حب منبوذ

١٧

قالت للزول الجا دا يوصلني !
هو زاتو عاين ليها ! و سكت  ( انا قلت في سري هي كيف تخلي راجلها دا يوصلني عادي كدا !!)
قلت ليها لالالا ما بيحتاج خليكم زي م انتو انا بمشي تمام .. قالت لالا انا وعدتك ولازم اوصلك و كفاية والله ونستينا و فرقتي علينا و بسطتيني بالجد يا وهاد والله قدر ما اوصف ليكي سعادتي قدر شنو ما حتتخيليها اتجاوزتي كل توقعاتي الختيتهاا للتوب دا .. ارجوكي اقبلي دي حاجة بسيطه والله في حقك !
قال ليها : اللبسي توبك ارح معانا كلو مشوار عشر دقايق بالعربية ... وطلع قبل ترد مشى على العربية ..
نهلة : خليكي ! اديني التوب دا بمش انا !
امهم : تموتي في لبس التياب لمن تعرسي اللبسي براحتك م تقعدي تتخمخمي لي من اسي !
نهلة : اصبري والله توب نهاد دا بشيلو لي عرسي من اسي ، اصبري بس نمش نوصل وهاد دي واجيكي بدفع ليك 
فيهو عديل ..
قالت ليها : اجي ! وتشيلي حقي ليه ! دي ليها وهاد قدامك خليها تعمل ليك واحد تاني ، اصلا قبيل قالت لي حتشتغل في وحد تاني لكن حق جرتق ، محجوز يا وهاد صح ؟
قلت ليها : لالا دا تصميم كدا في راسي و حابة انفذو مختلف عن المعتاد والاتعودت عليهو الناس !
نهاد : واو اتحمسته اشوفو
نهلة : يلا يلا خالد دا بضرب بوري
قلت ليهم : يلا فرصه سعيدة ! و طلعنا ..
ركبنا العربية ، الوضع عادي جداً ، نهلة بتتونس معاي شوية و بتدردش في تلفونها شويه ، اتبادلنا ارقامنا انا ونهله من واتساب لي فيس ..الخ ،ما كان في حاجة تُذكر ، لحد م وصلنا حلتنا ، انا صممت انزل منهم على الشارع ، بس نهلة صممت يدخلوني لحد جوا قدام البيت .. و فعلا دخلوني لحد البيت و كان طارق واقف قدام خشم الباب ! مع صوت العربية جارتنا فتحت بابها و بقت تتاوق ، لمن سلمت عليهم و نزلته ، اثناء ما هم بياخدو خلف بالعربيه عشان يستعدلو ويطلعو .. جارتنا رمت كم كلمة ، قالت لي : ( عاد اشكالك دي كان ما وصلوها بالعرباات ، الحيوصلوهن منو ، جنى الحرام فعايلو كلها بتكون حرام في حرام ، وراثة والشكية لي الله ) ، في اللحظة دي السايق العربيه (خالد اخو نهلة ) وقف العربية وطلع راسو برا الشباك !
لحد ما طارق رد ليها : بدل تتكلمي و تطاعني زي دا امشي ارفعي بتك من السراير ، انحنا حق الحرام دا عرفنا نربيهو و ماسكنو علينا ، اها الدور والباقي عليكي ... جراني قالي خشي ..خشي ...دخلني وقفل الباب !
(كان في جانب خالد و نهلة )
خالد : فهمتي حاجة ؟
نهلة : لا ابداً ، بس المرة دي كعبه !
خالد : كلامها ما كان طبيعي ولا عادي ..
نهلة :واضح ان في بيناتهم مشاكل
خالد : اعوذ بالله من جار ، ما بيعرف حق الجار ، ربنا يهدي النفوس و يصلح الحال !
نهلة : امين .. دايرة اسألك ممكن !!!؟
خالد : متوقع سؤالك لكن اتفضلي اسألي .
نهلة : ههه كويس طيب ! انا سؤالي بخصوص ريم صراحه !! يعني ! في حاجة بينكم !
خالد : سؤالك تركبيتو غلط و فهمك غلط اكتر من سؤالك ! يا بت ريم دي معرفة مزن بتي ههه اتخيلي بس ما عارف اسوي شنو مع مزن دي تصاحب ساي و ما قادر اتدخل فيها لسه صغيرة !!
نهلة : انت عارف كويس هي ليه طالعه كدا ! لكن ربنا يحفظها بس و يخليها ليك ..
خالد : امين .... و سرح ..!!
طارق : كنتي وين انتي ! و ديل منو ؟؟
وهاد : ما بعرفهم ! (و مشيت )
طارق : اقيفي يا وهاد ! ما بتعرفيهم و راكبه معاهم ليه ؟؟
**سلمتها شغل و صممو يوصلوني!
__اها ان شاءالله عاجبك الفضيحه و كلام الجيران حتى الناس الغرباء سمعو فضايحنا ، وان شاءالله تكوني فهمتي انا داير احميكي من شنو كويس !
**(اتلفت عليهو بي غضب ) اسمع كلامي دا كويس ، انا سكته و سمعته تفاهاتك دي المرة الفاتت ! لكن ااكد ليك لو كلامك دا اتكرر تاني حتشوف وهاد عمرك ما شفتها ، و لعلمك ما انت الحتحميني من الناس ، انا بعرف كويس كيف احافظ على نفسي ، و لعلمك تاني (رفعت ليهو يديني ) انا عندي يدين و عندي رجلين و عندي عيون بتشوف و عندي احساس و عندي كل حاجة ربنا اداني ليها موجودة عندك وعند اي بني ادم طبيعي و من الجمال رزقني البخليني احمدو واشكرو ليل نهار ، يبقى انا ولله الحمد ما ناقصني شي و لا مجردة من حاجة ولا ناقصة حاجة عشان تفكر تعرسني من باب الشفقه لحد م تعرس وحدة تانية على هواااك ، واذا انا ناقصني حاجة في نظرك ، فا اتاكد ح اكون نقطة في بحرك لانك ناقص عقل ومنطق ، و  اوووعااا يا طارق وانا بحذرك انك تنظر لي بي شفقه ولا تعاملني معاملة زي دي مرة تانية، لانه وقتها انا ما حأريحك ، عايز تبقى لي اخ زي ما بعرفك طول عمري اهلا و سهلا داير تبقى على راجل دي حيطة و دي حيطة ودي راسك ،، مفهوم ؟؟؟ ( و مشيت خليتو منطط عيونو)... و بقيت بنادي في امي ..دخلت ليها في البرندة ..قلت لبها اسمعي !! قالت لي اعفي لي !! قلت ليها انا البقوليك اعفي لي و حأعوضك يا امي بأذن الله حأعوضك ...عايني يا امي ..
ممكن تتمي لي قصة سامية !!؟؟
قالت لي حاضر لكن ما اسي ، تعرفي !! طارق جا قبل شوية و قالي انه اتوظف في شركة كبيرة الحمدلله بعد دا ربنا يهديهو علينا بس ..و كمان ما وريتيني قالو ليكي شنو عن التوب ؟
قلت ليها : عجبهم شديد ... و بعد قلت لقيت لي زباين جديدة ، بي سبب سمعتي الظاهر اني خسرتهم و م اظن يتعاملو معاي تاني ، و كلو بي سبب جارتنا الزفته دي ، انا والله يا امي خايفه عليها مني ، ساكته و متحملاها خايفه عليها من غضبي بس بجد انا اكتفيت منها و وصلت الحد !
قالت لي : اسمعي انا غيرت راي من بيعة البيت عشان المرة دي ، وانا بعرف شغلي معاها كويس تصبر لي بس .. اسمعي رايك شنو تمشي تقدمي في الشركة الاشتغل فيها طارق دي ؟؟
قلت ليها : اممم م محظوظة انا يا امي خليني في شغلي دا بس عايزة اوسعو و افكاري كتيرة و حاليا م عندي قروش زاتو محتاجة شوية وقت !! اسي عايزة احاول بكرة امشي احول القروش دي لـ ابو هنا ..
قالت لي : ايوة احسن حاجة نتخارج من هم دينو ..
قلت ليها : كملي باقي القصة ...!!!
اما في جانبي انا -ريم
تلقائياً من غير ما احس ، دوستا فرامل و وقفتا العربية ! قلت لي طه :
*شنو دي التضيع ؟
_اللوحة حقتك الاشتغلناها !
*كيف يعني ! اللوحة معاي انا شلتها اليوم داك !
-اذا شلتيها اذن اللوحة العندي دي شنو ؟؟
*طه انا لمن كنت واقفه جمبك فتحتها وشفتها قبل تلفها لي ! يبقى كيف اللوحة معاك ؟؟؟
_طيب تعاالي اتأكدي بي نفسك ، واضح ان في سوء تفاهم !؟
*(صوتي بدا يرجف) طيب حاضر انا جاية عليك !!
         *عشر دقايق و وصلت عنده في المحل*
**طه كيفك ؟
__الحمدلله ....مالك ؟ عيانه انتي ؟؟
**خليك من عيانه كدي وينا الرسمة !؟
__دقايق طيب !! ...دخل عند مجموعه كبيرة من الرسومات ، اخد وقت كبير وهو بيفتش ليها لدرجة انا اعصابي باظت وقعدته في اقرب كرسي لي و بقيت ماسكة راسي و بعاين ليهو ! قلت ليهو طه ! ما حتلقاها ! اتلفت علي كدا بي استغراب ! رفع يدو و فتحها قالي هي دي ولا ما هي !
قمت ناطة خطفتها منو وبقيت بعاين فيها ! قلت ليهو ! ياها !! طيب طه انا حأجن عندك تفسير لي ! انا شلتها يا طه معاي والله شلتها ممكن تصدقني؟ قالي : انتي معصبة كدا ليه ؟ و ليه عيونك رقرقت كدا و اتوترتي مجرد ما جبت ليك سيرة اللوحة دي !؟
عادي يا استاذة كلنا بننسى و مافيها حاجة ما تدي الموضوع اكبر من حجمه و الحمدلله اللوحة دي ليها ولو لاقدر الله ضاعت منك مستعد ارسم ليها زيها مرة واتنين و عشرة !
قلت ليهو : طه انت ما فاهم حاجة !
__يمنع شنو تفهميني ؟
** انحنا كـ بشر ربك كرمنا بالعقل ما فايت عليك طبعاً و كل انسان مننا عندو منطق في حدود المعقول والحاجة الما تفوق الواقع و في نفس الوقت ما تتخطى عقله ! لانك لو قلت حاجة مافيها جزء من المنطق في الحالة دي حيفتكر اللي قدامك دا انك بتستهين بي عقليته و حيتحول الموضوع لي سُخرية و استتهار ... ودا بالضبط اللي حاصل معاي ، يعني انا عشان احكي ليك لازم تخت عقلك على جمب و تتعامل معاي بـ الا منطق !!
__.....!!!!!!! دقيقة ..دقيقه ! الموضوع دا محتاج ...اااا محتاج قهوة ! انا حأتناولها واجي !!
**دقيقه طه انا حأمشي ..
__اسمعيني ، انا ماعارف انتي وضعك شنو في الحياة دي و بصراحة ما بيهمني ، بس الشايفو فيك عقلك و عشان عقلك كبير يمكن م مفروض انا انصحك بس هي كلمة وحدة حأقولها ليكي يا استاذة *واجهي* !!
**اواجه منو !
__واجهي اي حاجة شايفه انها مسببة ليكي ضغط نفسي ، اتكلمي بي صوت عادي ما تكتمي حاجة و تخليها تدخلك في متاهه ونفسيات لمجرد انه م صح تتقال او عيب او غلط او كلام الناس !! اتعلمي تكوني أنانية في راحة بالك .. ما وريتيني كم معلقة سكر ؟؟
**ماقعد اشرب قهوه .. فا خليهو شاي !
__جداً !..
اما أنا -وهاد
كنت مصممة شديد على امي تكمل لي القصة !
كانت كل مرة تحكيها لي على دفعات ، لأن في احداث هي ما عاشتها ، فا كل الكانت بتعملو انها بتيتحضر تفاصيل و بتنقل لي كلام اتقال من خشم ابوي حسين ... اخدت تنهيدة طويل و كملت :
*احداث1994*
و اها .. سامية قامت قالت لي امها
__يمة !  رووووقي ، انا بقدر احلها يا يمة بس عليك الله اسكتي اسكتي !!!...
**اسكت كيفن يا سامية يا بتي ! دي مصيبة و اهل البلد لو عرفو بعلقوها و يقطعوها عبرة للبنوت ، اتي ..اتي ...كيف استهنتي بي مصيبة زي دي (خبطتا في كتفها ) اتي قتلتي ضميرك دا كيف وريني !
(مشت على اميرة و مسكوها الحريم منها و هي بتكورك وتقوليها ) قومي يا المطلوقة قومي ، الله يكسر عينك ،و يكسر رقبتك زي ما كسرتي رقابنا ، دي القراية الجاية ليها ! دي القراية يا تافهه ، قسم بالله يا اميرة اادبك ادب المدايح ..
__يمة تعالي (جرتها برا الاوضة )
**ياسامية ما ....*قاطعتها*
__يمة اسمعيني ، لو رايدة لي الخير اسمعيني ، شوفي يمة عايني لي ...عايني لي (جدعت التوب وفرقت ليها شعرها ) عايني شعري يمة بقى زي القطن ، عايني لي كويس في وشي دا يمة ! انا صغيرة .. انا صغيرة يا يمه ردي لي ؟؟ اسوي شنووو ان الله ما كتب لي الجنى ! هاه اسوي شنو ؟ حكمتو ما اعترضته الحمدلله ، لكن نفسي ابقى ام ، و دا جنى الله جابو لي لحد عندي!
** وقت اتي بتعرفي الله يا سامية مالك بتعصي فيهو الليل والنهار ! و بعدين اوعااااااااك يا سامية تقولي لي ناوية تشيلي الجنى دا بقتلك فاهمه ولا لا ! الله ما اداك دي قسمتك ترضي بيها لكن ما بتوصل لي حق الحرام ! ولا اتعودتي على الحرام ، قلبك مات و ضميرك مات ، باريتي الودع سكته ، قلبتيها ظار و نسوان وقرف سكتة ، اسي دايرة توصليها لي جنى الحرام !!!!!؟؟؟ هوي يا سامية بقتلك ، و بعدين ، ما تكوني ناوية تكضبي على راجلك المسكين دا و تقولي ليهو انك حامل و توهمي الراجل ؟؟؟؟؟؟؟؟؟
ردددي علي !؟
**يمة !
__ما يمة انجما اتبلعك ما تقولي لي يمة لا امك لا بعرفك لا ربيتك على كدا !! ررررردي لي ! ناوية على شنو ؟؟؟ 
ردددددددي !!
..........
__اها يا استاذة بعد الشاي دا يا ستي بقدر افهمك ، بس قبل اي شي ... قدر ما حاولت اخت ليك عمر غلبني ! و عندي تساؤلات كمية في بالي و ما عارف اذا لي صلاحية اسألك ولا لا؟؟
** اسمي : ريم
عمري :28 سنة تقريباً ( وانا بشيل في اللوحة و شنطة يدي )
__ماشة وين لسه ما اتكلمنا ..؟؟
**ماشة اواجهه نقطة ضعفي زي ما قلت لي !!!!!!
يتبع ......
*في الحلقة الجاية*
لا ما الواجهه دي ، بقصد جهة النيل فوق التله ديك .. المكان مسكوووون ؟؟