✔ | IMPERIAL FLOWERS BOOK 2: Guia, The Dancing Lotus Fairy

Chapter 9.2

GUIA saw the distressed look on Mirui’s face when she went to the closed court to check on Lexus. Hindi niya alam kung bakit kinabahan siya sa nakita. Kaya naman agad niya itong nilapitan para tanungin. Napansin niya na bahagyang nanlaki ang mga mata ng dalaga nang mapansin na rin nito sa wakas ang paglapit niya.

“Ate Guia…”

“Ano’ng nangyari? Bakit ganyan ang mukha mo? May nangyari bang masama?” sunud-sunod na tanong niya rito.

Umiling ito. “Wala namang masamang nangyari. Si… Si Kuya kasi, eh…”

“Ano’ng nangyari kay Lexus?”

Bumuntong-hininga muna si Mirui bago nagsalita. “He said he doesn’t want to see you for now.”

Okay… Now that had made Guia somewhat confused. Not to mention, hurt. “Hindi kita maintindihan. Hindi niya ako gustong makita? Sinabi niya ba iyon sa 'yo?”

“Ewan ko ba sa kanya. Pinakiusapan niya ako na sabihin sa 'yong huwag mo raw muna siyang puntahan at kausapin. Ayaw naman niyang sabihin sa akin kung bakit. Nag-aalala na nga ako, eh. Halos lahat na lang, itinataboy niya maliban sa akin. Well, hindi naman niya ako maitataboy kasi nga…” Napahinto ang dalaga sa pagsasalita at tumitingin-tingin pa sa paligid bago inilapit ang mukha nito sa kanya at bumulong. “…alam mo namang magkapatid kami.”

Nanlulumong napatingin na lang si Guia sa pinto papuntang locker room ng tennis team mula sa kanyang posisyon. Hanggang doon lang naman ang kaya niyang gawin. Hindi na rin niya naitago ang lungkot na kanyang nararamdaman dahil sa mga narinig niya mula kay Mirui.

Ano ba talaga ang nangyayari sa 'yo, Lexus? Bakit pati ako, idinamay mo?

ーーーーーー

NAROON si Guia sa harap ng puntod ng kapatid niyang si Gizelle dahil birthday nito nang araw na iyon. Sa kaiisip niya kay Lexus ay muntik na niyang makalimutan ang okasyong iyon. Pero hindi gaya ng dati, hindi na masakit sa kanya ang pagbisita niyang iyon sa puntod. Malungkot pa rin sya, at aaminin niya iyon. Pero sa mga sandaling iyon, wala na ang nakakasakal na sakit ng kaloobang nararamdaman niya sa tuwing bumibisita siya roon. At aminado siya na isa iyon sa mga ipinagpapasalamat niya kay Lexus. Kaya lang, heto siya ngayon. 

Hindi siya sigurado kung pumapasok pa nga ba si Lexus sa klase nito dahil lagi naman itong wala sa closed court sa tuwing magpa-practice ang Falcon Knights. Si Mirui naman ay hindi uma-attend ng club activities ng Imperial Flowers dahil abala naman ito sa pag-eensayo para sa skating competition na nakatakda nitong salihan kasama si Yuna. Kaya ang madalas na nagagawa niya ay tumunganga o 'di kaya ay walang patid ang pagpapatugtog ng violin.

“Hi, Zelle. Happy birthday. Sorry kung ngayon lang nakabisita sa 'yo si Ate, ha? Medyo naging busy, eh. Alam mo na. I’m fulfilling your dream of becoming a violinist. Pinapakinggan mo ba ang mga pinatutugtog ko sa tuwing magpe-perform ako o ang IF? Sana pumasa naman sa 'yo.”

Kapagkuwan ay inilapag ni Guia sa ibabaw ng puntod ni Gizelle ang isang bouquet ng chrysanthemum at saka nagsindi ng kandila. Ilang sandali pa ay nag-alay siya ng dasal para sa kapatid. Pagkatapos niyon ay nanatili lang siyang nakaupo habang nakatingin sa lapida ng yumaong kapatid.

“Zelle, can I make a request? Bantayan mo naman si Lexus, o. Nag-aalala kasi ako sa kanya, eh. Ayaw niyang magpakita sa akin. Alam mo, hindi ko siya naintindihan. But you know what? I missed him so much. Sis, huwag mo siyang pababayaan, ha? Subukan mong kausapin si Lord na dalawa kayong magbantay at gumabay sa kanya. He’s that important to me.”

Hindi man siya nakakakuha ng sagot sa mga pinagsasasabi niyang iyon, kumakalma naman siya dahil sa pagkukuwentong ginagawa niya nang mga sandaling iyon sa harap ng puntod ng kanyang kapatid. Nagtagal pa siya ng ilang sandali roon bago niya naisipang umalis sa lugar na iyon at magpaalam sa puntod ni Gizelle.

ーーーーーー

KANINA pa pabalik-balik ng lakad si Guia sa clubhouse. Hindi talaga siya matahimik kahit na anong gawin niya. Kahit anong pilit niya na sabihin sa sarili na walang problema, alam niya na nagsisinungaling lang siya. Dahil doon, hindi rin siya makapag-concentrate sa pagtugtog ng panibagong piyesa.

Iniiwasan siya ni Lexus. Iyon ang totoo. At naiinis siya dahil hindi niya alam ang dahilan kung bakit nito ginagawa iyon. Ano ba ang nagawa niya rito at bakit nito ginagawa iyon sa kanya? May kasalanan ba siya na hindi niya alam?

Umiling siya. Imposibleng hindi niya alam. Tandang-tanda niya ang bawat engkuwentro nila ni Lexus. Wala siyang maalalang nagawa niya rito na mali.

"Aba'y nahihilo na ako sa 'yo, Guia, sa totoo lang. Tumigil ka nga sa isang puwesto lang," wika ni Ria na nagpatigil naman sa kanya sa pabalik-balik na paglalakad.

Pero hindi pa rin nauupo si Guia. Huminga lang siya ng malalim para pakalmahin ang sarili.

"Si Lexus na naman ba? Ano ba kasi ang nangyari at ginugulo niya ang isip mo nang ganyan? May problema ba kayo?"

"Kung alam ko lang ang sagot sa mga tanong mo, Ria, hindi na sana ako nagkakaganito ngayon. Kahit ako, hindi ko maintindihan. Bigla na lang siyang umiwas," naiinis na tugon ni Guia. Hindi siya sanay naglalabas ng saloobin lalo na kapag patungkol sa isang lalaki.

Pero hindi lang basta isang lalaki si Lexus sa kanya. Ito ang--

"Does this mean you've fallen for him, Guia?" Pero sa paraan ng pagkakasabi niyon ni Ria, hindi iyon isang tanong kundi isang obserbasyon.

Hindi siya kaagad nakakilos sa gulat. May dahilan kung bakit ganoon ang reaksyon niya. Gulat dahil nahulaan kaagad kaagad iyon ni Ria. Gulat dahil hindi na niya nagawang pigilan ang damdaming iyon para kay Lexus, para sa lalaking tumulong sa kanya na alisin ang takot sa puso niya.

Ito ang nangulit at nanatili sa tabi niya habang ipinipilit nito na gawin niya muli ang isang bagay na tinalikuran ng ilang taon. Sa kabila ng mga agam-agam, ginawa pa rin niya ang hiling nito dahil iyon ang gusto niya. She wanted to do everything she could to please him and see him smile.

Dahil mahal niya ito. Noon pa. Iyon din ang napansin ni Jeric nang huling beses silang mag-usap nito. Iyon ang totoong driving force niya kung bakit nagawa niyang labanan ang takot sa kanyang sarili. Ang damdamin niya kay Lexus ang dahilan kung bakit sinabi niya rito noon na ito ang huling taong gusto niyang makakita ng naging pagdurusa niya matapos ang aksidente.

"H-hindi ko alam... kung magagawa ko pang sabihin 'yan sa kanya," nanghihina nang saad ni Guia at sa wakas ay naupo na siya sa settee katabi si Ria.

"Guia..."

"Hindi na niya malalaman ang lahat, ang totoong dahilan kung bakit ginagawa ko ang gusto niya para sa akin."

Hinagod na lang ni Ria ang likod niya nang tuluyang tumulo ang kanina pa pinipigilang pagbagsak ng luha. Hindi niya gustong isipin na huli na ang lahat. Kailangang may gawin siya. Kailangang malinawan siya.