#حب_بعد_ورطة
الحل{36}قة
الجزء1..
#ملاحظة/بما إنها الحلقة يلي قبل الآخيرة فحبيت الحلقة هذي اتكون جزئين بيش مانظلمش النهاية وبإذن الله تكملة الحلقة حتكون بكرة بإذنه تعالى ع الساعة 10 ترقبوا
#قراءة_ممتعة_للجميع..
تحياتي_رحيق الفجر🕊🕊
....................................................
احمد:قلتلك تكلميييي بسرعة خير مانحبسك أقسم بالله انديرها
سعاد:لالا بالله ماتحبسنيش عندي بنات من وين بياكلن
نزلت أم قيصر تحت ووقفت بين سعاد وأحمد: شن فييي خيرك معاها
ولاء:يا أمي هذي وحدة حيوانة وماتتحشم عطيناها وجه هلبا لين تمادت
أم قيصر:إحترمي نفسك سعاااد تخدم هنا قديش ليها
أحمد:وواثقة فيها إنت
أم قيصر:إنت تسكت مش متحشم من يلي درته عشوي ماقتلت بوك ع خاطر الأملاك إنت عملتك مستحيل تنغفر
أحمد بعصبية:تنغفر ماتنغفرش أني نبيها تو إتقول من يلي دفها عليا
أم قيصر:تي خيرها شن دارتلك...
......... ........ ......... .........
مافهمتوا شي صح تعالوا هي منفهمكم...
هاذي ولاء مشت لسعاد في المطبخ وبدت إتهزب فيها
ولاء:إنت شن دخلك ليش خديتي الورقة شن قلتلك ونبهتك أني
سعاد:يلي درته هو الصح وإنت كنت بتهلكي عيلتك لو أحمد وقع ع التنازل لمحمد
ولاء:هاتي الورقة توا جيبيها
سعاد:لا
ولاء:إنت خدامة هنا ماتنسيش روحك فاهمة هاتيها الورقة توا أحسن ما أندير حاجة إتندمك طول عمرك
طلعت سعاد الورقة متاع التنازل يلي فيها اسم محمد من الدرج الأول وخدت الولاعة وولعت فيها النار
ولاء شهقت😱😱
سعاد:مش تبيها الورقة خوديها..
ولاء حاولت تاخد الورقة لكن النار ماتراجي وكلت نص الورقة...
رفعت ولاء عيونها بحدة وعصبية وصدفة لمحت أحمد جاي جهة المطبخ فإبتسمت بخبث
ولاء بصوت عالي:إنت كيف تقدري إتديري هكي إنت وحدة قليلة شرف وناموس
سعاد بصوت أعلى:إيه قليلة ناموس وشرف شن بتديري
ولاء:ومعاها وقاحة إنت كيف إتديري هكي
سعاد:درتها وخلاص شن الفايدة تو
ولاء:كيف إتديري في العيلة يلي امفضلة عليك هكي هكي إتخونيهم وأتخلي أحمد يوقع التنازل ع أملاكه ليك
سعاد فاتحة فمها ومش فاهمة شي من يلي اتقول فيه ولاء وليش اسلوبها تغير فجأة
أحمد بصوت رجولي:شن يلي نسمع فيه توا تنازل شنو
سعاد شبحت فيه وفتحت عيونها بخوف وصدمة
ولاء في خاطرها:هذا يلي نبيه
قدمت ولاء لأحمد وبحزن متصنع:شفتها يا أحمد هادي يلي تحسابوها فقيرة ونية شوف مايطلع منها
سعاد:شن اتقولي انت
ولاء:يا أحمد أني كشفتها ع حقيقتها عرفت الملف الأزرق يلي وقعته اليوم
أحمد:إيه
ولاء:إنت وبدون ماتعلم وقعت ورقة تنازل ع الأملاك كلهن
أحمد:شنهووو
ولاء:إيه ورقة تنازل ليها هي ستر ربي يلي طحت فيها أني وخديت ورقة التنازل وحرقتها
شوفها هااا حرقتها
-أحمد لزها من هنا هذي وحدة حقيرة
أحمد شبح في الورقة يلي محروقة وشبح في سعاد وإذكر لما الصبح خشتله سعاد وخلاته يوقع الملف
أحمد قرب بعصبية والنار في عيونه..
........ ......... .......... ..........
احمد:مستحيل تقدر اتديرها بروحها هي أصلا لا تعرف تقرا لا تكتب تكلمي من يلي معبيلك راسك
إلتفتت أم قيصر لي سعاد وسألتها:سعاد الكلام يلي اسمعته توا حق ولا كدب
سعاد سكتت وهي ترعش خايفة
أحمد قدم وبعصبية:ياتتكلمي ياتمشي للحبس
وهذا تليفوني منتصل بالشرطي
سعاد:لالا ماتتصلش مافيش حد بعتني ولا حد عبالي راسي
أم قيصر مصدومة فيها وولاء تبتسم بشماته
سعاد بحزن ونزلت راسها:حطيت ورقة التنازل في الملف الأزرق بروحي
أحمد :ماتفوتيهاش عليا إنت لا تكتبي لا تقري ولا تعرفيهن الأمور هذين تكلمي خيرلك أقسم بالله منتصل بالشرطة تحبسك وعارفتني إنديرها
أم قيصر:معقولة ياسعاد والله ماتوقعتك إتديريها
ولاء:اشبح من معبيلها راسها ومطمعها بشوية فلوس
وصاحبك هذا كتب الورقة باسمك بيش لما يكشفوه يطلع منها وتجي ع راسك وأصلا جت هي
سعاد فنصت في ولاء وولاء تبتسم بخبث وترفع في حواجبها..
أحمد شد يد سعاد:تكلمي
-شكلك ماتفهميش باه تو اتشوفي
-الو
سعاد:خلاص خلاص حنقولك بالله سكر
سكر أحمد الخط:قولي من
سعاد شبحت في ولاء طبعا ولاء خافت اتخبرهم عليها..😰😰
سعاد إبتسمت:الأملاك ولت لأصحابها يا أحمد كيف ما خليت سيد رجب يوقعلك خليتك اتوقع
أحمد مصدوم فيها😦😦
وولاء مستغربة وأم قيصر مش فاهمة شي
إلتفتت سعاد لأم قيصر:إنت مش تبي قيصر يولي خلاص حيولي للحوش ومن جديد وهو المالك للحوش والاراضي والشركات كل شي ولا باسمه
أني مش ميته ع فلوسكم ولا طامعة في حاجة منكم وكل خدمتي هنا ع عيون قيصر وامه وبوه ولو قعدتلك يا احمد ويا ولاء حتى الكلب مايرضى يخدم عندكم
احمد بصوت عالي:سكري فمك
سعاد أنخلعت ووخرت
احمد حط يده ع راسه ليش لأنه خسر كل شي
سعاد:أقسم بالله الغريب خير منكم إنتم ما إتقولش خوت قيصر نبي نعرف بس شن دارللكم قيصر معقولة هكي دانا يلي ماليها قرابة واقفة مع قيصر كأنه أخته
أحمد إشبح في سعاد :تقصدي حتى دانا مشاركة في القصة
سعاد سكتت
أحمد بصوت عالي لين أنخلعوا كلهم:تكلمي🤬
سعاد تلقائيا:إيه
أحمد فتح عيونه بحدة مصدوم مش مصدق
ولاء فاتحة فمها مصدومة وفي خاطرها: الكلبة ريحت كل تعبي ع الفاضي😱😱
أم قيصر لا عرفت تفرح لا عرفت تزعل لأنها مصدومة..
أحمد شد سعاد من يدها وسحبها لعند الباب وفتح الباب وطلعها:اقسم بالله اتوريلي وجهك انهارك أحرف...
وخدي تليفونه قعد يتصل...
أم قيصر تبكي:والله ماني عارفة شن منقولك إنت غلطتي ياسعاد
سعاد:سامحيني يامدام ماكانش قصدي كل يلي كنت نبيه قيصر وسراب يولوا شبحتك إنت والسيد رجب ماعاد تنزلوا زي قبل ماعاد تهدرزوا بكل الحوش ولى ظلام..
حضنت أم قيصر سعاد:شكرا وربي يبعتلك أيام حلوة
لو نقدر انخليك لكن عارفتني ماعنديش كلمة معاه
سعاد:عارفة يامدام انشوفك ع خير سلام
خشت أم قيصر وهي تبكي..
إلتفتت سعاد نادتها ولاء...
ولاء:ريتي شن صارلك قلتلك ولا ماتلعبيش معاي إنقلبت عليك هههه
سعاد:تعرفي ليش ماخبرتش فيك ولا؟؟
لأن سراب هي يلي قالتلي ما أنخبرش فيك تعرفي عليش؟؟ماتبيش إتزيد العيلة كره في بعضها ماتبيش أحمد يكرهك زي ماكاره قيصر
-وتو يجي يوم تعرفي قيمة يلي مش مدايرتله قيمة وتعرفي حقيقة يلي مدايرتله قيمة
-هي سلام تعطلت ع بناتي...
ولاء قعدت واقفة وتشبح في سعاد سارحة بتفكيرها
.
.
قيصر خدي الورق من دانا بهدوء بدون مايتكلم ولا يبين ردة فعل ع إنه موافق أو رافض
دانا:قيصر إنت أكيد إفهمتني صح
قيصر ببرود:أكيدة
-غدوة ساهل
-تصبحي ع خير
دانا برد قيصر مخوفها شنو يلي ناويه قيصر
طلعت دانا وهي تشبح في قيصر بإستغراب وخشت في الدار وهي تتكلم مع روحها..
سارة كاينة تتصل بعصام وتبعتله لكن عصام ماردش عليها...
دانا:هذا خوك والله ما إفهمته مرات إنحسه عنده إنفصام
سارة:وأني عصام مايردش عليا ليش
دانا شبحتلها ع جنب:غير شوفي أني نحكيلها هكي وهي اتخرف هكي
خشت دانا تحت البطانية وهي تفكر شن بيصير غدوة وجي في بالها ردة فعل أحمد
دانا:وليش يهمني ردة فعله
وجي في بالها كلام سعاد الصبح ع الحب ماحب
دانا في خاطرها:زعما حق ولا لا
هزت راسها :لالا يادانا هو مجرد صديق وبس
خلاص أرقدي...
.
.
#الك يوم_التاني
محمد:كييييف هكي ويييين عقلك إنت معقولة خدامة تضحك عليك ياغبية
-إنت وحدة مسكرة ما ينعبي عليك بكل
ولاء:محمد شن اتقول إنت
محمد مسكها من يدها وطلعها برا من المكتب متاعه
ولاء:محمد شن اتدير إطلقني
محمد طلقها برا من الباب:أنسيني فاهمة أنسيييني
شن الفايدة منك
ولاء تبكي مصدومة فيه..
وسكر ع وجهه الباب إلتفتت وهي تبكي لقت وراها دانا تشبحلها مسحت دموعها وبعصبية:تريحتي هكي توا والله طلعتي وحدة ملوعبة وخبيثة
دانا إبتسمت ع جنب:ماتخافيش مش حنسألك ولا حنكلمك لكن خلي حاجة وحدة في بالك
-هذا يلي اتحبيه للأسف يحب روحه وبس ماضيه أسود وحاضره أسود ومستقبله أسود
أكيدة عرفتي ليش كتبت الأملاك بإسم قيصر تو
وإبتسمت وطلعت روحت...
ولاء سرحت بتفكيرها ودموعها في عيونها
.
.
أحمد يلود في الصالة وحاط يده ع جبهته يفكر كيف بيطلع من هالورطة يلي جت على راسه
شبح في الباب لقي قيصر واقف بكل شموخ وثقة
أحمد وقف في مكانه وقعد يشبح...
قيصر شبح لعتبة الباب تحت وتخطاها وخش للحوش
أحمد:برافوا عليك شن اتحب نعطيك جائزة الأوسكار ولا نوبل ولا جائزة أفضل محتال استخدمت المحامية والخدامة بيش تحتال وترد كل شي صح
شن منقول عليك من يوم يومك هكي نظرتي ليك كانت حتتغير لكن بعد يلي درته قاعد قيصر الفاسد
وزدت نزلت من عيني أما عن المحامية تو تشوف الخاينة هذي
قيصر ببرود وهدوء:كملت كلامك ؟؟
أم قيصر نزلت وهي تبتسم تجري :قيصر
قيصر زاد قدم خش وأحمد يشبحله بغضب ونار
حضناته أمه وهي تبكي:إستاحشتك هلبا
قيصر يشبح في أحمد ورافعله حاجبه بإستفزاز وغرور
قيصر:كيف حالك باهية
وخرت أم قيصر:الحمد لله..
ولاء خشت وهي تشبح في قيصر ووقفت جنب أحمد
شد قيصر يد امه ومسح دمعتها:ماعاش تبكي من اليوم ماعاش تبكي قيصر هنا موجود من اليوم ويلي يبكيك ولا يقلل أدبه عليك إنطلع عيونه
وشبح في أحمد وولاء 😠😠
أم قيصر:بالله تتكلم جديات
قيصر:ايه
وقدم لأحمد:شن كنت إتقول إنت...أني محتال اااه؟؟
ويلي درته في بوك إنت شن إنسميه ؟؟
أحمد سكت وهو متنرفز حامق
قيصر:ع العموم أني مش جاي هنا ع خاطر الكلام الفاضي هذا
وطلع الورقة من جيبه وفتحها
قيصر:هاذي الورقة يلي فيها تنازل منك ع كل شي ليا أني صح؟؟
أحمد يشبحله بي غل
ومزقها قيصر بين أربع أجزاء
أحمد أمه ولاء أنصدموا من تصرفه
ورماهن وحط يديه في جيوبه وبثقة:قلتلك من قبل وحنولي انقولها الفلوس آخر همي مش زيك يعني
أحمد مصدوم ويشبح في الورقة يلي تمزقت...
قيصر وخر خطوة:لكن هذا مايعني إني ما إستفدت من توقعيك بالعكس استفدت هلبا تبي تعرف كيف..
وطلع ورقة ثانية ووراها لأحمد:قبل لنجي هنا درت تنازل لبوي ورديتله كل شي بحكم إني وليت المالك الوحيد
أحمد شاف المكتوب وفتح عيونه
قيصر:يعني يا أمي الأملاك ولت بإسم رجب
ويا أحمد مقيولة قبل "الدنيا دوارة، وكما تدين تدان"
احمد وجهه يعطي جميع الألوان وكأنه كفوف ع وجهه حصلهن...
قيصر:بالعامية مش حنورث بوي وهو قاعد حي
وفي نفس الوقت حنولي للحوش غصبا ع يلي يبي ويلي مايبي
أم قيصر إبتسمت:هذا أحسن قرار الحوش حوشك ياولدي🥰🥰
أحمد بينفجر من يلي يسمع فيه
قيصر بصوت عالي:أمي داري قاعدة خذوها الجماعة
أم قيصر:قاعدة تراجي في مولاها
قيصر:تمام وتي دار جديدة امالا في ضيف جديد حيقعد عندنا
أم قيصر:من؟؟
قيضر شبح في احمد يستفز فيه:تو تعرفي بعدين😏
احمد نفخ بغضب وخش لداره سكر الباب بقوة
ولاء قعدت واقفة تشبح في قيصر مش عارفة شي مش فاهمة شي.
(وتوا نولي بالوقت شوي نحكيلكم الكلام يلي بين دانا وقيصر)
قيصر:شنو يلي في يدك
دانا:هذا تنازل من أحمد ليك
قيصر بسخرية:ههههه من احمد وليا أني
دانا:ايه ليش مستغرب لازم اتولي لحوشك سادك وفي الشرع والقانون مايقدر أحمد يدير شي
قيصر:ومن قالك خايف منه يدير حاجة أني ماعاش نبي شي خليتها ليه واسعة عريضة والورقة يلي في يدك مزقيها مش مستحق أني
وإلتفت عطاها بظهره...
دانا قعدت تشبحله وتشبح في الورقة..
قيصر في خاطره:وليش رفضت ياقيصر خيرك شن صارلك ولا سراب خلاتك ضعيف الشخصية معقولة حبك ليها خلاك تتغاضى عن هلبا حاجات أحمد ذلك وهانك هلبا وغلط فيك وقعدت ساكت ع خاطر سراب صار وقت نوقف من جديد
إلتفت:دانااا
ولت دانا :نعم
قدم قيصر وخدي منها الورقة بدون مايتكلم لكن ملامحه اتقول هلبا كلام...
((وبعدين عرفتوا شن صار))..
#باااك...
ومن قيصر لعند سراب...
أم سراب:ماقالتلكش أختك خيرها متعاركة مع راجلها هكي
سوسن:عارفتها يا أمي سراب ولا ماتحبش تتكلم في مشاكلها ولا شني مضايقها
أم سراب:أني مش مطمنة ومش حنتريح لين نعرف شن صاير
سوسن:تعرفي يا أمي شبحت ع رقبة سراب اثار صوابع لما سألتها عليها إرتبكت وهزبتني
أم سراب:أثار صوابع زعما ياوخيتي مش ضاربها
سوسن:مش عارفة لكن شكلها عركة كبيرة
أم سراب:والله هالبنت من يوم يومها حظها زي الزفت
سوسن:إن شاء الله خير
.
.
#في_الشركة
خش قيصر للمكتب لقي عصام
قيصر إبتسم:الحمد لله ع سلامتك
عصام حضن قيصر:تسلم
-شن الجو
قيصر:مليح
-كيف كانت السفرة
عصام:كويسة عطونا شوية تعليمات ومكان المسابقة وين وموعدها..
قيصر:تعالى شوف المشروع
عصام:قيصر
قيصر ألتفت:ايه
عصام:كيف حالك
قيصر:شن تشبح فيا
عصام:مش من برا من داخل
إبتسم ع جنب:مافيش حد يكسرني
وصلت؟؟
عصام سكت..
قيصر:يلا وقت علينا في غيابك في هلبا عروض يبن التصفاء قبل موعد المسابقة
عصام:يلا..
نور:اوكي حنبلغ عصام بالموعد
سكرت الخط وناضت طلع قدامها طارق وخشت فيه طيحتله الملف يلي في يده
طارق:خيرك عمي يعمي عيونك
نور:وعيونك ياتافه إنت يلي أشبح قدامك
طارق:والله تحسابي روحك في سوق
نور:لا مش في سوق لكن مش دار نومك تدهور فيها كيف ماتبي
طارق:جيبي يلي طيحتيه بسرعة
نور رفعت حاجبها:شنوو
طارق:جيبيه بسرعة
نور:مستحييل
ومشت خطوة مد طارق رجله طيحها تحت
طارق بغرور:لما تغلطي تتأسفي ع غلطك فاهمة
ونزل خدي الملف وهو يشبحلها بغرور
فات خطوة ومدت نور رجلها طيحاته جنبها وناضت نفضت يديها وشبحتله بثفة وغرور:ولما تمشي أشبح قدامك بيش مايغلط فيك حد فهمت؟؟
ومشت من جنبه..
طارق وقف بحدة وقبل بيمشي وراها بيوريها لكن تمالك أعصابه وفاتها...
.
.
وبعد مرور وقت مشي قيصر للحوش وخبر سارة ودانا إنهم يوتوا دبشهم بيش ينتقلوا للحوش في الأول دانا رفضت إنها تمشي معاهم وحستها رزينة لكن إصرار قيصر هو يلي خلاها توافق...
ومشوا وصلوا للحوش نزلت سارة يلي بدت تشبح للحوش من برا وتشبح في الجنان وكأنها إتعبر عن إشتياقها
قيصر:خشن هيا
فتحتلهم أم قيصر الباب وجت سارة تجري حضنت امها
أم قيصر :هكي تمشي وتسيبيتا ياسارة ولا تسألي لا شي
سارة:سامحيني يا أمي عندك الحق
أم.قيصر:الله إستاحشتكم وأخيرا جي اليوم يلي منشوف عيلتي مجتمعة من جديد
حولت عنها...وشافت لي دانا ودانا نزلت راسها
أم قيصر:ليش نزلتي راسك يابنتي
-خشي تعالي
خشت دانا:أني آسفة
أم قيصر:عليش تتأسفي إنت مادرتي شي غلط بالعكس إنت رديتيلي الروح من جديد تعالي خشي أنت زي بنتي سارة وولاء توا
دانا حست بحنان الأم بعد خمس سنين ايه دانا أمها متوفية من خمس سنين وانحرمت من الحنان والحب واليوم لما كلمتها ام قيصر بالطريقة هذي خنقتها العبرة وبتبكي..
دانا:شكرا
أم قيصر:العفو يابنتي أني يلي لازم نشكرك
سارة:ريتها ريت جت دانا انستنا
قيصر وأمه ودانا:هههههه
أم قيصر:وين سراب خيرها مش معاكم
دانا وسارة شبحن في قيصر...
قيصر رفع عيونه:أني جعان منموت تعرفي ديرلي حاجة من يدك ناكلها استاحشت طبخك
ومشي خطوتين
أم قيصر:ماتغير الموضوع وين سراب
بنات تكلمن وين سراب
إلتفت قيصر بهدوء حاد وهو يشبح في دانا وسارة بمعنى ماتقولن شي:عند هلها
أم قيصر:اه
خش قيصر ورقي لداره فتحها وفتح الضي وبدي يلود في مكانه ويشبح فيها..يسمع صوت سراب خيال سراب غمض عيونه وتنهد يبي يطلعها من راسه فتح الروشن وأذكر لما سراب حاولت تهرب من الروشن لما خطفها إبتسم وقعد سرحان يدكر في كل شي كل المواقف كل المشاكل كل الرومانسية والحب يلي بينهم....
سارة:دانا هاذي دارك
طبعا دار دانا جت جنب دار أحمد في نفس الممر
خشت دانا للدار حطت شنتطها وبدت اتشوف في الدار تتأمل فيها....
تلاقت ولاء مع سارة..
سارة حضنت ولاء:ولاااء
ولاء استغربت سارة كيف حضنتها
سارة:استاحشتك
ولاء بهدوء:حتى أني
حولت سارة عنها:كيف حالك خيرك هكي مصدومة
ولاء:لا مش مصدومة
سارة:أكيدة شبعتي في دبشب تلبسي فيه صح
ولاء ساكته مش فاهمة شي توقعتها ما تكلمهاش
.. .. .. .. .. .. .. .. .. .. .. .. ..
وقت العشي أم قيصر وسارة في المطبخ ويوتن للعشي..
طلعت دانا من دارها وهي لابسة توتة رياضية رصاصي بالوردي ومشت للمطبخ
ام قيصر:تبي حاجة يادانا
دانا:لا مانبي شي
وقدمت اتوتي معاهن
أم قيصر:شن اتديري إنت ضيفتنا
دانا:لا عادي منساعدكن
أم قيصر:لالا عيب يابنتي إنت ضيفتنا
دانا:مش تعتبري فيا زي سارة وولاء
أم قيصر:اكيدة
دانا:تمام خليني انعاونك إمالا
وهي اتوتي في العشي معاهم أم قيصر تشبحلها وعاجبتها...
طلع أحمد من داره والشيطان متربع ع خشمه مشي للمطبخ بيشرب أول وحدة بانت عليه سارة عرف إن قيصر هنا وقدم خطوة شبح دانا وهنا إذكر توقيعه للورقة وزاد ولع ويخش للمطبخ يشد دانا من يدها
ام قيصر:شن اتدير نحي يدك
أحمد:مايدخل حد
سارة:احمد عيب
احمد:سكري فمك.ومايدخل حد في كلام نبي انقوله ليها
وسحبها وطلع من الباب الخلفي ع الجنان وجابها قدامها..
دانا:أحمد اني
أحمد:أنت شنووو اااه شنوو وعندك عين اتواجهيني بعد يلي درتيه فيا ليييش هكي شن درتلك أني وأني يلي معتبرك صديقة ومعجب بأسلوبك وشخصيتك وكنت حنحب...
وسكت غير الكلام...
ماتوقعتك هكي يامحامية يلي تعرفي الصح والغلط
برافوا عليك لعبتيها صح شن مخططاتك الجديدة ااه شن تبي بالزبط تبي اتصيري مالكة الحوش لا تبي فلوس ولا بتعلبي ع قيصر كيف ما لعبتي عليا
وتعطيه كف ع خده حط أحمد يده ع خده وبعصبية:إنت كيف تتجرأي وتمدي يدك
دانا بحدة:نتجرأ لو بتغلط فيا وفي شرفي نتجرأ أكثر من هكي لو تفكيرك هكي بالسطحية هذي نكسرلك راسك فاهم
-ايه صح أني يلي بعتت سعاد وقلتلها اتحطلك ورقة التنازل بيش اتوقعها تعرف ليش لأن لو مادرتش هكي محمد كان خدي منك كل وحقق إنتقامه منك ومن قيصر وشرد بيكم
أحمد:محمد؟؟وشن دخل محمد في الموضوع وكيف يقدر يوصلي إذا أني مانتواصلش معاه بكل
دانا:في حد حطلك في الملف ورقة تنازل بأسم محمد بيش اتوقعها فقلت الفلوس يمشن لقيصر ولا يمشن لمحمد
أحمد قعد يضحك بسخرية
دانا:ليش تضحك
أحمد:لأن كلامك مايخشش في العقل وحتى المجنون مايصدقه يلي واقف قدامك يامحامية مش بهالغباء راه لين يصدق شن اتقولي
دانا:باهي شن مصلحتي من إن نكتب الأملاك بأسم قيصر كان هذا راهو كتبتها بإسمي الورقة
أحمد:قوليه لروحك الكلام هذا وأسألي السؤال لروحك فاهمة ولا تتأملي إن حنصدقك من جديد ولا نسمعك شن اتقولي
دانا:احمد صدقني محمد حينتقم منك وعن طريق حد من العيلة
أحمد:خلاااص أسكتي ولا كلمة من يلي من عيلتي حيرضى فيا حاجة هذا كان إنت ماعبيتي راس حد عليا لكن الباين إنك بديتي اتعبي في راسهم بالشوي
دانا:خلااااص
.
.
رجب:نورت حوشك ياولدي والله بلاك إمظلم
قيصر:كيف حالك يابوي
رجب:باهي بخير
-حكتلي أمك ع يلي درته خليت الأملاك بإسمك ليش
رديتهن بإسمي
قيصر:لا تبيني نورتك وإنت حي مستحيل واصلا الحمد لله خدمتي مع عصام كويسة ونقدر إنغيش منها يعني مش مستحق
رجب:لكن
قيصر:سكر ع الموضوع خلاص الحاجة يلي كنت نبيها إن انولي للحوش بكرامتي ووليت
أني مانبيش فلوس ولا أملاك هاذي الحاجة الوحيدة يلي نبي أحمد يفهمها
كانت ولاء واقفة ع الباب وسمعت كل الكلام يلي بين رجب وقيصر وبدت تشبح في قيصر ومصدومه فيه وإذكرت كلام سراب لما قالتلها حيجي يوم وتعرفي إن قيصر مش فاسد كيف ما اتقولي واذكرت معاملة محمد ليها وكلام سعاد وألف فكرة وفكرة تجيها..
رجب:وين سراب
قيصر سرح...
رجب:قيصر وين سراب خيرها ماجتش وينها
قيصر:ااه سراب عند هلها عندهم عرس خوها وأختها
رجب:اه سلامتها
-لكن ياولدي شكلها أمك داعيتلك بالخير أما أخلاق وأما أسلوب وفطنة رد بالك منها سراب مافيش منها
راك إتحمقها
قيصر تنهد وبحزن:ياريت يابوي
رجب:ااه
قيصر:إحم قصدي حاضر
.
.
دانا:خلااص لهنا وقف عندك إنت فاهمني غلط وتو يجي يوم وتعرف إنك تغلط بكلامك هذا فيا
أحمد:كلام فاضي غير بنتي ع حقيقتك من توا لاعاد بينا كلام ولاسلام تشبحيني ديري روحك ما إشبحتينيش ونفس الشي بالنسبة ليا ولا الأحسن تمشي من هالحوش بكل لو عندك ناموس
وفات من جنبها خبط كتفه في كتفها
دانا بدت تشبح فيه وهو يمشي ودموعها نزلن مسحت دموعها بسرعة:ليش نبكي أني وكان رايه فيا مايهمني
ومسحت دموعها ودموعها ينزلن وهي تمسح وهن ينزلن :خلااص ليش البكي وكان فهمني غلط أصلا مايهمني فهم ولا لا
سارة بإبتسامة:احمد تعالى كان بتتعشى
أحمد :مانبيش عشاكم
وطلع برا من الحوس سكر الباب بقوة لين أنخلعت سارة وأم قيصر
جت دانا بعد ماروقت ومسحت دموعها...
سارة:أكيد هزبك صح
دانا بحزن:عادي
أم قيصر وهي إترتب في الطاولة:هو صح عصبي وكلامه حار وقاسي لكن من داخل طيب الفترة هذي مش عارفة خيره إنقلب هكي
دانا:يمكن لأنه بعيد ع العيلة
أم قيصر:كيف
دانا:شوفي ياخالتي أني فهمت أحمد هو يدير هكي لأنه حاسس إنه مايحبه حد ولا طايقه حد هذا عليش هكي لو تخلوه يحس بالحب وتهتموا بيه شوية عمره الظلام مايختفي بروحه الظلام يختفي لما يطلع ضي الشمس وهكي الحال مع أحمد
أم قيصر:الله كلامك جواهر يابنتي فهمت عليك حاضر حنحاول معاه
سارة:حتى أني
إبتسمت دانا ونزل قيصر مع بوه وإلتموا ع طاولة وحدة...
ولاء قدمت رجل توخر ورجل اتقدم
شبحها قيصر كيف مرتبكة:خيرك تعالي تعشي
شبحوا فيها كلهم
أم قيصر:قدمي ياولاء خيرك
ولاء تشبح في قيصر قيصر نزل عيونه متجاهلها وقعد ياكل...
قدمت ولاء وقعمزت جنب سارة وهي مرتبكة
رجب وهو يبتسم:الله شبه الحياة ولت للحوش
جت دانا...
رجب:من هذي
قيصر:بوي هذي أخت محسن دانا المحامية يلي قلتلك عليها
رجب:ااه أهلين يابنتي
دانا:كيف حالك ياعمي
رجب:الحمد لله بخير
-تفضلي قعمزي الحوش حوشك...
وبعد ماتعشوا وهدرزوا وضحكوا كل واحد مشي لدراه
خش قيصر للدار قعمز ع السرير وفتح تليفونه ع صورة سراب مرة مصورها وهي راقدة قعد يتأمل فيها...
قيصر:ليش مش قادر نتقبل إنك مش معاي ليش قيصر يلي ماتجرأ حد يوقف قدامه كيف قدرت بنت اتخليه في الحالة هذي...
ولوح التليفون بعصبية وتمدد ع السرير....
...................
ولك طيفا في المنام لي زائر...
ولي قلبا في المنام بات ضائع...
ولك عينان بقت بين رموشي...
جمالها برّاقا يبرق بريقا رائع...
لك عشقا في قلبي كمه كبير...
لايفني ولو جعلني الفناء نائع...
أذكرك في حديثي سهوا سهوا...
وكأنك جالسا فيه وأنت الصانع....
وكأن شفتاي لا حول لها ولاقوة....
تتشكل كما تريد ليس لها مانع...
أكتبك غفوا بقلمٍ قد زلَّ زله...
فتظهر لي لوحة رسامها يافع...
وأشعر لك الشعور شعرا أنت....
فيه قافية ووزنا وبحره الشائع...
فإن وجد مابعد العشق شيئا...
فهو أنت والقلب إلى الأزل قانع...
#بحبرك_ياقلمي✍
#رحيق_الفجر🕊🕊
.............................................
ومر أسبوع على شخصيات حب بعد ورطة...
سراب رجلها ورقبتها صحت وولت زي قبل وأحسن وبدي الوحم عندها إترجع وحالتها حالة قدام عيلتها ومن برا تبتسم ومن داخل قلبها وجوارحها مع قيصر..
أما سوسن فرحانة اتوتي لعرسها وسفيان حتى هو يفرش في حوشه يلي عرسه مع سوسن
أما عن عصام وقيصر شارقين بالمشروع الجديد
ويوتوله..
أما طارق قاعد النزاع بينه وبين نور و مافيش يوم يمر في الشركة إلا لما يتعاركوا ولا يديروا مقالب لبعض فيكم إتقولوا تعودوا...
دانا إتحاول تتكلم أحمد لكن أحمد إمعند مايبيش يكلمها...
أما سارة قاعدة تتصل بي بعصام يلي مايردش عليها
وأما عن ولاء في الأسبوع هذا أتكح وكل ما أتكح يطلع دم من فمها لكن ماخبرت حد وضعفت وعلامات الإرهاق ع وجهها..
أما عن رجب وأم قيصر الفرحة مش سادتهم لأن قيصر تغير هلبا ولاحظوه إن مايدخن ويروح بكري للحوش وينوض بكري يمشي للشركة ماعاد يعصب هلبا ويبصر ويضحك هلبا مع دانا وسارة ومعاهم...وقعد يكلم في ولاء شوي شوي
أما أحمد يمشي للشركة من الصبح ماعاد يروح لنص الليل مايبيش يشوف قيصر ولا دانا...
.
.
سراب:سوسن نوضي وقت هيا منكملوا عقاب دبشك
سوسن:خليني شوية بس
سراب:نوضيي توا بعدين منمشي مع أمك حتى هي قديش منقسم روحي أني
سوسن بكسل:الله علينا
سراب:حي فهد يتصل
ناضت سوسن خط واقفة :وينه وينه
وشبحت في سراب لقتها تضحك عليها
سوسن نفخت:حيوانه والله خاطري في نوم
سراب:نوضي وقت وبعدين مش عرسك أنت بس حتى خوك سفيان يبي من يشوفه ويطلع معاه للمحلات نوضي نوضي
وطلعت برا تلاقت مع طارق يلي مستعجل
طارق:حولي بسرعة مستعجل
سفيان:خيرك أول مرة تطلع مستعجل
طارق:ماهو اليوم المسابقة حول ياراجل تحتك التليفون وأني إندور
حول سفيان :هاك
طارق:الله ماساخن التليفون 😈😈
سفيان:كنت نشحن فيه😈😈
سراب:خزي والله ماعاد في حشم🤣🤣
طارق:إدعوا مشروعنا ينجح
سراب:طارق
طارق يلبس في سبيدروا متاعه:نعم
سراب بهمس:قيصر؟؟
طارق:كيف إنت كيف هو خيركم ما تسألوش زي الناس قولي كيف حال قيصر وهو يقول كيف حال سراب للدرجة هذي معقدين
طبعا سراب مش مخبره طارق إن قيصر ضاربها وخبراته زي ماخبرت أمها وسوسن عركة عادية
سراب:قصدك سأل عني؟؟
طارق:ايه وقلتله تاكل وتشرب مامعدلة ع حاجة😁
سراب:خزي والله فاضية سألتك نوض وقت عليك
طارق فتح الباب:كويس مليح ماناقصه شي
سراب:اها به
طارق:هي طيري توا منمشي
.
.
أم قيصر:أحمد يا أحمد
أحمد:خيرك
أم قيصر:تعالى كان بتفطر
أحمد:مانبيش
أم قيصر:وراس ولدي هيا
سارة:درتلك كريب يلي تحبه نوض
أحمد شبح الكريب ما إقدرش يقاوم😍😍
أم قيصر:تعالى هيا
أحمد يشبح في الكريب ومايبيش يقدم وفي نفس الوقت المنظر يقتل🤤🤤
قدمت دانا وخدت صونية الكريب:اووو هذا ليا أني
سارة:لا لأحمد
أحمد تنرفز من وجود دانا
دانا:من أحمد وينه هو مهناش يعني الكريب ليا أني
وخدت الموس والكاشيك بتاكل منه ويفكه منها أحمد
أحمد بعصبية:قالتلك لأحمد ولا
دانا :وإنت ماتبيش شن منديرلك
أم قيصر وسارة يشبحن في بعضهن ويضحكن بخبث😈😈
دانا وقفت وفكت الصونية منه:أني جيت الأولى يعني الكريب ليا أني...
أحمد حط اللاب توب متاعه ع جنب:وهي دايراته ع خاطري أني جيبي البلي
دانا بعداته عنه:ماصح وجهك
أحمد قدم:جيبي
دانا وخرت:لا
أحمد:بلا لعب عويل وجيبي إلجاي
دانا إلتفتت وطلعت للجنان جري🏃♀️🏃♀️
أحمد مشي وراها يجري:هاتي منفطر وقت ع الشركة
دانا:مانيش الكريب ليا أني وريني كيف بتاخده مني
أحمد تنهد بغضب:أسمعي راهو حامق منك وناقم عليك الأحسن اتجيبي وبلا لعب
دانا:إن شاء الله تنفجر المهم الكريب هذا ليا أني
أحمد:لعينك
ولحق وراها وهي تجري وهو يجري
أحمد:هاذي محامية وتحل في قضايا كان يشوفوك هكي تتصرفي زي العويل يلزوك
دانا:والمحامي مش من حقه يجري ويلعب شوف روحك مثلا حتى إنت مدير أعمال ويجري وراء بنت ع خاطر كريب
أحمد:جيبي هيا
دانا:لااا
وهي تجري عترت طاحت وجي وجهها في الصونية
أحمد تلقائيا وعفويا:دااانا
ومشالها يجري شدها من كتافها بينوضها :صارلك شي
وقفت دانا وشدت ركبتها وبألم:ركبتي ااااه
أحمد بخوف:تعالي قعمزي ع الكرسي
-قلتلك أني ماتجريش ولا خيرك زي الصغار
قعمزها ع الكرسي وبدي يديرللها في مساج خفيف ع ركبتها وهي تشبحله دايبة فيه
أحمد:هكي توجع فيك
وبعدين وعي على روحه شن يدير فتح عيونه مصدوم من روحه
ورفع عيونه وبدال مايهزبها ويوخر قعد يضحك عليها
أحمد:ههههه وجهك خيره هكي ههههههههه
دانا بإستغراب:وجهي؟؟
أحمد:وجهك زي عباد الشمس مولي هههههههههههه
وقفت دانا وشبحت وجهها في روشن المطبخ من برا ولقاته مليان شكلاطة شهقت وألتفتت لأحمد يلي ميت بالضحك عليها ومع هذا سرحت في ضحكته وجدبها بيها كمية الطيبة والبراءة بانت لما إضحك
أحمد وقف عن الضحك ولفتله نظره خصلات شعرها نازلة ع عيونها وهي تشبحله جدباته بعيونها قرب منها وهي قاعدة تشبح وتبتسم
أحمد بدون وعي حول خصلات شعرها وراء وذنيها:تعلمي بروحك إنك جدابة ولا
هزت دانا راسها بمعنى :إيه
أحمد:باهي تعلمي إن يلي واقف قدامك ميت فيك صح
هزت دانا راسها بمعنى لا
إبتسم أحمد ع جنب وطلع منديل من جيبه وقعد يمسحلها في الشكلاطة من وجهها وهو يمسحلها أغراته شفايفها وقعد يقرب منها شوي شوي
.
.
يتبع..
#رحيق_الفجر🕊🕊
