..و الباب تنطر...بقوة...تخلع معاها قلبها....و لقات روحها حلت عينيها مالفجعة...بدنها العريان بكلو ترج...ولقاتو واقف قدامها....و العين في العين....هو يهز فيها و يحط من فوق للوطة طالع هابط.....و هي كيف كيف....غزرة لغزرة....قحرة لقحرة....نفس مقابل نفس....ند للند.....و من هنا بدات حكايتنا.