#راوية_حب_ورطة
الحل{17}قة...
سراب بهستيريا:مات هو مات انفجر المطبخ وهو في وسطه ياقيصر بوي مات بسببي أني وا...
حضنها قيصر بسرعة وقوة وقعد يمسح في شعرها بيده:خلاص أهدي روقي
وسلم ع راسها وعيونه ولن حمر وقلبه تقطع عليها وجعاته وكسرت طبعه القاسي وخلاته يحن ويلين للمرة الثالثة..
دفاته سراب بعصبية ودموع:عرفت توا شن صارلي تريحت عرفت إن ما حنيتش عليك كل القصة أني وانت ضحية ظروف ويلي صار معاك صار معاي في نفس اليوم
قيصر :سراب ا...
سراب قطعت عليه بصوت مجروح:والله عييت نفسيتي تعبت نبي ننسى يلي صاااار معااااي ماعاد نبي انخاف بمجرد يتكلموا ع النار حتى المطبخ نسيت شكله نسيت كيف انطيب انسيت كل شي مانبيش حياااتي كلها في خوف
قيصر قدملها بهديها لكن دفاته من جديد:لااا سيبني أحسن ليك حيجي يوم وانختش فيه
قيصر فتح عيونه بعصبية وجي بيتكلم ماحصل كلمة معاها
سراب: اني ا...
وتقطع كلامها بوسة مفاجأة من قيصر يلي ماعرفش يسكتها كان بالطريقة هذي وفعلا سكتت وفتحت عيونها بصدمة ماعاد عرفت اتنوض ولا تقعد اتقول جمرة طاحت في اميه وهو شد راسها من وراء
زاد قيصر قوى البوسة وطولها سراب حطت يدها ع كتفه بتدفه عنها لكن هو زي الجبل وياجبل ماتهزك ريح حست بنفسها انقطع بدت تخبط فيه
وخر عنها وهو يتنفس بقوة وهي شدت قلبها وبدت تتنفس بقوة شبحتله دفاته جي مقعمز وقفت وعيونها نار:حيوااان عشوي متت
قيصر ابتسم ع جنب:ماهو ماسكتيش
سراب:جرب اتعاودها قلة أدبك هذي انوريك
وقف قيصر وهي وخرت وخدودها زي الطمام:خليك بعيد
قيصر قدم ولف يديه وراء ظهرها حبسها
سراب:حول
قيصر:روقي خيرك
سراب شبحلته ومتوترة متحشمة وقلبها بيطلع من مكانه
قيصر:أسمعيني توا بعد ما اسمعتك
نزلت يديها وحست إنه يبي يكلمها في حاجة جدية
قيصر:ما نعلمش لو تقدري تنسي يلي صار معاك ولا لا ولا انقولك أنسي لأن يلي صارلي وصارلك مش ساهل مات بوك ومات خوي
سراب دمعن عيونها
قيصر:شخصين إعزاز علينا هلبا صعب تنسيهم صعب
يلي نبي إنقولهلك إن قيصر حينسيك كل شي ويعوضك عن كل شي خسرتيه ويقلب دموعك لضحك وهذا وعد مني إنت ماليكش علاقة بموت حد هذا كل يلي نعرفه
بدت تشبحله شبحات حب وآمان وثقة
قيصر:إنت واثقة فيا صح
هزت سراب راسها وبدموع:ايه
قيصر:إنحبك وعارفك اتحبيني مش عارفة كيف صار وحبيتيني لكن صار وخلاص لأنك شعرتي معاي بالآمان أول مرة نحضنك فيها😈😈
سراب:😳😳
اذكرت لما قالت الكلام هذا لسوسن في حوش هلها
سراب:قصدك اسمعت كل شي هذاك اليوم
قيصر مسح ادموعها:ايه
وخشت في حضنة بسرعة وحطت راسها ع صدره وابتسمت وشدت بقوة في سوريته من خلف
سراب:انحبك انحبك انحبك انحب ااااااااك
قيصر:وطي صوتك يامهبولة في غيرنا في الحوش
سراب:خلهم يسمعوا إن سراب اتحب قيصر القاسي المغرور
.
.
صباح اليوم التاني
ولاء:صباح الحب
؟؟؟:صباح الورد لأحلى وردة
ولاء:شن اتدير
؟؟؟:كيف منعدي للعمل...
-وانت
ولاء:كيف نضت
؟؟؟:صح النوم
سارة:شوية بس
ولاء:سكر سكر باي
ناضت ولاء وبدت تشبح بخوف
سارة خشت للدار:وينه وين حطيته
وشبحت لسارة لقتها تفنص
سارة:خيرك تفنصي اتقول كلب مخنوق
ولاء بتوتر:ااه بري من حداي صبح
سارة:ان شاء الله باللطف
.
.
أم سراب:مش عارفة والله هالبنت تتهنى في حياتها ولا لا
سفيان:خير واكلة همها للدرجة هذي
أم سراب:خايفة عليها الظروف يلي تزوجت ويلي تزوجاته مش عارفة والله متلخبطة
خش طارق:صباح الخير
سفيان:صباح النكد
أم سراب:صباح النور
طارق:شبحت الرد كيف يابهلول
سفيان:😑😑
-كيف ماقلتلك ماتخافيش عليها
طارق:ع من تهدرزوا
أم سراب:سراب
طارق:اها هههه والله ماتخافوا عليها تي والله طايحة في دابة قريب بيديرلها مخدة ويزازي بيها
-ماواجعتني كان الطريحة يلي كليناها منه الزفت
-مافي من وراهن كان الفشخ والضرب
سوسن:صباح الخير
طارق:اهي السوسة هذي أمس واكل طريحة ع خاطرها شوية بس تو تتزوج حتى هي
سوسن:صبح وانت ماتعيا من الكلام مابعدها يلي بتطيح فيك
طارق :جميلة
الكل:😳😳😳
طارق بإرتباك:جميلة الوجه بتطيح فيا
أم سراب:يلا وقت ع أشغالكم
سفيان:اسمعي
أم سراب:ايه
سفيان:خلااص كلمت أهل أمل وموافقين ع الموعد
أم سراب:خلاص ياولدي خير البر عاجل
سوسن بهمس:قلت جميلة الوجه ااه ولا اسمها جميلة
طارق:عطيني رقمها
سوسن:نعطيك عينك
طارق:بالله
سوسن بخبث مدت يدها
طارق:يافرخة فلستي بأمي
سوسن:ماتبيشي الرقم
طلع عشرة من جيبه:وحق ربي كان مشيت لمركز شرطة راهو جابولي الرقم من دون ماندفع يا استغلالية كان حطوك في مصرف راهو الشعب امفلس
سوسن:ماتنفخش الراس
طارق:هاااك
سوسن:لا حبيبي حتى هو رقم مانبيش عشرة
طارق:بلكي مقعمز ع بنك روما يافرخة ماعنديش
سوسن:هيا وصلني للكلية
طارق:خلااص هاك ان شاء الله يريحن ولا تتهني بيهن
سوسن:مانا تسحابها ساهلة الدوة
طارق:هاك وهاتي الرقم سحيقة
سوسن:😈😈😈😈😈😈
.
.
؟؟؟:ووين بتمشي مني تسحابي روحك كان اتزوجتي هربتي لا ياروحي مش بالبساطة هذي..
-اصبري عليا شوية لمنختش بيك وانخليه يرميك زي مارميتيها عليا وهو حنسود عيشته وناخدك منه كيف ماخداك مني
((عرفتوه من يلي يهدد وفي من يهدد🤔😉))
.
.
ولحوش قيصر تحديدا في دار قيصر وسراب
راقدين جنب بعضهم قيصر حاط يده تحت راس سراب ويده الثانية ع خصرها وشابك صوابعه في صوابعها
فتحت سراب عيونها ولقاته قريب منها وشاد في يدها ابتسمت لأنها رقدت بآمان من غير كوابيس رقدت بإرتياح قعدت تشبحله وتشوف في ملامحه وهو راقد قدمت وباساته من خده وحطت يدها خده
قيصر وهو مغمض عيونه:هني روحك
سراب تفاجئت من نومه الخفيف وقعدت تلعب في شعره وتضحك
قيصر:سرااب سيبي الشعر في حاله
سراب:ليش مربي شعرك
قيصر إلتفت عطاها بظهره:بيش انديره ظفرة زي عنيزة
سراب:ههههههههه تطلع عليك
قيصر:خليني نرقد صبح
سراب بدت تنخص فيه
قيصر تنهد:هني روحك آخر مرة
سراب قعمزت وشحت البطانية رمتها:شن بتدير هي
قيصر فتح عيونه:جبتيه لروحك
ويلتفتلها بسرعة ويسحبها تحته
سراب :ااااه ههههههه شن اتدير
قيصر:قلتلك هني روحك جبتيها لروحك
سراب:لااااا
قيصر حط رجله على رجليها وشد يديها بيد وحدة
سراب:لاااا قيصر بالله آخر مرة
قيصر:مانعرفش
وكان في خطاط ع الدرج جنب السرير خداه وفتحه
سراب فتحت عيونها وحاولت تهرب منه:لااااا
قيصر:اييييه تستاهلي لما انقولك هني هني
ورسملها شناب قطوس ونقطة كبيرة ع خشمها
سراب تتحرك:لااا لاااا
قيصر كمل لوح الخطاط وفكها ناضت وشعرها جي ع وجهها وهي حامقة
قيصر:ههههههههههههههههه
ناضت ع المراية وشهقت:شنااااب
وألتفتتله بعصبية:تو انوريك
ومشتله تجري خدت الوسادة وبدت تخبط فيه
وهو ميت ضحك🤣🤣
سراب وقفت لأن ضحك قيصر لفت نظرها وعجبها بدت تشبحله وتبتسم معاه
وقف قيصر ع الضحك:عارفتني شني إندير وين تشبحيلي هكي
سراب:بالسيف منشبح لأنك وين تضحك عيوني مايتحملن مايشوفنش
قيصر قرب :وشن تاني
سراب:وانحس في شي في داخلي يضحك معاك
قرب قيصر نين لصق فيها مباشرة:ايه وشن تاني
سراب:ولما تتقرب مني ااا ااااه
قيصر قرب وجهه لوجهها:وشن تاني
سراب غمضت عيونها وباساته بوسة خفيفة ووخرت فتحت عيونها لقاته يشبحلها متفاجئ
خدودها ولن حمر تحشمت نار ركبت فيها واتنوض تجري خشت للحمام سكرت الباب
قيصر ابتسم وبصوت عالي:حبيبتي انحرفتي راك
سراب فتحت الباب وطلعت راسها:تعلمته منك الانحراف ياكبدي
وسكرت الباب إبتسمت وحطت يديها ع وجهها بخجل وقلبها زكرة
قيصر:😯😯😯
.
.
رن رن رن
قيصر:الوو
؟؟؟:مراقبك 24ساعة ماتسحاب روحك بتتهنى بعيشتك لازم اتخاف مني ومن يلي جاي وتخاف ع عيلتك وتنتبه مني
قيصر تبدلن ملامحه من اللين للقسوة من جديد:شاااديي
شادي:اييه شادي وموت فادي حتدفعه الضعف
قيصر:ا...
طوط طوط طوط
قيصر:الووو..
قيصر حمق ومزاجه تعكر هو مش خايف ع روحه لكن خايف ع أهله وخاصة سراب
طلع الدخان وطلع في البلكونة وقعد يدخن بعصبية وبشراهة..
.
.
أحمد:الو ماتسكريش ماتسكريش
طوط طوط طوط
أحمد لوح التليفون وناض حامق
أم قيصر:شن في خيرك حامق
أحمد بعصبية وصوت عالي:فكيييني خليني في همي وحالي
سارة:والله فاضية اتكلمي فيه
.
.
سوسن:كلبة من قالك أعطي رقمي لفهد
جميلة:ااه😅😅
سوسن:كلبة تو اتشووفي
جميلة:كلمك هو
سوسن:مانييش
جميلة:بالله بالله
سوسن:ايه كلمني
جميلة بإندفاع:شن قالك وشن قلتيله
سوسن:ماقالي شي عادي
جميلة:والله وحدة كلبة انت ماتبيش اتقولي
سوسن:والله ماقال حاجة أصلا ماطولتش المكالمة
جميلة:شكله يحبك حتى هو
سوسن:😍😍
خش فهد للقاعة وعيونه طول لسوسن:صباح الخير ياطلبات
الكل:صباح النور
فهد: سوسن
سوسن بإستغراب:نعم
فهد:أطلعي برا
وقفت مصدومة:شنهوووو
فهد:أطلعي قلت برا
سوسن:شن درت أني
فهد:قلت أطلعي
سوسن:إن شاء الله باللطف ياربي شن درت تي مالحقت اندير
فهد:أطلعييي
الكل يشبحوا فيها خدت شنطتها ومذكرتها لقت وحدة تشبح فيها وتضحك
سوسن:ضحكة عنز ع باب مسلخ يامسخة خيرك تضحكي
الكل:هههههههههههه
فهد يبتسم شاد ضحكته عليها
سوسن:إنشك إنك دكتور أعصاب ودكتور مادة هذا واحد فيوزاته مضروبات
فهد:احم أطلعي قلت
سوسن وهي طالعة:واحد مريض ديما اتجيه هبلته عليا
فهد:احم يلا نبدوا في المحاضرة
ولت سوسن ودخلت راسها من الباب:والله لمايخليكم مهابيل زيه
الكل:😂😂😂😂
فهد:براااا
سوسن فنصت فيه وطلعت:كلب أقسم بالله مختش
.
.
طلعت سراب من الحمام وشمت دخان قوي شبحت للبلكونة لقت قيصر يدخن بطريقة اتخوف والدخان تحته قريب عشر طروف مشتله تجري إلتفتلها من عيونه ووجه نين خافت منه ووخرت
سراب بخوف:ق ي ص ر خيرك هكي مولي
عطاها بظهره وولى يدخن
تشعجت ووقفت قدامه:شن اتدير ليش هكي اتدخن
قيصر بصوت واطي:حلي عني توا خليني في حالي
سراب:قيصر فيك شي خيرك قوللي
قيصر بحدة:قلتلك خليني بروحي
سراب فكت الدخان منه:حوله مش باهي الدخان شوف حالتك ووجهك
تنهد وغمض عيونه بعصبية:سراب هاتيه
سراب:لا
قدم بياخده منها لكن وخرت عنه خطوة وحطاته وراء ظهرها
قيصر بحدة شدها من رقبتها:جيبي الزفت الجاي
سراب أنصدمت من تصرفه :لا سيبه الزفت هذا
قيصر بصوت عالي:جيبيه الجاي قلتلك أحسنلك مش رايق لتصرفاتك البايخة
قعدت تشبح فيه مصدومة وعيونها تعبن دموع
قيصر ضغط ع رقبتها:جيبيييه
عطتهله في يده وهي مش مصدقة يلي كاين من شوي يبصر معاها ويضحك انقلب وقسوته الأولى ولت
دفها طالق رقبتها نين لصقت في الحيط
سراب بدموع:خيرك شن يلي قلبك
قيصر بحدة وتهديد:صح انت مرتي وانحبك لكن مانسمحلك تدخلي في حياتي وتقوليلي شن اندير وماندير فهمتي ولما انقولك خليني بروحي خليني بروحي اتقي غضبي أحسن يكون ليك
ومشي من حداها سيبها مستغربة مصدومة فيه
.
.
كملت المحاضرة وطلع فهد
سوسن:انت يامختش
إلتفت فهد:أني
سوسن:لا غولتك في غيرك مضروب هنا
فهد في خاطره:الزفت ماحلاها لما تحمق
وبصوت عالي:ايه إنت
سوسن قدمتله وبعصبية:نبي نعرف ليش لزيتني من المحاضرة شن درتلك
فهد:أمس راجيتك تتصلي وما أتصلتيش
سوسن شهقت:شن دخل هذا في هذا
فهد:دخل قعدت ساهر طول الليل انراجي فيك
سوسن:بلكي مرتك ولاخطيبتك وأني مانعلمش
حطت يدها ع فمها وتحشمت
فهد ابتسم وقدم خطوة:عاودي شن قلتي
سوسن:احم ماقلت شي
فهد:وين تعلمي مرات يصير زي ماقلتي
سوسن شبحتله ووجهها ولى أحمر
سراب:ااانت شن اتقول وتخرف
فهد رفع حواجبه:تو اتشوفي الايام تتبثلك
ومشي من جنبها...
جميلة:تس من هذا يلي طايح فيها رسائل من بكري
وشبحت في سوسن لقتها سرحانة وتشبح في الفراغ
جميلة:هييييي
سوسن:ااه شن تبي
جميلة:وين سارحة
سوسن:شي..خيرك انت
جميلة:أبصر من يبعتلي في الرسائل من بداية المحاضرة
سوسن:ترا
جميلة:هااا شوفي
شبحت سوسن في الرسائل وبدت تضحك
جميلة:خيرك تضحكي
سوسن:ههههههههههه
جميلة:عليش تضحكي
سوسن:حي الشاعر طارق
جميلة بإستغراب:طارق
سوسن:ههههه ايه طارق
جميلة:ومن وين تعلمي انت
سكتت سوسن وبدت تشبح من تحت لتحت
جميلة شهقت:ياكلللبة
سوسن:وحدة بوحدة
جميلة:ياتافهة ليييش
سوسن:كيف ليش لييش لأن حبيبتي
وبعدين اتحصليه طارق شخصية وحلو أحلى منك اوخيي
جميلة:ياحيوانة مش قصة سمح ولا شين
سوسن:خلااص مانا ضمي فمك انت تعطي رقمي لواحد غريب عادي وأني عطيته لخوي درتيلي مشكلة
جميلة سكتت وبدت تشبجلها😑😑😑
سوسن:تعالي تعالي أني المستفادة من حبكم
جميلة:شنوو
سوسن:شي تعالي بعدين انفهمك
.
.
سراب:قييصر
لكن قيصر طلع وملامح الغضب ع وجهه
أم قيصر:خيرك ياسراب
سراب:مش عارفة كان مروق وفجأة مزاجه تعكر لقيته يدخن بطريقة اتخوف ياعمتي
أم قيصر:هكي طبعه يابنتي لما يحمق يكمل حتى في باكوا في وقت واحد
سراب:لكن هكي غلطمش باهي لصحته
أم قيصر:إقنعيه كان تقدري قيصر ياسراب من النوع يلي يتطبع بطبع ماعاد يسيبه لأن عقلية قيصر عنايدية
سراب سكتت خايفة..
أم قيصر:هذا عليش أني ورجب نبوه يتزوج بنت تقدر اتغيرله هالصفات وترده زي قبل وعلقنا آمالنا عليك يابنتي نبو انشوفوا قيصر متهني وفرحان قبل لربي ياخد أمانته
سراب:بعد عمر طويل ان شاء الله
-وبالنسبة لقيصر حيتغير ماتخافيش هو قاعد مايعرفش وين اتسكر سراب راسها ع حاجة
ولاء بصوت عالي:ويييين خيط الشحن
الخدامة:خذاه السيد قيصر
ولاء:ووااااك قلتله ستين مرة ماعاش ياخد حاجة ليا وماعاش يمس حاجة تخصني بدات هو هالفاسد هذا
سراب فاتحة فمها
أن قيصر:ماتستغربيش ولاء وأحمد كرهوا قيصر لأنهم يعتبروا فيه شرطي فاسد وهو يلي مخرب ع حياتهم من جميع الجهات
سراب:باهي هو فاسد زي مايقولوا ولا لا
أم قيصر سكتت سكتت وبعدين قالت:وانت شن رايك ياسراب
سراب:مش عارفة مازال مافهمتش قيصر ياعمتي
أم قيصر:باهي شن اتحسي فيه هل فعلا هو هكي ولا لا
سراب تنهدت وغمضت عيونها... وفتحتهن :قلبي يقوللي إن قيصر مستحيل يكون هكي...
أم قيصر ابتسمت:مش حنخاف ع قيصر طالما عند زوجة واثقة فيه زيك ومتأكدة حتغيري طبعه للإحسن
سراب:تأكدي حتيغير وحنخلي ولادك يحبوا بعض
إبتسمت أم قيصر:شكرا يابنتي نحمدوا ربي بعتلنا كنة طيبة زيك
سراب:ولو إنتم عيلتي توا
.
.
قيصر:عرفت عنه حاجة
محسن:لا
قيصر بعصبية وصوت عالي نين كل المركز سكتوا وخافوا:تيييي شن اتقول كيف ماعرفتش مكانه
محسن:🤐🤐
قيصر:الكلب هذا يدهور برا وخطير ع هلنا دبر كيف اتجيبه جيب فيت أمه من سابع وطاء
محسن سكت وإلتفت:حاضر
قيصر حط جبهته ع يده وتنهد
رن رن رن
قيصر:ألو
شادي:أختك التانية سمحة هلبااااا هههههه
قيصر وقف وطلع يجري :شااادي عداوتك معاي أني
وركب السيارة..
شادي:ماعاش اتقولي عداوتك معاي أني مانعرفش أني يلي نعرفه مننتقم منك بأي طريقة
قيصر بحدة وتهديد:اتمسها ياشادي ولا إتقرب عليها انهارك مغبر وحنديرك عبرة للي يسوى ومايسواش
شادي بسخرية:خوووفتني
زاد السرعة قيصر نين العداد قريب بينفجر
قيصر:لآخر مرة ياشادي انحدرك وانبهك
شادي:فات الوقت:هههههههههههههههههه
طوط طوط طوط
قيصر رمي التليفون وقعد منتبه للطريق بعدين خدي التليفون ورن ع سارة
سارة:ايه قيصر
قيصر:وويين انت
سارة:شن في
قيصر بعصبية:قووولي وينك
سارة:في الحوش
قيصر تنهد واذكر ولاء:وولاء وينها
سارة:في العمل وين
-ألو
قيصر:شااادييي اتمسها انوريك
وفات خط بالسيارة
.
.
سراب:خيره قيصر
سارة :مش عارفة سكر الخط
سراب:ان شاء الله خير
.
.
وصل قيصر للمكان يلي تشتغل فيه ولاء ونزل قعد يدور فيها بخوف وفكرة اتقله وفكرة اتجيبه نين لقاها طالعة من الباب تنهد ومشالها يجري
ولاء انصدمت:شن اتدير هنا
قيصر:كملتي
ولاء بدت تشبح يمين يسار
؟؟:ان شاء الله خوها هذا
؟؟؟:يهبببل لكن
؟؟؟؟؟:شن الفايدة واحد مرتشي وفاسد
؟؟؟؟؟؟:أكيدة حتى هي زيه بتكون جاية تتفلح برزق الحرام خزي آخر وقت
ولاء حمقت وبدت اتفنص في قيصر
قيصر:فوتي قدامي
ولاء مابتش تتكلم لكن في قلبها نار وتبي اتطلعها وع من ع قيصر يلي خلى الناس تتكلم عنها
ركبت في السيارة ولاء وجي بيركب قيصر رن تليفونه ونفس الرقم يلي اتصل بيه امبكري ويلي هو شادي
فتح قيصر وسكت ماباش يتكلم لكن الحمق يلي داخله لو كان شادي قدامه كان قتله..
شادي:ههههههههههههههههه خوفتك صح أيوا هكي نبيك اتخاف ويلي جاي أسوء من هكي راجي وشوف
قيصر: سيورك طايح بين يديا أقسم بالله ماني راحمك
سكر الخط..
وركب السيارة لقي ولاء اتفنص فيه ماعدلش عليها
وولع السيارة ومشي
ولاء:ليش جيت وروحت بيا
قيصر تجاهلها وسكت
ولاء:حشمتني قدام الناس من أمتى اتروح بيا انت
قيصر:ضمي فمك
ولاء:والله زهقت الكبد شن هالحالة ماقلتلكش روح بيا غير خليتهم يعرفوا إنك خوي للأسف
فنص فيها قيصر :تسكتي ولا انفرغ دينم المسدس في دماغك
ولاء:هذا يلي فالح فيه
وصلوا للحوش خشت ولاء سبقاته وبدت اتعيط بصوت عالي:كلمي ولدك ماعاش يدخل فينا شن يدير اليوم مروح بيا مانبيش حد يعلم إني أخته
قيصر قعد واقف ويسمع فيها كيف تعيط
شي طبيعي أي حد بيسمع هالكلام وخاصة هو قيصر كخوها بيوجعه كيف أخته تكرهه وحاقدة عليه لكن قيصر مابينش إن متأثر نهائيا بعكس سراب يلي تشبحله من بعيد مصدومة في ولاء كيف تتكلم ع خوها وواجعها وحست بيه لكن مابتش اتكلمه حاليا لأن كان بتكلمه بيولع فيها...
سراب في خاطرها:مش معقولة هكي
سارة بصوت عالي:سراااب
سراب أنخلعت:نعم
قيصر اشبح في سراب وعقد حواجبه بإستغراب وإذكر شن دار الصبح معاها
سارة:هاك مش تبي تتصلي بصاحبتك
سراب:ااه
وشبحت في قيصر لقاته كيف بيمشي للدار
سراب:ااا اييه
قيصر:ألوو...
.
.
سراب خدت التليفون وبدت اترن ع نصيب
سراب:ألو
نصيب:ألو
سراب:نصييب
نصيب:سرااب كيف حالك ههههه وآخيرا اتصلتي
سراب:آسفة سامحيني عندك الحق
نصيب:عندي الحق مانا شنو
سراب:كيف حالك شن أخبارك ماعاد ضايقوك أهلك
نصيب:من أهلي
سراب بإستغراب:نصيب خيرك أمك وبوك وخوك
نصيب:اااا تو نتلاقوا ونحكيلك المهم إنت قاعدة متزوجة من ال
سراب:ايه قاعدة نصيب سامحيني هذاك اليوم عيطت عليك
نصيب:لا عادي أصلا عارفاتك بس نبي نعرف ليش تزوجتيه ليييش إنت عارفة قبل شن بيدير وعارفاته كيف هدد بوي وكيف خدي رشوة منه إنت كيف تزوجتيه
سراب:مش عارفة كيف يمكن لأنه نصيبي مثلا
نصيب:نصيبك ؟؟سراب ماتقوليش اااا تس لالالا
-مش تجي ع عرسي راه والله مادخلني.
سراب:صصعب يانصيب
نصيب:سراب شن يلي صعب تي والله مادخلني وعقوبة ليك ماعاد دورتيني بتجي تباتي عندي
سراب:والله عارفة روحي مقصرة لكن ظروفي توا تختلف قبل لنتزوج
نصيب:نزعل منك ياسراب راه
سراب:حاضر حنحاول مع إن صعب لكن حنحاول...
.
.
سوسن:شن يقصد زعما شن يقصد؟؟
رن رن رن
شبحت للتليفون وتنوض قافزة فرحانة لأن يلي يتصل فهههد
سوسن:أنرد لا أنرد
-لالالا سوسن تو اتقول ماصدقت
لكن هو يلي متصل مش أني
-تس والله ماني رادة
شوية وبعت رسالة
فهد:ردي راهو مش قايل عليك ماصدقتي
سوسن أنصدمت ودارللها الشك وقعدت تشبح يمين يسار
فهد:ما إتدوريش ماتخافيش مش في حوشكم ووين نعرفه أصلا
سوسن مصدومة فيه
رن رن رن
سوسن بتردد:االو
فهد:كيف حالك
سوسن:ككويسة إنت كيف ا...
فهد:عارف تفكير البنات وزابطهن
سوسن:وكيف عرفك فيهن
-قديش إمكلم وحدة
فهد حس بيها غارت:امممم والله تقريبا عشرة هكي تسعة
سوسن بعفوية وإندفاع:شنهوووو
وبعدين سكتت تحشمت
فهد:ههههههه غرتي
سوسن بإرتباك:وليش انغار من إنت أصلا
فهد:نسألك إنت السؤال هذا من فهد بالنسبة لسوسن
سوسن سكتت شن بتقول هي صح اتحبه ومهتمه بيه لكن ماتبيش تعترفله
فهد:وين مشي تفكيرك
سوسن:ليش ترد ع السؤال بسؤال
فهد:ع كل لو مارديتيش عليا اليوم محاضرة غدة لزيتك منها
سوسن:والله شن سايبه هي
فهد:سوسن
سوسن:نعم
فهد:غدوة نبيك في موضوع مهم
سوسن تستغبى:وحتى أني نبيك تشرحلي الدروس يلي فاتني وا..
فهد:لالا وين مشي تفكيرك نبيك في موضوع مهم خاطي القراية تعالي غدوة راك تغيبي
سوسن:قوله ع التليفون
فهد:مايجيش ع التليفون
سوسن فرحت إنه يبيها في موضوع مهم
فهد:تعالي للقاعة بسبلة إنك تبي تسأليني سؤال
سوسن:والله الملزوم يتعب وبعدين عندي الأولى محاضرة مهمة ومانقدرش انفوتها
فهد:سوسن أني مسافر غدوة ع الساعة تسعة
حست بقلبها انكسر لما قاللها منسافر وبصوت متقطع:وسافر من شادك محاضرتي أهم
فهد:متأكدة
سوسن سكتت
فهد:مسافر واحتمال ماعاش نتلاقوا
سوسن دمعت عينها:سافر قلتلك
فهد:تمام لكن أني حنراجيك في القاعة للتسعة لأن نبي انقولك حاجة مهمة قبل لنمشي
سوسن:مش حنجي بتضيع وقتك عالفاضي
فهد:حتجي ياسوسن حتجي ماتقدريش تحضري المحاضرة وإنت اتفكري فيا وفكرة إني مسافر مش حتتقبليها وهي يلي بتخليك تطلعي من المحاضرة وتجي لعندي لكن إدعي مايكون فات الوقت..
سوسن:مش حنجي
فهد:تصبحي ع خير سوسو
سوسن:😳😢😢
.
.
روح قيصر من المركز في وقت متأخر لأنه كان طول اليوم يدور ع شادي ماسيب مكان إلا ومادوره فيه
خش للدار لقاها مظلمة فتح الضي ولقي سراب راقدة في سابع نوم
خش للحمام غسل وطلع فتح البلكونة وقعد يدخن ويفكر في شادي يلي صار خطير عع عيلته وخاصة سراب يلي خطفها قبل واخته اليوم وشبح في سراب الراقدة وإذكر شن دار معاها طفى الدخان ورماه..سكر البلكونة وجي جنب سراب رقد قدامها وشد يدها بيده وحط يده الثانية ع خدها وكأنه يبي يتأسف منها لكن طبيعته القاسية خلاته ينسى هالشي
غمض عيونه بحزن وهو يفكر وعطي ظهره لسراب
وماحس إلا بيديها لفن ع صدره
فتح عيونه لكن ماتكلمش
سراب:ليش مهموم ياقيصر في شني اتفكر
قيصر بحدة:مافي شي كملي نومك
سراب:كيف انكمل نومي وراجلي يفكر مهموم
قيصر يبي يغير الكلام بيش مايحمق عليها:حلوة منك راجلي عجبتني
وإلتفتلها قعد يشبحلها
سراب:ماتغيرش الموضوع ياقيصر
قيصر:سراب مانبيش انهزبك زي الصبح
سراب:كويس يلي إذكرت شن صار الصبح
قيصر:ماهو مش ماعاد تدخلي في حياتي
سراب:إنت إتدخن هلبا مش باهي لصحتك صدقني هذا الدخان يقتل
قيصر:هذي حياتي وحر فيها
سراب بحدة:حياتك حياتي صارت ومستحيل إنخلي حياتي إتضيع
قيصر سكت وقعد يشبحلها:للدرجة هذي إتحبيني
سراب:وأكثر ماتتخيل
قيصر:غريب كل الناس يكرهوني حتى من خوتي ويخافوا مني وإنت كل يلي درته فيك انسيتيه وتوا اتقوليلي انحبك إنت منو
سراب:بنت بسيطة عادية رت فيك صفات خلتها ماتشبح عيوبك وخلتها اتحبك رغم قسوتك وجبروتك وعنفك مايهمني شن يقولوا عنك المهم إنت في نظري شنو ومنو وبس
خداها قيصر في حضنه بقوة وكان يحصلها اتخش لقلبه وتسحب وتشفي كل هم ودا من وفي قلبه
سراب:كل شي وليه حل وكل هم حيمشي وأني وياك حنكملوا حياتنا مع بعض والمشاكل حنتغلبوا عليها
.
.
في الصبح
ناضت سراب شبحت يمينها ويسارها لقت قيصر مهناش ناضت رتبت السرير ولقت هدية ع الطاولة خدتها فتحتها لقاته تليفون إبتسمت:قيصر هههه
فرحت وحطاته ع الطاولة وخشت اتدوش...
.
.
وصلت سوسن للكلية وخشت للمحاضرة قعمزوا الطلبة كلهم وخش الدكتور متاع المادة وبدي يعطي في المحاضرة..
تلقائيا سوسن شافت الساعة لقتها 8:30
وبدت في رجلها اتهز بتوتر وقلق
وكل شوي اتشوف للساعة اتفكر في كلام فهد
سوسن في خاطرها:فوتيه كيف حبيتيه بالسرعة هذي إثبتيله العكس سوسن انتبهي للمحاضرة
جميلة بهمس:خيرك
سوسن:مافي شي خلينا ننتبهوا للدكتور
وشافت الساعة لقتها8:45
زاد التوتر والضغط وبدت تدكر في فهد من أول لقاء ليهم لعند مكالمة آمس
.
.
؟؟؟:أحسن حاجة اتخلي بوك يوقع أوراق نقل ملكية كل الممتلكات لاسمك
أحمد:إنت مختش مستحيل
؟؟؟:كان تبي تحول قيصر من قدامك وتمحيه من حياتك وتضرب عصفورين في حجر واحد منها تمتلك كل شي ومنها قيصر يلي جايك في النص ومخرب عيشتك وخلى حبيبتك ترفضك تلغيه بكل وهكي بعدين تتريح 😈😈
أحمد:🤔😈🤔😈
.
.
يتبع...
#بقلم_رحيق_الفجر🕊🕊
