حب منبوذ

٣

(اما في جانب تاني)
سارة و فاطمة و وجدان ...
فاطمة جات داخلة المكتب .. و بتتكلم براها ! 
سارة : في شنو ؟
وجدان : في شنو يا بت التاخير دا كلو !!
فاطمة : ......!!
وجدان : فاطمة افتحي خشمك دا بالله حاصل شنو ؟ 
فاطمة : والله البت دي ما صعبة زي ما احنا فاكرين !
سارة : بت منو ؟ و ريم كانت عايزاكي في شنو ؟؟
فاطمة : حيكون منو يا سارة اكيد قصدي ريم ، الزوله دي ما كعبه ، بس ممكن تكون شايفه نفسها شوية و صارمة لكن فيها حاجة م طبيعيه ! 
و الشي الغريب ان من يوم ما اتعينت في الشركة دي و عرفت استاذة ريم دي ، بتغير اي شي ما عدا السلسل الفي رقبتها دي دايماً لابساها !
وجدان : والله انتب م عندك موضوع يا فاطمة انحنا في شنو وانتي في شنو ، عليك الله عايزة شنو بي سلسلتها ، فهمينا في شنو ، قاعده تلاته ساعات معاها ف المكتب ، حاصل شنو في الشغل !! 
فاطمة : مفروض انزل اعلان جديد بخصوص تعينات جديدة ، و حتكون في تغيرات لسه ما وضحتا لي ، بس اراجع الملفات ، و ماشاءالله حتفتح مشروع تاني  و موضوع طويل ...
سارة : و مالك بقيتي عاقلة كدا ؟
فاطمة : ما عارفه بس اتمنيتها لو تبقى صحبتي بالجد حاساها ما طبيعيه و رغم كل الرفاهية العايشاها و مستوى اهلها المعيشاهم فيهو والموديلات والحياة دي كلها الا اني شايفاها من قريب انها تعيسه !! 
وروني يوم واحد من ما جينا الشركة دي ، شفنا ليها حبيب ولا صاحب ولا صحبه ،، غير رزان و وليد ماف زول !! يعني بنت في عمرها وعز شبابها ، شوفو انجزت قدر شنو ، انا اكبر منها و ما عملت تلت من العملتو هي !
وجدان : بيني و بينكم ، الزولة دي ملهمتي !
قدر م اقول الحياة صعبه و احلامي صعبه تتحقق الا اني لمن اشوفها بتديني طاقة اجابية رغم انها دايماً صارة و قالبه وشها ! 
سارة : صراحه شايفه تركيزكم في حياتها اكتر من تركيزكم في حياتكم !
وجدان : عايني للموضوع بي اجابيه يا سارة انها انسانة ناجحة في العشرينان من عمرها و عندها شركة لا وارثاها ولا مشاركاها مع زول و رافعه مستوى اهلها ، و ابسط مثال عندك لمن نجرد شفتي بننضغط كيف ودا دليل للنجاح و دليل على انها انسانة بتخاف الله فينا ..
سارة : للامانة الفضول حيقتلني رغم اني ما بحب اتدخل في حياة الناس ، بس م كنت عارفه انها م وارثه افتكرت اكتسبت الحاجة دي من اهلها ! 
فاطمة : اسمعو .. قدامنا ساعه و نطلع ، خلونا نخلص الفي يدنا ..
بتحكي ريم .. 
اتوقع كان نفسكم تجي اللحظة اللي تعرفو عني فيها معلومات ، يعني ، من تصرفاتي الغريبه ، صح ؟
بعد يوم طول من ضغط االشغل ، هو ما كان حاجة المهم ، اليوم دا كان مصادف نهاية 2018 يعني اخر يوم و زي الليله بالضبط راس السنة الجديدة لي 2019 ، ما زولة برامج و مخططات زي م شفتو قبيل رزان و كلامها لي ، المهم موضوع الشغل و ضغطو كانت حياتي الطبيعيه يعني م حاجة جديدة علي ان يومي يكون مليان ضغط ، انا عايشه عشان كدا .. 
رجعت البيت قبل المغرب بي 13 دقيقة ، لقيت في عربات واقفة برا ، عرفت ان في ضيوف ، و م اي ضيوف كمان ... 
دخلت و كان وليد اخوي و ماهر ود عمنا و عمار دا خطيب رزان اختي ، و احمد دا ( ...)
و اهل عمار اخواته الاتنين و والدته و بت عمنا هبة اللي هي اخت ماهر ( حتحسو بي زحمة اسامي حاليا و جوطة بس كله بيترتب م تشيلو هم و م تركزو الا مع الشخصيات الرئيسية ).. 
المهم البيت كان عامر ، وليد والشباب كانو بيركبو زينة و اجواء زي دي .. 
سلمت بصورة عامة و عارفه الحاجة دي بتزعج امي و عارفه نظرتهم لي والكلام اللي بيتقال بعد امشي والهمسات ..
رغم ذلك م عندي حاجة لي زول ، سلمت و طلعت غرفتي ..... 
و انا عارفه الحيحصل ... 
جاتني امي و رزان .... قلت ليها ، ازيك يا امي ؟ 
كيف كان يومك ؟ 
رزان جات مسكتني من يدي ! قالت لي : 
انا ما عارفه انتي بتعملي كدا ليه ، و لحد متين ؟؟ 
بتعملي كدا ليه في شنو !؟ كل واحد فينا عنده قسمتو في الحياة دي ماف زول فينا بيختار حياتو يا ريم يا اختي ، انا مستغربة ، عقلك و نصجك الكان سابقك و وصلك للمرحلة دي من النجاح في حياتك ، ما قادرة تستوعبي الصح من الغلط و ان الكبير ليهو احترامو !!!
يعني جيتي مارة اتجاوزتينا زي الغرباء ،!! ياخ خليكي مننا ، طيب عماتي و الناس الكبار ديل ليهم احترامهم ياريم !!!
امي : بعد كلام رزان ليكي م اظن لي وجودي او لكلامي داعي ، غيري و تعالي سلمي على الناس من فضلك ! 
ريم : انا جاية من الشغل مرهقه حابة انوم !! 
امي : عاينت لي وهزت راسها و طلعت  !!
رزان : انتي ما صاحية !!! رررريم ! انا مليت م ممكن محل م امشي و محل ما اقعد مع الغريب و القريب شابكني ريم مفترية و ريم عشان عندها و عندها و ..... *قاطعتها بي صوت عالي *
شنووووو هووو شنوووو !!
ياخ ارحمووووني ارحمووووني ياخ انا تعبته و مليت ، من ريم سوت و ريم عملت و ريم تركت و ريم اتزززفت تعبته ! ياتو اليوم الناس كانت بتسكت ، ما ياهم في الخير بتكلمو و في الشر بتكلمو ، دي حياتي انا ما حياة الناس انا حرة اتقبل فيها منو و ما اتقبل فيها منو ، انا ما قعد اتدخل في حياتكم ، ولا حياة زول منكم ، ياريت ماااافي زول يتدخل في حياتي طالما انا ما اذيت زول فيكم !  
_: من فضلك وطي صوتك !
*: لا ما بوطيهو خليهم الداير يسمع ، يسمع ..
_: وطيهو احتراما لامك كا للناس !
* : انا تعبانه ، من فضلك اطلعي و اقفلي الباب وراكي ، من فضلك لو سمحتي !! 
_ :ريممم !!!! غريبة !
*: في شنوووو ؟؟؟؟؟
_سلسلك !! اول مرة تقلعيهو !!!
*كك كك كيف يعني(وانا بتحسس رقبتي) بسم الله !!!
ووين راح. كان في رقبتي ؟ 
_روقي طيب براحه ، بيتلقى 
*لاا يا رزان كنت لابساهو (متوترة) ، من غير م احس على نفسي ، فتحت باب غرفتي و جريت حفيانة ، و بفتش في الارض في البيت و في الممرات حقت البيت لمن وصلت الصالون الكبير لدرجة م حاسه بي وجودهم اصلاً و رزان جارية وراااي !!
لمن وصلت الشارع و انا زي المجنونه بفتش ، و هما واقفين و ماموين بعاينو فيني ، اصلا خاتين فهم اني مريضة نفسيه ، و تصرفي دا اثبت ليهو مية في المية اني بعاني من مرض نفسي .. 
لمن جاني وليد و رزان ، و رزان بتقول لي بيتلقي روقي ، طلعت لي شبشبا قالت لي اللبسي دا انتي حفيانه ! 
و وليد م فاهم حاجة ، بقى يقولي خلاص روقي كل شي بيتعوض !! رفعت راسي ، قلت ليهو بيتعوض !!!!!! 
رزان بقت تقولي خلاص يا ريم لو سمحتي ، خلينا ندخل جوا ، ١٠٠٪؜ حيكون في المكتب وقع ولو لقوهو الموظفين حيختو ليكي لحد بكرة !! 
م رديت عليها .. دخلت البيت طلعت جبت مفتاحي حق العربية و طلعت م فتحت خشمي مه واحد فيهم !!! 
اما في مصر ..
وهاد بتحكي !! 
انا اتوقعت اي شي ممكن يحصل لي ، الا اني ممكن يجي يوم و احس بالخوف كدااااا ، "بعد اليوم داك" ! كنت مفتكرة ان كل مخاوفي انتهت !! بس .. 
صدقوني انا ما عارفه اتصرف كيف حاليا و خايفة على امي اكتر من اي حاجة تانية ، و ما قادرة ابطل تفكير في يوم بكرة ، و في الحيحصل فينا !! 
امي ما عندها غيري ، و لا انا لي غيرها ! امي دي عملت عشاني كتير ، ولازم اعمل عشانهاا قدر العملتو لي و زيادة !! 
ماف انسان بعيش من غير اهلو واقرب الاقربين ليهو ، لكن امي عملت كدا عشاني .. و المرت بيهو في حياتها ابداً ما ساهل ... 
جا علينا اليوم التاني .. قررت انزل اتصرف ، كيف ما عارفه ، بس طلعت الصباح بدري ، و نزلت الشوارع بقيت لافه ! 
كنت متمنيه القى لي شغل اشتغلو في نفس اليوم دا و اخد قروشو و ادفعا للشقه ! 
المهم ، بقيت بدخل المطاعم ، و بسال لو محتاجين وحدة تغسل عدة و لا اعمل حاجة ... 
بعد تعب ، وانا راجعه على البيت ، لقيت محل كُشري ، سبحان الله و انا داخله كنت متوقعه الرد .. 
دخلت عند المحاسب ، قلت ليهو : ممكن اشتغل اي حاجة ؟
م رد علي ، طوالي اديتو ضهري و انا ماشه قالي ، لحظة يا آنسة ، معلش كنت بحسب في حاجة ، تعالي اتفضلي كنتي بتقولي ايه !!! 
قلت ليهو ولا يهمك ، بصراحه انا محتاجة لشغل ، من اللحظه دي لاني مارة بظروف ما يعلم بيها الا الله ! ومحتاجة قروش ! 
سكت مسافة ، و قالي تخرطي بصل ! 
قلت ليهو جدااا ، بس ممكن اعرف حاخد كم ؟ 
قالي انتي ايه ظرفك ؟ 
قلت ليهو : انحنا جينا هنا علاج من شهر ، و الشنطة اتخطفت مننا و فيها كل احتياجاتنا من تزاكر لجوازات لي كلو ! و مشكلتي كلها في الشقه حالياً ، السمسار مصمم نطلع لانو اخر يوم لينا بعد بكرة !! 
قالي طيب يا .... 
قلت ليهو #وهاد بت حنان !! 
(ما بت الحرام)
ولا .... ريم ؟ ولا مريم ؟؟؟؟؟
يتبع ....
#استككانةة🧡 ...
#سحر_سمير ...