حب منبوذ

١٦

اتلفته و كانت الصدمة ... بتقولي دقيقة سلمي على بابا .. عاينت ليها لقيتا ماسكة يدو و جاية علي !!
بقيت انا الماشة عليهم من غير ما احس ..وماشه و متقدمة عليهم ، لمن هم وقفو !!
وقفت قصادو ! قلت ليهو : تااااني ! و بعدين معاك !
قالي : عفواً !!!
**تاني انت !
قالي : اسف بس مزن اصرت احصلك عشان اسلم عليكي ! و كمان اسف تاني اليوم داك ما كان قصدي اخبط فيكي 
كدا ، بالجد م كنت منتبه !!
**عاين ! انت بتعمل كدا ليه !! ما تمثل علي (بي صوت عالي ) ما تمثل علي قدامهم كفاااااية ابوس يدك كفاية ، اقسم بالله انا تعبته تعبته ! ارجوك ما تمثل علي قدامهم و خليهو يكون اخر لقاء بينا ، و وريني لو سمحته ! انت عايز مني شنو ؟؟
و كمان ( ويديني برجفو) وكمان اكيد انت شلت مني اللوحة الرسمها لي طه ، بس ما حسألك ليه بجد صدقني والله ، بس كل الدايراهو منك ما تظهر لي تاني ، اذا عايز اي حاجة انا بديك ليها بس لانك كدا بتضرني اي زول بشوفني بكلمك بقول عني مجنونة !
نهلة : (عاينت لي اخوها ) اسمعني ! اذا في بينكم خلافات ولا نقاشات ما حينفع تتكلمو بالطريقة دي قدام مزن و في ضيوف لو صوتها زاد عن كدا حيتلموا  ... تعالي يا مزن معاي (جرتها) !!
وهو واقف مافاهم اي حاجة ! عاين لي و قال لي :
__انحنا ما اتلاقينا قبل كدا غير مرتين يا ريم !! وحقيقة انا ما فاهمك ! كلامك دا متأكدة انه موجه لي انا !
لمن ركزت فيهو شديد ، قعدت ابكي ابكي ابكي بي حرقة من قلبي ! جا علي بقى متردد يمسكني ولالا ، و بيعاين في الشارع ! قالي ريم !! ...ريم !! استهدي بالله يا زولة ! لو في حاجة اقدر اساعد فيها وريني !! ريم ! ...... زحيت منو و جريت على عربيتي !!
بقى مهرول وراي ، داير يحصلني بس كنت اسرع منه ، ركبته عربيتي .. و بقى يخبط لي في الشباك ويقول لي  ما تسوقي كدا ما تسوقي كدا  اقيفي يا ريم .. ريم ...
ركب عربيتو و مشى وراي و م كنت شايفاهو ولا حاسة بيهو ، ( لمن ركزت فيهو شديد ، شبه اني فقتا و حسيت بالحاجة الحأكون عملتها ، نفسيتي تعبت و حاسة بالخجل لاني م متذكرة انا قلته ليهو شنو ولا اللي كان حاضر الموقف البايخ دا منو) ..

فضل ماشي وراي لمن وصلت البيت .. و نزلته و دخلته ، وهو كان واقف بعيد !! اثناء دخولي  لقيتهم مجتمعين زي البتناقشو في موضوع و وش رزان ما كان مطمن ابداً .. اول مرة ما اقدر اتجاوزهم ! من غير ما اشعر ، قلت ليهم في شنو ؟؟
امي : ماهو م منطق فجاة كدا تقولي م دايرة العرس بعد م اتحدد و مخطوبين ليكم سنتين فجاة كدا ! يا ريم بالله اتكلمي مع اختك دي !؟
** عاينت لي رزان .. قلت لي ابوي كيفك ؟ و لي امي و وليد ،، قلت لي رزان تعالي عايزاكي ..
(في جانب مزن ونهلة )
نهلة : ماشاءالله ذوقها رهيب شديد ، فساتينك حلوة شديد يا مزن !
مزن : شوفي العلبة دي يا عمتو لقيتا في الصندوق تحت ، افتحيها لي !
نهلة : كدي ....... ووووب علي دا دهب !! عايني يا امي ! دا دهب ولا عيوني كعبات ؟
امي : عاد من كلامكم دا عن ريم دي اشتهيت ليها شوفة ياريتني كنت قاعدة .. كدي جيبي !
نهلة : مختوم انتي عارفة ! عاد يا مزن صحبة السرور
امي : اي مختوم ، حلو شديد ماشاءالله منو البهدي دهب الزمن دا يختي ..
نهلة : والله يا امي خلوقه وهاديه كدا بس ما بتضحك يعني لو ابتسمت بتكون انجزت ،و غير كدا واضح ان في معرفة بينها وبين ابو مُزن .. ومعرفة قوية و قديمة كمان والله اعلم !
امي : ربنا يهدي النفوس يا بتي ، و انتي عارفه اخوك ما زول معرفة وحاجات زي دي بكون سوء تفاهم بس ..
نهله : مع انه م ظنيت لكن على قولك نقول ربنا يهدي النفوس ..
"زي ما شفتو بعد رجعت البيت م كنت فاهمه "
و عشان م كنت بخير و كان لازم اتدخل ، طلبت من رزان تطلع معاي غرفتي ، انا عارفه انها بتحب عمار دا شديد و كانت متمسكة بيهو شديد ، بس ما كنت فاهمه فجاة قفلت بالطريقه دي ليه ! حاولت معاها كتير كانت متحفظة بالأسباب و حسيت ان كلامي معاها دا كان في توقيت غلط و ان السبب اللي خلاها تقرر كدا لسه نارو م بردت عشان كدا مقفلة كل الطرق للنقاش و م وصلت معاها لنقطه واضحة غير انه تأجل الكلام في الموضوع دا حالياً وسكتنا على كدا ...
في اليوم التاني _ 10:45
كنت متواجدة في الشركة ، جاتني فاطمة ..
__صباح الخير أستاذة ريم
**صباح النور فطوم كيفك
__ماشاءالله مشرقة اليوم
**مشرقة بي وين و الله البركة في ضحكتك دي يا فطوم ..(اكتر انسانة بحسها مريحه وبقدر اخد وادي معاها في الكلام )
__شكراً شكراً ، المهم الليله يومنا حيكون ضاغط حبة حسب جدولنا ، و جيتك عشان في واحد كان مقدم و من الايميلات الاتقبلت و مؤهلاتهم عالية ، بس ما جا الانترفيو في الوقت الكان محدد حسب كلامه انه كان برا العاصمة و الليلة من الصباح جا الشركة عشان يشوف في فرصة ليهو و لالا ! وحالياً هو مستني برا ، اهااا ؟؟
**خلاص انا اخدت العدد المطلوب يعني هو ما اتاخر يوم ولا اتنين ......اااه خلاص اسمعي جيبي لي ال C.Vحقو  و اذا مؤهلاته بتسمح ، نفر إضافي ما بيضر و اذا م اتوفق اكيد المشروع الجديد حتكون فرصو اوسع ..
__طيب دقايق اجيبو ليكي !  *دقيقتين وفاطمة جات* .. اتفضلي أستاذة ريم !!
**امممم "طارق حسين " ....... قريت الاسم و اخدت لي صنة و انا بعاين في شهاداته !! قلت لي فاطمة .. خبراتو كويسه ، ودي الC.Vحقو لـ محمد ويكمل اجراءاته في قسم الكمبيوتر  و من بكرة يبدأ يداوم و ويوريهو مواعيد العمل ، والرواتب حقت القسم دا ..
__موضوع الرواتب دا كان موجود في الاعلان ،.
**اي زيادة خير من حقو يعرف كل حاجة عشان يمكن ما انتبه او ما يناسبو الشغل ..
__فعلا ... عن اذنك
بعد فاطمة طلعت .. مشت القسم حقهم !! و جدعت ال C.Vفي المكتب لي سارة .. قالت ليها :
فاطمة : سلمي دا لي محمد
سارة : دا شنو ؟
وجدان : حاصل شنو ؟
فاطمة : دا تعين في واحد جديد وصليهو بي محمد عشان يكمل اجراءت ال C.Vدا !
وجدان : واسطة ولا شنو جا بعد التقديم انتهى !
سارة : وديهو انتي مش استاذة ريم قالت ليك انتي ؟
فاطمة : ما واسطة يا وجدان وعارفه ريم ما بتعين زول بي واسطة ،  عنده مؤهلات كويسه و ربنا اداهو ، و يا سارة انتي عارفه علاقتي بمحمد عاملة كيف ، حتقدري تودي الملف دا ولا كيف !!
سارة : حأوديهو براحة ....
وجدان : شكلو حلو ولا من عينة محمد واشرف !!
فاطمة : امشي شوفيهو
وجدان : ما بعرفك مالك اتغيرتي كدا يا فطوم
فاطمة : مافي شي يا وجدان زهجانه بس ..
وجدان : سكته طيب !
اما انا - وهاد
زي الساعه 2:13 كدا اتصلت علي ست التوب -
**سلام عليكم ..
__وهاد كيفك حبيبتي وعليكم السلام ..
**الحمدلله ..انتي كيفك ؟
__حمدلله بخير  ..
**اتصلت عليكي بخصوص التوب ، انا انتهيت منه فا كنت حابة اعرف يوصلك كيف ؟
__وهاد انا قلت ليكي بعد بكرة حبيبتي ليه ضغطتي نفسك كدا ؟
**ما ضغطت نفسي انا بحب شغلي و لمن ببدا حاجة ما بقدر اوقف الا وانا مخلصاها ..
__كدا ارهاق و خافي على عيونك و صحتك حبي شغلك ايوة لكن حبي عافيتك و صحتك اكتر ..
**تقولي شنو بس حمدلله ..
__طيب يا وهاد تحبي تجيني في البيت ؟
**لالا برا افضل
__هههه ما تخافي انحنا ناس محترمين والله وامي في البيت و اختي و اخوي و كدا ..ممكن نجيبك و نرجعك ما تخافي ..
**ما كدا والله بس عندي شغل تاني ، توب جرتق و متشوقة ابدا فيهو و غير كدا طالما في يدك في عربيه ممكن اصل السوق ونتلاقى هناك ..
__طيب تمام .. يلا دقايق ونتلاقى ...
بعد 31دقيقة -
طلعت فعلا ، وصلت السوق ، التوب كان نقصو سلفرة ، سلفرتو و انتظرتها ، وقفت 11 دقيقة حتى جات .. بي عربية كبدية رهيبه شديد و كانت سايقة و معاها بنوته صغيرة و ولد صغير .. سلمت عليها و صممت اجي معاها ، فعلاً مشيت معاها والمشوار ما كان بعيد شديد .. نزلت معاها و دخلت البيت ، كان في اختها و والدتها مرة كبيرة كدا ، سلمت عليهم ورحبو بي شديد .. جاتني الشافعة .. قعدت جمبي ، قالت لي اسمك منو انتي : قلت ليها اسمي وهاد !
شهقت كدا قالت لي يا خالتو اسمك سمح شديد .. قلت ليها اكيد ما حيكون احلا من اسمك ، قالت لي انا مُزن ...قلت ليها مش قلت ليك ان اسمك حيكون حلو شديد هههه .. جابو لي عصير و بقو يتونسو معاي شوية عن طبيعة شغلي وكدا !
لمن جا وقت التوب ، اديتو ليها .. شالتو مني و قالت لي اختها : قومي يا نهله اللبسيهو ..
قلت ليها : انتي ما فتحتيهو اصلا
قالت لي : بحب اتفاجأ ، هههه نهلة اجدعي التلفون دا من يدك قومي اللبسيهو عليك الله ..
نهلة : اللبسيهو انتي يا نهاد هو حقي ولا حقك ، (بدت تفتح فيهو ) و بتقول . وااااو واااو لا لا لا ما بصدق لا نهاد شوفي !! (نهاد قبلت عشان تشوفو بعد تلبسو اصلو ابت تعاين ليهو )
نهلة : وووووواااي من الرهابة لا لا ، نهاد عاد توبك دا ح يغطي على العرس كله دمار ..
نهاد : البسي خارجيني عشان اشوف
امهم : ماشاءالله تبارك الله توب السرور يا يمة .
نهلة : عاينو ليهو واااي لا انا شلت التوب دا يا نهاد والله كان ترضي ولا كان تابي
نهاد : (بعد اتلفتت ) وهاد .. انتي انسانه ما طبيعيه انتي بالجد كارثة ! معقول دا شغل يدوي ماشاءالله ، ماشاءالله كدي طلعي يا نهلة خليني اشوفو ... و هنا الشكلة قامت بيناتهم ومناقرات في التوب ... كنت فخورة شديد بي ردة فعلهم دي.. بعد مدة من الكلام ، جا راجل داخل ( نص التلتينات كدا ) ، جرت عليهو الشافعه (مزن) حضنتو و قالت ليهو بابا ..
بعد المناقرة انتهت ، حاسبتني على قروشي ، و قالت لي للزول اللي جا دا يوصلني .....!!!
ريم بتحكي :
بعد يوم ضاغط زي ما اتعودتو ، طلعت من الشركة جاني تلفون من مكتب العمل ، و اتصلت بي وليد طلع ناسي المواعيد .. و خليتو مشى ليهم .. بعدها بي دقايق اتصل علي طه !!
_شنو يا استاذة من ديك و عيك !
*مشغولة والله يا طه
_انا بس كنت عايزك تجي عشان خايف عليها تضيع وسط اللوحات ..
*شنو دي التضيع ؟
_اللوحة حقتك الاشتغلناها !
*كيف يعني ! اللوحة معاي انا شلتها اليوم داك !
-اذا شلتيها اذن اللوحة العندي دي شنو ؟؟
يتبع .....
*في الحلقات الجاية*
انت واحد حقير و تافهه ، و يعني شنو كان عارف حقيقتي شنو ! الحمدلله اتربيت في اسرة محترمة اكتر من اسرتك اللي ما عرفت تربيك ، و طلعت بي ولد زيك ما تامي راجل حتى !!
#استككانةة🌸..
توقعاتكم للاحداث الجاية  -
#سحر_سمير ...