حب منبوذ

١٥

**خير يا طارق !
__انا قررت اتزوج !
**بجد ياسلااااااااام ياخ ، بالجد انا سعيدة ليك شديد فرحتنني من جواا قلبي ياخ ، وربنا يتم ليك على خير ! ههه عارف اتحمسته شديد ، اااه اخيراً حتجيني اخت و زوله تونسنا و تفرق علينا ياسلااام !!
__وهاد ...وهاد !!
**اهااا ...
__انا عايز اتزوجك انتي ....!!!!
** هههههه طارق بطل عليك ياخ ، اقسم بالله متحمسه حماس الف ، عاين انت لازم تديني رقم تلفونها ولا واتسابها ولا اي حاجة ، لازم لازم اتعرف عليها ، بس عايزة منك طلب يا طارق !! (في اللحظة دي امي جات وقفت جمب باب الغرفة)
__وهاد ، اسمعي ! اسمعي !
**اسمعني انت لو سمحته ! طلبي بس انك م تكون واضح معاها حالياً بي خصوصي ولا حتى مع اهلها انا عارفه ان دا غلط بس لحد ما يدو نفسهم فرصة انهم يتعرفو علي ، و  عشان ما تخسر الانسانه دي بي سببي ، فاهم علي ! يعني من ناحية اهلها وكدا و النظرة الممكن ينظرو لي بيها  !! فهمتني صح !!
__وهااااد .. مافي اي بنت عايز اتزوجها غيرك افهمي !! انا داير اتزوجك انتي !
**(وقفت على حيلي) ! انت مجنون !؟
__لا ما مجنون انا داير احميكي من الناس ومن المجتمع ، انا داير اكمل اللي بداهو ابوي حسين ربنا يرحمه ! بس كمان دا م بيمنع اني اعيش حياتي ، وعشان اكون واضح ، انا م حأكتفي بي زواجي منك و حأجي يوم واتزوج انسانه انا عايزها !
**دقيقه ...دقيقه ...!! انت مجنون في راسك دا !! ياامي انتي ما سامعه طارق دا بيقول في شنو !!! 
كيف يعني يتتـ.. تتـ ...زوجني !! انا اختك يا طارق انت جنيت ولا شنو ، و منو سمح ليك تفكر بالطريقه دي ! و هسسي دي لو سمحته قول ان كلامك دا ما حقيقي وان الاتقال دا اعتبرو هظار سخيف و بايخ !
امي : انا ماعارفة انت كيف اتوصلت للنتيجة دي او للكلام دا يا طارق يا ولدي ، يعني دافعت عنها من عمرها 8 سنوات ، و اللي كان بيقول عليها حرف واحد كنت بدخل اصابعي دي جوا عيونو الاتنين و اقوليهو كذاب ، هسي انت جاي وبكل بساطة تقول عايز تتزوجها عشان تحميها من الناس !! الناس تولع ..الناس تحرق ! دافعت عنها سنين حيغلبني اذافع عنها اسي ؟؟ و انت اتجاوزت حدك شديد يا طارق و كل مرة قاعد تتمادى و بتوصلني لي مراحل انا ما دايرة اصل ليها !
__دا جزاااي !! انا ح اضحي واتزوجها عشان استرا !!
امي : جات بي غضب رفعت يدها فوقو !! شنو انت شابكني تسترا ، تسترا ! محسسسني انها فلتانه و ناقصه ! و منو القاليك تضحي اصلا ، وخاتي نفسك في الصورة لشنو مادام ماقادر تبقى ليها اب و اخ !
**امي ... طارق ما جادي ! و ح اعتبر نفسي ما سمعت التفاهات حقتو دي .. فاهم ؟؟؟
__......(طلع من غير ما يرد ) ..
امي : لاحول ولاقوة الا بالله .. ما قادرة اصدق الحصل دا ، طارق دا ما عارفاهو مالو وليه بيعمل معانا كدا ، وهاد ما تزعلي يا بتي من كلامو ، ما دايرة ادافع عنه لانه ما خلى لي مجال ادافع ليهو ..
**اكذب عليكي لو قلت ليكي كلامو ما جرحني ، طارق بيعاملني زي البلوة العايز يتخلص منها كاني قاعده ليهو في حلقو ولا عار عليهو ، وزاد عليها انه لو اتزوجني ، حيتزوج غيري  كأني ما محسوبه او ما بني آدمة و لي وجود ، يعني اتخيلي الاهانة يا امي و من اقرب انسان لي بشوف فيهو السند !
بعد كلام كتير و مواساة من امي و جبر خاطر ، م كنت قادرة اتقبل اي حرف و اي كلام ، نفسي قفلت من اي شي ، وكل العملتو قفلت باب غرفتي علي و كبيت غضبي كلو على شغلي في التوب ..
(في جانب رزان )
رزان : ايوة يا عمار
عمار : قلبو
**كيفك حبيبي ؟
__حمدلله ، وينك ! اتصلت عليكي مرتين !
**كنت مع امي بهناك
__اهااا ، كيفكم ؟
**حمدلله ماشي الحاال
__ماحاسي بيكي تمام ، حاصل شي ؟
**لا ابدا مافي شي
__احكي حاصل شنو !
**موضوع طويل ، و ما عارفه اذا لي صلاحية اتكلم فيهو ولالا ..
__طالما حاجة مؤثرة فيكي يبقى تخصك و اي حاجة تخصك انا من حقي اشاركك فيها واعرفها والا شنو ؟
**امممممم، الموضوع بخصوص ريم !
__ههههه ريم المنفسنة !
**عمار !!! كيف يعني تقول عليها كدا !
__اسف ياروحي وبعدين ما انا بس البقول كدا ، اي زول بعرفا بقول كدا يا رزان !
**طيب ديل الناس الغرباء بيقولو كدا ، تقوم انت تبقى زيهم ! و بعدين وريني شفت منها شنو كعب ؟
__براحة بالجد اسف ماقصدت حاجة !
**لا ما اسف اذا الناس دي كلها قالت عنها حاجة مفروض انت تدافع عنها ، لو ناسي بذكرك وقفت معاك قدر شنو ! ابسط حاجة شغلك دا وريني في زول كان بعرفك من التجار ديل ! ما كلو بي سببها هي دعمتك و وقفت معاك عشان تقدر تعمل لي حاجة !
__لالا دقيقه اسي انتي انفجرتي فيني كدا عشان كلمة قلتها !! و بعدين يعني شنو دعمتني ، ما كلو بي قروشي و قالت ليك كمان شحدت منها قرش !!
**ريم ما قالت حاجة ، ولو انا ما سمعت منك انها ساعدتك ، لي يوم الليله م كنت حعرف الموضوع دا ، عشان تكون عارف انها م قالت حاجة لا لي ولا لي ناس البيت .. واقوليك حاجة ! انا بحمد ربنا اني ما اتسرعت و حكيت ليك المضايقني ، بالجد بحمد الله .....يلا عن اذنك ..
__رزان لو سمحتي ! انتي فهمتي غلط و شكلك اصلا زهجانة و اتفشيتي فيني ، دي م كانت كلمة !
**اسمع ، كلمة ولا شولة في النهاية بتجرح ، سلاام ...*قفلت* ..
(اما في جانب البنات، وجدان وفاطمة و سارة)
سارة : مابعرف والله اطلبو لي اي حاجة معاكم بس
وجدان : الفتوشيني دي سمحة يا فاطمة ؟
فاطمة : بري م بحب الكريمة في الاكل ، يمكن تعجبك جربيها غايتو ..
سارة : انا دايرة بيتزا غايتو و ميرندا وخلاص مالي و مال القراية ام دق ، جناً تعرفو احسن من جناً ما بتعرفو ..
وجدان : والله يا سارة ضحكتيني ، ياهو على قولك ..
ياخ صدقو ، اتمنيت لو استاذة ريم كان جات اتعشت معانا هههه بس ما حتقبل تقعد معانا احنا المساكين ديل ، بتخيل يعني بتقضي اوقاتها وين !
فاطمة : و ليه ما تقبل ، على فكرة انتي فاهمة ريم غلط ، ريم ابدا م متكبرة للدرجة دي !
سارة : خلونا من سيرة ريم يا بنات ..
وجدان : غايتو ح اموت واعرف حاصل شنو م كانت بتغيب كدا ولا بتتاخر و سمعت تحت ان الحصل اليوم داك يا فاطمة غير الانتي حكيتيهو لينا ، يعني لا شاكلتك في ملفات ولا حاجة ، م بعرفك بتدسي مالك !
فاطمة : ادس ! طيب وين المشكلة لو دسيت !  مثلا لو موقف بايخ حصل مع سارة دي وانتي م كنتي حاضرة ، هل ينفع اجي اقوليكي والله يا وجدان الليله م شفتي الحصل مع سارة ! هل دا صح في رأيك ؟
يمكن لو وحده مننا حصلت ليها حاجة الناس م حتركز معانا لاننا ناس عادين و م عندنا عداوة م زول ! لكن دي مالكة الشركة يا وجدان ، مليون الف واحد مترصد ليها ! ومنتظر ليها هفوة وحدة بالغلط ! وغير كدا كانو في تعيينات جديدة وناس جداد ما صح الناس تاخد عنها فكرة غلط من اول مرة و كدا م حتلقى الاحترام اللي تستاهلو !!
يا وجدان ، انحنا ما شفنا منها الا كل خير ، عشان كدا لازم ندعمها ، عايني في عيونها حتلقي فيها مليون ومليون قصة 
وقدر شنو هي فاقده الناس رغم كل اللي بتملكو ، الا انها خاوية من جواها و القروش عمرها ما بتشتري ليها قلوب وحب لله في لله !!!
سارة : الحمدلله ...الحمدلله بالجد يا فاطمة انك بتفكري كدا ، سيرة الناس كان ما بقت بالحُسنة مافي داعي نجيبا اصلا 
وكل واحد فينا عنده مليون حاجة كاسراهو لولا ستر الله ...
وجدان : حسستوني اني كعبه !
فاطمة : لا العفو ، انا بس بقول الحق !! و كل واحد ح احترمو في غيابو وادافع عنه بالحاجة الكويسه اللي شفتها منه !
المهم .... خلونا ناكل ، اخدنا الكلام ...
وهاد بتقول :
اتأنقته كعادة كل يوم ، واخترت الوردي في لبسي حسيت انه مناسب لي اجواء عيد الميلاد ، و طلعته ..ركبت عربتي 
و شغلت ال GPS،و مشيت على العنوان اللي رسلتو لي نهلة عمة مُزن ، ما عارفه ليه كنت متوترة و بتكلم بي قلبي كتير ! عن اللي حصل معاي ، بقيت بنزعج شديد لدرجة ماشه وانا خايفه يحصل لي الموقف دا في عيد الميلاد دا ! و قاطع تفكيري ، صوت التلفون ...
__الوو ....
**ايوة انا ..
__انا تبع دكتورة شيماء
**ايوة ..
—كان عندك مواعيد الليلة الساعه خمسه بعد التحويل مع دكتور كمال و ما جيتي ! تحبي اجدد المواعيد لي بكرة ولا رايك شنو ؟
**اااه بس نسيت ، خلاص خلي المواعيد بكرة ان شاءالله انا حأجي .. بس دكتورة شيماء ما ورتني حاجة عن تفاصيل الدكتور دا !
__ما عارفه لكن هي اتصلت و حولتك و اخدت ليكي مواعيد ..
**طيب انا حا اتصل وافهم منها ( دخل على اتصال في الانتظار)..
__تمام .. يلا سلام
**سلام ....*قفلتا الخط و فتحت المكالمة التانية*
__الووو ..مساء الخير !
**مساء الانوار
__انا نهلة .. اتاخرتي حبيت اشوفك م نكوني ضعتي
**اي طلعت متاخرة من البيت ، لكن لحد اسي الطريق واضح ..
__خلاص تمام ، انحنا في انتظارك برا ..
**شكرااا .
_ولو ....
دقايق مافي و كان وصلته ..
نزلته و فتحت الباب ورا ، شلت البوكس حق الهداية و البوالين ..
(كان في نفس المكان دار حوار بين نهلة و وحدة من الاهل اسمها منى)
منى : لالالالالا يا نهلة واااااي لا بس ما تقولي لي ان دي هي ريم ! اللي احنا منتظرنها !
نهلة : عليك الله اصبري انا زاتي ما عارفاها عامله كيف ! معقول تكون دي هي !! عايني الشعر ، هي قصدي عايني البلالين !!
منى : اعاين في شنو و اخلي شنو و لا العربية ! ولا السماحة وووب عليك يا منى ، اريتك جبتيني راجل يا امي !! 
نفسيات كان دي هي !
نهلة : اجي !! وانتي مالك يختي ! ي زولة دي شكلهت هي شوفيها جايه علينا !
منى : شنو مالي عايني لي كويس وعايني ليها ! شوفي الشعر دا طاير كيف ولا اللون ولا السماحه ولا اللبس ياخ دي يختوها يعاينو ليها كدا بس !!
نهلة : اسكتي اسكتي الله يفضحك ! عاد يا مجايبك يا مُزن يا بت اخوي !
المكان ، بيت ظريف شديد .. و كنت ماشه و شايفه بنتين واقفات -
وحدة فيهم كانت مبتسمة و جاية علي .. قالت لي :
نهلة : يا هلا ... ريم صح ؟
**ايوة ريم ..ازيك ؟
منى : كيفك (مدت يدها )
**الحمدلله ...
نهلة : اتفضلي اتفضلي ... مزن ...يا مزن (وانحنا داخلين ) مزززن تعالي ، ريم صحبتك جات !
دخلنا و كان اطفال كتار ، و الكبار بالعدد . وصوت الاغاني حقت ال Djعالي ،، مزن من شافتني خلت صحباتها وجات جارية حضنتني .. قالت لي :
مزن : سمحة شديد انتي يا خالتو ريم !
**من ذوقك يا حلوة ... كل سنة وانتي طيبه و عقبال نشوفك كبيييييرة كدا ، و تبقى ... اممممم نفسك تكبري تبقي شنو ؟
مزن : انمممممم القى عندي شركة كبيرة !
**!!!!!(حيرتني صراحه ) اشمعنى شركة ؟
مزن : ساي بس ، حلوين البلاين ديل .
**هاكي ليهم اصلا حقاتك وزعي على صحباتك ..
مزن : شكرااااً و جرت ....
**دقيقه دقيقه ! م عايزة هديتك ؟
مزن : عايزاها ..
**اتفضلي هديتك ..
مزن : شكرااا
بقيت مستغربة الاجواء بس مستلطفاها ، حسيت اني اخدت فاصل من الواقع بي شوفة ناس جداد في حياتي ..و كنت شايفه في ناس كبار يعني صحبات مزن كل وحدة جايباها امها ، لحد م جا وقت الكيك و تطفي الشمع .. بعدها انا استأذنتا !
مسكو فيني شويه بس اصريت و اتحججته بالزمن .. اثناء طلوعي من الباب و نهلة مقدماني ، لحد عربيتي .. فجأة سمعته صوت مزن بتكوورك و بتقولي يا خالتو ريم .. اتلفته و كانت الصدمة ...
يتبع