حب منبوذ

٦

و كل مرة كانت (حنان ام وهاد) 
بتتزكر مواقف وحاجات فاتت عليها سنين !! بس الزكريات دي كانت سر بينها و بين زوجها عم حسين ، و تقول :
ربنا يرحمك يا حسين ، كل مرة لمن تضيق بي شديد ، بتزكرك و بتزكر كلامك و بتزكر نصايحك ، مافي يوم مر علي و ما اتزكرتك فيهو ، كل ما اعاين في وش وهاد ، كنت بشوف وشك فيها !
كان نفسي اقوليك ان ربنا ودانا اليوم داك للمكان دااك ، لخير يا حسين ، و ربنا يديك قدر الاجر الكنت متمني تاخدو و تتقاسمو معاي ! 
نفسي احكي ليك عن الفقدتو من بعدك ، و عن طارق الما عارفه ليهو درب ، بس والله مسامحاهو لانو حته مني ، دايما كنت بتقول لي سامحي وارضي عشان تعيشي بي قلب سليم و نضيف !و الله يا حسين انا عافيه ليهو وراضية عنه وانا عارفه هو عمل كدا عشاني ، م كان هاين عليهو اشتغل ، بس هو طول الغيبة و انا حنيييييت ...
ااااخ يا دنيا ! يا ربي وينك يا سامية ! حية ولا ميتة !
توبتي من ذنبك ولا لسه !! يا ستار .... 
صدقيني يا وهاد يا بتي ، كنت متمنية لو كنتي اصغر شوية وقتها ، كان حاجات كتيرة اتغيرت ..
**قاطع تفكيرها صوت الباب**
وهاد : السلام عليكم ... مالك قاعده كدا !
-وعليكم السلام ياهو صليت و قعدت قبلي .. كيف كان يومك ؟
**يومي سمح شديد والحمدلله ، و اتخيلي بس 
_احكي لي ..
**خلينا ناكل وبحكي ليكي ، جبت كشري اخدي علاج السكر و اكلي ، عارفه انه غلط عليكي بس مرة وحدة ما بسوي حاجة ان شاءالله ..
_ختي واحكي لي خير ! 
**خير يا ست الكل ، لقيت شغل تاني بس والحمدلله .
_يا بتي شغل شنو تاني لازم تكملي مع الراجل دا عشان تسددي ليهو دينو ولا شنو فهميني !!
**اتكلمته معاهو و اتفقت معاهو ح اسدد ليهو بس من السودان ، اسي اهم حاجة نحاول نطلع جوازاتنا بدل فاقد و نشوف وضع التزاكر ياامي بس محتاجة شوية وقت ، ما تشيلي هم حاجة ابداا ، كله حيتسهل ! 
_ونعم بالله ...
**امي انتي بتسرحي فيني طوالي كدا ليه ! 
_بحب صورة ابوكي الابساها طوالي دي ، يشبهك !
**.............
_سكتي مالك ؟
**يشبهني كيف بس يا امي! اكلي يا غالية الحو بارد و حيبرد !
عارفه يا امي !! مفتقدة طارق شديد ، يعني بتخيل لو كان معانا كان حيتصرف كيف عشانا ، لكن بدعي انه يكون بخير ، والشاغلني اكتر ، انه يكون لقى طريقة اتصال و بيحاول يتصل على ارقامنا السودانيه و ما داخله معاهو ، م قادرة ابطل تفكير !!
_دعاي معاهو و شاحدة ربي انه يحفظو لي و يرجعو لينا بخير و سلام ، انا عارفه انه طول بس وادعاهو للمولى ...
**ونعم بالله ..
(في بيت ريم )
رزان : امي انتي غلطتي ، و غلطتي شديد كمان 
، والموضوع دا لازم يتحل و يتصلح قبل ابوي يجي ، و ما تنسي ابوي حيجي الليله !
امي : اسمعي يا رزان انا ما غلطته ! انا قلت الحق !! و الحاجة دي حق من حقوق احمد ، يمكن اكون غلطته عشان ما كلمت ريم قبل اكلم احمد بس انا ما اجرمته انا حبيت الامور تكون واضحه من البداية و دا عشان مصلحة ريم !!! 
و ابداً ما اتوقعته بعد خمسه سنوات احمد حيتواقح بالطريقه دي و يعمل لينا مشاكل !
رزان : يعني ما عارفه هو عمل كدا ليه ؟؟؟ يعني زول خطب و علاقه انتهت من سنين اشمعنى اسي جا وعمل الدراما دي ؟؟
امي : مش يمكن ما دراما و يكون كلامو صح ، ان في علاقه بيناتهم ! اقنعيني جاب السلسله من وين ؟
رزان : لالا با امي في دي بالغتي عديل والله يا امي ! قبل شويه كنتي بتقولي ريم مستحيل تعمل كدا ، اسي الاتغير شنو ! امي م تنسى ريم تربيتك زي ما انا و وليد تربيتك ، !!
امي : طيب اديني سبب واحد يخلي احمد يعمل كدا ؟ و م تنسي انحنا لحد اللحظة دي ما بنعرف سبب انفصالهم شنو !!
رزان : انتي اديني سبب واحد يخليهو ما يعمل كدا ؟
يا امي ، ريم جمال و قروووووش ! ماف زول حيهتم لي مشاعر ريم و مشاكلها النفسية ، بقدر انه يهتم بي قروشها ! انا من رأي يا امي احمد دا حاول يرجع علاقتو بي ريم ، و لمن رفضتو عمل القصة دي كلها عشان يكسر عينا قدامنا ، والدليل انه زول محدد عرسو ، اها دي ليها تفسير تاني غير كلامي دا ؟؟ 
و كمان ريم زعلانه منك شديد ، هي من غير حاجة حساسة و ما طبيعيه يا امي ، فمابالك كمان بعد عرفت انك اتكلمتي مع احمد و هو كمان م قصر قليل الاخلاق ، شبكها الفي الشارع محلو في الشارع الله ينتقم منو بس !!
امي : كلامك منطقي شديد بس صدقيني ريم لو ليها حق عنده ما حتخليهو انا واثقه فيها رغم الكك الدهل فيني لي لحظات و الله يسامحني بس ، و بالجد زعلني شديد والله ..
اما في الشركة -
يارب تسعد استاذة ريم سعادة ما بعدها سعادة يارب 
يارب توفقها و تصلح المكسور جواها و تجبر بي خاطرها و توفقا يا الله يا كريم .... 
فاطمة : دا كلو عشان ادتنا مكافأة !!!
سارة : اي انحنا بنشتغل عشان القروش بس دا ما معناه اني زولة مادية !!! بس براكي سمعتي كلام وجدان القالتو عنها !! ياخ بالجد البني آدم دا ظالم خلاص ، مفروض ابداً م نحكم على زول لمجرد موقف او تصرف حصل منه او حتى لمجرد انه صاري وشو دايماً ...
وجدان : بالجد انا زي ما فاطمة قالت نفسي تبقى صحبتي ياخ .. اتخيلي قالت لي انا ما بشرب قهوة بس خليها ح اشرب منها لانك جبتيها ، ياخ في جبر خاطر اكتر من كدا ؟؟؟ 
فاطمة : انحنا نسينا حياتنا الشخصية و مسكنا في ريم ، الله يديها العافيه بجد كنت محتاجة لي قروش وجات في وقتها ، الحمدلله يارب ..
وجدان : حتى انا والله محتاجة ادفع قسط الجامعه حق تسابيح اختي ، حمدلله .
ريم بتقول ..
بعد الموقف الحصل من احمد للمرة التانيه ، احساسي بالغربة زاد اكتر ، و دايماً كنت بزعل من نفسي لمن كنت بفكر افكار سلبية تجاه امي واخواني ، لدرجة استسلمت لي كلام الناس في اني ممكن تكون عندي مشكلة نفسية ، بس الاكتشفتو الليله من خلال احمد اني م كنت غلطانه في احساسي ابداً .... لحد ما قاطعتني امي و هي بتخبط و تدخل من باب غرفتي .. و بتقول لي : 
_ممكن نتكلم ؟
**لا رديت لا اتحركته من رقدتي !! 
_(مسكتني من يدي ) انتي بتي البحبها ، انتي سعادتي ! انتي ربنا وهبك لي عشان تسعديني في الدنيا ، في حاجات كتيرة بتحصل لاسباب يا ريم ، ربنا ما بعمل حاجة من فراغ ! فهمتي ؟ 
اما بالنسبه لاحمد او اي واحد كان حيكون مكان احمد يا ريم ، انا من حقي اصارحو واتكلم معاهو ياريم ، الصراحه عمرها ما كانت غلط ، الغلط في انه ندس او نكذب ! الكذب بيهدم ، عمرو ما بنى ليهو سعادة !!!! و لا عمر ليهو بيت !! و مهما طالت مدتو لا بد ان يجي يوم و يتكشف و تبقى بدل المشكلة مشاكل كتيرة شديد !
ياريت تطردي الافكار السلبية دي من بالك ، انا امك و ما ح اقبل ليكي الاهانة او الحاجة الكعبه من اي مخلوق في الدنيا دي ! 
عايني انتي وصلتي وين ! عايني لي قوتك الجواكي عايني لي نجاحك ، ريم انا فخورة بيكي يا بتي شديد ، قومي على حيلك و اخدي حقك من الدنيا و من الناس ، و انا عارفه حقيقة احمد والكلام القالو والغرض منه شنو و انتي انسانة ذكية شديد و اكيد فهمتي غرضه شنو ، و مهما حصل و مهما حيحصل انحنا وراكي و في ضهرك ، و  اعفي لي لاني صارحت الانسان الغلط !! 
.......
كلام امي كان في قمة الركز و الواقعيه وانا عارفه كدا كويس ، وعارفه ان ماف ام بتقبل الاهانة او الضيق لي اولادها .. 
قلت ليها اسمعيني !! انتي امي ؟  ورزان و وليد اخواني ؟ 
قالت لي اكيد يا ريم دا كلام شنو ؟؟؟ 
قلت ليها طيب ليه حاسه اني زي بنت الحرام ؟
(فكت يدي و الغضب ملا وشها ، و وقفت على حيلها) قالت لي : اتجاوزتي حدودك شديد المرة دي يا ريم !! و طلعت خلتني ....
طلعت كالعادة من البيت ، دايماً غضبي بيفوز علي ما قعد اقدر ابكي عشان افرغ غضبي دا بس بطلع و بسوق عربيتي ، محل توقفني بقيف ..
و من جواااي كنت خاته 90% يوم اموت حأموت  في حادث بسبب غضبي والطريقة البفرغ بيها غضبي ، لكن المرة دي غضبي كان اقوى مني وفوق طاقتي ...
بقيت سايقه بس ، حاسه ان نفسي دايرة اكسر الدنيا دي كلها .. ساعة ونص انا لافة في شوارع العاصمة ، لمن بعدت خالص ، و وقفت العربيه في حتة اول مرة اشوفها ، جهة تانية للنيل كنت منوراها بي انوار العربية ، وقفت مشيت على النيل في حتة عالية مقابلة ليهو و بقيت ادنقر و اشيل الحجار و اجدع و اشيل و اجدع في الموية و شوية شوية بقيت بصرخ ، و بكورك ، نفسي ابكي ما قادرة 
تاني رجعت اشيل و اجدع لدرجة شلت التراب و م عارفه انا بعمل في شنو ، حتى جسمي مليتو تراب ،، و فجاة قعدت في الارض ،( و السلسلة في يديني و قافلة عليها شديد) و فجأة سكته !!! 
فجاة جاني صوت راجل خشن واشبه ل انه مجروش كدا او مبحوح م عارفه اشرح ليكم قدر شنو النبرة دي كانت مميزة ، بيقول لي ، ( اعتقد لو صليتي ركعتين كان افضل ) ... 
للحظة حسيتو دا صوتي الجواي وان الصوت دا ما حقيقي !! بس لقيتو اخد نفسووو زي البستنشق ريحة النيل !! 
رفعت راسي ، لقيتو ، زول حقيقي قاعد على بعد مسافة كويسة مني ! عاينت ليهو ، و اتنفضت من قعدتي و جريت على العربية !! 
اتلفت ورااي محل كان قاعد ، مالقيت زول !! 
اتلفتا كتير و برضو ما لقيت زول !! خفته شديد ، ركبته عربيتي ، و انا برجع لي ورااا ، عاينت قدامي و انا بضرب نور ، لقيتو واقف قدام العربية ! 
(شاب طويل ملابسو بيضاء و لابس نضارة نظر ) 
و بيعمل لي بي يدو علامة (باي باي-مع السلامة) وهو مبتسم .. 
فجاة بقيت بصرخ و ختيت يدي في عيوني ، مسافه ، لمن حسيت على نفسي ، فتحت عيوني م لقيت شي ولا كان واقف ... دورت العربية عشان اكسر شمال ، اتلفت لقيتو جمب شباكي بي نفس الابتسامة ! وكان قريب شديد !!
*في الحلقة الجاية*
هي عارفه حقيقتا ، انحنا ما دسينا منها شي 
عشان تنصدم ، الصدمة دي ! 
يتبع ....
#استككانةة
💙
...
 ... توقعاتكم  شنو للاحداث الجاية ؟؟ 
و للناس الما قرو المقدمة ، فضلاً ارجعو اقروها حتلقو اجوبة على جزء من اسألتكم +بحبكم و بحب وجودكم و بحب دعمكم 
#سحر_سمير