#رواية_حب_بعد_ورطة
الحل{28}قة...
وتبدأ الحلقة بدخول قيصر للحوش...
خش قيصر للحوش وقعد يدور في سراب بعيونه
مشي للدار فتحها قعد يدور لكن ما إلقاهاش
قيصر بعصبية:وينهاااا سرااااااب سرااااااب
وطلع برا في الجنان قعد يدور عليها خدي تليفونه قعد يتصل لكن ماردتش وهو خلاص ميت خوف والف فكرة تجيبه وترفعه...
بيطلع يركب السيارة بيدور عليها مع جيتها مع سفيان خوها
سفيان:أهوا راجلك
سراب شبحت فيه ودارت الحولة:اه ايه هي خش شوف حوشي الجديد
سفيان:مرة ثانية
سراب:غير خش
قيصر سكر الباب متاع سيارته بقوه وقعد يفنص في سراب..
سفيان:والله مستعجل في واحد يراجي قدام الشركة
سراب:براحتك لكن مرة ثانية محقوق راه
سفيان:تمام إن شاء الله
نزلت سراب ومابتش تشبح في قيصر
بيب سفيان ع قيصر وقيصر رفع يده وخر سفيان بالسيارة ومشي...
مشت سراب من جنبه..
قيصر بحدة:وين كنت
سراب فاتاته ومشت خشت للحوش...
حمق من حركتها ولحق وراها شد يدها بقوة وضغط عليها:أني إنكلم فيك ردي عليا
فكت يدها منه بقوة وبحدة:وأني مانبيش نتكلم معاك مات الكلام بيني وبينك..
ومشت خشت للدار تبعها وفتح الباب بقوة نين انخبط في الحيط سراب ألتفتت خافت وأنخلعت..
سكر الباب برجله بقوة:مش كيف ماتبي كيف مانبي أني
وقدم شد يديها الإثنين سراب خافت منه
قيصر بحدة:عارفتني وعارفة الحركات هذين نكره فيتهن ولما انكلمك اتردي ولما نسألك تجاوبي وإلا
وسكت وقعد يفنص..
سراب شبحتله بحزن:وإلا شنو
قيصر ساكت
سراب بعبرة خانقتها:وإلا شنو ياقيصر شن يلي مادرته إنت
قيصر تنهد وغير الموضوع:وين كنت وليش وقفتي مع الكلب محمد وليش ماخبرتيني من الأول إنك كنت مخطوبة
سراب ساكته تشبحله مستغرباته...
قيصر ضغط ع سنونه:ماتشبحيليش هكي تكلللمي
نزلن دموعها من عيونها وبصوت عالي:لييييش تبيني انجاوبك حقك في إني أنجاوبك ع أسئلتك أخسرته من ليلة إمبارح
ضغط ع يديها أكثر وبحدة:هذا مش جواب على سؤالي
فكت سراب يديها بقوة منه ودفاته:إنت مش قيصر يلي حبيته أنت وليت زي قبل وأحرف إنت ما إتحس على روحك ماعندكش ضمير أنت تعرف أمس شن درت إنت كسرتني وجرحتني ذبحتني هنا في نص قلبي
قيصر بدال مايزيد يحمق هدي وقعد يشوفلها ويشوف في دموعها وحس صدره ضاق عليه
سراب بدموع وصوت مبحوح:أني ماوجعني لما دخنت يلي وجعني كيف كذبت عليا وخنت الثقة يلي عطيتهلك وكسرت ويلي ذبحني غصبتني ع حاجة منبيهاش كل شي كونته عنك من احترام وثقة وقدر ضيعته إنت ليلة إمبارح
قيصر خلاص ماعاد عرف شن يدير خايف يقدم تنهار وخايف يوخر ويخليها تزيد تنهار وفي كلا الحالتين دموعها بالنسبة ليه نار تحرق في كبده لأن كان السبب في هالنار...
مسحت دموعها وبحدة:إيييه صح ماخبرتك عن محمد تعرف ليش لأني إنسيته لأنه ماكانش حاجة مهمة في حياتي وماعمري حسيت معاه بالآمان يلي فقدته ويلي لقيته عندك وقفت معاه برا المحكمة تعرف ليش بيش إنوقفه عند حده ونعرفه بأن سراب تحب قيصر ومش بالسيف قاعدة معاه زي ماهو يقول...أني وفيت بوعدي ليك إن مش حنسيبك لكن إنت خنت الوعد وماصنته وماكنت عند كلمتك
وطاحت تحت قعمزت
قيصر قدم خطوة خاف عليها..
سراب بحزن:أني تعبت عيييت في الآخير أني إنسانة إنحس قديش منتحمل غيرتك الزايدة يلي خانقتني من رقبتي ولا تصرفاتك وعاداتك يلي مش مستعد تغيرهن..
قيصر لو قعدت هكي حتخسرني
هنا لعبت عالوتر الحساس وهنا دق ناقوس الخطر وهنا نقطة الضعف عند قيصر قدم قيصر وقعمز قدامها وحط يديه ع خدودها
قيصر:شن قلتي ؟؟نخسرك ؟؟
حولت وجهها من بين يديه وبرمت وجهها جهة اليسار وهي تبكي
مسك ذقنها بصوابعه الإثنين وبرمها لعنده وبهدوء فيه حدة:نخسرك ياسراب إنت تعرفي الكلمة هذي قديش تحرق فيا
سراب بعيون عسلية حزينة:ليش إنت ماتحرق فيا
قيصر حط يديه ع وجهها وقرب أكثر وحط جبهته ع جبهتها ونفسها ونفسه في صوت واحد وتير واحد
قيصر:سراب وحبك ليا نقص؟؟
سراب ساكته وغمضت عيونها
قيصر بصوت رجولي:حبك ليا نقص ياسراب
فتحت عيونها وشبحتله مباشرة وبدت تبكي...
قيصر:كل شي نقدر إنرده ياسراب إحترامك ليا ثقتك فيا نقدر إنردهن
حول يديي من وجهها وقعد يواسي في خصلات شعرها العسلي الناعم وقرب أكثر:يلي يهمني حبك ليا نقص ولا لا لأنه الحاجة الوحيدة يلي مانقدر أنرده بسهولة جوابك يهمني ياسراب تكلمي ماتسكتيش...
قعدت تشبحله وتشبح في عيونه وحاسة بلمسته الدافية الحنونة حست من كلامه إن نادم ع يلي داره معاها والحاجة الوحيدة يلي قعدت متمسكة فيها هي إن مهما قسي القيصر لكن قلبه مستحيل يقسى
قيصر:سراب جاوبيني جاوبيني ماتسكتي سكوتك نار في قلبي سكوتك بالنسبة ليا موت
حطت يدها ع فمه بسرعة وخوف ووقفت ع ركبيها
قيصر قعد يشبحلها..
سراب:أسكت ماتجيبش الموت ع لسانك
-حبي ليك مستحيل ينقص ياقيصر مستحيل
وبدت تبكي عالصامت إبتسم قيصر ووقف ع ركبيه وحضنها بقوة تمناها تخش في قلبها في الحضن هذا..
وهي قعدت تبكي:انحبك انحبك مانقدرش نكرهك
قيصر:آسف سامحيني إنعمي على قلبي وعيوني وجرحتك وخليتك مرمية وماعدلت عليك آسف ياعمري آسف آسف
حولت سراب من حضنه ولقت دموع في عيونه
سراب بإستغراب:أنت تبكي
قيصر نزل راسه تحت...رفعتله سراب راسه وباساته جنب فمه بحنية وحب
قيصر مستغربها ومستغرب حركتها...
وخرت عنه شوي ومسحتله دموعه:مش متعودة عليك تبكي لا عاد تبكي
وحضناته من جديد..
قيصر:يعني سامحتيني
سراب:ايه
قيصر:إنحبك ومانقدرش إنعيش بلاك وآسف ع كل شي ونوعدك وعد وهالمرة وعد من قيصر رجب وعد من راجل وكلمة راجل الدخان يحرم عليا مسه ولا تدخينه وحنحاول نتحكم في غيرتي وتصرفاتي
وخرت عنه وهي تبتسم:تتكلم جد
هز راسه وهو يبتسم:ايه وعد
وقف قيصر وقفت معاه سراب..
قيصر:لكن بتصبري معاي لأن قيصر الحجر مش بالسهولة هذي يولي حرير..
إبتسمت سراب:حاضر ياعمري
وحطت راسها ع صدره ولفت يديها ع ظهره بقوة..
شد قيصر راسها ورفعه لنظره وقعد يشوف في شفايفها:ترا وريني وجعتك صح؟؟
حطت راسها ع صدره وإبتسمت:مر الحبيب عسل..
قيصر:كبير الكلام ياسرو..
سراب:الله أول مرة إتدلعني
قيصر:قصدك مش حلو
سراب:لا حلو من فمك حلو
إذكرت سراب المحكمة ووخرت عن قيصر..
قيصر :خيرك
سراب وهي تضحك:قيصر ربحت القضية إنت ربحتها
قيصر ابتسم:صباح الخير ههههه
سراب بدت اتنقز وضحك:فرحانة هلباااا وآخيرا إفتكينا من المشاااكل
قيصر يشبحلها ويبتسم...بعدين سراب هدت وكشرت
قيصر:كملي خيرك تعرفي لما تضحكي تبقي أحلى
سراب بحزن:لكن خسرت عملك ياقيصر كيف بتدير توا
قرب قيصر لسراب وسحبها من خصرها:شن منديير؟؟
امممم منقعد جنب حبيبتي نصبح عليها نتمسى عليها عندي أحسن من ألف خدمة
سراب ضحكت بمسايرة:فالح بعدين من وين منعيشوا
قعد ينخص فيها في أجنابها:يصير خير..يصير خير
سراب:اه هههههه بطل
-هيا قيصر قولي كيف بتدير
قيصر تنهد:أصلا أني منسيبها منسيبها الخدمة هذي لأنها جابتلي المشاكل لحياتي
-ولا تخافي حنلقى خدمة ثانية
سراب:كيف باه القاضي بعد حكم القاضي ماعاش تقدر تخدم شرطي
وخر قيصر وقلع الجاكيت متاعه:مافيش كان الشرطة في البلاد
سراب:باهي شن بتخدم
قيصر باسها من خدها:مش لازم تعرفي توا كل شي في وقته سمح توا عيان ومش قادر نفتح عيوني خليني نرقد شوي..
سراب:حاضر
.
.
دانا:عصام إنتم روحوا اني عندي أوراق يبن مراجعة
عصام:تمام
سارة حضنت دانا:شكرا شكرا
دانا ابتسمت:العفو
عصام:غريبة الصحافة مانفختش بالأسئلة
دانا:أني تكلمت معاهم ع موضوع سارة..
يعني ياسارة موضوعك سر حيبقى لا تخافي..
سارة ابتسمت:شكرا يلي درتيه ع خاطري أني وقيصر ماينتسى
دانا:انتم عيلتي توا ويلي درته درته ع خاطر محسن حتى هو...
-يلا أمشوا توا من هنا
-عصام وصل سارة للحوش
عصام:ايه أكيد
دانا:يلا باي
ومشت
سارة وقفت وسرحت
عصام:نمشووا
سارة شبحت لعصام وهزت راسها..
ومشوا ركبوا في السيارة...
قعمزت دانا في جنان المحكمة ع الكرسي وتنهدت بإبتسامة حزينة وفتحت تليفونها ع صور محسن..
دانا:إنت يلي خليتني محامية قوية هكي مستحيل ننساك ولا ننسى تعبك معاي يامحسن ومستحيل ننسى القهوة يلي اتجيبلي فيها وين كنت نسهر للقراية كنت ليا البو والأم والخو والصديق وكل شي كنت سندي موتك كسرني وحقك جبرني وهاني اليوم خديت حقك وعاقبت يلي قتلك
وبدت تبكي...😭😭
محسن استاحشتك ياخوي استاحشتك هلبا..
حست بيد روجلية انحطت ع كتفها انخلعت وشبحت في اليد وناضت مخلوعة وقفت وإلتفتت لقاته أحمد..
احمد:ماتخافيش هذا أني
مسحت دموعها وبإرتباك:انت ماروحتش
أحمد:كنت مروح لقيتك مقعمزة بروحك والمحكمة فضت قلت انشوفها خيرها وانباركلك
دانا:اه الله يبارك فيك
وبإستغراب:ليش تباركلي المفروض تزعل لصاحبك محمد ان خسر
أحمد:شادي مغتصب بغض النظر عن يلي رفع القضية وبغض النظر عن يلي ربح وفاز المهم عندي شادي انحبس وانحكم إعدام
دانا:وقيصر ليش تكرهه ليش بعد ماعرفت الحق مامشيتش ليه
سكت أحمد بعدين تنهد وابتسم:المهم إنت كويسة توا
دانا:ايه كويسة
أحمد:تمام نشوفك بخير
دانا:أحمد
إلتفتت أحمد😍 واستغربها من وين تعرف اسمه
دانا:ااا شكرا لو ماطيحت شادي كان أشبح شن دار
إبتسم أحمد:العفو مادرت شي إنت درتي كل شي اليوم وأمس إنهنيك ع شجاعتك وصبرك "وذكاءك"
دانا:شكرا
أحمد:شفتك تبكي عليش تبكي المفروض تفرحي
دانا إبتسمت بحزن:شوية ذكريات عادي مافيش حاجة كبيرة
أحمد:يلي في الصورة محسن صح
دانا سكتت وشبحت لي تليفونها بحزن
أحمد:براحتك مانبيش نضغط عليك المهم تشرفت بمعرفتك مع إن اللقاء الأول كان حاد شوي
دانا ابتسمت وارتبكت تحشمت..
أحمد قعد سرحان فيها..
دانا:صراحة أني جدية وحادة هلبا في الأمور يلي تخص تخصصي
مدت دانا يدها:المهم تشرفت بيك أحمد أني دانا
مد أحمد يده وهو يشبحلها :بيك أكثر
دانا استغرباته خيره شد يدها ماعاد طلقها
دانا كشرت:احم احم
احمد توتر:ااه ايه آسف يلا باي نتلاقوا ع خير
دانا:باي..
.
.
#في_السيارة🚙🚙
سارة ساكتة..
عصام:كيف حاسة توا
سارة:كويسة
عصام:شفتي لما قلتلك ماتخافيش شفتي كيف ربي خدالك حقك
سارة إبتسمت:ايه شكرا
عصام:عليش شن درت
سارة:ع وقفتك معانا والفيديو يلي جبته
عصام:تقولي هكي مرة ثانية نزعل منك أني واحد منكم وبعدين ع خاطرك إندير أي شي
سارة:اااه
عصام:احم
-أني جعان وإنت
سارة سكتت وبدت تشبحله
عصام ارتبك درس السيارة ونزل:خليك تو انجي
وهو ماشي:شن تلخبط ياعصام إنت
-الزفت الفارة حلوة مش قادر إنقاوم
سارة:شن قصده بيها كلمة ع خاطري
رن تليفون عصام في الأول سارة ماعدلتش بعدين وين قعد يرن هلبا خدت التليفون وشافت الاسم لقاته مكتوب (إكبيدتي) هنا النار ولعت فيها ومن الحمق رمت تليفونه في المرش القدامي:متزوج ويضيع في وقته معاي خزي...
ركب عصام في السيارة وشاف لسارة لقاها عاطية وجهها للروشن
حط الكيس ع جنب وقدم بالسيارة ع البحر ووقفها
عصام:سارة شدي
سارة تجاهلاته ومابتش تتكلم
جي بيكلمها رن تليفونه...
عصام:ألو
-آسف ياحبيبتي آسف حاضر تو إنجي
سارة تشبحله ع جنب ووجها أحمر من الحمق وحست بشي خش في قلبها قسمه..
عصام:حاضر سكري يلا باي
-وأني أنحبك ياعمري باي
سارة:🔥🔥🔥🔥🔥🔥
عصام حط التليفون وبينزل..
سارة بحدة:وين
عصام:انزلي تعالي انغيروا جو ومناكل جعان
سارة:أني مش جعانة روح بيا للحوش
عصام:خيرك شوية تغيير جو
سارة بحدة:أني مانبيييش إنغير جو قلتلك وصلني للحوش
عصام استغربها خير أسلوبها تغير:خيرك
سارة:ماخيرني شي هكي وبعدين يلي اتصلت بيك أكيدة تراجي فيك
عصام:شن تقولي إنت
سارة:وصلني للحوش وتوا
حرك عصام السيارة بتنرفز...
رن رن رن
رن رن رن
أحمد:خيرك
محمد:هكي إتكلمني
أحمد:مانا كيف تبي إنكلم واحد كداب وغشاش
محمد:تكلم زين أحمد
أحمد:لو فيك وجه ماعاد تتصل بيا فاهم طلعت تستغل فيا تو إنوري أصلك أني والفلوس يلي إمسلفهن ليك أتردهن خلال يومين
وسكر الخط في وجهه..
محمد:تو إنوريك ياكلب إنت وعيلتك لما إنشرد بيكم
.
.
سمعت سراب صوت رسالة من تليفونها فتحت عيونها لقت قيصر راقد جنبها وشكله أول مرة يرقد هكي كان راقد بعمق قربت يدها من وجهه تلمساته وحولت شعره من عيونه وباسته ع خده وخدت تليفونها فتحت الرسالة...
؟؟؟:ألف مبروك ربحتوا القضية ياحبي ياحياتي
سراب شافت لي قيصر لقاته راقد إرتبكت ووجها ولى أصفر من الخوف
وصلت رسالة ثانية:هيا أمتى بتصيري ليا وفي حضني بين يديا..
وطبعا كلام كبير مانقدرش نكتبه😁😁😁
سراب وقفت مش مصدقة يلي تشبح فيه سمعت قيصر تحرك طفت التليفون بسرعة
إلتفتت لقاته فاتح عيونه يشبحلها
قيصر بكسل:خيرك واقفة هكي
سراب بتوتر:لا شي
وإبتسمت بمسايرة:صح النوم
قيصر:تي أما صح نوم والله خاطري في نوم مزال
-تعالي جنبي
سراب:مانبيش نرقد أني
قيصر:مانقدرش نرقد إلا وإنت جنبي تعالي
سراب في اللحظة هذي إتفكر في الرسالة وصاحبها وسرحت بتفكيرها
قدم قيصر وسحبها من يدها جت مقعمز ع السرير
قيصر:شن قلت أني
تمددت سراب جنبه وقيصر قرب منها دفن وجهه في رقبتها من الجنب وحط يده ع بطنها وغمض عيونه
سراب تنهدت:قيصر
قيصر:اممم
سراب خايفة اتقوله وخايفة ما أتقولاش وقعدت اتفكر...
سراب:منخبرك حاجة ضرورية
قيصر بكسل ويتاوم:بعدين بعدين ماتقطعيش اللحظة خليني هكي
سراب:لكن ياقيصر حاجة مهمة مانقدرش إن....
وقطع كلامها ببوسة مفاجئة خفيفة طويلةع شفايفها
سراب فتحت عيونها وجمدت في مكانها..
وخر عنها:هكي تفهمي إنت توا أرقدي وإنت ساكتة
سراب مش مستوعبة شي زرطت ريقها قعدت تشبح في سقف الدار إتقول لبسها جن..😂
إبتسم قيصر ع ملامحها الطفولية وغمض عيونه...
...
وصلت سارة للحوش وفتحت الباب متاع السيارة وهي حامقة وطلعت سكراته بقوة
طلع وراها عصام :سارة وقفي وقفي
لكن سارة تمشي بسرعة ماعدلتش عليه اسرع مشيته ولحق عليها شدها من دراعها بقوة برمها لعنده وبعصبية:إنكلم فيك خيرك مش معدلة
سارة:إطلق يدي
عصام:مش قبل لتقولي خيرك حامقة مني شن درتلك فهميني
سارة إتفك في يدها من يده
عصام:تريحي مش حنطلق نين اتخبريني شن الغلط يلي درته نين حامقة مني هكي ومتنرفزة بالطريقة هذي
سارة بحدة:ومن إنت بيش نحمق منك ااه من أنت ليش وليت من جديد ليش؟؟كنت إمشبة أموري وحياتي من وين طلعتلي وقلبت حياتي فوقي تحت
شد عصام يدها الثانية وقعد يهز فيها:شن درتلك أني بيش تتكلمي معاي هكي فهميني وين الغلط في جيتي للبلاد مرة ثانية وييين
سارة:وين الغلط قلتلي؟؟ الغلط في إنك سافرت من الأول وكسرت ق....
وسكتت..
عصام:كملي ليش سكتي شن كسرت سارة تكلمي
سارة:عصام مانبيش نتكلم معاك مش رايقة توا حل عني
عصام:لا مش ع كيفك
سارة فكت يديها بسرعة وبقوة وبصوت عالي شوي:إنت شن تبي مني حل عني كل واحد وعنده حياته..اوكي صديق..لكن مش لدرجة اتدخل روحك في كل حاجة ماتعنيكش
عصام مصدوم من كلامها حتى بيتكلم ماقدرش
وعطاته بظهرها ومشت بسرعة خشت للحوش
عصام:شن قصتها خيرها
خشت سارة للحوش ومشت تجري للدار سكرت ع روحها وبدت تبكي:أني ليش تكلمت معاه هكي ليش
ماكانش منها داعي العصبية كلها وعليش هذا كله ع خاطر طلع متزوج وعنده إصغار خلاااص ياسارة أنسيه هو في حياته ماكان ليك ولا حيكون
وبدت تبكي...
ومر الوقت لعند الساعة 8م...
خشت دانا للمطبخ وبدت إتوتي وإطيب في العشي
سارة طلعت من الدار وعيونها منفخات خشت للمطبخ..
دانا:اها انت هنا
سارة:ايه
خدت سارة الموس
دانا:شن بتديري
سارة بكسل وحزن:منعاونك
دانا:لالا مايخش حد معاي خاطري انطيب بروحي اليوم والعشي كله من تحت يديا
سارة حطت الموس جنب دانا
دانا:سارة خيرك هكي
سارة:ماخيرني شي
دانا:في حد مضايقك اليوم
سارة: مافيش حد
دانا:شكلك كنت تبكي
سارة:يوووه منك فاتحتيلي محكمة هنا مافيا شي
دانا:غير شن قلتلك بيش تفاعلتي هكي آسفين ماعاد انكلموك
سارة تنهدت وقربت من دنا:دندون
دانا:حولي من حداي
سارة:دندونة آسفة سامحيني مش قصدي
دانا مابتش اترد عليه
سارة:بالله سامحيني والله فشت غل كل من عصااام هذا ا..
دانا:عصام؟؟
سارة سكتت وتنهدت
دانا:في حاجة بينك وبين عصام
سارة ساكته
دانا حطت من يده وابتسمت:ما أتقوليش أتحبوا بعض ههههه
سارة:لا يامهبولة لا
دانا:عليا أني
سارة:هو صح ومش صح
دانا:كيف صح ومش صح
سارة:صح إنحبه لكن هو
دانا:مايحبكش
سارة:مش مايحبنيش كيف منوصلك أني
دانا:تمام تمام خليني إنكمل من العشي بعدين إنهدرز أني وياك وحتخبريني كل شي
هزت سارة راسها بمعنى حاضر...
طلعت سراب من الدار وبدت تمشي وسرحانة خايفة مرتبكة
سارة:اها الملكة طلعت
دانا:سراب
سارة:سراب
سراب سرحانة...
دانا بصوت عالي:سرااااب
سراب قفزت مخلوعة:اه منو
دانا:صح النوم وين سرحانة
سراب:اااه
دانا:الوووو سراب معانا ع الخط إنت
سارة بخبث:شكله مأثر عليها قيصر
ههههه
دانا:حيوانة هههه
-أسمعي سرااب تعالي معانا في المطب...
نقزتها سارة بيدها
دانا:اااي خيرك
سارة:سراب ماتخشش للمطابخ
دانا:ولييش
سارة بهمس:زمان ولعت في حوشهم النار وبوها مات من وراء هالنار
دانا تشبح لسراب:مسكينة
باهي شن دخل المطبخ والطبخ مافهمت شي
سارة:مع إنك محامية لكن غبية
دانا:وشن دخل المحاماة في الموضوع شن المحامي دجال بيش يعرف كل واحد ماضيه شني
سارة:باهي اسكتي وإنت ماتصدقي ترغي سادك اليوم خمس ساعات في المحمكة مابطلتيش كلام
دانا:والله كلبة إنت خزي
سارة:هههه انبصر المهم بو سراب بعد ماطلع سراب من روشن المطبخ جي بيطلع لكن الطبخ تفجر وهو في وسطه ومن هذاك الوقت سراب تكره النار وتكره المطابخ
دانا:ياحرام مساكين باهي وقيصر كيف
سراب:قيصر لأن يحبها مراعيها من ناحية الطبخ
سراب:في شنوووو سرحانات
دانا:اااه
سارة:شنهووو
دانا:تعالوا شوفوا من يتكلم
طلع قيصر من الدار وشبح دانا وسارة في المطبخ
قيصر:شن يديرن الصبايا
سارة:اليوم دانا بتعشينا من تحت يديها
دانا:إيه لأن اليوم فرحانة هلبا ووصيت ع حاجات من برا ع حسابي يعني اليوم معزومين ع حسابي
قيصر إبتسم:غير راك تفرحي زيادة وتخلينا بلا عشي
سارة:ههههههههه
دانا:قيصر أنت مافيش عشي مش انوريك ع تسهويكك
سراب:حتى أني مانبيش عشي مانا
سارة:اووووو قوية مرت خوي
سراب:مانا شنو بتخلوه بلا عشي
قيصر شبح في سراب:ياحليلي منها يلي خايفة عليا
.
.
فهد:شني حبيبتي واتية لغدوة
سوسن:إيه وفرحانة منطير
فهد:مش أكثر مني..
سوسن:مش مصدقة تعرف
فهد:لا حبيبتي صدقي غدوة خطوبتنا وبعد إسبوع عرسنا يعني كلهم إسبوعين ونبقى أني وإنت واحد
سوسن بخجل:ههههههه
فهد:ااااه من الضحكة السمحة منموت أني
أم سراب:ياناااري منك ياسوسن
وبصوت عالي:سوسن تعالي يابنت
سوسن:حي عليا أمي بتقتلني باااي..
طارق:تمام غدوة منبدأ إن شاء الله
عصام:اوكي تعالى ع الموعد
طارق:إن شاء الله
سكروا الخط...
طارق:ياسلااااام يس يس
سفيان😑😑:إن شاء الله عقل صغره مش كبرة
طارق:تي أسكت إنت وين تفهم
الشركة يلي نحلم بروحي نشتغل فيها غدوة منبدأ خدمة
سفيان:باه وكان هذا
طارق:طول عمرك مافرحتلي ع حاجة إتقول ولد الضرة أني والله عارفكم ما إتحبوني
سوسن:وآخيرا فهمت روحك
طارق:ضمي فمك مسكين فهد إضحكنا عليه عطيناه راجل إلا😂😂
سوسن:هاهاه بايخة من واحد بايخ
طارق:والله كان يشوفك هكي بيدير باب في الحيط من كتر الخوف سحيقة وجهك يقطع الخميرة من الخبزة
سفيان:كلا إنت وكلامك تبو إعدام
طارق بغرور:حاسديني
سوسن:غير عليش
طارق خبط سوسن ع رقبتها من خلف:وأولهم إنت
سوسن:يح بصارتك ثقيلة يازهاق
سفيان رن تليفونه
طارق بخبث:عز الدين عز الدين احمر وا...
ويرمي عليه سفيان الوسادة
طارق:ااااااهههههههههه
حان الآن موعد الرومنسيات حسب التوقيت المحلي لمربوعة سفيان وضواحيها😂😂😂
سارة:هاهاهاهاااااا
.
.
حطت دانا العشي ع الطاولة وجابت حلويات وعصائر من برا وحطتهن في المطبخ ونادت ع الكل..
سارة:اممم شكله عشي مرتب يسلم يديك
دانا:شكرا
جت سراب وقيصر قعمزوا...
قيصر:شكله مافيه بنه
دانا:قيصررررر
قيصر:ههههه انبصر
سراب:هههه
خبط الباب...
سارة:أني منفتح..
قيصر:هذا عصام أني إتصلت بيه أتعب معانا حتى هو
سراب:صح
فتحت سارة الباب وجمدت في مكانها..
عصام:مساء الخير
إلتفتت سارة وخلت الباب مفتوح وتجاهلاته
عصام تنهد بحمق..
قيصر:خش ياعصام
خش عصام:شن الجو
دانا:خش تفضل
شبح الطاولة معبية:ووه شكله اليوم عشي صح
سراب:حماتك اتحبك تعال
عصام:والله كان قيصر يحبني اتصل
قيصر:ههههه
دانا وقيصر وسراب:هههههه
وقعمزوا...وبدوا يتعشوا طبعا سارة اتهدرز وجوها فري لكن بدون ماتشبح لعصام وكأنه مش موجود نهائيا وهذا يلي يحرق في عصام من داخل...
سارة:احم اليوم دانا بطلة الحدث صراحة طريقتك في المحكمة مش عادية
سراب:ايه بدات لما توقف هكي بثقة تحسيها بطلة مسلسل ولا فيلم
قيصر:ساد من النفخ راهي تنفجر
دانا:احم مش نفخ هذا واقع
عصام:ماتشوفيش روحك
سراب:من حقها اتشوف روحها ياكبدي
قيصر:وين حتى عصام جاب دليل قوي
دانا:ايه حقا كيف جبت الدليل
عصام:سررر
قيصر:ههههه
دانا:ماتشوفش روحك علينا
عصام وقيصر بصوت واحد:من حقه يشوف روحه
😎😎😎
سراب:هههه مجانين
سارة:لالا أحلى لقطة عجبتني لما بديتي تسألي في شادي بسرعة وكيف خليتيه يجاوبك ويعترف
سراب:ايه صراحة فتحت فمي فيك والأسئلة بروحي تلخبطت
دانا:هذي طريقة كويسة بيش تخلي المتهم يعترف أني انسمي فيها الطريقة الثعلبية طريقة ماكرة تخلي أي واحد يعترف بيلي داخله لأن الخارج يكذب لكن الداخل عمره مايكذب...
عصام:انهنيك فكرة قوية الحق لازم يخافوا وين يسمعوا بدانا المحامية
قيصر:الحكم بيتنفد غدوة
سراب:بتحضر..
قيصر:أكيد حنحضر مستحيل انفوته نبي انشوفه كيف نهايته هكي تبرد ناري يلي والعة في صدري
دانا:حقك
-ايه قولولي شن رايكم في العشي
الكل:يعععع😂😂😂
دانا:خزووو
سارة:حبيبتي يهبل تسلم يديك
دانا:والله سارة تفهم فيا
سارة:نعجبك
وغمزتلها😉
هذي الحركة عصام ماعنداش معاها روح وزيادة من سارة تي ذاب في مكانه(غير أصبر ياعصام مش ليك الغمزة راه😂😅)...وبعد ضحك طويل ودردشة طويلة...
كملوا العشي...ورفعن المواعين للمطبخ ويلي صار إن سراب خشت للمطبخ
دانا:خلي حبيبتي عادي تو إحني نغسلوهن
سراب:والله منغسل معاكن
دانا وسارة بدن يشبحن في بعضهن مستغربات
سراب:خيركن تشبحن في بعضكن
سارة:مش ما أتخشيش للمطبخ
سراب:صح ماعنديش جرأة نمس الغاز وعندي فوبيا من الن...اااه لكن المية انحبها راه ويشكروا فيها
دانا:هههه تمام مانا أني منوتي القهوة والحلويات..
.
.
عصام:شكلك رضيتها
قيصر:ايه
عصام:به كويس
-ماكلمك أحمد
قيصر:لا خيره
عصام:لا خير غير حسيته زي يلي يبي يكلمك لكن مش قادر
قيصر:فكني منه ماعاد اتجيبلي سيرته اصلا حتى أمي وبوي غدوة بإذن الله يكونوا عندي
عصام:باهي شن صار مش فصلوك من الخدمة كيف بتدير
قيصر:والله ماني عارف
عصام:مش شهادة الهندسة واخدها
قيصر:هذا يلي بيصير
عصام:تمام تعالى اخدم في شركتي
قيصر:شكرا مانبي صدقة من حد
عصام:غير شن اتخرف صدقة شنو تي امداير اعلان قديش ليا ونبي حد معاي يعني شريك ومش حنلقي أحسن منك نوثق فيه
قيصر:لا انت وقفت معاي هلبا ساد هكي
عصام:غير فكر شريكي في الشركة اني يلي محتاج مش انت
قيصر سكت
عصام:وانت أذكى مني بهلبا ودرجتك أعلى من درجتي يعني مش مستحق لحد أنت
قيصر:يصير خير
عصام:خود راحتك نراجي فيك أني
-وبعدين تعالى هنا شن صار في الموضوع يلي كلمتك عليه
قيصر:أما موضوع
عصام:حي ياحي مش كلمتك ع سارة
سراب:سارة..
عصام وقيصر ألتفتوا..
سراب حطت السفرة:خيرها سارة
عصام:اششش وطي صوتك
سراب:خيرها به
قيصر:ماخيرها شي
عصام:والله منقول لسراب احسنلي
قيصر:تي باهي خيرك انت مستعجل
عصام:سراب أني تقدمت لسارة نبي نتزوجها
سراب بفرح وصوت عالي:بالله
عصام:اششششش
سراب:آسفة بالله جديات تتكلم
عصام:ايه قلت ياحنة لراجلك لكن مش عارف خيره معند اتقول مايبينيش نتزوج
قيصر:ياحمار مش مانبيكش تتزوج الوقت هذاك التاو مش مناسب
عصام:وتوا مناسب المشاكل انحلت كلها
-سراب حداك كلميه أني يئست
سراب:خلاص موضوعك عندي عطيني يوم بس
عصام:تمام عبيت عليك راه
سراب:تم
قيصر:وأني رجل كرسي هنا
عصام:لا وانت الصادق حيط زي الحيط يلي راسمه
غادي
سراب حطت يدها ع فمها بدت تضحك
قيصر:اضحكي انت توا تلاقيتوا عليا وانت نوض هي روح
عصام:والله ماني امروحها باهي
دانا جت هي وسارة..
عصام:اسكتي مش توا
سراب:به
دانا:شن رايكم نلعبوا
قيصر:ها ريت هذا يلي يفتح المجال للأناثي تبي تلعب
دانا:سراب كلمي راجلك خيره معاي
سراب:ههههه تصطفلي انت وياه
سارة:مش ألعاب عويل ريتوا دانا كيف سألت شادي في المحكمة
الكل:ايه
سارة:نلعبوا زيها ودانا هي يلي تسأل وبالواحد
قيصر:تي نوضوا من حداي لعب فروخ
دانا وسارة:قيصر بالله
قيصر:روحوا ماني لاعبها
وناض وقف شدت يده سراب:باهي كان قلتلك ع خاطري❤❤
قيصر😍😍
سارة وعصام ودانا:اوووووووو
ابتسمت سراب بخجل:ع خاطري
تنهد قيصر وقعمز
عصام:الكلام كبير ياصاحبي كلمتين من سراب
قيصر وهو يشبح في سراب:مانقدرش نرفضلها طلب
وقعدوا يشبحوا في بعضهم بحب❤🔥
دانا:احم تمام حنبدأ بي قيصر هو الأول
قعمزت دانا قدام قيصر عالكرسي
وسراب وسارة ع الكنبة وقيصر وعصام ع كنبة ثانية
دانا:واتي
قيصر تحمحم ونفخ خدوده:يلا أبدي
دانا:سراب
سراب:ايه
دانا:تعالي جنب قيصر لأن الأسئلة مزدوجة ليكم الإثنين
سارة:ايه هكي أحسن
قيصر:مش بتسأليني أني
دانا:لالا غيرت فيها تعالي سراب ويلي يخسر معناها مايعرفش الثاني
-منشوف كم تعرفوا بعضكم
وقف عصام وتبادل هو وسراب وقعمز جنب سارة سارة شبحتله ع جنب وتجاهلاته..
عصام يشبحلها وبس...
سراب شدت في يد قيصر 😍❤
دانا:واتيين
قيصر وسراب:لك ذلك
دانا:هههه خزي..
-اسم حاجة اتحبها
قيصر تلقائيا:سراب
سراب شبحتله بحب
سارة:اووووو ع الحب
دانا:الأسئلة سريعة مايقطع حد..
-الحب
سراب:قيصر
دانا:لون سراب
قيصر:وردي
دانا:قيصر
سراب:اسود
دانا:سراب
قيصر:صعبة المنال
دانا:قيصر
سراب:حبيبي
دانا:عمرها
قيصر:24
دانا:طبعه
سراب:عصبي حنون
سارة سارحة في سراب وقيصر كيف يجابوا ع الأسئلة وعصام يتأمل في سارة
دانا:الكره
قيصر:دموعها
دانا:الخوف
سراب:واني مش معاه
دانا:شن تكره سراب
قيصر:النار
دانا:عيد ميلاد قيصر
قيصر قعد يشبح في سراب :سراب ماتعرفش عيد ميلادي
دانا:واحد..أثنين...
سراب:ثلاثة/ أربعة /1989
قيصر فتح فمه وقعد يشبحلها...
وبدت تسأل هلبا أسئلة وكل واحد يجاوب أسرع من الثاني نين دانا عيت
دانا:خلااااص عيييت
بدت سارة اتصفق وعصام
سارة:أحلى ثنائي انحبكم
دانا:الصراحة كسرتوا الرقم القياسي ولا جواب غلط ولا في مجال للتلخبيط
سراب:حبنا لبعض قوي والتواصل يلي بيننا أقوى
قيصر:سراب تفهمني من عيوني بدون مانتكلم
سارة:تهبلوا
سراب:دور عصام وسارة بما إنهم أصحاب من زمان
سارة فتحت عيونها :لالا اللعبة يلي يحبوا بعضهم
عصام شبحلها وسارة إرتبكت...
دانا:عيونك شن أنحب شادي أني
سراب وقيصر:هههههه
سراب بخبث😈:دانا دانا
-أسألي كل واحد بروحه
قيصر:ياشطانة عارفك
سراب:شوف كيف يعرفوا بعضهم وشوف الفيلم يلي بيصير
قيصر:تو انوريك ياشطانة
سراب:ههههه
همست سراب لدانا:خلي الأسئلة شخصية
دانا:عارفة ههههه حتى هي هكي
عصام:لالا فوتوني
سراب:والله ماخصاتك نوض تو انت الأول
سارة ناضت بتمشي
دانا:وين ولي انهارك ياماتولي
وسحبتها قعمزتها
سارة:مانبيييش
سراب:قعمزي واسكتي
لفت دانا الكرسي لجهة عصام وسارة..
يتبع....
#رحيق_الفجر🕊🕊
