حب بعد ورطة

34

#حب_بعد_ورطة
الحل{34}قة...
وتبدا الحلقة مع قيصر يلي وصل ع القهوة يلي مقعمز فيها محمد درس السيارة ونزل منها ونار الغضب ع ملامحه...🔥😡
خش للقهوة وقعد يدور بعيونه ع محمد شوي ولمحه ع الرخامة يلي يحطوا عليها في الطلبيات
قدم قيصر بهدوء وهذا الهدوء يلي يسبق العاصفة
محمد:لو سمحت بسرعة مستعجل
ومايشبح إلا حد وقف جنبه وحط يده ع الرخامة محمد رفع عيونه بيشوف ويجمد في مكانه من الخوف😱🥶
أحمد.بإرتباك:ققققيصر
حط الولد قهوة محمد ع الرخامة:قهوتك
شبح قيصر في القهوة وشبح في أحمد 🤨
محمد بيمد يده بياخدها لكن قيصر كان أسرع منه وخداها 
محمد تحمحم ومسح العرق يلي ع وجهه🥵😰
قيصر بهدوء مخيف:معقولة تشرب قهوتك وإنت مروق هكي للدرجة هذي مهزلة هي ؟؟
محمد بخوف:أسمع هي يلي تتصل بيا وا...
قيصر شرب من القهوة رشفة (جغمة) وحولها من فمه
قيصر:تعرف القهوة حلوة هلبا
وفجأة بزعها ع وجه محمد
محمد وخر وشد وجهه وقعد يعيط لأن القهوة ساخنة هلبا:ااااااه🔥☕
قيصر بحدة:وتوا ولت مرة ويومك مر ع راسك
وقدمله ويعطيه بوكس ع خده وبوكس تاني وركله ع بطنه لين محمد طاح ع ظهره وقعد يتألم
كل يلي في القهوة قعدوا يتفرجوا
قيصر بعصبية:قلتلي هي يلي كلماتك هييي
ويشده من من رقبته بيديه الإثنين  وهو ضاغط ع سنونه:أقسم بالله إندورلك فيها دوارة قديش ليا تحملتك هلبا واليوم منطلع فيك الغل يلي من يوم إنحبست فيه أني وعصام لعند هاللحظة إنت ماعرفتش روحك مع من إحصلت أني قيصر رجب فهمت
ويرميه ع العرصة متاع القهوة وبصوت عالي:قيصر رجب ياحيوااااان
طاح محمد تحت وشد راسه يلي جت الخبطة فيه
قدمله قيصر وشده من رقبة جاكيته:مازال عليك تي أني كيف بديت فيك
قدموا شوية شباب بيحزوا العركة
قيصر بصوت عالي:لاااا أقسم بالله واحد يقدم إنهاره أسود فاهمييين
وخروا الشباب لأنهم خافو من قيصر يلي عروق وجهه واضحة وعضلات يديه طالعة💪💪
محمد بألم:ااااه بالله خلاص
قيصر :خلاص آخر الشهر
ويشده يرفعه الفوق ويحذفه ع الطاولة لين أنكسرت
محمد:اااااااااااااا ااااااااااه
الكل يشبحوا مصدومين من عنف الضرب😱😱
قدمله قيصر وقعد يضرب فيه ع وجهه وبصوت عالي حاد حزين:بسببك أني ضربتها ضربتها ضربتها رفعت عليها يدي ضربتها ياكلب ياحقير
كلّ منك كلّ منك
محمد وجهه من الدم ماعاد ينفرز وإرتخي بكل
قدم راجل:استهدي بالرحمن ياولدي
وقف قيصر وهو داهش:خليييني منشبع فيه اليوم هال******
وشده من رقبة جاكيته:صبي الفوق قاعد ماكملتش
محمد:اااااه  ااااااه
قيصر ماعاد يشبح في شي قدامه كان لما ضرب سراب...
يعني كل يلي داره محمد داسه قيصر لين تراكم وجي اليوم يلي بيصفي حسابه فيه
قعد يضرب في محمد ع وجهه بقوة وغل ومحمد ظلمت قدامه ماعاد شبح شي
اشبح قيصر ثلاجة المشروب ويجري بمحمد ويدكله راسه في الثلاجة نين انكسرت
الكل شهقوا وقدموا يجروا شدوا قيصر وخروه عن محمد يلي راسه كله ينزف دم وملامح وجهه ماتنشبح من الدم
قيصر بصوت عالي:حولوووووو إطلقووووني
قعدوا ينوضوا في محمد ويشوفوا فيه وفجأة إنطلق قيصر منهم ومشي لمحمد شده من رقبته وبصوت عالي:نوووض افتح عيووونك أني ماكملتش نووض
وقعد يحرك ويخض فيه بقوة وبصوت مبحوح وعالي:نووووض ياكلب نووض
قدمولها الرجالة وفكوا محمد من بين يديه وطلعوه برا
قيصر:والله ليك غيرها أقسم بالله طريحة زيها النار ما إنطفتش
الراجل:هدي ياخوي خيرك استهدي بالرحمن
سكت قيصر قعد يتنفس بقوة داهش
جي الراجل صاحب القهوة وقعد يعيط بقوة:شوف شن درت في قهوتي ما ألقيت وين تتعارك كان هنا
الراجل الأول:روق ياخوي حتى أنت
صاحب القهوة:تي كيف هكي شوف كيف خلوها دمار
حط قيصر يده في جيبه وطلع فلوس من جيبه وشد يد صاحب المحل  حطهن في يده
قيصر بحدة وبصوت داهش:هاك حق يلي انكسر وسادك عياط زي البنت
وطلع من القهوة بكل ثقة وحدة وعصبية
.
.
أحمد طاح تحت:اااااااه عيوووني
ولاء قربت من سعاد وهمست في وذنها وهي ضاغطة ع سنونها:عارفاتك قصدا درتيها لكن تو اتشوفي والله لماتندمي
نزلت أم قيصر ع العياط وقدمت لأحمد:أحمد
-خيره خوك
-أحمد خيرك يالولدي
ولاء فنصت في سعاد:سعاد بخت الفليت
أم قيصر بصوت عالي:فليييت نهار أسود
احمد:عيووووني ااااااه🔥🥵
أم قيصر نوضت أحمد:نوض ياولدي معاي تعالى
سعاد دارتها وخافت جسمها كله يرعش🥶🥶
أم قيصر:جيبي ثلج بسرعة
سعاد:يلا
أحمد يعطس وخشمه ولى أحمر وعيونه اتقول فيهن فلفل🤕😷
ولاء قعدت واقفة وتشبح في الملف:وبعدين امتى بيوقعه 😠
رن رن رن
ولاء:هذا محمد😱😬
في الأول ترددت ماتبيش تفتح لأن بيسألها ع الورقة
بعدين فتحت وحطت التليفون ع وذنها وزرطت ريقها:ممحمد😁😬
؟؟؟:يا أختي إنت تعرفي صاحب التليفون
ولاء بإستغراب:ايه ليش وين محمد😑
؟؟؟:هو في المستشفى توا
ولاء:شنهووو؟؟😱
اما مستشفى؟؟💔
.
.
#في_المستشفى
سراب بهمس:دانا وينه
دانا:تو يجي تو يجي
سراب:دانا قوليلي الحق قيصر مايبيش يشوفني صح🥺💔
دانا حمقت وبصوت عالي:إنت وحدة بلا كرامة معقولة في وحدة زيك إتدير هكي 😠
سراب:اا..😟
دانا:أسكتي بالله ولا كلمة 🤫😡
-إنت تندري شن دارلك ولا...😠
هو ضربك مد يده عليك أصحي ع حالك إنت اتطيحي من شخصيتك راه هكي مش كل مرة بتجري في جرته قيصر غلط معاك ومش هالمرة هذي بس ديما يغلط معاك وديما اتسامحي فيه لأمتى صارت كرامتك هكي أمتى مايبي يصونها وأمتى مايبي يعفس عليها 🤬
سراب تشبح في دانا مصدومة من كلامها أول مرة دانا تنفجر هكي😳
دانا:عارفة اتحبيه وعارفة يحبك لكن الحب يبي شوية ثقة شوية احترام تقدير تفاهم مش هكي وخلاص أني ع حسب ما اسمعت ماكنتيش هكي ياسراب..
وين شخصيتك العنيدة القوية وين سراب القديمة يلي وقفت قدام قيصر قيصر الضابط العنيف القاسي وقدرت تنقد صاحبتها وكسرت غرور وكبرياء الضابط يلي يسمع بإسمه بس يتجمد في مكانه وينها اااه قوليلي
سكتت دانا وحطت يدها ع جبهتها:شي يجيب الضغط والسكر أما حب هذا وأما زواج 🧐
سراب بحزن وصوت هادي:كملي ليش سكتي 🥺
دانا شبحت في سراب بإستغراب🙁
سراب:كملي كلامك كله صح يادانا عندك حق...
أني حبيت قيصر لدرجة إنعميت حبيته لدرجة إنسيت كرامتي وشرفي عطيته كل الحب والإحترام ووثقت فيه وعفست ع كرامتي وإحترامي وهو ماقدرني وبيش جازاني جازاني بالشك والخيانة ماوثق فيا زي ماوثقت فيه ثقة عميا 💔😢
دانا تنهدت:سراب أني آسفة ع أسلوبي بس والله لأني إنعزك هالشي غلط أني دارسة حقوق ومن هالحقوق حق المرأة في المجتمع وخاصة الزوجة
سراب بدت تبكي وبحزن:عارفة وكلامك صح مازعلت منك بالعكس إنت فتحتي عيوني ع حاجة انسيتها ع خاطر قيصر وهو مايستاهل عندك حق عطيته حب هلبا لين تمادى هو يحسابني ضعفت لكن
تو يشوف قسما عظما حنشعفه وانخليه يعرف إن سراب القديمة حية مش ميته وحيتربى زين هالمرة
دانا بخوف:سراب إنت بتسيبي قيصر يامجنونة مش هكي قصدي ااني قصدي
سراب بألم:ااااه
دانا:ساعدي روحك
سراب:لالا كويس حالي خير من بكري
-عارفة يادانا أني مانقدرش انسيبه ومستحيل لكن قولي قرصة وذن
-أني يادانا قربت هلبا نين قربي ليه ولى مذلة وتوا جي الوقت يلي منتباعد شوي وانخلي مجال للشوق والحنين والأيام والوقت حنتباعد بيش نتقرب فهمتيني يادانا
دانا شدت يد سراب:فهمتك حبيبتي وأني معاك أي حاجة تبيها من عيوني
سراب:تسلم عيونك وشكرا لولاك مافتحت عيوني
دانا:ع فكرة حاسة بالدنب تجاهك
سراب:ليش
دانا:كل مني أني يلي قلتلك ماتخبريش قيصر وعطيتك وعد إني حنكشف من ومشيت سافرت سيبتك
سراب إبتسمت بحزن:ما إتقوليش هكي وكويس يلي صار هكي هذا وين عرفت إن قيصر مايوثق فيا
-ايه خطرها ومن طلع يادانا
دانا سكتت😬🤐
سراب رفعت راسها شوي وولت رداته بألم:ااااه
دانا:وين نايضة إنت قاعدة تعبانة
سراب:قوليلي يادانا من ؟؟
بعد ماتنهدت:محمد ياسراب
سراب:😐😐محمد؟؟
وقعدت تشبح الفوق وبعدين إبتسمت بسخرية
دانا:خيرك تضحكي
سراب:نضحك من الوقت وع الوقت هو يلي شك فيا وإتهمني بالخيانة مع قيصر لما كنت مخطوبة ليه واليوم تعرضت لنفس الموقف لكن المرة هذي جرحتني أكثر من يلي قبلها
دانا قدمت ومسحت دموع سراب :خلاص حبيبتي كل شي ح ينحل إنت غير ماتوتريش روحك
خدت سراب نفس كبير وطلقاته...
سراب إذكرت حاجة:دانا
دانا:ايه
سراب:ع سيرة محمد الحقير هذا يبي ينقل أملاك عيلة قيصر ليه وا...
دانا:وعن طريق ولاء صح
سراب بإستغراب:وإنت كيف عرفتي
دانا:إنت يلي كيف تعلمي
سراب:خبرتني سعاد يلي تشتغل في الحوش غادي
دانا:وسعاد هذي ا؟؟؟
سراب:لالا ماعندهاش في الخبث كويسة وطيبة وتحب العيلة
دانا:خشيت لمكتب محمد ع أساس منحط ظرف ومنطلع لكن لقيت تليفونه ع الطاولة ولقيت الورقة متاع نقل الملكية فتشت التليفون مالقيتش رسائل
كتبت رقمي في تليفونه واتصلت وهكي عرفت إن محمد هو يلي يبعثلك في الرسائل وعرفت إن ولاء مدايرة علاقة معاه وهو يستغل فيها بيش يحصل ع الفلوس والأملاك ويرميها
سراب:أقسم بالله نتقزز من روحي لما ندكر إني كنت مخطوبة ليه هالحيوان
دانا:عندك رقمها سعاد نبي نتواصل معاها بسرعة
سراب بحزن:رقمها في تليفوني وتليفوني🥺
دانا:تمام خلاص غير إن شاء الله ماوقعش
سراب:أني وصيتها سعاد لكن أشبح
دانا:شن بتدير هي مسكينة هي مجرد شغالة وإحتمال كبير توا يلزوها
-ع كل أكيد الرقم في الشفرة تو انشوفه
سراب:تصرفي بسرعة يادانا
خش الدكتور وفي يده ملف متاع سراب
الدكتور:كويس كويس كل ساعة أحسن من ساعة ياسراب
ابتسمت سراب بمسايرة☺️😊
الدكتور:هذا آخر تحليل وفحص ليك امورك كويسة تمام مافيش حاجة اتخوف الحمد لله ردي بالك من روحك الفترة هذي كولي كويس وانتبهي لروحك
وألزمي فراشك ماتتحركيش هلبا
سراب تهز في راسها تسمع في الدكتور ونصائحها
الدكتور:وخليك بعيدة ع التوتر لأن مش كويس ليك وللجنين يلي في بطنك
سراب في الأول تسمع وعادية ووين سمعت الجنين يلي في بطنك هنا سراب تحنطت ولاحركة ولا كلمة حتى عيونها ماعاد رفن بدت تشبح في الدكتور مصدومة..
دانا:شنووو
الدكتور:ايه حامل من اسبوعين والحمد لله يلي صار معاها اليوم ما اثر ع الجنين
-الف مبروك وين زوجك خله يفرح بالخبر
سراب:دكتور دكتور
الدكتور:نعم
سراب:خلي الخبر سر بيننا بالله
الدكتور:ليش سر لازم تفرحي واتخبري زوجك يابنتي
سراب بحزن ودموع:لا يادكتور رجاءا خليه بيننا أني فرحانة والله فرحانة لكن ماتخبرش زوجي
الدكتور يشبح في سراب ودانا مش فاهم شي
دانا:دكتور أكيدة حنخبروه لكن لأسباب شخصية مش توا حنخبروه
الدكتور:تمام براحتكم لكن غلط هكي
سراب:عارفة غلط يادكتور لكن الظروف جبرتني نكتم الخبر
الدكتور:تمام مش حنخبر حد المهم ردي بالك من روحك الفترة هذي بدات
سراب هزت راسها بدموع :شكرا دكتور
طلع الدكتور...
دانا ابتسمت:إنت بتصيري أم يا سراب
سراب حطت يدها ع بطنها وابتسمت والدموع في عينها:مش عارفة يادانا نزعل ولا نفرح نزعل ع وضعي ولا نفرح لأن في بيبي في بطني
.
.
#في_مستشفى_ثاني...
مرمي ع السرير وملفوف ع راسه شاش طبي ووجهه مولي خريطة الوطن العربي😁 ومش قادر حتى ينوض
خشت ولاء بإندفاع وخايفة وشدت يد محمد :محمد
محمد شبحلها :شوفي خوك شن دار فيا
ولاء وجعها محمد وبدت تبكي:أنت كويس
محمد بعصبية:لااا مش كويس شوفي خوك قيصر كيف شوهلي وجهي
ولاء سكتت  وشدت يده وهي تشبحله
فك محمد يده منها:ليش جيتي هنا اااه 😡
ولاء:عارفاتك زعلان مني ع خاطر توقيع الورقة والله يامحمد انحاول كيف انخلي أحمد يوقعها لكن هو مايبيش يوقع لدرجة فسدتله تليفونه بيش مايتواصل مع حد
محمد:للدرجة هذي واعر توقيع أني يلي حمار عبيت عليك من الأول ااااااه
ولاء شهقت:بابسوي عليك
محمد بحدة:إمشي من هنا وماتجيش إلا ومعاك ورقة الأملاك موقعه
ولاء:لكن يامحمد
محمد بصوت عالي:برييي قلتلك
وبألم شد راسه:اااااه
وقفت ولاء وبدت اتوخر وتشبحله وتبكي
محمد:ياغبية بري من هنا تو يشوفك حد امشييي
طلعت ولاء جري
وقف محمد وقدم للمراية وشاف وجهه لقاه خريطة
وبحدة وشر في عيونه:والله لما تندم ياقيصر انت وعيلتك شوهتلي وجهي وأني حنشوه سمعتك وانخليك عبرة للي زيك غير انحصل الورقة وشوف شن يلي منديره😈😈👹
.
.
سعاد:مدام ماكانش قصدي سامحيني
أم قيصر:صار خير ياسعاد والفليت ترميه وماعاد تنسي فاهمة
هزت سعاد راسها بحزن وخوف :
-كيف حاله توا
أم قيصر:درتله الثلج وهفتن عيونه عليه وتوا راقد
-ديريلي قهوة بالله وجيبيها الفوق
سعاد:حاضر وآسفة مرة ثانية
.
.
#في_المستشفى
خش سفيان والشطان ع خشمه متربع مايشبح في شي بكل كان أخته يلي يعلم بيها في المستشفى
سأل الإستعلامات عنها وخبروه عن مكانها ومشي..
وصل للحجرة يلي فيها وشاف من الروشن وفتح الباب لقي سراب راقدة وسبتة طبية ع رقبتها ويديها ملفوفات بشاش طبي ورجلها عليها ضمادة فك قعد يقدم بالشوي مش إمصدق إن هذي سراب أخته كيف وأمتى ولت في الحالة هذي
وقف ع راسها :سراب
فتحت سراب عيونها وإنصدمت:سفيان
سفيان:شن صايرلك خيرك هكي وامتى ك ك كيف
سراب بإرتباك:سفيان من خبرك
سفيان:مشيت لحوشك لكن خبروني أنك في المستشفى
سراب سكتت
سفيان:سراب فهميني شن يلي صاير وبعدين وين راجلك تكلمي
-شكلك مدايرة حادث
سراب:سفيان قعمز وروق واسمعني
سفيان:تي كيف تبيني انروق وحالتك هكي ومافيش حد معاك
سراب:كانوا معاي مش بروحي هنا إنت غير قعمز وحنفهمك كل شي
تنهد سفيان بضغب وقعمز بالسيف:قولي نسمع فيك
طبعا سراب قريبة هلبا من سفيان وديما تحكيله وتشكيله أكثر حتى من سوسن لأنه يفهم فيها وتفهم فيه وبدت تحكيلة ع قصة محمد وقصة الرسائل وشن دارللها قيصر وحكتله شن تبي اتدير مع قيصر وإنها تبي اتندمه واتشعفه طبعا سفيان جن جنونه لما عرف ان يلي صار مع مش حادث وإن قيصر ضاربها لكن سراب بإسلوبها وطريقتها أقنعت سفيان إن مايدير شي ولا يخبر حد ويساعدها 🙏😟😢
تنهد سفيان ووقف حامق😡
سراب:بالله ياسفيان ع خاطري
إلتفت سفيان:اقسم بالله كان ع خاطرك ولأني إنعزك ومحترمك ومحترم قراراتك كان هذا وريته حسابه ع مدت يده شن يحسابها سايبة ماعندك حد ولاشنو
سراب إبتسمت:ولأني عارفاتك حتفهمني خبرتك بالحق ربي يخليلك ليا وماننحرم منك
قدم سفيان وشد يدها:كم عندي سراب أني المهم كيف حاسة روحك توا
سراب:الحمد لله أحسن
-ايه وتي روحك أنت حتصير خال
سفيان بفرح:بالله جدياات
سراب:ايه هههه
سفيان:ألف مبروك 😀😀
سراب:الله يبارك فيك
سفيان:تسمع امي بيك والله لما اتطير من الفرح
-وكان الفرخ طارق هنا راهو شهدر بيك المستشفى كلها😂😂
سراب:هههههه ااه اح اح
سفيان:ساعدي روحك
سراب:ياعنشكلك غيرتلي جوي 😂
.
.
سارة:شن صار في سراب يا دانا خبريني
دانا اتدور في التليفون:مليحة
-وين مشي
سارة:وقيصر وينه
دانا:مانعلمش
-تس اووف
سارة شدت دانا وبعصبية:دانا خليك معاي ع شنو اتدوري
دانا:نعم ياسارة شن تبي
سارة:نسأل فيك ع سراب طمنيني
دانا:مليحة كويسة والله مافيها حاجة وشوي تاني بيعطوها خرووج
ونزلت تحت السرير اتدور
سارة:في شنو اتدوري
دانا:تليفون
سارة:شني
طلعت دانا من تحت السرير:تليفون سراااب
سارة:أني حولته
دانا:هاتيه
سارة:مكسر راه ماعاد يجي شي
دانا:غير هاتيه نبيه
فتحت سارة درج في الدولاب متاع سراب وعطاتهلها:هاك
دانا:شكرا
وطلعت تجري
سارة:خيرها هذي شن تبي فيه التليفون
طلعت دانا برا وفكت الجهاز وخدت الشفرة منه وركبتها في تليفونها وبدت اتدور في رقم سعاد
دانا:سعاد سعاد سعاد وينها وينها
-اهوّ😀
#ونمشوا_لي_سعاد
بعد ماعطت القهوة لأم قيصر نزلت سعاد وكان تليفونها يرن خدت سعاد تليفونها وبإستغراب:من الرقم هذا؟؟
ردت:الو
دانا:الو
سعاد:من معاي
دانا:سعاد صح
سعاد:ايه شن تبي يا اختي
دانا:سعاد أني دانا خبرتني سراب ع كل شي
سعاد بخوف:ااه من سراب
دانا:ماتخافيش أني صاحبة سراب وأني محامية ماتخافيش مني أني نبي انساعدك قالتلي سراب ع كل شي
سعاد:اها
دانا:المهم احمد وقع ولا لا
سعاد:لا ماوقعش وشكلي منطلع من الحوش بكل لأن ولاء كشفتني
وحكتلها كيف اتحاول تمنع أحمد وكيف ولاء اتحاول اتخلي أحمد يوقع
سعاد بصوت يرعش:وتوا أحمد راقد متحسس من الفليت يلي بخيته
دانا عفويا:كيف حاله توا
سعاد:مانعلمش ماعاد شفته
دانا:اها تمام أني حنعطيك ورقة بدال الورقة يلي في الملف واتحاولي اتحطيها والورقة هذيك تعطيهلي
تمام..
سعاد:كيف مافهمتش
وقعدت دانا تشرح لسعاد إن الورقة يلي بتنحط بدال الورقة هذيك هي ورقة ملكية نفسها لكن الاسم متغير من محمد لقيصر وإن قيصر هو الولد الكبير للعيلة وهو ليه الأحقية بالأملاك وإن الأملاك يمشن باسمه خير من واحد غريب حقير زي محمد يلي ماليه علاقة أصلا
سعاد:باهي صعب كيف منبدلهن وزيادة أحمد في داره قاعد
دانا:مش هو مايشوفش
سعاد:ايه
دانا:خلاص تقدري اتحطيهن وأني معاك حنجي ع اساس منعطي ورق لأحمد
-تو تفهمي وين نوصل غادي تمام
سعاد:تمام خلاص لكن خايفة
دانا:ماتخافيش مش ح يصير شي تأكدي
سعاد:حاضر يلا باي
بعد ماسكرت الخط
تنهدت بقوة دانا:مع إن ماينفع فيك ياقيصر لكن هذا طلب سراب شن مندير..
#نولوا_بالزمن_بالشوي..
وقبل ليجي سفيان للمستشفى وبعد ماطلع الدكتور جت بتطلع دانا نادتها سراب
دانا:نعم
سراب:شن ناوية
دانا:والله ماني عارفة؟؟
سراب:منطلب منك طلب وهذي آخر حاجة انديرها لقيصر قبل لنمشي
دانا:ومازال ينفع فيه ياسراب
سراب:لا يادانا أني متأكدة إن الفترة يلي منمشي ومنسيبه فيها قيصر حيولي لعوايده القديمة حيولي يتنمر ع الناس ويولي يدخن بالطريقة المخيفة هو تعود ع العيلة وإن حد يكون جنبه بعد ماكان وحيد مانبيشي يولي للظلام من جديد
دانا:شن طلبك
سراب:اتبدلي الورقة بورقة فيها اسم قيصر هكي قيصر يولي لحوشه جنب بوه وامه
دانا:ومن في غادي أحمد يلي يكرهه ولا ولاء يلي مش طايقة تشوفه وكل هالبلي منها
سراب:عمتي وعمي إنت ماشفتيش كيف قيصر إفرح لما شاف امه وبوه هذاك اليوم...
هذاك اليوم شفت إبتسامة ع قيصر اول مرة في حياتي نشبحها رجاءا دانا ديري يلي قلتلك عليه وصدقيني حتشوفي بعينك كيف أحمد وولاء حيحبوا قيصر ويولوا يحترموه ويقدروه وطبعا إنت حتكوني موجودة
دانا:اني لااا إعفيني
سراب شدت يد دانا:بالله حنطمن ع قيصر أكثر بما إنك موجودة غادي
#ونولوا_للوقت_الحاضر...
هزت دانا راسها يمين يسار ونفخت خدودها وخشت
ومن دانا لعند سراب في المستشفى...
وقع الدكتور ع ورقة الخروج لسراب:
-تقدري تطلعي
-من هذا
سراب:هذا خوي
الدكتور:تمام ياخوها تقدر اتروح بيها حالتها كويسة غير تبي راحة لو سمحت
سفيان:حاضر
-مشكور يادكتور
الدكتور:العفو هذا واجب
سفيان:وين ندفع الحساب
الدكتور ابتسم:الحساب مدفوع من بكري
-دفعه زوجها
سفيان كشر وعقد حواحبه
الدكتور:هذا الدواء ضروري تاخده بإنتظام
خدي سفيان الوصفة وطلع الدكتور...
سفيان:يقتل القتيل ويمشي في جنازته واحد تافه
سراب:هيا قبل ليجي ورد بالك حد يندري قول مدايرة حادث وخلاص
سفيان:مش بيسألوا ع قيصر أمك وطارق يخدم معاه في الشركة
سراب:خلي طارق عليا تو إنفهمه
سفيان:احححح
-تمام هي نوضي
خدت سراب العكازة وسندت ع سفيان وفتحوا الباب وطلعوا ومشوا طلعوا من المستشفى وبيركبوا السيارة
قيصر:سرااب
جمدت مكانها وغمضت عيونها بألم وقهر
قيصر قدم وسفيان إلتفت ولما شبح قيصر قريب نقز عليه
سراب وهس مغمضة عيونها:سفيان فكنا بالله
سفيان:أركبي إنت في السيارة
فتحت سراب الباب لكن قيصر سكره وشدها من يدها:وين ماشية
سفيان قرب وبحدة:إطلقها
قيصر تجاهل سفيان:سراب ردي عليا وين ماشية بعدين عطوك خروج
سراب منزلة عيونها ماتبيش تشبحله وتضعف قدامه
قيصر:سراب أرفعي عيونك وأشبحي فيا
سفيان:ماتبيش اتكلمك حول يدك
قيصر تجاهله مرة ثانية واشبح في سراب:سراب ردي خيرك حطي عينك في عيني وكلميني
سراب خلاص بتبكي😢💔🔥
سفيان:إنت بيش تفهم بعد يلي درته فيها كيف بتشبح فيك
قيصر ضغط ع سنونه وغمض عيونه بعصبية وفتحهن وتنهد بهدوء وتجاهله:سراب تعالي منروحوا في حوشنا أكيدة عيانه
شد يدها وسحبها لكن إلقي سراب مش متجاوبة معاه وتشبح في مرش سيارة سفيان
قيصر إنصدم فيها ومش امصدق لكن ضغط ع يدها  وسحبها لكن فكت يدها منه وشبحتله شبحة حادة عنيفة بدون ماتتكلم عرفها قيصر إنها مجروحة منه وناقلة عليه
سراب وين شبحت في قيصر لقاته حالة يديه دم وشعره امبعثر جاي ع عيونه اول زرين من سوريته مقطوعات يلي برزت العرق ع عضلات صدره الرجولية المنظر هذا خلق ألف سؤال وسؤال في بال سراب وشعل نار في قلبها نار فضولية تحرق فيها حرق من داخل تبي تعرف خيره هكي مولي
لكن إذكرت شن دار فيها وإدكرت كلام دانا هالنار هدت وولت شبحت في المرش ماتبيش عيونها يفضحنها
قيصر مصدوم فيها قاعد😟
سفيان فك يد قيصر ودفه :خليك بعيد عنها
قيصر ماتحملش وشد سفيان من رقبة سوريته وبحده وعصبية ممزوجة بالحزن:وإنت شن دخل فيتك بيني وبين مرتي شن خلك
سفيان شد قيصر من رقبة سوريته حتى هو:دخلني هذي أختي يلي في الحالة هذي بسببك وجاي بكادل وقاحة وحقارة تبي اتروح بيها للحوش شن تسحاب روحك أمتى ما تبي إتهينها تهين وأمتى ماتبي تضربها تضرب ولا مش عارف إن وراها خوت يدافعوا عليها
قيصر :إطلق وحول من قدامي
سفيان:إنت يلي إقلب وجهك من هنا خير ماتشبح شي مايعجبك
قيصر دف سفيان بقوة نين جابه طايح تحت
لوحت سراب العكازة وبدت تتعكز من رجلها نين وصلت في سفيان وبخوف:سفيان سفيان
وقف سفيان وشبح في سراب:ماتخافيش
سراب بدت تبكي:خلينا نمشي من هنا
قيصر قدم :سراب وين بتمشي ؟؟
قدم سفيان لقيصر بيضربه لكن قيصر شدله يده ورفع يده الثانية بيضربه ع وجهه بوكس
لكن هنا سراب عيطت بقوة وصوت مبحوح مجروح ودموع:خلااااص
وقف قيصر وقعد يشبحلها 😟😟
سراب قدمت وهي تتعكز وهنا قيصر قعد يشبح فيها كيف السبتة ملفوفة ع رقبتها وكيف يديها ملفوفات بالشاش ورجلها يلي تتعكز منها خزي ولعن روحه ألف مرة ع عملته😔😔
سراب:خلاااص سيبه
قيصر سيب سفيان ووقفت بين قيصر وسفيان قيصر قدامها وسفيان وراها..
سراب:إنت شن تبي مني اااه شن تبي بعد ماكسرتني وجرحتني شن تبي مازال جاي بتكمل عليا ولا مازال في إتهامات بتتهمني بيهن شن مازال
قيصر قدم وبيحط يده ع كتفها:سراب إنت عيانة توا خلينا انروحوا وا..
وخرت سراب:خلييك بعيد عني
وقف قيصر وهو مصدوم منها...
سراب:ورد بالك إتمسني فاهم
-خسرت حقوقك عليا من لما خسرت ثقتك فيا
مش ضربك ليا هو يلي جرحني عدم ثقتك هي يلي هزتني شكك فيا قتلني إنت حتى ما إسمعتني شن نبي انقول ولا خليتني اندافع ع روحي
قيصر بحزن:سراب أني آسف إنعميت ماتحملتش إنك تكوني لحد غيري
سراب بصوت عالي ودموع:سألتني ليش ماسألتني
ولا غير تبي اتبرر لروحك وخلاص
-وبأي حق جاي وبتروح بيا ولا كأنك مداير حاحة تسحابني منسكتلك ديما تسحابني منسامحك ديما ع أغلاطك تسحابني ديما منعفس ع كرامتي ع خاطر ترضى وتتريح حضرة جنابك
قيصر يشبح في سراب القديمة قدامه ولت سراب الجريئة الشجاعة يلي لسانها احد من السيف
سراب:ولا تسحاب سراب القديمة ماتت لا ياقيصر إنت غالط سراب القديمة حية غير عطاتك  حب زيادة عن اللزوم ع حساب كرامتيها وشرفها
واليوم إكتشفت إنك ماتستهال😠💔
مجرد رسالة تافهة خلاتك اتدير هكي فيا
قيصر خلاص دموعه في عيونه تحجرن...🥺😢
سراب:إيه حنمشي عنك وانسيبهلك واسعة عريضة ياقيصر
قيصر قدم وشد يد سراب:لا ياسراب ما إتدريش هكي فيا إنت عارفتني مانتحملش
سراب فكت يدها ووخرت خطوة وبحدة متصنعة:حنمشي ياقيصر لأن لو قعدت معاك يا منخش حالة نفسية يامنقتل روحي فاهم فالأحسن نتباعد
قيصر:إنت أكيدة اتبصري صح إنت عارفتني نكرهها البصارة هذي
سفيان:يلا سراب
قيصر تحت الصدمة:سراب لا
سراب وخرت وهي تشبحله بحزن ودموعها نزلن
قيصر:سراب ما إتديريهاش أني آسف وعد ماعاد انجي شورك ماعاد انكلمك ويلي تبيه حيصير غير ماتسيبينيش كيف نقدر انعيش بلا مانشبحك
فتحت الباب وهي تشبحله...
قيصر قعد يبكي وبصوت باين عليه القهر والحزن:وعد يلي تبيه يصير سراااب
سراب بحزن:يلي نبيه يصير إنك ماعاد اتوريلي وجهك يمكن ننسى يلي درته فيا وندكر الأيام الحلوة يلي عشتها معاك
قيصر بصوت عالي مجروح مكسور:أنت وعدتيني ما اتسيبينيش
سراب ركبت السيارة وولع سفيان السيارة
سراب بدموع:وإنت وعدتني إنك ماعاد إتدير حاجة تجرحني وتكسر قلبي
قيصر:سراب وقفي ماتمشيش
سكرت سراب الباب وماعاد شبحت في قيصر لأنها حتضعف قدامه
قيصر قدم للروشن وهو يبكي:سراب ماتسيبينيش أني إنحبك وأني ندمان صدقيني وقفي ماتمشيش
سراب دموعها ماوقفن بكل وحتى ماتزيد تتأثر سكرت المرش متاع السيارة وهنا قيصر قعد يخبط فيه
قيصر:أفتحي كلميني ماتمشيش هكي سراب وقفي
حرك سفيان السيارة ومشي قعد قيصر يجري وراء السيارة وينادي في سراب ويبكي بعدين قعمز في الطريق وقعد يبكي:لاااااا
سراب إنهمرت بكي في السيارة 😭😭
اما عن قيصر وكأنه خدوا قلبه من بين ضلوعه أول مرة في حياته ينقهر هكي هو صح الموت ماخداش سراب لكن قيصر بالنسبة ليه بُعدها وغيابها عن عيونه موت...
.
.
طق طق طق
سعاد:يلا جاية
فتحت سعاد الباب
دانا بهمس:اهلين
ولاء بصوت عالي:من يلي ع الباب
سعاد:إحم
-هاذي وحدة تبي أحمد
ناضت ولاء وقدمت ع الباب:من؟؟
دانا:مساء الخير
ولاء:مساء النور
دانا:أحمد موجود
ولاء:ايه من إنت؟؟
اه راجي ما تقوليش إنت المحامية يلي في محاكمة شادي
ابتسمت دانا بمسايرة:ايه
ولاء:اها تفضلي أحمد موجود لكن ااا
دانا بإستغباء:لكن شنو
ولاء:مايقدرش يطلع لأنه عيونه
دانا:عادي إنخشله
ام قيصر:مع من تتكلمي ياولاء
ولاء:هذي المحامية دانا تبي أحمد
أم قيصر:قوليلها تتفضل
ونزلت أم قيصر لدانا
دانا:شكرا...
ولاء:إمشي ديري قهوة خيرك تشبحي هكي
سعاد بتنرفز:حاضر..
أم قيصر قدمت وحضنت دانا لين دانا استغربت
حولت أم قيصر وإبتسمت:قديش ليا نتمنى انشوفك بيش نشكرك ع يلي درتيه معانا
دانا:العفو هذا واجبي
رن تليفون ولاء ومشت لدارها بترد
أم قيصر:ايه كيف حالك وحال سراب وقيصر وسارة
دانا:الحمد لله كلهم بخير
وفي خاطرها:شن منقوللها
أم قيصر:مانبيش انعطل عليك انخليك اتشوفي أحمد
دانا:شكرا
ام قيصر:الدار يلي في نهاية الممر هذا ع يدك اليمين
أني منشوف عمك وقت دواه وانجي
-ماتتحشميش الحوش حوشك
-سعاااد
سعاد:نعم
ام قيصر:بسرعة ضيفيها
ومشت أم قيصر لدارها
وقفت دانا ومشت لدار أحمد...
طقطقت الباب...وخشت
وبدت تشبح في الدار بعيونها 👀👀
احمد كاين راقد ع السرير ع بطنه ورافع رجله اليسار وكان بلا سورية
قدمت دانا خطوة..
أحمد بصوت عالي:قلتلك مانبي شي خليني في خالي شكلك ماتفهميش
وخدي الوسادة ورماها :أطلعي إقلبي وجهك
دانا شدت الوسادة ورمتها عليه
أحمد بعصبية:كيف تردي ترميها عليا أقسم بالله غير نفتح عيوني لمنوريك
دانا:أحم خلاص مانا تو حتى الورق يلي في يدي مش ضروري منهن...
أحمد قعمز وهو مغمض عيونه:من إنت😮
دانا:تو تسأل من أني
أحمد إلتفت :دانا صح ولا أني نتخايل
ضحكت دانا😄😄
أحمد بإحراج:اووو أني آسف سامحيني نسحابك سعاد
دانا:ولا يهمك عادي
أحمد:الله غالب عيوني مانشبحش فيك
دانا:خبروني برا شن صارلك
حط أحمد يده عفويا ع كتفه وإنصدم تحشم قعد يتلمس في جسمه كله :سوريتي 😬😳
دانا ضحكت ع منظره:صباح الخير هذا وين جاتك التغطية
تلمس بطانيته ودرق روحه بإحراج ماعاد اقدر يتكلم
قدمت دانا وخدت سوريته من تحت ورمتهله:شد ألبس😂
خداها أحمد ولبسها بسرعة 😁😳
دانا:دارك حلوة
أحمد:اه ايه
-قعمزي/ كان لقيتي حاجة مرمية ديري روحك حولة😁😬😳(يقصد ملابس داخلية🤣🤣)
قعمزت دانا وحست بروحها قعمزت ع حاجة مدت يدها وجت في يدها يلي خايف منه أحمد😂رفعتها الفوق مش مصدقة إنها في يدها ورفعت حواجبها الإثنين مصدومة😱😧
أحمد:ايه شن جيبك فجأة هكي
رمتها دانا من يدها رمية عفوية جت ع وجه أحمد
دانا:😱😱
حولها أحمد من وجهه وتلمسها عرفها شن هي😳😳
أحمد بصوت عالي:قلتلك ديري روحك حولة🤪
دانا:تي الأحول يشبح راه قعمزت عليها أني
أحمد دسها تحت وإرتبك وأنفجرت دانا ضحك
هههههههههههه😂😂
وشوية أحمد قعد يضحك حتى هو😂😂
دانا:اه اااه إحم آسفة
أحمد:الله غالب عيوني😅
دانا في خاطرها:إيه إرمي حاجاتك الداخلية زي الساقطة وقول عيوني
-إحم جبتلك تعاهد من مالك إن مايقربك ولا يجي شورك إنت وشركاتك
أحمد بفرح:شكرا والله ماني عارف كيف انردلك جميلك
دانا:عادي ما أتدور شي
-المهم كيف تحس توا
أحمد:كا إنحصل نفتح عيوني تعرفي نبي انشوفك
قصدي نبي نشكرك زين
دانا:وكيف الشكر المليح عندك ترا
أحمد:ااه ااا ههههه
-دانا
دانا:نعم
أحمد:إنت فوق الذكاء يلي عندك سمحة هلبا خاصة عيونك الحادة
دانا متفاجئة فيه كيف يعترف بكل صراحة
أحمد:أني معجب بيك بصراحة معجب بشخصيتك وعفويتك واسلوبك كلك ع بعضك حلو
دانا بتموت من الحرارة يلي ركبتها 🥵🥵
-إنت كيف هكي تعترف بالصراحة هذي كلها
أحمد:مش إنت محامية
دانا:وشن دخل هذب في هذي😳
أحمد وقف ع السرير:إحم أقسم بأن أقول الحق ولا شيء سوى الحق😎✋
-هكي في المحاكم يقولوك صح
دانا:هههههه عطك السلامة
خشت سعاد وإستغربت أحمد ليش واقف ورافع يده
سعاد:خيرك واقف
أحمد تحمحم وقعمز:منأذن
طلعت دانا الورق من شنطتها وعطتهن لسعاد بعد ماحطت القهوة ع الطاولة وقدمت...
أحمد:خيرك شن تبي
سعاد:جبت القهوة بس
أحمد:اه
اشرت دانا لسعاد بمعنى إمشي غيري الورقة
خدت سعاد الورقة من دانا ومش لنهاية الدار مكان مامحطوط الملف
أحمد:وين مشت سعاد
سعاد إلتفتت وخافت هزتلها دانا راسها بمعنى كملي
دانا:طلعت
أحمد:طلعت غريبة ما اسمعتش صوت رجليها
دانا:لا مانا حتى ودانك يبن لفة
أحمد:ههه زعما؟؟
خدت الملف وحولت الورقة وحطت الورقة بدالها وحطاته بسرعة وطلعت تجري سكرت الباب بقوة
دانا غمضت عيونها
أحمد:من هذا
دانا:ااه هذا الروشن مفتوح والباب دقاته الريح
وقفت دانا:هي منمشي أني إن شاء الله لا باس عليك
أحمد:خليك شوي
دانا:والله مانقدر وقت عندي قضية غدوة
أحمد:أها بالتوفيق
وقف أحمد وقدمت وهو طبعا مايشبح في شي
إعتر في كندرته
إلتفتت دانا بتكلمه ويطيح عليها طاحوا تحت
دانا:ااااه
أحمد:اامممم
سكتوا هم الإثنين ومافيش كان نفسهم هو يلي يتكلم دانا سرحت في أحمد جذبها منظره عن قرب بينما أحمد داخ في عطرها المميز وملمس يدها الناعم قعد أحمد يفتح في عيونه ويسكر وبعدين فتح عين وحدة والثانية ماقدرش يفتحها
(مش مهم يابطل المهم اتشوفها واتكحل عينك بيها)
😂😂❤😍
مد أحمد يده وحول خصلات شعرها يلي ع عيونها
وهو ذايب فيها:
-مش قلتلك إنت سمحة وجدابة ومن جمالك نين عيني إنفتحت خليك شوي تاني وعيني الثانية تو تنفتح🤤😍
ضحكت دانا بعفوية
أحمد خلاص تبنج من ضحكتها
بعدين فاقت دانا لروحها وتحمحمت وجت بتدف أحمد
على خشت أم قيصر وهنا كان الحشم والسكوت والصدمة أسياد الموقف..
.
.
يتبع...
#رحيق_الفجر🕊🕊