حب منبوذ

١٤

امها : عاد جناك دا يجي كيفن وانتي ساكة الودع والجبنات والفارغة ! ربك دا حينظر لي امرك كيف و انتي من الفارغه ما فاضية !
سامية : يمة عليك الله باركيها عليك الله انتي بس !!
—دا راسك و دي الحيطة ، انا العندي قلتو !!
**مششيم
"جاها صوت بعد امها مشت بيقول ليها"
— اها الجوطة في شنو المرة دي ؟
**امي وانت عارفا ،، اسوي ليك جبنة؟
__ لالا تعالي اقعدي عايز اتكلم معاكي ..
**الله يستر !
__ ياهو يا سامية موضوعنا حق كل يوم ، يا سامية لا انتي و لا انا بقينا صغار بعد دا ،  عايني لي راسي دا و دقني بقى زي القطن و العمر جاري يا سامية!
** يعني اسوي شنو يا عبدالرحيم ما خليت حاجة ما سويتها بعد دا الباقي في يد الله ،اسوي شنو لو الله ما رزقني بي جنى يا عبدالرحيم وريني ؟
— ( قام على حيلو ) !
**ماشي وين رد علي !
—خلاص يا سامية خلاص انا بطلع !
و كانت الخلافات كل يوم ماشه في زيادة ما بين سامية و عبدالرحيم .. بعد ام سامية رجعت البلد حقتهم ، اخدت ليها اسبوع وجات راجعه !! رجعت من غير اي ما تكلم ساميه ، وحسب فهم سامية ان امها حتقعد لسه فترة اطول !
و جات البيت وكانت وكانت سامعه الجوطة و الخبيط ،في بيت بتها سامية ، لمن جات داخلة من باب الشارع للحوش ، اتفاجأت بي منظر الحريم و الدموم المالية ملابسهم و ضييح الديك ، و امور الظار ديك ... كانت صدمة لدرجة رجعت برا الشارع عشان تتأكد انها دخلت بيت غلط ولا لا ..
ابتدت تدخل لي جوا وبتفتش لي سامية بي عيونها وسط الحريم ! لامن سألت وحدة من الحريم الفايقات الكانوو بحضرو بس ، قالت ليها : وينا سامية ؟؟ ردت ليها المرة ما بعرفا ! اها كملت لمن وصلت نص الدايرة ، برضو ما لقتا ، لمن فكرت تدخل جوا ، لقت السُرة صحبة سامية الكانت بتجيب ليها الوداعية ! قالت ليها : سامية بتي وينا يا السُرة !
بعد تمتمة و مراوغة ، قالت ليها : سامية جوا الاوضه ديك لي جواا !
قالت كربت توبي و دخلت لي جواا !! دفرت الباب ودخلتا وانا شايلة من الغضب ما يعمي ! كان اشوف أميرة (بت البلد) مرقدة في السرير ، وديك ليها ساميه واقفه و شفقانه و بتسأل في المرة المعاها بي شفقة و ترجي ! و من شافتني اتخلعت و عاينت لي اميرة و سكتت المرة و جرتا و جرتني انا زاتي و طلعنا من الاوضه !! قلت ليها :
**دا شنو يا سامية الحاصل في بيتك دا يا سامية ؟
__يمة نتكلم بعدين ! ( وهي بتدفر في المرة المعاها)
**سامية انتي جنيتي يا بتي ، دا ظار داقة الظار في نص بيتك ! وعبدالرحيم ما شايف البتسوي فيهو دا ، و بعدين اميرة مالها ! بت الناس امانة فوق رقابنا دي يا بتي مالها ؟
__يمة اسمعيني ، اميرة عندها حمة زيها زي اي زول بيمرض و الشي التاني ديل صحباتي ما بقدر احرجهم ، عليكي الله اسكتي يمة !
**صحباتك كان ما واعيات وعيهم يا بليدة ، اسمعي هنا اسي تمشي تفضي الفوضى وقلة الاداب الحاصله دي !
__اصبري شوية عليك الله قربو يخلصو !
**طيب ما تلوميني في الحعملو ...و ماشة ، قامت سامية قبضتها من يدها ، قالت ليها ..
__اصبري يمة خلاص و مشت عليهم هي !!
**(بتتكلم براها ) لاحول ولاقوة الا بالله حاصل شنو يا سامية كل ماليكي ماشة تتمادي من سيئ لي اسواء يابتي !! .. المهم بعد جدال طويل شديد بين سامية وامها و وعودات من ساميه ان الموضوع دا ما حيتكرر وانها كانت اول مرة واخر مرة .. فات الايام و سامية ما حققت اي وعد من الوعود بالعكس لسه بتتمادى !! و كل يوم في مناقرات بينها وبين امها ، وامها م كانت عندها حيلة ..
لحد مافي يوم ام سامية جات و لقت نفس اللمة ، حقت الودع والامور دي و ما قدرت تتحمل الوضع و اتناقشت مع سامية نقاش حاد في حضور اميرة اللي كان وشها شاحب زي الزول القاعد في تلاجة و دمو مجمد !!
امها قالت ليها :
ياخ اتقي الله في نفسك و في راجلك و في بيتك ،ابدا ما معقول كل يوم والتاني داقة #الظار دا في نص البيت، عايزة ربنا يراضيكي كيف ، و يجبر بخاطرك ؟
اقوليكي حاجة !!!
انا من الليلة حادعي ربنا ليل نهار انك ما تبقي ام. ولا تضوقي ليك يوم سمح ما لم تبطلي القرف البتسوي فيهو دا و تنتبهي لبنت الناس دي ، و اتزكري #دعوة_الام !! انتهى الكلام بي كواريك و جوطة الحريم بي وقوع أميرة المفاجئ ، بس سامية كانت مصدومة اكتر منهم !!
ام اميرة جرت عليها وبقت تحاول تفوق فيها ، وسامية بتقوليها زحي يا يا يمة انا بفوقه ، وقالت لي السُرة صحبتها تجي ترفعا معاها ! لمن دخلوها جوا وام سامية مقلقه و واقفه ليهم جمب الباب ، سمعت وحدة من الحريم و هي بتقول لي سامية ، (في الشهر الكم هي !! ) ، سامية حاولت تسكتا بس ما قدرت ، لانو ام سامية سمعت خلاص !!
**دا كلام شنو يا سامية !!! قصدها شنو في الشهر الكم ؟
__اسمعي يمة ! اميرة حامل !!
**سجمي سجمي سجمي بت الناس ، نبحت معاك قدر شنو انا تخلي بالك من البت دي امانة في رقبتنا ، ووووووب عليك ووووب عليك الليله يا سامية بت الناس ضاعت ، كيفن حامل يا بتي ، والبت دي عرس ما معرساهو ، ياهو دا كلامي ، تمرق اليوم كلو برااااا ، واتي عينك فيها سامية ااااخ يا قلبي...
__يمة !  رووووقي ، انا بقدر احلها يا يمة بس عليك الله اسكتي اسكتي !!!.........*معلق لحين عودة*
انا كملت بي عربيتي ..
بعد قفلته منهم ، مشيت على السوق اللي بالجد لي زمن منه ، يعني لمن كنت بحتاج حاجة كنت بطلبها اون لاين ، و بتوصلني لحد البيت !
نزلتا لفيت كتير عشان اقدر اشتري هديه كويسه لي مُزن بمناسبة عيد ميلادها ، لاني ما مُلمة بي هدايا الاطفال ، دخلت محل فساتين ، شلت ليها تلاته و معاهم ايباد فيهو العاب .. بعد طلعته و ختيت الحاجات دي في صندوق حسيتهم حبة ما بعرف ليه ، و والله م كان قصدي اتفاخر او حاجة بالشكل دا بس دخلت الصايغ شلت ليها سلسلة فراشة كدا وغلفتها و شلت مسكة بلالين و ختيتهم ف العربيه ،و مشيت البيت ، من دخلتي قعدت طوالي في الصالون كنت حاسه بي ارهاق شديد م بعرف ليه !
لسه ما قعدت كويس تلفوني رنّ ، و كان مكتب العمل عن العاملتين الطلبتهم ، عن اني لازم امر عليهم بكرة وجوطة زي دي !!
بعد قفلتا ، جا وليد داخل من باب الشارع قالي :
_سلاااام
*هلا وعليكم السلام (و انا بشيل شنطتي و قايمة )
_بس من تشوفي وشي دا طوالي تشوفي ليك مخرج
*امممم(م رديت عليهو ) .. اديتو ضهري و انا ماشه على السلم ، سمعتو بيقول لي زول تعال اتفضل اتفضل .. اتلفت وراي عفويا بس ، فجأة وقفته !! و بقيت مركزة عايزاهو يرفع راسو ، بي شعرو الاسود الكتير و الدقن .. كنت حأجن ، رجعت نزلت براحه و انا بعاين فيهو ! ومقربة عليهو !! عاينت لي وليد و انا مادة يدي قصاد صحبو ، قلت ليهو : (بي صوت بيرجف ) دا منو يا وليد !!
و من غير ما احس قلت ليهو دا انت !!  و ليد قالي ريم دا شنو البتسوي فيهو دا ؟ و انا مقربة من الولد لمن رفع راسو كان هووّا ، قلت ليهو و انا برجف !! انت بتعرف وليد ! طيب انت عامل لي قلق و بي سببك الناس مفتكراني مجنونة ! ارجوك اشرح لي انت داير مني شنو عشان انا تعبانه و ما قادرة اتحمل نفسي  ، وريني عشان انا بي سببك مشيت لي دكتور نفسي 
( لمن مشت حسب اللافتة و قبلها كانت بتبحث في الايباد عن حاجة ) ! وانا متأكدة اني ما مجنونة ، من فضلك ! انا بترجاك بترجاك ( وقعدت في الأرض على رُكبي )  ما حسألك عن موضوع الرسمة اختفت كيف و اتحولت لي ورقة بيضاء ، بس وريني كيف اتخلص منك و من هوووسك ، من فصلك !!
وليد عصب و مسكني من يدي ، قالي انتي مجنونة ! مجنونة صح ! دا شنو البتعملي فيهو دا ! و انا بقوليهو فكني يا وليد انا تعبته منو ، ما بقدر انوم بيظهر لي طوااالي ، صدقني كرهت اليوم المشيت فيهو النيل با وليد من فضلك هو صحبك حيسمع كلامك خلي يوريك و يحكي ليك هو داير مني شنووو ! لمن تعب مني وليد جراني قعدني في الكنبه و مسكني من حنكي ! و بيهز في وشي بقولي فوقي يا ريم انتي مالك ودا شنو البتقولي فيهو دا !
جرا جاب موية من الجك ، و بقى يرش فيني و انا مصممة على انه هوا دا !!
بقيت بقاوي في وليد ، و بقوليهو زح مني خليني اتكلم معاهو قبل يختفي هو ما بيظهر بالساهل عليك الله يا وليد !!
قالي طيب قومي ، و قاليهو تعال يا احمد ! (الود مخلوع ) قالي اهو قدامك ؟ في شنو فهميني ياريم بتعرفيهو من وين ! ولا لاقيتيهو وين ! لمن رفعت راسي كانت شخصية غير !! ختيت يدي في خشمي ، و قلت ليهو دا م هو لكن نفس ملابسو ! بس ما وشو ، وبقيت بجري و بفتش ، قلت ليهو وين صحبك ال جا معاك قبل شويه يا وليد ، شعرو اسود كتير و عندو دقن !!!
لمن طلعت الشارع وانا بفتش ،، جاني وليد مسكني ! دخلني جوا !! قالي ريم ...ريم ....ردي علي !! رددي علي !! عايني لي ! رفعت عيوني عاينت ليهو ، قالي قولي : لا إله الا الله - قلت ليهو لا اله الا الله سيدنا محمد رسول الله ،قالي : دا احمد صحبي عايني ليهو كويس ، جا من بورتسودان للخرطوم ودي اول مرة يجي معاي البيت ! و ما جا معاي زول تاني دا ياهو زاتو الكنتي بتتكلمي معاهو من شويه ، انحنا اتنين بس ما تلاته ... عاينت ليهو كدا وقلت ليهو : بس الشفتو كان واحد تاني ، كان لابس نفس ملابس احمد دا بس وشو مختلف صدقني والله ياوليد داك كان شعرو اسود وكتير و عندو دقن ولابس نضارة نظر !! (بقيت بعاين للولد بصورة غريبة ) !!
رد لي احمد دا : بتحصل كتير اننا نشبه على ناس و م تنسي بيخلق من الشبه اربعين زي ما بيقولو !!
انا عارفه انه هو حاول يلطف الجو و  يبرر تصرفي بس هو برر بصورة عامة نفس الكلام المستهلك اللي بنسمعو من الناس ، بس الحاصل معاي ابداً ما كدا ، هو زيو زي اي زول ، هو في وادي و انا في وادي تاني !!
كل العملتو اني هزيت ليهو راسي ( كـ تأكيد لي كلامو )، و طلعته غرفتي ، دخلته قعدت في طرف السرير و بقيت سامعه الاذان (الله اكبر .. الله اكبر )
بقيت بفكر في معنى  (الله اكبر ) ! دي بي عمق ، فعلا ان الله اكبر من شعور و من اي وجع ومن اي حاجة في الدنيا دي ! اي انا ما قعد اصلي بس هل عيب اني الجأ ليهو في وقت ضيقي ! رغم اني متعلمة لي اقصى المراحل و عارفة كل حاجة ، بس مع تفكيري اتذكرت قول الله :(  أنا عند ظن عبدي بي، وأنا معه إذا ذكرني..) .. طوالي قلت انا لازم اصلي من قلبي ما عشان ال طيف داك قالي صلي .. و قمته صليت واستغفرت الله كتير كتير شديييييد ، لمن جا وليد خبط و الباب كان فاتح اصلاً ، لقاني قاعدة في السجادة ... قالي :
__ كيفك ؟
*م رديت ....
__ حاصل شنو انا مقلق من قبيل !
*مافي حاجة ، زي ما قال صحبك ، مجرد تشبيه بس وفعلا بيخلق من الشبه اربعين !
__ طيب فرضاً كلامو صح ! دا المنو البيهمك أمره و بتهمك شوفتو وتدخلك في دوامة زي دي ؟!
*......(م رديت)
__ بتحبي انتي !! فات خلاك !!
*امممم ايوه فعلا بحب و فات خلاني !
__ ريم تحب !! والله دي ما بتتصدق
*ريم ما من حقها تعيش اصلا في نظر الناس كلها ! لمن ريم تحب دي تبقى قوية هه
__ ريم فهمتيني غلط !
* لا مافهمت حاجة اصلا انا بتكلم حسب نظرتي ..المهم انزل لي صحبك تحت ، م صح تخليهو براهو !
__ خليكي من صحبي ، ريم انا ما قصدت حاجة بالجد ما صح منك تفسري كلامي بالطريقه دي !
*وليد !! (عاينت ليهو ) انا ما فهمت حاجة ، ريح بالك فضلاً ، و كنت عايزاك تقضي لي مشوار بكرة لو فاضي !!
__ قولي ، افضى ليكي ..
*في مكتب عمل حق عاملتين انا طلبتهم للبيت وامي و عرس رزان و الدوشه دي ، مفروض بكرة امشي اخلص الاجراءات 
و يومي مليان ممكن تمشي بدلي و بمدك بالمعلومات ! حينفع !!
__ غير سودانيات ولا شنو ؟
*ايوة و من مكتب عمل حيكون اضمن و افضل ح ارسل ليك الحاجات واتساب .. وقوم يلا امشي لي صاحبك و خليني انا اجهز طالعه لي مشوار ..
__خلاص تمام ...يلا !
*(ابتسمت ليهو ) .. عشان يعرف اني بخير و في كل الأحوال ما كان حيستوعب الحاصل معاي فا افضل شي اني اجاريهو حسب فهمو !!
بعدها ، وقفت قدام دولابي و اخترت لي طقم كويس كدا و بديت اجهز نفسي لي عيد الميلاد حق مُزن !!
نجي عند وهاد شوية -
امي حاولت تحكي كل البتعرفو ، و قبل تكمل جا طارق قاطعنا .. و ساق امي و طلع قاليها عايزك في موضوع ..
بعد طلعو ، جاني اتصال في الماسنجر من الزولة حقت التوب ، رديت ليها :
**هلااا
__ هلا وهاد ، كيفك ؟
**الحمدلله ..وانتي ؟
—الحمدلله بخير ، اسمعيني يا وهاد ! بصراحه انا مقلقه ، يعني انتي واثقة من امكانياتك في ان التوب دا حيعجبني ؟
**انتي شفتي صور لي شغلي اكيد حتكوني عرفتي امكانياتي ..
__ ما اختلفنا بس انا عشان متعود اختار حاجاتي بي عناية و اسي انا م عارفه حتى الالوان شنو !
**قلت ليكي حددي لي الالوان وانا بشتغل انتي ما قبلتي ، و خليتي الموضوع كلو علي !
__ ما حبيت اقيدك حبيت انك تثبتي نفسك بس ، لانو الموهوب لمن يلقى مساحتو بيبدع عشان كدا ..
**طيب تحبي اصور ليكي الجزء الاشتغلتو ؟
__لالا ، حابه اشوفو بعد ينتهي و على الحقيقيه !
بس عايزاهو بعد بكرة لو ممكن معليش اذا بضغطك بس الاحتياط واجب عشان لو ما عجبني يكون عندي وقت انزل السوق اشتري لي واحد !
**امممم فعلا معاكي حق ، لا ان شاءالله ، بعد بكرة حيكون جاهز بخلص و بديكي تلفون .
__يا الله ، شكراا بجد لتفهمك ..
**ولو .... (اثناء م انا بتكلم ، جا طارق داخل )
قفلته منها بعد خلصته كلامي معاها ... و عاينت لي طارق وكان واقف و بيعاين لي بنظرة غريبة !!
قلت ليهو :
**اقوم اسوي ليك حاجة ؟ داير شي ؟
__لالا داير اتكلم معاكي بس !
**طيب اقعد في الكرسي مالك واقف كدا ! و امي وين مشت !!
__امي برا قاعدة بتجي اسي !
**ايوااا ، طيب اتفضل ...
__بعد تفكير كتير يا وهاد ، انا اخدت قرار ! هو ما فرض عليكي ، بس حسب نظرتي هو مناسب ليكي ..
**خير يا طارق !
__ا نا قررت اتزوج !
**بجد ياسلااااااااام ياخ ، بالجد انا سعيدة ليك شديد فرحتني من جواا قلبي ياخ ، وربنا يتم ليك على خير ! ههه عارف اتحمسته شديد ، اااه اخيراً حتجيني اخت و زوله تونسنا و تفرق علينا ياسلااام !!
__وهاد ...وهاد !!
**اهااا ...
__انا عايز اتزوجك انتي ....!!!!
يتبع
#استكانة
#سحر_سمير