رواية بترجعين؟ // بقلم،، كاملة للكاتبة جود الحزن

23

4م
حكت راسها /وش ضيوفه؟
روان/مدري عمور وصى فيهم يقول راح يبقون في ضيافتنا هالفترة حسسوهم انهم في مكانهم
مرام وقفت بسرعه /خسارة ودي كان اشوفهم قبل امشي بس نواف برا ينتظرني
روان/ما عليه بتشوفينهم لاحقه
مرام باست خدها/زين حبوبة اشوفك على خير..
روان ابتسمت لها /استودعك الله.. سلمي على نواف
مرام بنظرة جانبية/يعنني اعرفه
ضحكت روان و لا علقت و مرام قالت و هي رايحة تنزل /يبلغ ان شاء الله
نزلت روان للمجلس النسائي اللي فيه ام ليلى و بناتها و ام عمر و وريف و رهف و صفا و على طول ابتسمت و هي تشوف الجو حلو و صاخب و كأن الكل كان يعرف بعض من زمان.. او ممكن هم تغيرت نفسياتهم بعد ما حلف لهم عامر ان وجدان و عمر بأيدي أمينة و تأكدوا اكثر لما شافوا وجه ابوهم المشرق اكثر من قبل و تفاؤله.. كلهم اقتنعوا ما عدا راشد اللي ما صدق و رجع يندس في غرفته يعيش طقوسه بروحه..
صفا و وريف اندمجوا مع ليلى و حنين بسرعه عكس رهف اللي بس توزع ابتسامات و تقط كم تعليق لطيف و تسكت..
و ام عمر و ام عادل راحوا يتكلمون عن مواضيع كثيرة بدءًا من عودة المدارس مرورًا بتظاهرات لبنان و ازدهار السعودية اقتصاديا و رياضيا و سياسيا و ما تركوا موضوع ما تطرقوا له و كأنهم كانوا جوعانين سوالف و حصلوا بعض اخيرا..
حمدت الله كثير انه أرسل البنتين المرحتين هذولي لهم، هي نفسها اللي ما كانت متصورة ان فيه شيء راح يعدل مزاجها عدلوه و صارت تضحك على اتفه سبب و خذت عليهم بسرعة.

.
.

.
4م
نفخ بغضب /يعني متى؟؟؟ احنا زين نلقى لنا ذريعة نستر بها هالخبر.. لازم نسوي العشاء بسرعه و نجمع كل قريب و بعيد من القبيلة و نعلمهم
استغفرالله.. استغفرالله _ كررها كذا مرة و هو يحس ان كل غضبه تبخر لما خلص مكالمة من صاحب عمره ابو عمر.. ندم كثير على عجلته و تسرعه مع سعود.. بس هو ما وضح له شيء.. كل اللي قاله انه كان على خلاف مع اللي احرق الفيلا و هو ابو سعود قلبه باقي مكسور و مستصيب من موت فيصل ما تحمل ينصدم هالصدمة و تكون ردة فعله هادية و عادية.. ما يقدر
. رد على اخوه الغاضب بقدر غضبه اول ما عرف/ اصبر ننتظر.. ابو عمر علمني بعلومٍ يشيب لها الراس و ان شاء الله تنفرج اليوم و الا بكرة
ابو ياسر بعقلانية / سعود عاقل.. و ما سوا سواته الا وراه شيء كايد خاف على أخته منه.. نادوه نسمع منه و نبرر للعرب على أساسه.. و انت يا عبدالله يشهد الله انك استعجلت و عذبت الولد معك.. على أدنى خطأ حاسبته و طردته وين يغدي؟ ما فكرت ان الرجال ميتةٍ مرته و باقي جرحه طري، و يمكنه محملٍ نفسه ذنب اللي سوا و اللي ما سوا و انت ضغطت عليه و كسرته.. عز الله ما سويت فيه خير عسى الله يعينه و يجبر بخاطره
ابو سعود نكص راسه بمرارة شديدة و قال /من حر ما اوحيت و احرق تسبدي ياخوك و الا الشاهد الله ان مانيب حمل فرقاه مرةٍ ثانية
ياسر تنفس برضا و راحة.. و شكر ابو عمر في نفسه كثير.. كم له ابوه و هو يتكلم على عمه عل و عسى يسمح لسعود يجي لمجلسه و يفهمهم وش صار على لسانه بس عمه عبدالله راسه يابس و ما لان و لا طاح اللي براسه الا بعد ما كلمه ابو عمر.. / أدق على سعود اناديه؟
ابو ياسر بتهديد /لا تحسب انك طالع منها يا أسود الوجه بعد انت
ابو سعود ناظره بعتب و صد عنه
ياسر سكت و هو يعض شفته التحتيه و جاه صوت عمه تركي /دق عليه خله يجي حالا
..