اعلان جريمة عشق

البارت الثالث

اعلان جريمة عشق
بقلمي #فاطمة_العبادي
قرائة ممتعه كيكاتي 🖤..

درت وجهي وطلعت من البيت و هيه تصيح وراي ، فتحت الباب و شفت صلاح ينزل بأغراضه من السيارة و هيه صاحت من وراي :- كررررررم بس اوكف فدوة .........

كرم :- ياا هلاااااا بصلوحي يا هلا بهلرجعه

صلاح :- ههههه هلا بيك يلغالي ، تحاضنه
و كتله :- نورت العراق برجعتك ، شلونك شلون صحتك ولك

دك على ظهري و كال :- والله يا حزام ظهري يمك أصير زين و كل الحيل بيه

كرم :- هههه يا بعد حيلي يا خوية

بتعدت ودنكت على الجنط شلتهن ، و دندخل كال :- هاي الاناقه كلهة شكلك متواعد وية وحدة صاكة

كرم :- لا وين يحضي بس كلت اطلع للكوفي يم الجماعه بس بعد جيتك اكابلك و اكعد

صلاح :- ههههههههه ما اصدكك لو مدري شنو ، اذا مواعد اتفل بكصتي

كرم :- لو ما اخوي الجبير جان سويتهة لا تخليني كبال خيارات صعبه

صلاح :- مرتي هنا ؟
اخذت نفس يمه نجلطت زين ما سامعهة :- اي نادين اليوم اجت

صلاح :- خابرتني كالت تريد ترجع كتلهة اي رجعي علمود اجي و افاجئهة

كرم :- هاا حلو لعد الزم جنطتك يلحبيب و روح فاجئ مرتك و اني اشوف الجماعه و ارجع اشتري مسواك للبيت لان خلصتهة مطاعم و الثلاجة موشله

صلاح :- ههههههههه لا ترجع اخذ راحتك
غمزتلة و كتله :- الله ينصرك على الحرب القادمة

خذيته بلضحكة و نسحبت من يمه ، بعد ما حجيت وياها قبل لا اطلع سمت بدني
حتى حسيت بلقرف منهة

شغلت سيارتي و طلعت لبست نظارتي الشمسيه
و شغلت أغنيه محمد السالم ، الو ها يحبيبي البارحة شلونك ،
رفعت صوت الاغنيه و امشي بلسيارة ، و الازدحام شي ثاني

طفيت الاغنيه و فتحت جامة السيارة ، اباوع زفه عرس
و سيارة كوستر كلهة بنات ، و اني من اشوف بنات اتخربط

لابس نظارتي وعين كدام و عين عليهن ، كل وحدة تكول گمر مو بنيه
اني فاتج جامه سيارتي وهنه فاتحات هم

وحدة منهن كالت :- يبووووي جعلني النظارة و حاطني على عيونه ....

اني مسوي نفسي ممهتم و من اباوع نظرا سريعه ما يلاحظن
نزعت النظارة و اسمع صوت ضحكهن العالي و يركصن ضلن يهوسن

وحدة تكول :- فدوة للعيون

عود اني كلش صرت رفعت جامة السيارة و باوعت عليهن نظرا اخيرا عفسن وجهن
و نوب كلت كافي ما اباوع بعد عيب

بطلعت الروح خلص الازدحام و وصلت للجماعه
صحت :- شلوووونكم يلشرفاء ولد الشرفاء

_وينك كل ما نريدك تجي تتأخر ، شنو من صرت محامي لحد هاي الساعه بلسنه حسنه نشوفك