#رواية_حب_بعد_ورطة
الحل{11}قة...
سراب وقفت مصدومة وابتسمت:نصيب
نصيب:سسراب
وحضنن بعضهن
سراب:وينك ليش قطعتي مش قتلك تتصلي بيا وين توصلي وين كنتي خوفتيني عليك
نصيب تبكي:أسفة سامحيني ياسراب
وخرت نصيب عنها ودفتها :حولي معاش اتكلميني
أني انساعدك وانت اتديري فيا هكي
نصيب:ماتحكميش عليا وتظلميني ياسراب لأنك ماتعلميش شن صارلي هذاك اليوم
سراب بحزن وفي خاطرها :وأني أنقلبت حياتي فوقي لوطي
نصيب:خلينا إنقعمزوا
وقعمزن على الكرسي
سراب:شن صارلك ووين رامي
إبتسمت نصيب:أني ورامي عرسنا الأسبوع الجاي
سراب:بالله
نصيب:ايه لولاك انت كان هالحقير اااا
وتنهدت وبإندفاع:هذا اليوم الحيوان مش عارفة كيف إلقانا جابني أني ورامي وهددني وحط المسدس في فم رامي لو ماخبرتاش ع مكانك كان قتله
سراب تهز في راسها مادارت ولا ردة فعل والحزن ووالبأس على وجهها
نصيب:سراب
سراب:نعم
نصيب:أني خبرته ع مكانك وهددني كان خبرتك بيقتل عيلتي فلهذا ماتجرأت واتصلت بيك خفت يدير حاجة سامحيني أني وحدة أنانية
سراب:ولا يهمك يلي صار صار
نصيب:شن تقصدي هو مادارلك شي صح أمك وخوتك كويسين سراب ردي عليا
سراب إبتسمت بمسايرة:غير فكينا مني كلنا كويسيين إحني المهم كيف جوك مع رامي شن شعورك
نصيب:والله فرحانة انت فكيتيني من أكبر مشاكلي ووقفتي هالحقير عند حده
ابتسمت بضيق وفي قلبها حرب عالمية ودموعها جنود يراجوا في امر بس
نصيب:وكويس تلاقينا مش تجي لعرسي فاهمة
سراب:ااه
نصيب:سراااب أنسيني كان مانكش جاية راه
هزت سراب بمسايرة راسها وحضنتها نصيب:شكرا ع كل شي يا أحلى أخت وصاحبة وكل شي ربي مايحرمني منك
نزلت دمعة من عينها ومسحتها بسرعة:ربي يسعدك ويهنيك مع رامي
-وماتشكرينيش كنت في يوم مهمومة ومن غيرك وقف معاي بين الصاحبات مافيش جمايل
ووخرن عن بعضهن
نصيب بإستغراب:ليش حسيتك مهمومة ومش سراب يلي قبل متأكدة مافي شي يابنت
سراب بإرتباك:لا مافي شي
قصت عليهن سارة وسراب ارتبكت وتوترت
سارة:هيا سراب قيصر يراجي فينا
نصيب فتحت عيونها وفمها مش مصدقة يلي سمعاته وسراب توترت
نصيب:مممن يراجي قلتي
سارة:قيصر
نصيب:سراب فهميني شن القصة
سراب:سارة خلينا نمشوا
نصيب:وووين بتمشي تعالي فهميني شن دخل الشرطي ومن البنت يلي معاك
سارة:الشرطي راجلها وأني أخت راجلها عندك مانع
نصيب حطت يدها على فمها وشهقت:مستحيل
-سراب صح يلي سمعته سرااااب جاااوبيييي
سراب بعصبية:حلييي عنييي مانبيش نتكلم توا
نصيب:شن صارلك أني نصيب ليش سألتك شن صارلك مارديتي
سراب سكتت وقعدت تبكي
سارة تشبح فيهن وزي الأطرش في الزفة
سراب شدت سارة ومشت لحقت عليها نصيب
نصيب:عارفاتك ماتبيش تقوليلي تخافي أجرك يضيع
لكن مش حنضغط عليك براحتك هذا رقمي الجديد لما تحسي روحك بتحكي كلميني
وحضنتها وبدموع هن الإثنين
نصيب:باي نتلاقوا
سارة:هيا
سراب:هي
وقعدت نصيب تشبح في سراب وتبكي
سارة:سراب من هذي شكلها قريبة منك
سراب مسحت دموعها:هذي صاحبة عمري
سارة:اوو باهي ليش اتكلمي فيها هكي
سراب:واخدين ع بعضنا عادي
سارة:عجب أول مرة نشبح صحاب وهكي في الأول نسحابها فرخة تتعاركي معاها...
سراب وسارة فاتن من قدام شاب الشاب حط يده على كتف سراب
سراب أنخلعت ووخرت بدت إتفنص فيه
سارة:نزل يدك ياحيوان
الشاب:من كلمك انت
واشبح في سراب وقدم:بوسة وحدة بس
سراب فتحت عيونها ووخرت
سارة:خلينا نمشوا قيصر سيارته هنا
وسراب جسمها كله يرعش من الفرخ الصايع
إلتفتت سراب وسارة ومشن بسرعة والولد لحق وراهن وبدي يقول في كلام يغطي الشيطان وجهه
منه..
قربن من السيارة وهن يجرن فتحنها وركبن فيها ودورن الولد لقنه مهناش
سارة بصوت يرعش:وين مشي
سراب اتشوف يمين يسار:مش عارفة
سارة:باهي ليش قيصر مش في السيارة وين مشي
.
.
الولد:من إنت شن تبي
قيصر شاد الولد من رقبته وخانقه بملامح نارية حادة وزاد ضغط على رقبته
الولد بألم وصوت داهش:ااااااه إطلقني
قيصر بنبرة هادية فيها الحدة والتهديد:إنت غلطت ووصلت في قيصر
وشدله يده:هذي اليد حطيتها على كتفها صح
الولد خايف يرعش:معاش نعاودها
وفجأة ماينسمع إلا صوت عظم الولد إطربق
الولد:ااااااااااااااااااااااااااااااااااااا
طلقه قيصر وشده من رقبته من الخلف وشد يده المكسورة ضغطله عليها
والولد بيموت من الوجع😬🤯
قيصر:وقلت نبي بوسة
الولد:لاااا خلاص بالله
ولصق وجهه في الحيط وقعد يحكله فيه على الحيط
الولد:امممممممم ااااااااه
وقعد يخط فيه ع الحيط ويقول:تبي بوسة اااه بووسة صار هكي مصير يلي يشبح في مرت القيصر فاهم
نين الولد ولى وجهه دم بعدين طلقه قيصر وطاح الولد تحت قعد شاد وجهه ويعيط
لبس قيصر نظارته ومشي للسيارة
سراب سارحة وكيف بتخلي عيلتها يتقبولها زي قبل
خش قيصر للسيارة وشبح في سراب
سارة:وينك
قيصر:هاني جيت شن تبي
سارة:لا مافي شي غير لقينا السيارة فاضية
قيصر:امممم كان عندي موال
وبهمس:وربيته
حرك السيارة وطلع....
.
.
أم سراب:طااارق شوف الباب
طارق مشي وفتح الباب:نصيب
نصيب:شو الجو طارق
طارق:مليح خشي
ام سراب:مني
نصيب:كيف حالك خالتي
أم نصيب بتنرفز:أهلين شن تبي كان تبي سراب مش هنا
نصيب:مانبيش سراب لأني لاقيتها اليوم
طارق:شن تبي من الآخير
نصيب:نبي نعرف شن صار مع سراب ليش تزوجت شن السبب
أم سراب:مش شفتيها اليوم سألتيها
نصيب:مابتش اتقوللي
أم سراب بسخرية:شن بتقولك بتقولك كيف إختفت يومين ووين ولت ولت متزوجة
نصيب:أكيد في سبب كان هذا
أم سراب:اسككتي ما إتدريش روحك الصاحبة الفالحة لو كنت صاحبتها حق ما خليتهاش تلحقك وتتلاقى مع الشرطي يلي ضرب ولادي وشهدرنا قدام الناس
نصيب:لكن ياخالتي
أم سراب:أطلعي من هنا مانبيش انكثر الكلام
طارق:نصيب أمي مدايرة عملية والتوتر مش باهي ليها أطلعي والأحسن ماعاد تجي هنا
طلعت نصيب وهي مصدومة مش مصدقة شي
نصيب:شن صار في سراب من وراك ياقيصر الزفت
.
.
سوسن:وووك صقع
جميلة:ايه بكل
فات فهد من قدامها
سوسن فنصت فيه قريب بتنقز عليه
فهد:تعالي كوليني
سوسن ابتسمت ربع ابتسامة وفنصت
جميلة:عطك البلي تو يسقطك في المادة متاعه
فهد فات وقعد يضحك:ياحليلي وخلاص الفرخة مش عادية على الحلال لما انختش بيها
سوسن:يمشي ينقع ننجح بجهودي
واذكرت لما قاللها لو مقدر نتلاقوا حنتلاقوا سرحت وابتسمت
جميلة:وين سرحتي
سوسن:هي نوضي وقت
.
.
ولاء:وووه راسي نبي قهوة
أحمد:أمي وين أمي
ولاء:برا
أحمد:باه
خشت سراب وسارة
ولاء وقفت:وين كنتم
سارة:شن دخلك
ولاء:فرخة ما سألتكش
سارة:وا...
سراب بهدوء:كنا في السوق
ولاء:مسرع جيتينا ومسرع السوق
سراب:😧😧
سارة:هذي وحدة باردة وجه فوتيها سراب تعالي
وشحت سراب وركبن
ولاء:زي راجلها
أم قيصر:بتخطب
أحمد:ايه امشي اليوم شوفي البنت
أم قيصر:اليووووم
أحمد:وراس امي اليوم
أم قيصر:ما إنلحقش يا أحمد
أحمد:لالا اليوم
أم قيصر تنهدت:باهي باهي تو نمشي
احمد فرح وحضن امه:شكرا
.
.
سارة:بالله قيسي هذا بالله
سراب:والله ماعندي خلوق
سارة:غير هيا بالله قلتلك
سراب:باهي خلاص
خشت سراب اتقيس
سارة:تو انجيك ياسراب لحظة
طلعت سارة من الدار وخش قيصر في يده واحد من الأكياس نساته سراب في السيارة
خش على أساس بيحطه وبيطلع وتطلع سراب لابسة قفطان قصير فوق من ركبتها نظام طوبو اكمامه طوال لونه فوشي وظهره سبعة كبيرة وشعرها مرفوع الفوق وخصلتين منه نازلات ومش مدايرة ميك طالعة تجنن
قيصر ع قد مالفتت نظره نين طيح الكيس من يده
سراب تواسي في القفطان:سارة شن قلتي
ورفعت عيونها لقت قيصر بياكلها جمدت في مكانها لاعرفت تولي ولا تطلع
خطوات قيصر خناته وقدم لسراب ووقف قدامها وهو يتأمل فيها
سراب توخر بالشوي خايفة منه :ااانت شن اتدير هنا
قيصر يقدم والحب في عيونه واااضح وكبير لاحظاته سراب فيه حتى الخوف يلي في قلبها خف وبدي يتلاشى
لصقت سراب في الحيط وحط قيصر يده ع الحيط
جت بتطلع من الجهة الثانية لكن حط يده الثانية قبل لتطلع
سراب بإرتباك:ششن تبي
قيصر بهمس:إنت طالعة حلوة
فتحت سراب عيونها وزادت توترت من قربه ونظراته فيها ونفسه القريب وقلبها متربعة فيه
(🤣فاطمة الحمصة🤣)ع كثر مايدق
قيصر قدم أكثر وباسها من خدها
سراب:😳😳
قيصر:تعرفي كل يوم تعلقي بيك يزيد أكثر إنت لي قيصر وبس ياسراب لقيصر وبس وصدقيني كرهك ليا حنقلبه حب وعشق وهوس نجهل السبب يلي خلاني نتعلق بيك مع إنك وقفتي ضدي وتحديتيني لكن يلي نعرفه سراب بالنسبة لقيصر حياته وأغلى من حياته وحنحميك من كل شي ومش حنسمح لشي يصيرلك
سراب في خاطرها:مستحيييل كل هالكلام من القاسي هذا سراب إنت تحلمي سراب خيرك قاعدة تصنتي فيه خيرك تشبحيله نزلي عيونك نسيتي شن دار فيك بسببه خسرتي أهلك وحياتك ادمرت راحت بلا معنى
تشجعت سراب ودفاته وبحدة:قلت ديما أربع خطوات وبعدين إنت آخر واحد يتكلم ع الآمان الخوف ماعرفته إلا وين لاقيتك حياتي هذي يلي بلا معنى إنت السبب فيها وماتتوقع مني شي غير الكره وبس وأني مش ملك لحد فهمت
قدم وخبط يده في الحيط وبعيون حادة:كل هذا مايهمنيش وعدلي كلامك أحسنلك قيصر ماعمراش حد رفضه
وطلع من جنبها وبدت تمسح في خدها:نكرهك واحد نسواني
.
.
شوية ونزلت سراب
ولاء:اسمعي انت
سراب ألتفتت وشبحتلها
ولاء:ايه انت ديريلي قهوة
سراب:😶😶
ولاء:شن تشبحيلي راسي مصدع نبي قهوة
أم قيصر؛ولااااااء
قفزت ولاء:نعم
أم قيصر:سيبي مرت خوك وتعالي
ولاء فنصت في سراب ومشت
سارة:هي امشي معانا
سراب:ويين
سارة:منشوفوا عروس لأحمد
سراب:لالا امشوا انتم
أم قيصر:غير تعالي معانا
سراب:لالا والله ماخاطري امشوا خلوني
سارة:براحتك
أم قيصر:باهي اتردي بالك من عمك نين جو كان مافيهاش ازعاج
سراب:مافيها ازعاج بروا وماتخافوش على عمي
أم قيصر:شكرا يابنتي
سراب:العفو
.
.
مقعمز يدخن في سيارته ويفكر فيها مابتش اتحول من باله ويبتسم في الهواء
محسن:ان شاء الله خير خيرك تتبسم
قيصر بعفوية وسهو:هي سمحة لدرجة لما انشوفها مش عارف شن يصيرلي شعور غريب يجيني تعرف يامحسن مع إنها اتلاطي فيا بلسانها وحادة وجريئة قيصر يلي قدامك حبها ومن يتخيل قيصر يلي يكره حد يتحداه يجي يوم ويحب نفس الشخص
تعرف يا محسن ا...
صحصح قيصر ولقي قيصر حاط يده على خده وسارح
محسن:اممم كمل خيرك سكتت
قيصر:احم انت شن اتدير هنا
محسن:لا والله حلوة منك هذي
-عشت وشفت قيصر يتكلم بلغة العشق والرومانسية
كل الكلام يلي قلته توا كويس باهي وآخيرا تعلقت بوحدة لكن الوحدة هذي زعما تبادلك نفس الشعور
يعني بعد كل يلي درته فيها وكل يلي عيشتها فيه تقدر اتحبك وتخضعلك ولنفرض إنها حباتك بترضى تعيش مع واحد مزاجي عنايدي قاسي مغرور زيك ولا بتتغير..
قيصر رمي الدخان وعفس عليه برجله وبحدة:قيصر مستحيل يتغير وكان ماحبتنيش ومارضتش اتكمل معاي عندي هلبا طرق بيش انخليها معاي
محسن:ماتزيدش النار زيت وتخلي البنت انزيد تكرهك
قيصر ببرود:نوض روح أكيد مرتك تراجي فيك
.
.
طق طق طق
رجب:أدخل
سراب:مساء الخير عمي
رجب ابتسم:خشي مساء النور
سراب:عمتي والبناويت مشن وااا
رجب:مكسدة صح
سراب:حتى وقت ع دواك
رجب:تعالي قعمزي
خشت سراب وقعمزت بعد ماعطاته الدواء
رجب:شو الجو
سراب بهدوء:تمام
وشبحت لصورة فيها قيصر وأحمد وشخص ثاني..
وبدت تشبح مستغربة:عمي منسألك
رجب:أسألي
سراب:من يلي في الصورة يلي في النص
حست سراب ان رجب ارتبك ووجهه احزن
سراب:أني قلت حاجة غلط
رجب:لااا عادي... هذا ولدي قصي
سراب:اها غريبة ماشفتاش هنا
رجب بضيق:كيف بتشوفيه وهو تحت التراب
سراب أنصدمت:آسفة اااني كنت
رجب:عادي
-قصي وقيصر كانوا أكثر من خوت زي التوأم من بطن وحدة لدرجة قيصر كمل قرايته في الهندسة وإلحق بالشرطة كيف قصي
سراب:تقصد قصي شرطي
رجب:ايه....قصي كان لقيصر القدوة ليه متأثر بيه هلبا ولما جي اليوم يلي سيبنا فيه قصي قيصر ا..
قيصر بصوت عالي:بوووي
سراب انخلعت والتفتت ورجت تلكمس ولا كلمة
قيصر قدم وهو حامق:خديت دواك
رجب:اااه اايه
سراب تشبح في قيصر وتشبح في رجب ومستغربة خيره هزب بوه
قيصر:سراب نوضي هاني هنا
سراب تجاهلاته:ايه عمي احكيلي ع روحك
قيصر بعصبية قدم وشد سراب من يدها وسحبها لعنده وبصوت عالي:لما إنكلمك اتردي ونهارك أحرف مازال تعاوديها الحركة هذي
رجب:تحشم ياولد
سراب تفك في يدها منه والعبرة خانقتها بتبكي
قيصر فنص في بوه:مايدخل حد
-وإنت مش كان رخيت إتديري ماتبي توا تطلعي من هنا كلمة هي
وطلقها شبحتله بخوف وعيونها يلمعن بالدموع...
وطلعت تجري...خشت للدار بعصبية
سراب:ومعاها يهزب وعايش الدور خزي أقسم بالله لمنوريه أني قبل شادة روحي لكن توا مافيهاش كيف
قيصر:رد بالك اتقوللها شن صار من ست شهور
رجب ساكت ويشبحله على جنب
قيصر:ماتشبحليش هكي..ماتنبلش الفولة في فمك
رجب:باهي اسكت امشي كان بترضي مرتك هزبتها قدامي
قيصر اذكر انه هزبها وغمض عيونه ومشي
خش للدار لقاها متغممة بالباطنية قعمز بجنبها وتنهد
قيصر:نوضي منتكلم معاك
سراب لا رد
قيصر وهو ضاغط ع سنونه:نوضي منكلم معاك كلمة هي
سراب لارد
قيصر حمق وشد الغطاء ولوحه وبصوت عالي:لما إنكلمك ا....
ولقي تحت الغطاء إمخاد
ناض قفز وقعد يدور زي المجنون في الدار كلها وفي الحمام
قيصر:سراااب وييينك
ويدور ويلود الحمام خشله مرتين ويدور فيها زي المجنون
قيصر:سرااااااااب
وحط يده على جبهته:وين مشيتي
وطلع قعد يدور فيها في الحوش في المطبخ في الديار في دار بوه في كل مكان طلع حتى برا وقعد يدور فيها ووجهه مايتفسر على غضب على خوف
قيصر:سرااااااااااااااب
خش للدار وقعمز ع السرير وحط يديه على جبهته
وقف وبحدة:مستحيل انخليك تهربي مني مستحيل إنت مربوطة بيا انت ليا
وشد التليفون:محسن تبعث كل يلي في مركز الشرطة يدوروا على سراب
محسن:شن في شن صاير
قيصر بصوت عالي وبعصبية:مش وقت أسألتك دير يلي قلتلك عليه إقلب المنطقة احرقها فجرها المهم نبي سراب قدامي خلال ساعة فههههمممت
وسكر التليفون وحدفه ومسح جبهته بعصبية
قيصر:أقسم بالله حتندمي مش حنفوتهلك
سراب:اااااتشوووو
قيصر فتح عيونه وسمع صوت تحت السرير
عرف سراب انها تحت السرير ويشد الفراش ويرميه بعيد
سراب جمدت مكانها وخافت من ملامحه وشكله كيف مولي
قيصر غمض عيونه وتنفس بقوة وقعد يلح:أطلعي من تحت الزفت
طلعت سراب وخبطت راسها:اااه
قيصر بإندفاع وحدة:بالشوية إنت ماتشبحيش
طلعت سراب ووقفت قدامه
قيصر:شن هذا نلعب معاك في غميضة أني ااه
سراب شبحتله بعيون خايفات وفي خاطرها:يستااهل خليته يجري ولا يدري مش نوريه على تكشيخه قدام عمي نموت ولا حد يهزبني قدام حد..
وفجأة قيصر قعد يضحك بالقوة وضحك متواصل:ههههههههههههههههه
سراب انصدمت تسحابه بيضربها ولا أبصر شن بيدير توقعت ردة فعل عنيفة ماتسحابه بيضحك قعدت تشبح فيه وأنفلقت حتى هي ضحك وإرتفعت أصوات ضحكهم نين طقوا يدين بعضهم
قيصر:ههههههه زي العيلة تحت السرير مرة وحدة ههههه
سراب:هههههه وانت زي البيبي يلي مشت امه عنه ههه
قيصر:ايه ههههههههه
بعدين سكتوا هم الإثنين وقعدوا يشبحوا لي بعضهم بحب
قرب قيصر منها وحط يده على رقبتها من خلف وحط جبهته ع جبهتها هالمرة سراب تحت تأثير قيصر حول يديه وحطهن على خدود سراب وقرب أكثر وغمضت هي عيونها
سراب في خاطرها:ليش حاسة معاه بالآمان وإن مش قاسي وحقير زي ماكنت انفكر
وفجأة إذكرت قيصر لما قال:حنخلي حياتك جحيم
وتقلبها فوقي لطوي
فتحت عيونها ولقاته قريب بيبوسها دفاااته ووخرت عنه وهي داهشة من الخوف
قيصر قعد يشبحلها وجي بيتكلم معاها طلعت تجري وسيبت الدار
قيصر بتنرفز:الزفت تس
سراب وهي تتنفس بسرعة وحطت يدها ع قلبها:كنت منسلمه روحي زي الغبية مش عارفة شن صارلي وشن يصير لما يقرب مني
-سرااب ماتنسي شن دار فيك ماتنسيييش
.
.
شوية ويقطعوا عليها أم قيصر خشت حامقة هي وسارة وولاء
أم قيصر:والله ماهو واخدها لو أبصر شن يصير
ولاء:ريتيهم الكلاب خزي حتى أحمد فاضي
سراب قدمت:شن في
ولاء:وانت شن دخلك
سراب استهزبت:آسفة مش قصدي نتدخل
ومشت من حداهن
أم قيصر:ليش تكلمتي هكي معاها
ولاء:تمشي اتنقع شن دخلها
أم قيصر:منمشي انشوف بوكن وشوفن خوكن
خشت سراب للدار أنخلعت من الدخان يلي طلع في وجهها وشبحت في البلكونة لقت قيصر مقعمز ويدخن بشراهة زي كل مرة أنصدمت لأنها أول مرة تشبحه
سراب:ياربي شن هالمخلوق من شنو مصنوع معقولة في حد يدخن هكي
خدت الغطاء من تحت ورقدت على السرير طبعا مارقدتش وهي تراقب في قيصر خايفة منه نين خداها النوم وفي سابع حلم
ناض قيصر بعد ماكمل دخانه لقاها راقدة قرب شوي وقعد يشبحلها وكأنه يقول هيا حبيني حبك مهم بالنسبة ليا أوثقي فيا ماعاد تخافي مني...تنهد بضيق وحزن وطلع نزل تحت لقي أحمد حامق مقعمز ع الكرسي وسارة وولاء يهدن فيه
قيصر:شن في
ولاء:استغفر الله
أحمد ناض بحمق:شن يلي صار قول شنو يلي مش صاير
قيصر:خير فيتك تتكلم بالألغاز
أحمد:بالله إمشي من هنا مش طايق انشوفك ولا نسمع صوتك
سارة:أكبر منك اسكت
أحمد قدم لسارة بعصبية وبيضربها لكن قيصر دفه عليها قيصر:إنت ختشت نزل يدك
أحمد بصوت عالي:اييييه ختشت ختشت منكم ختشت من هالعيلة من روحي من كل شي والأكثر منك..إنت السبب كل منك اليوم بسببك رفضوني عيلة البنت يلي انحبها تعرف شن قالولي قالولي:خوك واحد فاسد ومستحيل إنأمنوا على بنتنا مع عيلة زيكم الفساد ماشي في دمكم
قيصر حمق وولت ملامحه القوية الحادة المخيفة
إحمد:ااييييه خيرك تشبح على أساس يهمك الموضوع إنت أناني ومامنك فايدة كان متت إنت وعاش قصي أحسن
قيصر مش فاهم شي وفي نفس الوقت القاز يرقى بالشوي من الكلام
أحمد:القصة ليها قريب سبع شهور حلك تنساها لكن لا قاعد عايش في ماضيك الأسود وسودتلنا عيشتنا معاك اليوم البنت يلي انحبها مش حنتزوجها ع خاطر سمعتك الفاسدة
قيصر قدم وشد أحمد من سوريته وبتهديد:كل واحد وحر في حياته شكله أهل حبيبتك مش راضيين بيك من الأساس هذا عليش يسبلوا بيا وبعدين تحترم نفسك وتلزم حدك خليني ماننساش إنك خوي..فاهم
ضحك بسخرية أحمد:على اساس أنت مش ناسي لو تعتبر فيا خوك كنت بطلت رشوة وابتزاز الناس كانت سمعتك نظيفة مش زي قصي
ويعطيه قيصر كف نين وخر أحمد ع وراه
سارة وولاء شهقن ونزلت أم قيصر تجري وجي قيصر بيضرب أحمد بوكس وقفت من بينهم أمهم
أم قيصر:شن أتدير إنت وياه راكم خوت وسعوا عن بعضكم
أحمد:فهمي هالكلام لولدك الكبير يلي مداير روحه كبير العيلة ومسؤول
قيصر:ضم فمك
وطلع السلاح من خصره:أقسم بالله انسكتك بكل
ام قيصر بخوف:لااااا وراس ولدي حوله ماتغلطش
أحمد:خليه خليه شن مازال ناقص هذا بس يلي ناقص هو أصلا قاتلنا وامبهدل بينا بين الناس
جت سارة تجري وقعدت تبكي:قيصر فوته بالله اتفوته إنت الكبير والعيب ع زايد العقل
قيصر:إنت آخر واحد يتكلم ويقول قصي فاسد إنت شن تعرف ولا تعلم زيك زي البقرة تاكل وترقد ووين تطلب في حاجتك تلقاها سهر مع جماعتك للفجر اتسافر تقعد بالشهر بالشهرين مانشبحولك في وجه كل هالفلوس والعيشة يلي عايشها بفضل قصي وأني جاي توا بكل وقاحة وتقول أمعيشنا عيشة سودة..هزلت والله
وحط المسدس في خصره وبثقة وحدة:ولو وقفت ع راسك أني مش حنتغير وأعلى مافي خيلك أركبه ايه وهذي يلي إتحبها ماعندهاش لسان ولاوفالحة كان إترشق معاك
ونتل يده من ساره وطلع برا
ام قيصر تبكي:تريحت هكي
أحمد:لاااا ماتريحتش
ومشي حامق لداره وتبعاته ولاء
أم قيصر تنهدت بضيق:ضروري سراب تعلم بماضي قيصر كان هذا مش حيتغير نهائيا
سارة:لالا راك اتخبريها بعدين قيصر يقلبها بالله فوتيه
أم قيصر:أنت ريتيه كيف يتعامل مع خوه ولو قعد هكي صدقيني بيقعد بروحه طول عمره ومش حيلقى حد في حياته
سارة:هدي يا أمي حيتغير والله حيتغير لو خبرنا سراب بعدين حتساعده من باب المحنة بس مش حتساعده على أنها اتحبه المسألة مسالة وقت
.
.
طلع برا حامق وخبط الطاولة بيده نين انشقت وخبط الكرسي برجله وقعمز حط يده ع جبهته وقعد يدكر في قصي..
قصي:كمل قرايتك وبعدين ساهل
قيصر:غير شوفلي بوك من توا
قصي:قيصر هذي آخرلك سنة في الهندسة كملها والشرطة تلحقها تلحقها
قيصر:اسمع نبي نخدم معاك في نفس القسم راه
قصي:بلكي جايبك وناسيك
قيصر:هههه اميييييي
قصي:اسمع راهو مافيش شخصيات في المركز يعني لا خوي لا نعرفك
قيصر:شنهوووو
قصي:أني المدير غادي وحتنفد كلامي
قيصر سرح :اااه ضروري نسمع كلامك
قصي:مانا كمل قرايتك سلم ولدي وفكك
قيصر:ههههه باهي خلاص خاضر من توا
قصي ابتسم:ليش تبي تخش شرطة
قيصر:بيش نقعد معاك ديما ونتعلم منك هلبا حاجات لأن بوي يحبك أكثر واحد
قصي:بيش اتنافسني في كل شي وتاخد مكاني يامعفن
قيصر:لا والله ماصارت
وخدي الشبشب ولحق عليه
.
.
قيصر يبكي:مافيش حد خدي مكانك ياقصي ولا إقدرت ناخده كنت نبي ناخده لكن ماعاش فيه نية ولا قابلية وكل يلي ساعدتهم ووقفوا ضدك أني عاقبتهم..
ومشت هالليلة وقيصر برا مع حزنه...
.............
في ليل طويل بارد مظلم
إنفتح جرحٌ عميقٌ قديم
أضلع تتمزق وصوتا مؤلم
دموعا تنهار وقلبا سقيم
وذكريات من ماضٍ مغتم
كلٌ ينام وأنا والنوم خصيم
وكأني أعشقه وهو لايهتم
فالخيال لو تخيل صار حليم
أيا ليلا طويلا شديدا معتم
ألاَ ترق مع قلبٍ عذابه وخيم
ألن تنتظر جرحا شمله يلتأم
أو تنسيني فتكون معي كريم
فأنت ليلا وما أشدك من ليل
حتى الوقت صوته فيك أليم
#مدونات_رحيق_الفجر🕊🕊
............................
يبدأ نهار جديد مع سوسن..
وهي خاشة للكلية خبطت في واحد
سوسن مستعجلة:آسفة
ومشت لكن شدلها يدها:آسفة ووين منصرفها هذي
شبحت الفوق لقت ولد طويل واضح صايع ومتاع مشاكل
سوسن فكت يدها:تمام مش آسفة مانا
ومشت خطوتين ولقاته قدامها
الشاب:تس تس تس سمحة ومغرورة
سوسن تجاهلته ومشت ويشدها من يدها بقوة
سوسن:إطلقنييي
الشاب:وين ماشية بلا ماتسمعي كلام مؤيد للأخير
سوسن:إطلق يدي يلي ماتتحشم
وكل حد خاش ولا طالع في الكلية يشبح فيهم
سوسن ارتبكت وتوترت وتحشمت وخافت
مؤيد يشبحلها شبحات حقيرة:شن رايك تمشي معاي
ركبت في سوسن النار ومالقت روحه الا ضاربة مؤيد كف:تافه برا للمسخات يلي زيك أني مش من النوع الحقير
وفكت يدها وعدت تجري وجسمها كله يرعش
مؤيد قعد سرحان وحاط يده على خده:أحلى كف في حياتي لكن غلطت لما ضربتني
رضوان:ههههههه والله امختش ياصاحب
مؤيد:غلطت خيرها غلطت تو منطر نوريها يلا رضو حبيبي
رضوان:إرسل
مؤيد:جيبلي الشباب خلهم يفرحوا شوي عندنا حفلة
في الكلية
رضوان:ياعيني ياعيني ديما إتفكر في غيرك
مؤيد:هههههههههههههههه ااااه
.
.
دوشت سراب ومشطت شعرها وفتحت الروشن لقت قيصر راقد برا على المعشب
سراب بإستغراب:هذا خيره راقد برا
-شكله ساكر ومعبيها فل
فتحت الباب وطلعت وهي نازلة من الدروج سمعت رجب يعيط قدمت بتشوفه خيره لقاته يهدرز مع سارة وأم قيصر
رجب:لدرجة يرفع سلاحه على خووه
أم قيصر:هدي أنت مش باهي ليك تتوتر
رجب:خبرتوا سراب
سارة:لااا رد بالك
سراب في خاطرها:على شن بيخبروني
رجب:خلاااص سراب ضروري تعلم إن قيصر مش كيف ماتسحابه وإن استقالتي من الشرطة هو السبب وأن إنتحار قصي خلاه واحد عدواني
سراب أنصدمت فتحت عيونها وحطت يديها على فمها:انتحار
سارة:لالا يا أمي حداك
أم قيصر:وأني رأيي من راي بوك سراب ضروري تعلم إن قيصر كان مؤدب ومثالي ماكانش هكي
خشت سراب عليهم والكل قعدوا يشبحولها
سراب:شن القصة خبروني
سارة:ااااه لا مافي شي تعالي
سراب:لا اسمعت كل شي ومافهمت شي فهموني
سارة:أحسن مافهمتي شي يلا
رجب:سارة خليها
سارة:لا
رجب:قلت خليهااا تعالي سراب أني منخبرك ويلي بيصير يصير
قعمزت سراب جنب رجب:شنو بتخبرني
أم قيصر:قبل لنخبروك بالله ماتقوليش لقيصر
هزت براسها بمعنى حاضر..
أم قيصر:ولما تسمعي قصة قيصر لو بتساعديه على خاطر حانة عليه فالأحسن ماتساعديشي
سراب:شن في خوفتوني
رجب:قبل ست شهور صار مع قيصر حادث خلاه يولي قاسي وعديم الضمير والأخلاق
قصي الولد الكبير وع راسه قيصر الناس يلي ماتعرفهمش تسحابهم توأم على مايشبهوا بعضهم بالشكل والتصرفات.... طبعا كانت حالتنا المادية بسيطة فقرر قصي يبطل قرايته ويخش للشرطة بيش يساعدني وفعلا خش للشرطة ومن شرطي عادي ترفع لمحقق ومن محقق لمفوض في الشرطة أني يلي بوه قعدت محقق عادي على ماكان حريص ومجتهد...قعدنا نشتغلوا نين حالتنا تعدلت وأمورنا مشت وخطب قصي البنت يلي يحبها أما قيصر بعد ماكمل هندسة خش للشرطة زي قصي وترفع حتى هو من شرطي عادي لنائب المفوض يعني نائب قصي شدوا الإثنين المركز وفي الفترة هذيك كل الخنبة والقتل والعراك المشاكل بصفة عامة ماعاش في كان وهالشي خلانا عيلة توب بين منطقتنا
لعند ماجي هذاك اليوم...
هنا رجب جاته نوبة الربو وقعد يتنفس بصعوبة
سارة:بووووي
أم قيصر جاته تجري عطاته البخاخة:تريح تريح
سراب:عمي تريح كمل بعدين
رجب:لاااا
أم قيصر:خلاص تريح أني إنكمل
هز رجب براسه بمعنى ايه..
أم قيصر:ولاد الحرام حطوا فلوس نصهن في مكتب قصي ونصهن في سيارة رجب خش قصي لمكتبه ولقي الشرطة تراجي فيه ورجب شداته دورية في الطريق واتهموهم بالرشوة وتهريب الممنوعات زي السكير والمخدارت...
نولوا بالوقت ((قبل ست شهور))
خشت الشرطة شادة قصي ورجب بالكلبشات للحوش..
قيصر وقف:شن في
قصي ورجب منزلين راسهم تحت
قيصر:قصي شن في ليش مكتفين هكي
الشرطي:فتشوا الحوش كله
قيصر:شن بيفتشوا تسحابها مهزلة
الشرطي:معانا أمر ماتعطلناش
قيصر:وييين مااااشي ليش الأمر فهمني
الشرطي:خوك وبوك متهمين بتهريب الممنوعات والرشوة
قيصر:لا مستحييل يديروها
الشرطي بصوت عالي:بوك متورط في عمليات تهريب فتشنا الحوش وتوا ضروري يمشوا معانا للمركز
قيصر:نحي يدك بوي مش متاع الدوة هذي حول يدك
الشرطي:في المركز قول كلامك هذا
أم قيصر وولاء وسارة وأحمد يبكوا وخايفين
قيصر:قصي تكلم خيرك دافع عن روحك بوي تكلموووووا الزفت خيركم ساكتين
الشرطي:قيصر إنت عارف يلي يعرقل الشرطة في عملها ينحبس ولا حول خلينا نشوفوا عملنا
ورفعوهم للمركز وقيصر مشي معاهم يجري
#في_مركز_الشرطة
المحامي:القضية قوية والمشكلة لقوا دليل قوي يحبسكم
قيصر:ماتقوليش هالكلام نبيهم بطلعوا وبس
قصي بهدوء:قيصر أفهم
قيصر:مانبيييش نفهم يلي فاهمة مستحيل اتديروا حاجة زي هذي
المحامي:ماعنديش ما إنديرللهم حتى ولو طلعوا حيخسروا عملهم
ويشد قيصر المحامي ويقعد يهز فيه بالقوة:قلتلك ما اتقولش كلام فارغ
الشرطي:تعالوا ع المكتب
ناض قصي ورجب وخشوا للمكتب وكان موجود الوزير والضابط يلي أعلى من قصي وقيصر
الوزير:عندكم حاجة اتقولوها
سكتوا هم الإثنين🤐🤐شن بيقولوا والتهمة لابستهم لبس
الوزير:سلموا سلاحكم والحزام والأوسمة يلي على صدوركم
حولوها وهم يبكوا وحطوهن على الطاولة
الوزير:مش حنحبسكم لأن الشرطي يتمنى ينحبس ولا يتجرد من منصبه تقدروا تمشوا
#الوقت_الحاضر
سراب فاتحة فمها ومش مصدقة يلي تسمع فيه
أما أم قيصر تحكي في القصة وتبكي
أم قيصر:روحو للحوش ومناظرهم مايتبرق فيهن شعور الذل والإهانة والحزن على وجوههم مش قادرين حتى يتكلموا أما قيصر المسكين مابطلش إتصالات يبي يعرف من يلي ورطهم
وفجأة خشت سالمة خطيبة قصي
#قبل_ست_شهور
قصي:سالمة
قدمت سالمة وعطاته كف ورمتله الدبلة
قصي:حتى إنت صدقتي
سالمة:كيف تبيني ما إنصدقش سكوتك خلاني نتأكد
قصي:والواحد كان سكت معناها مجرم حق
سالمة:ماعاد توريني وجهك
قصي:سالمة ساااااالمة
قصير:سالمة وقفي هذا كله كدب ماتصدقيش مستحيل قصي يديرها
سالمة بصوت عالي:حل عني أنت وخوك الفاسد وعيلتك الفاسدة أصلا حتى وصدقت خوك مستحيل نقدر انعيش وفي نظر الناس مرت الفاسد المرتشي
قيصر:سالمة ما إتديريش هكي وقفييي
ومشت سالمة وماعدلت..
طلع رجب من الدار وهو في حالة يرثى لها خدي مفتاح السيارة وطلع
أم قيصر:قيصر بوك
أحمد:بوووي وقف
قيصر:بوي تسمع فيا
رجب بصوت متقطع:خليني في حالي
قيصر:غير وين ماشي
رجب:قلتلك حل عنييييي
طلع رجب بسيارته...
وقصي رقي لداره وهو مش شاد شي في دماغه إلا كف سالمة وفراق سالمة وسكر على روحه الباب
ركب رجب السيارة حتى إنه خبط قيصر على ركبته على ماكثر أنه مايعلمش بروحه
قيصر:بووووووييي
وفجأة يسمع عياط داخل الحوش
ولى يجري قيصر داخل ولقي أحمد يبكي في الزاوية ولقي خواته وأمه مقعمزات جنب بعضهن ويتباكن
خش للدار وهو في وضع هدوء وخوف قدم جنب السرير لقي قصي قاطع وريده بموس حلاقه والدم معبي الدار
قيصر قعمز على ركبيه وبصوت متقطع:قققصي إنت شن درت
قصير بصوت عالي:لاااااااااااااااا
#الوقت_الحاضر
أم قيصر بدموع:وبعد ساعة إتصلوا بينا وخبرونا إن رجب دار حادث بالسيارة وهو في المستشفى قيصر قعد زي المجنون يجري ويدور في أي مستشفى ولما وصل للمستشفى خبروه إن رجب إنشل من قوة الحادث لو كان حد ثاني في مكان قيصر راهو ختش ولا قتل روحه خوه يلي يحبه انتحر قدام عيونه بوه يلي يعزه انشل شرفنا وسمعتنا مشت
ما إنقولش إن قيصر ما تأثرش ياسراب قيصر يلي تشبحي فيه توا هو ولد الموقف يلي صار من ست شهور قيصر يلي توا نتيحة يلي صار
وقفت سراب وعيونها دمعن وجعها كيف كانت اتسمع فيه كلام جارح وكيف كانت اتقوله حتقعد بروحك ومن هالكلام
سراب:اا شن منقول ااني
رجب:دعينا لربي إن قيصر يتزوج بنت تقدر اتغيره وفورا ربي رزقنا بيك وتزوجك قيصر مانعرفش الاسباب يلي خلاتك توافقي عليه المهم عرفنا إنك البنت يلي تقدري اتغيره
أم قيصر:سراب ماتكرهيش قيصر كرهك ليه حيزيد يخليه مضلول أكثر ماهو مضلول توا
ساعديه ورديه رديلنا قيصر الأول هذا طلب من بوك وأمك لو تعتبري فينا زي هكي
سكتت سراب شن بتقول بتوافق اتساعد الراجل يلي دمرها وخلى عيلتها ولا إتزيده
طلعت سراب وهي حايرة متلخبطة
أم قيصر:سراااب
سارة:خليها يا أمي توا مش ساهلة عليها تنسى يلي داره.فيها
.
.
خشت سراب وقعمزت ع السرير:متوقعتش يكون عنده ماضي زيي هو خسر خوه وأني بوي
ووقفت:هالمسكين ااه
سراب:مسكييين ويلي داره فيك نسيتيه
-لكن هو شن دنبه
-في هلبا ناس عندها ماضي هذا مايعنيش ان كلهم زيه
-هو خوه انتحر قدامه خوه يلي يحبه وهو كان كويس
-يعني كان تلاقيتي إنت وياه قبل ست شهور حبيتيه
-جاوبي خيرك سكتي لو كانت الظروف أحسن من هكي ماكانش دار فيك هكي وكنتي أكيده بتحبيه
((هذا الصراع مع الضمير أو الصراع بين العقل والقلب))
وقطع عليها قيصر فتح الباب وهو دايخ
سراب شبحتله تسحابه ساكر
قيصر طاح على الباب وشد راسه:اااااااح
سراب وخرت خافت منه
قيصر وقف ويشبح في عشرة من سراب قدم خطوتين وطاح
سراب شهقت وحطت يدها على فمها
قدمتله بدون وعي وقعمزت حداه في الأول ترددت
وبعدين تشجعت:ققققيصر تسمع فيا قيصر
ابتسم قيصر أول مرة اتناديه باسمه وولى غمض عيونه
سراب بتوتر وخوف يدها اتقدم واتوخر ماتبيش اتمسه وبعدين شدت يده بتنوضه لقتها ساخنه زي النار
سراب:ساخن هلبا هذا
وحطت يدها على جبهته لقتها قريب بتتفجر من السخونه
سراب:هذا طلع مريض مش سكران
😢😢😢😟😟😟
.
.
يتبع...
#رحيق_الفجر🕊🕊
