حب منبوذ

١٢

جدعت اكياسي و مشيت ليها لحد بابها ، مسكتها من  توبها ، قلت ليها اسمعي ! 
سكوتي عنك او عنكم كلكم انتو فاكرنو خوف ولا ضعف مني طول السنين الفاتو ديل ! لا والله ابداً ما ضعف 
ولا انكسار ، بس من قمتا و انا اتربيت على حق الجار ، و انا ساندني الله دا الاقوى منكم كلكم ومن نظراتكم 
و تنمراتكم السخيفة !! انا في نفسي اتقبلت الاهانه لانها انكتبت لي و عمر الكلمة الشينة ما لصقت ليها في بني ادم والحمدلله ، لكن حتجو عند امي بكسر رقابكم دي و بعلقا في عواميد الكهرباء دي عبرة لليسوى و اللي ما يسوى ، لانه لحد هنا و اكتفيييت وصلتوني الحد و بعد كدا ما تلومني على الحيحصل مني ! مفهوم ولالا !!!!! 
مسكت امي دخلتها و خميت اكياسي و دخلت البيت ! دخلت على الحمام استحميت و طلعته .. امي قالت لي : 
من غير شي انتي ما سالمة منهم و بعد يوم الليله دا حيضادوكي يا وهاد !
**م تشيلي هم حاجة يا غاليه اتطمني ما حسمع ولا حشوف اكتر من الشفتو والسمعتو قبل كدا و المعاهو رب العالمين ما يهاب ليهو بشر زيو روحي مافي يد بشر زي  روحي في يد الله وحده ..
__ونعم بالله يا وهاد انا عارفه الكلام دا كلو بس ..، انا بفكر نبيع البيت دا بعد كدا خلاص !
**(بي خلعه) نعم ! تبيعي بيت ابوي عشان ناس زي ديل !! 
__وهاد كفاية يا بتي مناقرة في الطالعه والنازلة سنين ياخ سنين ما كلو ولا ملو ، انا ما غالبني اقيف ليهم ما حيغلبوني ! الخلاني اخسر اهلي ما بغلبني ديل !! لكن انا دايرة اعيش الباقي من عمري دا في سلام و امان م معقول سنين ياخ انحنا عايشين في نفس النقطة، الناس م عندهم غيرنا !! 
**........... (ربنا كريم ) ، ومشيت من جمبها مشيت عند صورة ابوي بقيت واقفه قصادو ! وبقيت بعاين لي صورتو وبقوليهو : انت حاولت تنقذني ، حاولت تديني ابسط حقوقي في الدنيا دي ، قدمت لي كتير انت وامي وضحيتو عشاني ! تتزكر اول كلام لينا مع بعض !! 
*فلاش_باك*
الخرطوم-2001 
ماسكني من يدي ، و فتح لي باب العربية ورا ، ركبني و كان في ولد قاعد ، و ملامحو في قمة الحزن ، حتى نظراتو لي كانت غريبه ، المهم قعدني جمبو و كان ماسك باب العربية و واقف ، مسكني من حنكي ، قالي : ما داير اشوف ملامح الحزن دي في وشك من الليله ؟ الحياة ما ساهلة ابداً علينا ، حتى انحنا الكبار في حاجات بتجرحنا ، عشان كدا دايرك تكوني قوية و قوية شديد مهما حصل اوعي تقبلي بالهزيمة ، و حياتنا صعبة بي عُقد المجتمع و بالناس و أرائهم ، بس م دايماً هما بكونو صح ، في حاجات مفروضه علينا تحت مسمى المجتمع ما بيقبل ، و في ردود فعل بتقع علينا بتكون مبالغ فيها ! يمكن انتي لسة صغيرة على انك تفهمي معنى كلامي دا ، بس متأكد ما حتنسيهو لمن تكبري ..يا وهاد ! 
قلته ليهو : بس انا ما اسمي وهاد !! 
بتذكر ضحكته لي يوم الليله ، وهو بيقول لي ، نخليهو وهاد ! 
قلت ليهو وهاد دا اسم حلو شديد لكن ! قالي ما احلا من ضحكتك دي ! و زي ما اتفقنا من الليله اسمك وهاد ، تمام !!! (هزيت ليهو راسي انه تمام ) 
عاينت للولد الجمبي ، و كنت منتظراهو ينبزني او يقول لي اي كلمة فيها اهانة ، لاني حقيقي اتعودت على الاهانة ، والتنمر !! بس كل العملو قبل وشو مني ..
امي جاتني عاينت لي صورة ابوي و  قالت الله يرحمك و يحسن اليك يارب ، و قالت لي  :
اسمعي ! انا ما ضعيفه ولا بيأثر فيني كلامي الناس ، لكن رايك شنو ، نبدا حياة جديدة ؟ يعني نبيع البيت دا و نشوف لينا بيت كويس في منطقه بعيده من هنا ، و اذا في فرق قروش نعمل بوتيك و نكمل شغلنا ، رايك شنو ؟ 
قلت ليها نسيتي ان البيت دا يعتبر ورث ؟؟ وانا م بعتبر نفسي وريثه فيهو ، لانه البيت دا يعتبر بيت طارق 
وبيتك ياامي ،و انا م عندي مشكلة لان الذكريات في القلب !! 
زحت من جمبي بي غضب وانفعال ، قالت لي انا تعبته منك و من كلامك دا ! انا ابني يا وهاد وانتي بتهدمي ..
اما في جانبي -
اثناء وقوفي برا ، كانت جات فاطمة ( لمن ضربت ليها كان عشان تجي ).. كانت شايفني من وانا بتجارى حولين العربية ، لمن قربت علي !! قالت لي :
__استاذة ريم كيفك ؟
**م رديت عليها وانا نفسي قايم وبعاين في صندوق العربية ! و فاطمة مخلوعه و بتعاين في رجولي الحفيانة 
وفي اني واقفه بي بجامة البيت قدام البيت و اني م بسلم و م مركزة لي وجودها اصلاااً ..
لمن عاينت لقيت اللوحة قاعدة و ملفوفة زي ما ختيتها !! ختيت يدي في قلبي و قلت طيب ! دا معناتو شنو ! 
ما هي لو كانت مافي دي حتبقى مُصيبة كبيرة !! 
جات رزان وقفت جمب فاطمة ، عاينو لي بعض و عاينو لي !! عاينت ليهم انا كمان و قلت ليهم : الحمدلله لقيتها قاعدة !!! ههه هو كذاب بس داير يلعب بي اعصابي ساي ! 
و م يحتاج اوصف ليكم هم كانو بعاينو لي كيف ! ونظرات التعجب عن ريم دي بتتكلم عن شنو ! جات رزان 
وقالت لي ريم ، و ادتني شبشبها للمرة التانيه في نفس المكان ، قالت لي تعالي !
وانا ماشه معاها و فاطمة ماشة ورانا ! فجأة وقفتا ! رزان قالت لي امشي وقفتي مالك ! 
بعد وصلنا باب البيت ، جريت تاني على العربية و فتحت الصندوق ، و مسكت الورقه حقت الرسمة ، و فتحتها ! و كانت الصدمة انها #ورقة_بيضاء ! فاضية !!  ، بس نفضتها من يدي ، وقعت في الارض ، و ختيت يديني في خشمي و بقيت اقول ورا بعض ، مستحيل ..مستحيل ..مستحيل ...... 
لا مستحيل ، في اخر وحدة قلتها بي صرخة !! مستحييييل ! 
فاطمة جات جارية علي ، و رزان ، جوني مسكوني ، امي م كانت موجودة في البيت الوقت داك ، طلعت هي 
و وليد ! دخلوني لحد غرفتي !! كل العملتو اني رقدته و اتغطيت  وغطيت وشي باللحاف ، فاطمة واقفه وخاته يدها البترجف في وشها و بتعاين فيني ! 
رزان مسكتها وهي طالعه ، قالت ليها تعالي معاي ، فاطمة قالت ليها كيف نطلع و نخليها !! 
رزان قالت ليها حاليا م حنقدر نعمل حاجة ! فاطمة كانت م عايزة تطلع ! بس م كان بنفع تجادل رزان في حاجة ! بعد بقت طالعه ، انا ناديت عليها من تحت اللحاف ! قلت ليها فاطمة خليكي !! 
طوالي رجعت لي بي لهفه قالت لي حاضر استاذة ريم ، زي الما صدقت ! قلت لي رزان اطلعي انتي ! 
فعلا طلعت ! ( رزان شخصيتا شوية غريبة ، هي طيبه و كويسه بس م حكيمة م بتقدر تتعامل في اي موقف 
بتقيف بعيد حتى لو في خلاف ولا شكلة بتقيف بعيد حتى لو زول شاكلها م بتتكلم بتقيف بعيد و بتسكت عشان كدا 
م بتقدر تتعامل و بتحكم بنظرة غيرها يعني ) .. 
طلعت من تحت اللحاف ، و وقفت ليها ، قلت ليها :
**مستغربة فيني صح ؟ 
__لا ابداً م مستغربة فيكي !
**انتي بتقولي كدا لانك قدامي ولانك بتعتبريني استاذتك ف الشغل فا دا من دافع احترامك لي انا عارفه . 
__طيب ، (اتلفتت كدا و عينها جات ع المصحف ، مشت عليهو و ختت يدها )
**دايرة تعملي شنو ؟؟
__دايرة احلف ليك اني م بعاملك بي وش و وراكي بي وش ولا شايفة فيكي حاجة غلط !
**لا يافاطمة م لدرجة مصحف لو سمحتي تعالي ! اذا انا ما كنت فاهمه البحصل معاي شنو انتي حتفهمي ؟
__استاذة ريم ، مافي حاجة في الدنيا دي خارجة عن المنطق ! كل شي بالمنطق .. اذا كانو الناس شايفين تصرفاتك دي تصرفات وحدة مجنونة فا دا حصل لانهم نظرو ليكي بنظرة سطحية من غير ما يقربو ويفهمو ردة فعلك دي اساسها شنو !  هسي انتي ما لازم تسكتي اذا حسيتي بي حاجة غريبه فيكي ، م تهربي منها ، اي حاجة مهما كانت صعبة يا استاذة فا هي حلها المواجهه وبس واجهي !
**اواجه سراب !!!!!!!!؟؟؟ كيف اواجه حاجة ما عارفاها سراب ولا انس ولا جن !!!!! وريني يا فاطمة ؟
__(بقت تتمتم) كك كيف يعني !؟
**اها شفتي ؟ 
وهاد بتقول :
بعد نقاش و يوم مشربك ، م كنت قادرة اتجاوز العبئ الاضافي اللي انا ما عارفاهو و اللي كانت متحملاهو امي  
وبخليها تسرح بالساعات !! و كنت بعاين ليها ، لمن صوت الباب كان فاصل و م معروف اذا حنواصل ولا لا !! 
ختيت طرحتي في راسي .. و مشيت على الباب ، وقفت ورا الباب وانتظرتو لمن خبطت تاني( للتاكيد بس لان مافي زول  
 جاني صوت امي و هي بتقول لي منو الفي الباب يا وهاد !!؟؟؟؟ 
قلت ليها (وانا بفتح في الباب) : لسسسه ما..مااا..(بقيت بتمتم من الصدمة ) ما اا ... 
وفكيت الباب ورجعت لي وراا ....... قلت ليها بي صوت مبحوح ، دا ...
يتبع ...